അട്ടപ്പാടിയിലെ ഓൺ ലൈൻ പഠന സൗകര്യമില്ലാത്ത മുഴുവൻ ഊരുകളിലേക്കും ജില്ലാ പഞ്ചായത്ത്  ടി.വി ലഭ്യമാക്കുമെന്ന് ജില്ല പഞ്ചായത്ത് പ്രസിഡൻ്റ് അഡ്വ.കെ.ശാന്തകുമാരി അറിയിച്ചു. അട്ടപ്പാടിയിലെ 69 ഊരുകളിലായി 650 ഓളം വരുന്ന കുട്ടികൾക്കാണ് ഓൺ ലൈൻ പഠന സൗകര്യം ഇല്ലായെന്ന്  കണ്ടെത്തിയത്.  ഇതിനു പുറമെ ഓൺലൈൻ പഠന സൗകര്യം ഇല്ലാത്ത
മറ്റു പ്രദേശങ്ങളിലെ  കുട്ടികൾക്കും  ടി.വി ലഭ്യമാക്കും. ഇതിനായി  ജില്ലാ പഞ്ചായത്ത്‌ ഓൺ ഫണ്ടിൽ നിന്നും  10 ലക്ഷം രൂപ ചിലവഴിക്കുമെന്നും ജില്ല പഞ്ചായത്ത്  പ്രസിഡന്റ്‌  അറിയിച്ചു.
 

ഓണ്‍ലൈന്‍ പഠന സൗകര്യം ലഭ്യമല്ലാത്ത ഒരു കുട്ടിപോലും ജില്ലയില്‍ ഇല്ലെന്ന് ഉറപ്പാക്കുക എന്ന ലക്ഷ്യത്തോടെ പൊതുവിദ്യാഭ്യാസ സംരക്ഷണ സമിതിയുടെ നേതൃത്വത്തില്‍ ആരംഭിച്ച ഇ-ക്ലാസ് ചലഞ്ചില്‍ സഹായ പ്രവാഹം തുടരുന്നു. വീടുകളില്‍ ടിവിയോ സ്മാര്‍ട്ട് ഫോണോ ഇല്ലാത്ത വിദ്യാര്‍ഥികള്‍ക്ക് ആവശ്യമായ സൗകര്യം ഒരുക്കുന്നതിനായി വിദ്യാര്‍ഥി, യുവജന സംഘടനകള്‍, സന്നദ്ധ സംഘടനകള്‍, വ്യക്തികള്‍, സ്ഥാപനങ്ങള്‍ എന്നിവയുടെ നേതൃത്വത്തില്‍ സഹായം തുടരുകയാണ്. ചലഞ്ചിന്റെ ഭാഗമായി വ്യാഴാഴ്ചയും ടിവി സെറ്റുകള്‍ വിതരണം ചെയ്തു.

കൊലുമ്പനും ഇടുക്കിയും ശങ്കരാടിയും മുതല്‍ മമ്മൂക്കയും ലാലേട്ടനും തങ്കുപ്പൂച്ചയും വരെ.... പറഞ്ഞ് വരുന്നത് കൊറോണ ബോധവല്‍ക്കരണത്തിനായി തൊടുപുഴയില്‍ വിരിഞ്ഞ കാര്‍ട്ടൂണ്‍ വസന്തത്തെക്കുറിച്ചാണ്. കേരളാ കാര്‍ട്ടൂണ്‍ അക്കാഡമിയും കേരളാ സാമൂഹ്യ സുരക്ഷാ മിഷനും ചേര്‍ന്നാണ് വ്യത്യസ്ഥതയാര്‍ന്ന കൊറോണ ബോധവല്‍ക്കരണം സംഘടിപ്പിച്ചത്. തൊടുപുഴ ഗാന്ധിസ്‌ക്വയറിന് സമീപം പൊതുമരാമത്ത് വകുപ്പിന്റെ ചുവരിലാണ് 12 കാര്‍ട്ടൂണ്‍ ചിത്രങ്ങള്‍ പൂര്‍ത്തിയാക്കിയത്.

