ചാവക്കാട് തഹസിൽദാരുടെ ലേല നോട്ടീസ് പ്രകാരം ചാവക്കാട് താലൂക്ക് വാടാനപ്പള്ളി വില്ലേജിൽ കുടുംബകോടതി, തൃശൂർ കോടതി കുടിശ്ശിക ഈടാക്കുന്നതിന് ഭൂമി ലേലം ചെയ്യുന്നു. സർവേ നമ്പർ 254/5ബി 1 ലെ 0.0365 ഹെക്ടർ ഭൂമിയുടെ ലേലം ജൂലൈ 28ന് രാവിലെ 11ന് വാടാനപ്പള്ളി വില്ലേജിൽ നടത്തും.
വാടാനപ്പള്ളി വില്ലേജിൽ കുടുംബകോടതി, തൃശൂർ കോടതി കുടിശ്ശിക ഈടാക്കുന്നതിന് സർവേ നമ്പർ 206/8ൽ 4.01 ഹെക്ടർ ഭൂമിയുടെ ലേലം ജൂലൈ 28ന് രാവിലെ 11ന് വാടാനപ്പള്ളി വില്ലേജിൽ നടത്തും. കൂടുതൽ വിവരങ്ങൾ ചാവക്കാട് താലൂക്ക് ഓഫീസിലും വാടാനപ്പള്ളി വില്ലേജ് ഓഫീസിലും ലഭ്യമാണ്.

കോവിഡ് കാലത്തെ പ്രമേഹ നിയന്ത്രണത്തിനായി ഭാരതീയ ചികിത്സ വകുപ്പ് നാഷ്ണൽ ആയുഷ് മിഷന്റെ സഹകരണത്തോടെ ജില്ലയിൽ നടപ്പിലാക്കുന്ന 'ആയുഷ് മിഠായി'സീസൺ രണ്ടിന് തുടക്കം. ജീവിത ശൈലീ ക്രമീകരണത്തിലൂടെ പ്രമേഹ രോഗത്തെ നിയന്ത്രിക്കാനുള്ള ഓൺലൈൻ ട്രെയിനിങ്ങ് പരിപാടിയാണിത്. പ്രധാനമായും വാട്ട്സ്ആപ്പ് ഗ്രൂപ്പ് വഴിയാണ് പരിശീലനം. രാമവർമ്മ ജില്ലാ ആയുർവേദ ആശുപത്രിയും ആയുഷ് വെൽനെസ്സ് സെന്ററും ചേർന്നാണ് നടപ്പിലാക്കുന്നത്.

കോവിഡ് ലോക് ഡൗണിന്റെ ഭാഗമായി പൊതുസ്ഥലത്ത് സാമൂഹിക അകലം പാലിക്കാത്തതിന് തൃശൂർ സിറ്റി പോലീസ് 44 പേർക്കെതിരെ കേസെടുത്തു. ആകെ രജിസ്റ്റർ ചെയ്ത കേസുകൾ-124. കേസുകളിൽ ഉൾപ്പെട്ട ആകെ ആളുകൾ-180. കേസുകളിൽ ഉൾപ്പെട്ട വാഹനങ്ങൾ-75. മാസ്‌ക് ധരിക്കാതെ പൊതുസ്ഥലത്ത് കാണപ്പെട്ടവർ-320

