രണ്ടര മാസത്തെ അടച്ചിടലിനുശേഷം ഗുരുവായൂർ ക്ഷേത്രത്തിൽ ഇന്നു (ജൂൺ 9) മുതൽ ദർശന സൗകര്യം ഏർപ്പെടുത്തി. ചൊവ്വാഴ്ച 310 പേർക്കാണ് ക്ഷേത്ര ദർശനത്തിന് അനുമതിയുള്ളത്. ലോക്ക് ഡൌൺ ഇളവുകൾ പ്രഖ്യാപിച്ച സാഹചര്യത്തിലാണ് ഗുരുവായൂർ ക്ഷേത്രം ഭക്തർക്ക് ദർശനത്തിനായി വെർച്വൽ ക്യൂ സംവിധാനം ഏർപ്പെടുത്തിയത്. രാവിലെ 9.30 മുതൽ ഉച്ചയ്ക്ക് ഒന്നര വരെയാണ് ദർശന സമയം. ടോക്കൺ നമ്പറിനോടൊപ്പം തിരിച്ചറിയൽ കാർഡുമായി അനുവദിക്കപ്പെട്ട സമയത്തിന് 20 മിനിറ്റ് മുൻപ് കിഴക്കേനടയിലെ ക്യു കോംപ്ലക്‌സിൽ റിപ്പോർട്ട് ചെയ്യണം.

ഗവ. മെഡിക്കൽ കോളേജിൽ പനി ക്ലിനിക്ക് പ്രവർത്തനം തുടങ്ങി. ജനറൽ മെഡിസിൻ വിഭാഗത്തിന് കീഴിലാണ് തിങ്കളാഴ്ച മുതൽ പനിയ്ക്കായി പ്രത്യേക ക്ലിനിക്ക് തുടങ്ങിയത്. പകർച്ച പനികളുണ്ടെങ്കിൽ മറ്റു രോഗികൾക്ക് പകരാതിരിക്കാനാണ് ക്ലിനിക്ക് തുടങ്ങിയത്. പനി ബാധിതർ ഇനി മുതൽ ഈ ക്ലിനിക്കിൽ നേരിട്ട് എത്തിയാൽ മതിയാകും. ലാബ് പരിശോധനകളും ഇവിടെ നിന്ന് തന്നെ ചെയ്തു നൽകും. തിങ്കളാഴ്ച പത്ത് രോഗികൾ മാത്രമാണ് പനി ബാധിച്ച് ചികിത്സക്കെത്തിയത്.

കെ.യു.ജനീഷ് കുമാര്‍ എംഎല്‍എയുടെ ടിവി ചലഞ്ചിന് മികച്ച പ്രതികരണം. നിരവധി ആളുകള്‍ ചലഞ്ചിന്റെ ഭാഗമായി ടെലിവിഷന്‍ എത്തിച്ചു നല്‍കി. തിരുവനന്തപുരം സെന്‍ട്രല്‍ എന്‍ജിനിയറിംഗ് കോളജിലെ വിദ്യാര്‍ഥികളും, പൂര്‍വ വിദ്യാര്‍ഥികളും സംയുക്തമായി 10 ടെലിവിഷന്‍ നല്‍കുമെന്ന് അറിയിച്ചു. കോന്നി ടൗണിലെ സ്ഥാപന ഉടമകള്‍, വ്യക്തികള്‍, ജീവനക്കാര്‍ തുടങ്ങിയവരില്‍ ചിലര്‍ ഇതിനോടകം തന്നെ ടിവി എത്തിച്ചു നല്‍കി. അനേകം ആളുകള്‍ ടെലഫോണിലൂടെ സഹായ വാഗ്ദാനം നല്‍കിയിട്ടുണ്ട്.  ടിവി ഇല്ലാത്ത മുഴുവന്‍ കുട്ടികള്‍ക്കും ചലഞ്ചിന്റെ ഭാഗമായി ടിവി എത്തിക്കാന്‍ കഴിയുമെന്ന് എംഎല്‍എ പറഞ്ഞു.