ജില്ലയിൽ നിന്നും 1377 അതിഥി തൊഴിലാളികൾ ഇന്ന് (ജൂൺ 5) പുലർച്ചെ രണ്ടിന് പാലക്കാട് ജംഗ്ഷൻ റെയിൽവേ സ്റ്റേഷനിൽ നിന്നും വെസ്റ്റ് ബംഗാളിലേക്ക് മടങ്ങി. പാലക്കാട്, മണ്ണാർക്കാട് , ഒറ്റപ്പാലം,  പട്ടാമ്പി താലൂക്കുകളിൽ നിന്നുള്ള അതിഥി തൊഴിലാളികളാണ് നാട്ടിലേക്ക് തിരിച്ചത്. 

 ഇതര സംസ്ഥാനങ്ങളിൽ  നിന്ന് വാളയാർ ചെക്പോസ്റ്റ് വഴി ഇന്നലെ   ( ജൂൺ അഞ്ചിന് രാവിലെ 6 മുതൽ ജൂൺ ആറിന് രാവിലെ 6 വരെ) 1494 പേർ  കേരളത്തിൽ എത്തിയതായി സ്പെഷ്യൽ ബ്രാഞ്ച് ഡി.വൈ.എസ്.പി ആർ. മനോജ് കുമാർ അറിയിച്ചു. 896 പുരുഷൻമാരും 391 സ്ത്രീകളും 207
കുട്ടികളുമുൾപ്പെടെയുള്ളവർ 563 വാഹനങ്ങളിലായാണ് കേരളത്തിലേക്ക് എത്തിയത്. 415 കാറുകൾ, 62 ഇരുചക്രവാഹനങ്ങൾ,27 ട്രാവലറുകൾ,52 മിനി ബസുകൾ, 7 ഓട്ടോറിക്ഷകൾ എന്നിവയാണ് അതിർത്തി കടന്ന് കേരളത്തിലെത്തിയത്.

ഇടുക്കി ജില്ലയില്‍ നിന്നും ഇന്നലെ  ( 3ന് ) ഉത്തര്‍പ്രദേശിലേയ്ക്ക് 46 ഉം ഒഡീഷയിലേയ്ക്ക് 180 ഓളം അതിഥി തൊഴിലാളികളും മടങ്ങി. സ്വദേശത്തേക്ക് മടങ്ങാന്‍ പാസെടുത്ത് തയ്യാറെടുത്തിരുന്ന അതിഥി തൊഴിലാളികളെ  അതത് സ്ഥലങ്ങളില്‍ നിന്നും കെ എസ് ആര്‍ ടി സി ബസുകളില്‍ ആലുവ, എറണാകുളം റെയില്‍വേ സ്റ്റേഷനുകളിലെത്തിച്ചു. മടങ്ങിപ്പോകുന്നവര്‍ക്ക് യാത്രാവേളയില്‍ കഴിക്കാന്‍ ഭക്ഷണ കിറ്റുകള്‍  ജില്ലാ ഭരണകൂടം ലഭ്യമാക്കിയിരുന്നു. ഇന്ന് (ജൂണ്‍ 4) 400 അതിഥി തൊഴിലാളികള്‍ ജാര്‍ഖണ്ഡിലേയ്ക്ക് മടങ്ങും.

ജില്ലയിൽ കോവിഡ് 19 ബാധിച്ച് ചികിത്സയിൽ ഉണ്ടായിരുന്ന 17 പേർ ഇന്ന്(ജൂൺ അഞ്ച്) രോഗമുക്തരായി ആശുപത്രി വിട്ടു.മാങ്ങോട് മെഡിക്കൽ കോളേജിൽ ചികിത്സ ലായിരുന്ന 49 പേരിൽ 17 പേരാണ് വീടുകളിലേക്ക് മടങ്ങിയത്.
ഇവരുടെ പരിശോധനാഫലം തുടർച്ചയായി രണ്ടു തവണ നെഗറ്റീവ് ആയതിനെ തുടർന്നാണ്  ആശുപത്രിയിൽനിന്ന്  വിട്ടയക്കുന്നത്. ഇതോടെ പാലക്കാട് ജില്ലയിൽ ചികിത്സയിലുള്ള വരുടെ എണ്ണം 164 ആയി.
വിട്ടയച്ചവരുടെ വിവരങ്ങൾ ഉൾപ്പെടെയുള്ളവ ലഭ്യമാക്കുന്നതിന് അനുസരിച്ച് നൽകുന്നതാണ്.