തൃശൂർ ജില്ലയിൽ കോവിഡ് വ്യാപനം തുടരുന്ന സാഹചര്യത്തിൽ ജാഗ്രത കർശനമാക്കി തൃശൂർ സിറ്റി പോലീസ്. 'ഓപ്പറേഷൻ ഷീൽഡ്' എന്ന പേരിലാണ് നടപടികൾ ഏകോപിപ്പിക്കുക. കോവിഡ് - 19 രോഗ സാധ്യത നിലനിൽക്കുന്നതായി സ്ഥിരീകരിച്ച പ്രദേശങ്ങളെ ജില്ലാ ദുരന്ത നിവാരണ വിഭാഗം കണ്ടെയ്ൻമെന്റ് സോണുകളായി തിരിച്ചിട്ടുണ്ട്. തൃശൂർ കോർപ്പറേഷൻ 03, 28, 29, 30, 34, 41, 43, 35, 36, 39, 48, 49 ഡിവിഷനുകൾ, കുന്ദംകുളം മുൻസിപ്പാലിറ്റി 07, 08, 11, 15, 19, 20 ഡിവിഷനുകൾ, കാട്ടാകാമ്പാൽ (06, 07, 09), കടവല്ലൂർ (14, 15, 16) ഗ്രാമപഞ്ചായത്തുകളിലെ വാർഡുകൾ എന്നിവ കണ്ടെയ്ൻമെന്റ് പ്രദേശങ്ങളാണ്.

തൃശൂർ ജില്ലയിൽ സമ്പൂർണ്ണ ലോക്ക് ഡൗൺ ആണെന്ന രീതിയിലുളള പ്രചാരണങ്ങൾ വാസ്തവ വിരുദ്ധമാണെന്ന് ജില്ലാ കളക്ടർ എസ് ഷാനവാസ് അറിയിച്ചു. കണ്ടെയ്ൻമെന്റ് സോണുകളായി പ്രഖ്യാപിച്ച സ്ഥലങ്ങളിൽ മാത്രമാണ് അത് പ്രകാരമുളള നിയന്ത്രണങ്ങളുളളത്. ഇത് കർശനമായി പാലിക്കാനാണ് പോലീസിന് നിർദ്ദേശം നൽകിയിട്ടുളളത്. ഇതുമായി പൊതുജനങ്ങൾ സഹകരിക്കണം. മറ്റുളള സ്ഥലങ്ങളിൽ നിലവിൽ സംസ്ഥാനത്ത് കോവിഡ് പ്രോട്ടോക്കോൾ പ്രകാരമുളള നിയന്ത്രണങ്ങൾ മാത്രമാണ് ബാധകം. മറിച്ചുളള പ്രചാരണങ്ങൾ വാസ്തവ വിരുദ്ധമാണ്. ജില്ലയിൽ നിലവിൽ ആശങ്കാജനകമായ സാഹചര്യമില്ലെന്നും എന്നാൽ ജാഗ്രത കൈവിടരുതെന്നും കളക്ടർ പറഞ്ഞു.
 

സുഭിക്ഷ കേരളം പദ്ധതിയുടെ ഭാഗമായി മത്സ്യകൃഷി ആരംഭിച്ചു. കടവല്ലൂർ പഞ്ചായത്തിലെ പെരുമ്പിലാവ് ആൽത്തറ അയ്യപ്പൻകാവ് പാടശേഖരത്തിലെ പൊതുകുളത്തിലാണ് പഞ്ചായത്തിന്റെ അനുമതിയോടെ ആൽത്തറയിലെ സന്നദ്ധ സംഘടന മത്സ്യകൃഷി ആരംഭിച്ചത്.
40,000 രൂപ മുതൽ മുടക്കി നടപ്പിലാക്കുന്ന പദ്ധതിയുടെ ഉദ്ഘാടനം ഗ്രാമ പഞ്ചായത്ത് പ്രസിഡന്റ് യുപി ശോഭന നിർവഹിച്ചു. ആദ്യപടിയായി 2500 മത്സ്യക്കുഞ്ഞുങ്ങളെയാണ് കുളത്തിൽ വളർത്തുന്നത്. പഞ്ചായത്ത് അംഗങ്ങളായ ഷബീർ കരിക്കാട്, ജയപ്രകാശ് മുള്ളത്ത്, ഷംസുദ്ദീൻ ആൽത്തറ, സനൽ, ആശിഖ്, രഞ്ജു തുടങ്ങിയവർ പങ്കെടുത്തു.
 