ടിവി ചലഞ്ചിന്റെ ഭാഗമായി ടെലിവിഷന്‍ എത്തിക്കാന്‍ ശ്രമിക്കുമ്പോഴാണ് സായിപ്പിന്‍ കുഴി കോളനിയിലും, ചിപ്പന്‍ കുഴി കോളനിയിലും വൈദ്യുതി ഇല്ലാത്ത വീടുകളുടെ പ്രശ്നം ഉയര്‍ന്നു വരുന്നത്. ആന തകര്‍ത്തതിനെ തുടര്‍ന്ന് പുതിയ കുടിലുകള്‍ വച്ചവര്‍ക്കും, വൈദ്യുതി വിശ്ചേദിച്ചതിനെ തുടര്‍ന്ന് കാലക്രമത്തില്‍ വയറിംഗ് കൂടി നഷ്ടപ്പെട്ടവര്‍ക്കും ആണ് വൈദ്യുതി ഇല്ലാതിരുന്നത്.

സീതത്തോട് പഞ്ചായത്തിലെ മൂഴിയാര്‍ സായിപ്പിന്‍കുഴി പട്ടികവര്‍ഗ കോളനിയിലെ കുട്ടികള്‍ക്ക് മുന്‍പില്‍ ഫസ്റ്റ് ബെല്‍ മുഴക്കി കെ.യു. ജനീഷ് കുമാര്‍ എംഎല്‍എയുടെ ടിവി ചലഞ്ചിന് തുടക്കമായി. കോന്നി നിയോജക മണ്ഡലത്തിലെ ഓണ്‍ലൈന്‍ പഠന സൗകര്യമില്ലാത്ത മുഴുവന്‍ കുട്ടികള്‍ക്കും വ്യക്തികളുടെയും, രാഷ്ട്രീയ-സാമൂഹ്യ സംഘടനകളുടെയും സഹായത്തോടെ ടിവി എത്തിച്ചു നല്‍കുന്ന പദ്ധതിയാണ് ടിവി ചലഞ്ച്. സായിപ്പിന്‍ കുഴി കോളനിയിലെ രഘു-ഓമന ദമ്പതികളുടെ മൂന്ന് മക്കള്‍ക്ക് പഠനസൗകര്യമൊരുക്കി ടിവി കൈമാറിക്കൊണ്ടാണ് എംഎല്‍എ ടിവി ചലഞ്ചിന്റെ ഉദ്ഘാടനം നിര്‍വഹിച്ചത്. ഡിടിഎച്ച് കണക്ഷനോടുകൂടിയാണ് ടിവി നല്‍കിയത്.

ആറന്മുള കണ്ണാടി സത്യമായ നേര്‍ക്കാഴ്ച ഫെയ്‌സ്ബുക്ക് കൂട്ടായ്മ 500 മാസ്‌ക്കുകള്‍ ജില്ലാ ഭരണകൂടത്തിന് കൈമാറി. മാസ്‌ക്കുകള്‍ ഗ്രൂപ്പ് മോഡറേറ്ററായ ജി.ജെയ്‌സണില്‍  നിന്ന് ജില്ലാ കളക്ടര്‍ പി.ബി നൂഹ് ഏറ്റുവാങ്ങി. മോഡറേറ്ററായ സന്തോഷ് കുമാര്‍ പങ്കെടുത്തു.

ഓണ്‍ലൈന്‍ ക്ലാസുകള്‍ തുടങ്ങിയ സാഹചര്യത്തില്‍ ജില്ലയിലെ നിര്‍ധന വിദ്യാര്‍ഥികള്‍ക്ക് പഠനത്തിനു സഹായകമായി ടെലിവിഷനുകള്‍ കൈമാറി. ഇരവിപേരൂര്‍ സെന്റ് ജോണ്‍സ് ഹൈസ്‌കൂളിലെ 2000-2001 ബാച്ചിലെ പൂര്‍വ വിദ്യാര്‍ഥികളും അധ്യാപികയും ചേര്‍ന്നാണ് ടി.വികള്‍ ജില്ലാ കളക്ടര്‍ പി.ബി നൂഹിന് കൈമാറിയത്. 35 ഇഞ്ചിന്റെ മൂന്ന് എല്‍.ഇ.ഡി ടി.വികളാണു നല്‍കിയത്. അധ്യാപികയായ മോളി ചെറിയാന്‍, പൂര്‍വ വിദ്യാര്‍ഥികളായ എം.എസ് ജിനേഷ്, നീതു മേരി, ആര്‍.എസ് മിഥുന്‍, ഫെബി പാപ്പച്ചന്‍, ഹണി സി തോമസ് എന്നിവര്‍ ചേര്‍ന്നാണ് ടി.വി കൈമാറിയത്.