സീതത്തോട് പഞ്ചായത്തിലെ മൂഴിയാര്‍ സായിപ്പിന്‍കുഴി പട്ടികവര്‍ഗ കോളനിയിലെ കുട്ടികള്‍ക്ക് മുന്‍പില്‍ ഫസ്റ്റ് ബെല്‍ മുഴക്കി കെ.യു. ജനീഷ് കുമാര്‍ എംഎല്‍എയുടെ ടിവി ചലഞ്ചിന് തുടക്കമായി. കോന്നി നിയോജക മണ്ഡലത്തിലെ ഓണ്‍ലൈന്‍ പഠന സൗകര്യമില്ലാത്ത മുഴുവന്‍ കുട്ടികള്‍ക്കും വ്യക്തികളുടെയും, രാഷ്ട്രീയ-സാമൂഹ്യ സംഘടനകളുടെയും സഹായത്തോടെ ടിവി എത്തിച്ചു നല്‍കുന്ന പദ്ധതിയാണ് ടിവി ചലഞ്ച്. സായിപ്പിന്‍ കുഴി കോളനിയിലെ രഘു-ഓമന ദമ്പതികളുടെ മൂന്ന് മക്കള്‍ക്ക് പഠനസൗകര്യമൊരുക്കി ടിവി കൈമാറിക്കൊണ്ടാണ് എംഎല്‍എ ടിവി ചലഞ്ചിന്റെ ഉദ്ഘാടനം നിര്‍വഹിച്ചത്. ഡിടിഎച്ച് കണക്ഷനോടുകൂടിയാണ് ടിവി നല്‍കിയത്.

ആറന്മുള കണ്ണാടി സത്യമായ നേര്‍ക്കാഴ്ച ഫെയ്‌സ്ബുക്ക് കൂട്ടായ്മ 500 മാസ്‌ക്കുകള്‍ ജില്ലാ ഭരണകൂടത്തിന് കൈമാറി. മാസ്‌ക്കുകള്‍ ഗ്രൂപ്പ് മോഡറേറ്ററായ ജി.ജെയ്‌സണില്‍  നിന്ന് ജില്ലാ കളക്ടര്‍ പി.ബി നൂഹ് ഏറ്റുവാങ്ങി. മോഡറേറ്ററായ സന്തോഷ് കുമാര്‍ പങ്കെടുത്തു.

ഓണ്‍ലൈന്‍ ക്ലാസുകള്‍ തുടങ്ങിയ സാഹചര്യത്തില്‍ ജില്ലയിലെ നിര്‍ധന വിദ്യാര്‍ഥികള്‍ക്ക് പഠനത്തിനു സഹായകമായി ടെലിവിഷനുകള്‍ കൈമാറി. ഇരവിപേരൂര്‍ സെന്റ് ജോണ്‍സ് ഹൈസ്‌കൂളിലെ 2000-2001 ബാച്ചിലെ പൂര്‍വ വിദ്യാര്‍ഥികളും അധ്യാപികയും ചേര്‍ന്നാണ് ടി.വികള്‍ ജില്ലാ കളക്ടര്‍ പി.ബി നൂഹിന് കൈമാറിയത്. 35 ഇഞ്ചിന്റെ മൂന്ന് എല്‍.ഇ.ഡി ടി.വികളാണു നല്‍കിയത്. അധ്യാപികയായ മോളി ചെറിയാന്‍, പൂര്‍വ വിദ്യാര്‍ഥികളായ എം.എസ് ജിനേഷ്, നീതു മേരി, ആര്‍.എസ് മിഥുന്‍, ഫെബി പാപ്പച്ചന്‍, ഹണി സി തോമസ് എന്നിവര്‍ ചേര്‍ന്നാണ് ടി.വി കൈമാറിയത്.

ലോക്ഡൗണിനെ തുടര്‍ന്ന് ഇതര സംസ്ഥാനങ്ങളില്‍ അകപ്പെട്ടു പോയ മലയാളികള്‍ക്ക് കേരളത്തിലേക്ക് മടങ്ങി വരുന്നതിനും ഇവിടെ നിന്നും മറ്റ് സംസ്ഥാനങ്ങളിലേക്ക് പോകുന്നതിനും സര്‍ക്കാര്‍ പുതിയ നിര്‍ദേശങ്ങള്‍ പുറത്തിറക്കി.

പത്തനംതിട്ട ജില്ലയില്‍ ഇന്ന് (8) മൂന്നു കോവിഡ്-19 കേസുകള്‍ സ്ഥിരീകരിച്ചു. 1)മേയ് 30ന് ഷാര്‍ജയില്‍ നിന്നും എത്തിയ കടപ്ര, പരുമല സ്വദേശിനിയായ 50 വയസുകാരി. 2)മേയ് 28ന് കുവൈറ്റില്‍ നിന്നും എത്തിയ പന്തളം സ്വദേശിയായ 43 വയസുകാരന്‍. 3) മേയ് 27ന് അബുദാബിയില്‍ നിന്നും എത്തിയ ഇരവിപേരൂര്‍ സ്വദേശിയായ 52 വയലുകാരന്‍ എന്നിവര്‍ക്കാണ് ഇന്ന് (8) രോഗം സ്ഥിരീകരിച്ചത്.

ഒന്‍പത് വിമാനങ്ങളിലായി ശനി (ജൂണ്‍ 6), ഞായര്‍ (ജൂണ്‍ 7) ദിവസങ്ങളിലായി പത്തനംതിട്ട ജില്ലക്കാരായ 32 പ്രവാസികള്‍ കൂടി എത്തി. ഇവരില്‍ 12 പേരെ കോവിഡ് കെയര്‍ സെന്ററുകളിലും 20 പേര്‍ വീടുകളിലും നിരീക്ഷണത്തില്‍ കഴിയുന്നു.

ഇതര സംസ്ഥാനങ്ങളില്‍ നിന്ന് രണ്ടു സ്‌പെഷ്യല്‍ ട്രെയിനുകളിലായി ഞായറാഴ്ച്ച (ജൂണ്‍ 7 ) 40 പത്തനംതിട്ട  ജില്ലക്കാര്‍കൂടി എത്തി. ഇവരില്‍ ഒരാളെ കോവിഡ് കെയര്‍ സെന്ററിലും 39 പേര്‍ വീടുകളിലും നിരീക്ഷണത്തില്‍ പ്രവേശിച്ചു.

ഞായറാഴ്ച്ച രാവിലെ 10.20ന് നിസാമുദ്ദീന്‍ - എറണാകുളം സ്‌പെഷ്യല്‍ ട്രെയിനിന്‍ എറണാകുളം റെയില്‍വേ സ്റ്റേഷനിലെത്തി. പത്തനംതിട്ട ജില്ലക്കാരായ എട്ടു സ്ത്രീകളും ഏഴു പുരുഷന്‍ന്മാരും ഉള്‍പ്പെടെ 15 പേരാണ് അവിടെ ഇറങ്ങിയത്. ഇവരെ രണ്ടു കെ.എസ്.ആര്‍.ടി.സി ബസുകളിലായി രാവിലെ  പത്തനംതിട്ട ഇടത്താവളത്തിലെത്തിച്ചു. ഇവര്‍ 15 പേരും വീടുകളില്‍ എത്തി നിരീക്ഷണത്തില്‍ കഴിയുകയാണ്.