ഐതീഹ്യപ്പെരുമ കൊണ്ടും പ്രകൃതി സൗന്ദര്യം കൊണ്ടും സമ്പന്നമായ  തെക്കുമ്പാട് ദ്വീപ് കേരളത്തിന്റെ ടൂറിസം ഭൂപടത്തില്‍ ഇടം നേടാന്‍ ഒരുങ്ങുന്നു. മലനാട് റിവര്‍ ക്രൂയിസ് ടൂറിസം പദ്ധതിയുടെ ഭാഗമായാണ് തെക്കുമ്പാട് ടൂറിസം പദ്ധതി നടപ്പാക്കുന്നത്.  പ്രവൃത്തി ഉദ്ഘാടനം തെക്കുമ്പാട് കൂലോം  പരിസരത്ത് ടി വി രാജേഷ് എംഎല്‍എ നിര്‍വഹിച്ചു.  

കേരള ബീഡി-ചുരുട്ട് തൊഴിലാളി ക്ഷേമനിധി ബോര്‍ഡില്‍ നിന്ന് പെന്‍ഷന്‍ ലഭിക്കുന്ന നാളിതുവരെ പെന്‍ഷന്‍ മസ്റ്ററിങ് നടത്താത്ത അര്‍ഹതയുളള ഗുണഭോക്താള്‍ ജൂണ്‍ 29 മുതല്‍ ജൂലൈ 15 വരെ അക്ഷയ കേന്ദ്രങ്ങള്‍ മുഖേന മസ്റ്ററിംഗ് നടത്തണം. ഇത്തരത്തിലുളള ബയോമെട്രിക് മസ്റ്ററിങ് പരാജയപ്പെടുന്നവര്‍ അക്ഷയകേന്ദ്രത്തില്‍ നിന്ന് ലഭിക്കുന്ന മസ്റ്ററിങ് പരാജയ സര്‍ട്ടിഫിക്കറ്റുമായി ജൂലൈ 22 നകം ലൈഫ് സര്‍ട്ടിഫിക്കറ്റ് ക്ഷേമനിധി ബോര്‍ഡില്‍ സമര്‍പ്പിച്ച് മസ്റ്ററിങ് പൂര്‍ത്തിയാക്കണമെന്ന് ചീഫ് എക്സിക്യൂട്ടീവ് ഓഫീസര്‍ അറിയിച്ചു. ഫോണ്‍ : 0497-2706133.
 

സംസ്ഥാന സിവില്‍ സര്‍വീസ് അക്കാദമിയുടെ പാലക്കാട് ഉപകേന്ദ്രമായ ഗവ. വിക്ടോറിയ കോളേജില്‍ സിവില്‍ സര്‍വീസ് പരിശീലനത്തിന് ഓണ്‍ലൈനായി അപേക്ഷിക്കാം. ഡിഗ്രി/പി.ജി. കഴിഞ്ഞവര്‍ക്കാണ് അവസരം. റെഗുലര്‍, വീക്കെന്‍ഡ് ബാച്ചുകളാണുണ്ടാവുക. പ്രവേശന പരീക്ഷ ജൂലൈ 11 ന് രാവിലെ മുതല്‍ ഉച്ചയ്ക്ക് ഒന്ന് വരെ നടക്കും. താത്പര്യമുളളവര്‍ www.ccek.org ല്‍ ജൂലൈ എട്ടിനകം രജിസ്റ്റര്‍ ചെയ്യണം. ഫോണ്‍ : 0491-2576100, 8281098869