 ഇടുക്കി ജില്ലയില്‍ കണ്ടെയ്ന്‍മെന്റ്‌സോണില്‍ (ഹോട്ട്‌സ്‌പോട്ട്) ഉള്‍പ്പെട്ടിരുന്ന വണ്ടന്‍മേട്, കരുണാപുരം ഗ്രാമപഞ്ചായത്തുകളിലെ വാര്‍ഡുകളെ കണ്ടെയ്ന്‍മെന്റ് സോണില്‍ നിന്നും ഒഴിവാക്കി. ഈ വാര്‍ഡുകളില്‍ നിലവിലുണ്ടായിരുന്ന കര്‍ശന നിയന്ത്രണങ്ങള്‍ പിന്‍വലിച്ചിട്ടുണ്ട്.  എന്നാല്‍ പൊതുവായ നിയന്ത്രണങ്ങള്‍ തുടരും.
 ഉടുമ്പന്‍ചോല ഗ്രാമപഞ്ചായത്തിലെ 8, 11, 12 വാര്‍ഡുകളില്‍ ഹോട്ട്‌സ്‌പോട്ട് നിയന്ത്രണങ്ങള്‍ തുടരുന്നതാണ്.

ലോക്ക് ഡൗണിനെ തുടർന്ന് ഇന്ന് (ജൂൺ 5)  രാത്രി 7.30 വരെ ജില്ലയിൽ പോലീസ് നടത്തിയ പരിശോധനയിൽ 11 കേസുകൾ രജിസ്റ്റർ ചെയ്തതായി സ്പെഷൽ ബ്രാഞ്ച് ഡി.വൈ.എസ്.പി  ആർ. മനോജ് കുമാർ അറിയിച്ചു. ഇത്രയും കേസുകളിലായി 19 പേരെ അറസ്റ്റ് ചെയ്തു. 2 വാഹനങ്ങൾ പിടിച്ചെടുത്തു.   
ലോക്ക് ഡൗൺ നിർദ്ദേശങ്ങൾ  പാലിക്കാത്തതിനെ തുടർന്നാണ് കേസ് രജിസ്റ്റർ ചെയ്തത്.

 മാസ്ക് ധരിക്കാത്ത 55 പേർക്കെതിരെ കേസ് 

മാസ്ക് ധരിക്കാതെ പൊതുസ്ഥലങ്ങളിൽ ഇറങ്ങിയ 55 പേർക്കെതിരെ പോലീസ് കേസെടുത്തു.  മാസ്ക് ധരിക്കേണ്ടതിന്റെ   ആവശ്യകത പറഞ്ഞതിനു ശേഷം കോടതിയിൽ പിഴ അടയ്ക്കാൻ നോട്ടീസ് നൽകി വിട്ടയച്ചു.

തരൂർ മണ്ഡലത്തിലെ വിവിധ പഞ്ചായത്തുകളിൽ ഇന്ന് (ജൂൺ 6) മന്ത്രി എ.കെ ബാലൻ 18 ടെലിവിഷനുകൾ വിതരണം ചെയ്യും. നിലവിൽ സ്കൂളുകൾ തുറക്കാനാവാത്ത സാഹചര്യത്തിൽ  പൊതുവിദ്യാഭ്യാസ വകുപ്പ് വിക്ടേഴ്സ് ചാനൽ വഴി തുടങ്ങിയ ഓൺലൈൻ ക്ലാസുകൾ മണ്ഡലത്തിലെ സൗകര്യമില്ലാത്ത  വിദ്യാർഥികൾക്ക്  ലഭ്യമാക്കാൻ വേണ്ടിയാണ് ടെലിവിഷനുകൾ വിതരണം ചെയ്യുന്നത്. പട്ടികജാതി, പട്ടികവർഗം,  മറ്റ് ജനറൽ വിഭാഗം ഉൾപ്പെടെയുള്ള 250 ഓളം  വിദ്യാർത്ഥികൾക്ക് ഇത്  ഉപകാരപ്രദമാകും.