ജില്ലാ ലീഗൽ മെട്രോളജി ഓട്ടോ മീറ്റർ മുദ്രവയ്പ് ജോലികൾ താൽക്കാലികമായി നിർത്തിവെച്ചു. ലീഗൽ മെട്രോളജി ഓഫീസ് സ്ഥിതി ചെയ്യുന്ന ഒളരി വാർഡ് കണ്ടെയ്ൻമെന്റ് സോണായി പ്രഖ്യാപിച്ചതിനാൽ ഇനിയൊരു അറിയിപ്പുണ്ടാകുന്നതുവരെ ഓഫീസ് പരിസരത്ത് ഓട്ടോ മീറ്റർ മുദ്രവയ്പ് ജോലികൾ ഉണ്ടായിരിക്കുന്നതല്ലെന്ന് അധികൃതർ അറിയിച്ചു.

വാണിയംപാറ ഇകെഎം യു പി സ്‌കൂളിൽ അക്ഷരത്തുഴ-സാഹിത്യ പുസ്തകങ്ങളുടെ വിതരണോദ്ഘാടനം ഗവ ചീഫ് വിപ്പ് കെ രാജൻ നിർവ്വഹിച്ചു. ഇ.കെ.എം.യു.പി.സ്‌കൂൾ നല്ലപാഠം വൈറ്റ് കേഡറ്റ് ക്ലബിന്റെ ആഭിമുഖ്യത്തിലാണ് അക്ഷര തുഴ സംഘടിപ്പിക്കുന്നത്.

കുന്നംകുളം നഗരസഭയിലെ കുറുക്കൻപാറ ഗ്രീൻപാർക്കിൽ കഴിഞ്ഞ ആഴ്ചയിൽ പ്രവർത്തനമാരംഭിച്ച ചകിരി സംസ്‌കരണ യൂണിറ്റിൽനിന്ന് രണ്ടര ടൺ ചകിരിപ്പൊടി ജൈവവളസംസ്‌കരണത്തിന് കൊണ്ടുപോയി. പഴയന്നൂർ ഗ്രാമ പഞ്ചായത്തിലേക്ക് കൊണ്ടുപോയ ചകിരിപ്പൊടി പഞ്ചായത്തിലെ എയ്‌റോബിക് കമ്പോസ്റ്റിങ് ജൈവമാലിന്യസംസ്‌കരണ യൂണിറ്റിൽ മാലിന്യങ്ങൾ വളമാക്കി മാറ്റിയെടുക്കും.
ചകിരിപ്പൊടിയിൽ ബാക്ടീരിയ ഇനോക്കുലം ചേർത്താണ് ജൈവമാലിന്യം വളമാക്കി മാറ്റുക. കുടുംബശ്രീയ്ക്ക് കീഴിലുള്ള ഹരിത ആക്ടിവിറ്റി ഗ്രൂപ്പിന്റെ നേതൃത്വത്തിൽ ജൂൺ 17-നാണ് സംസ്‌കരണ യൂണിറ്റ് പ്രവർത്തനമാരംഭിച്ചത്.

കേരളത്തിന്റെ തനത് ഭക്ഷ്യസംസ്‌കാരത്തെ തിരികെ പിടിക്കാൻ 'പൂമംഗലം മട്ട' എന്ന പേരിൽ അരി വികസിപ്പിച്ചെടുത്ത് പൂമംഗലം ഗ്രാമപഞ്ചായത്ത്. പഞ്ചായത്തിന്റെയും സിസ്റ്റർ റോസ് ആന്റോയുടെ നേതൃത്വത്തിലുള്ള ഹരിതകർമ്മ സേനയുടെയും ശ്രമഫലമായി പൂമംഗലം എന്ന ഗ്രാമം ഇനിമുതൽ ഒരു അരിയുടെ പേരിലാകും അറിയപ്പെടുക. മട്ട അരിയാണെങ്കിലും നെല്ലിനും അരിക്കും ചോക്ലേറ്റിന്റെ നിറവും രുചിയും മണവുമാണ്. സ്വാദിനൊപ്പം നിരവധി ഔഷധ ഗുണങ്ങളും പൂമംഗലം മട്ടയുടെ പ്രത്യേകതയാണ്.