സംസ്ഥാന സര്‍വ്വീസില്‍ പോലീസ് വകുപ്പില്‍ അട്ടപ്പാടി ബ്ലോക്ക് പ്രദേശത്തെ വനാന്തരങ്ങളിലേയും വനാതിര്‍ത്തികളിലേയും സെറ്റില്‍മെന്റ് കോളനി നിവാസികളായ പട്ടികവര്‍ഗ വിഭാഗം  ഉദ്യോഗാര്‍ഥികള്‍ക്ക് വനിതാ പോലീസ് കോണ്‍സ്റ്റബിള്‍ (കാറ്റഗറി നമ്പര്‍ : 008/2020), പോലീസ് കോണ്‍സ്റ്റബിള്‍ (കാറ്റഗറി നമ്പര്‍ : 009/2020) തസ്തികകളിലേക്ക് സ്പെഷ്യല്‍ റിക്രൂട്ട്മെന്റിനായി ജൂലൈ 15 വരെ അപേക്ഷിക്കാമെന്ന് ജില്ലാ പി.എസ്.സി ഓഫീസര്‍ അറിയിച്ചു.

ജില്ലയില്‍ തമിഴ് മീഡിയം ഓണ്‍ലൈന്‍ പഠന സൗകര്യമില്ലാത്ത വിദ്യാര്‍ത്ഥികള്‍ക്കായി അവരുടെ സ്‌കൂളുകളില്‍ പഠന സൗകര്യമൊരുക്കിയതായി സമഗ്ര ശിക്ഷ കേരള ജില്ലാ പ്രൊജക്ട് കോര്‍ഡിനേറ്റര്‍ എം.കെ. നൗഷാദലി അറിയിച്ചു.

പറമ്പിക്കുളം മേഖലയിലെ ഒറവന്‍പാടി കോളനിയിലെ 28 കുടുംബങ്ങള്‍ക്ക് വ്യക്തിഗത വനാവകാശ രേഖ വിതരണം ചെയ്തതായി ജില്ലാ പട്ടികവര്‍ഗ വികസന ഓഫീസര്‍ അറിയിച്ചു. ഒറവന്‍പാടി കോളനിയിലെ 30 കുടുംബങ്ങളില്‍ 28 പേര്‍ക്കാണ് നിലവില്‍ വനാവകാശ രേഖ വിതരണം ചെയ്തത്. ബാക്കി രണ്ട് കുടുംബങ്ങളുടെ രേഖകള്‍ കൂടി ഉടന്‍ നല്‍കും. വനാവകാശ രേഖ ലഭിച്ചതോടെ കോളനിയുടെ അടിസ്ഥാന സൗകര്യ വികസനത്തിനായി സര്‍ക്കാരിന് ഇടപെടാനാകും.

ജില്ലയില്‍ ഡെങ്കിപ്പനി കൂടുതലായി റിപ്പോര്‍ട്ട് ചെയ്യപ്പെട്ട 26 തദ്ദേശ സ്ഥാപനങ്ങളില്‍ പ്രത്യേക ശുചീകരണ ക്യാംപയിന്‍ സംഘടിപ്പിക്കാന്‍ ജില്ലാ കലക്ടര്‍ ടി വി സുഭാഷിന്റെ അധ്യക്ഷതയില്‍ ചേര്‍ന്ന ജില്ലാ ശുചിത്വ സമിതി യോഗം തീരുമാനിച്ചു. തദ്ദേശ സ്ഥാപനങ്ങള്‍, ശുചിത്വ മിഷന്‍, ആരോഗ്യ വകുപ്പ് എന്നിവയുടെ സംയുക്താഭിമുഖ്യത്തില്‍ സന്നദ്ധ പ്രവര്‍ത്തകരുടെ സഹകരണത്തോടെയാണ് ശുചീകരണ ക്യാംപയിന്‍ സംഘടിപ്പിക്കുക. വീട്ടിലും പരിസരങ്ങളിലും ഡെങ്കിപ്പനിക്ക് കാരണമാവുന്ന കൊതുകുകള്‍ വളരാനുള്ള സാഹചര്യങ്ങള്‍  ഇല്ലാതാക്കുകയാണ് ഇതില്‍ പ്രധാനമെന്ന് ജില്ലാ പഞ്ചായത്ത് പ്രസിഡണ്ട് കെ വി സുമേഷ് പറഞ്ഞു.