പിന്നാക്ക വിഭാഗ വികസന വകുപ്പ് ഇ-ഗ്രാന്റ്‌സ് പോര്‍ട്ടല്‍ മുഖേന നടപ്പിലാക്കുന്ന ഒ.ഇ.സി, ഒ.ബി.സി (എച്ച്) പ്രീമെട്രിക് വിദ്യാഭ്യാസാനുകൂല്യ പദ്ധതി പ്രകാരം സ്‌കൂളുകളില്‍ നിന്നും ഡാറ്റാ എന്‍ട്രി നടത്തുന്നതിനുള്ള അവസാന തീയതി ജൂലൈ 27 വരെ ദീര്‍ഘിപ്പിച്ചു. ആനുകൂല്യത്തിന് അര്‍ഹരായ വിദ്യാര്‍ത്ഥികളുടെ വിവരങ്ങള്‍ www.egrantz.kerala.gov.in എന്ന സ്‌കോളര്‍ഷിപ്പ് പോര്‍ട്ടലില്‍ സ്‌കൂള്‍ ലോഗിനില്‍ നിന്നും ഡാറ്റാ എന്‍ട്രി പൂര്‍ത്തിയാക്കേണ്ടതാണെന്ന് ഡെപ്യൂട്ടി ഡയറക്ടര്‍ അറിയിച്ചു.

ശ്രീനാരായണഗുരു ഓപ്പണ്‍ യൂണിവേഴ്‌സിറ്റിയും തൃശ്ശൂര്‍ ജില്ലാ സാക്ഷരതാ മിഷനും സംയുക്തമായി സംഘടിപ്പിക്കുന്ന 'എല്ലാവര്‍ക്കും ബിരുദം' തുടര്‍പഠന പദ്ധതി സെമിനാര്‍ നടത്തി. തൃശ്ശൂര്‍ സിവില്‍ സ്റ്റേഷന്‍ അനെക്‌സ് ഹാളില്‍ നടത്തിയ സെമിനാര്‍ ജില്ലാ പഞ്ചായത്ത് വൈസ് പ്രസിഡന്റ് ടി.കെ. സുധീഷ്  ഉദ്ഘാടനം നിര്‍വ്വഹിച്ചു. എസ്ജിഒയു പട്ടാമ്പി റീജിയണല്‍ സെന്റര്‍ ഡയറക്ടര്‍ പ്രൊഫ. ഇ. വനജ അധ്യക്ഷത വഹിച്ചു.

ധീരം സ്വയം പ്രതിരോധ പരിശീലനാര്‍ത്ഥികള്‍ക്കുള്ള ജേഴ്‌സി, ഹാന്‍ഡ് ബുക്ക് വിതരണം ചെയ്തു

അസാപ് കേരളയുടെ ആഭിമുഖ്യത്തില്‍ തവനൂര്‍ കമ്മ്യൂണിറ്റി സ്‌കില്‍ പാര്‍ക്കില്‍ സൗജന്യ തൊഴില്‍ മേള സംഘടിപ്പിക്കുന്നു. 2026 ജൂലൈ 25 (ശനിയാഴ്ച) രാവിലെ 10 മുതല്‍ പാര്‍ക്ക് ക്യാമ്പസിലാണ് മേള നടക്കുക. പ്രമുഖ കമ്പനികള്‍ പങ്കെടുക്കുന്ന ജോബ് ഡ്രൈവിലേക്ക് ഉദ്യോഗാര്‍ത്ഥികള്‍ക്ക് നേരിട്ടെത്തി പങ്കെടുക്കാവുന്നതാണ്. താല്‍പര്യമുള്ളവര്‍ ബയോഡാറ്റയും ബന്ധപ്പെട്ട സര്‍ട്ടിഫിക്കറ്റുകളുമായി രാവിലെ 10 ന് തവനൂര്‍ അസാപ് സ്‌കില്‍ പാര്‍ക്കില്‍ റിപ്പോര്‍ട്ട് ചെയ്യണം.

സ്റ്റേറ്റ് റിസോഴ്സ് സെന്ററിന്റെ ആഭിമുഖ്യത്തിലുള്ള എസ്.ആര്‍.സി കമ്മ്യൂണിറ്റി കോളേജ് 2026 ജൂലൈ സെഷനില്‍ നടത്തുന്ന സര്‍ട്ടിഫിക്കറ്റ് ഇന്‍ മാര്‍ഷ്യല്‍ ആര്‍ട്സ് പ്രോഗ്രാമിന് ഓണ്‍ലൈനായി അപേക്ഷിക്കുന്നതിനുള്ള തീയതി ദീര്‍ഘിപ്പിച്ചു. ആറു മാസം ദൈര്‍ഘ്യമുള്ള പ്രോഗ്രാമിന് പത്താം ക്ലാസ്സാണ് വിദ്യാഭ്യാസ യോഗ്യത. കളരിപ്പയറ്റ്, കുംഫു എന്നിവ പഠനവിഷയങ്ങളാണ്. തിയറി, പ്രാക്ടിക്കല്‍ ക്ലാസ്സുകള്‍ അംഗീകൃത പഠനകേന്ദ്രത്തിന്റെ സഹായത്തോടെയാണ് നടത്തുന്നത്. 15 വയസ്സിനു മേല്‍ പ്രായമുള്ളവര്‍ക്ക് അപേക്ഷിക്കാം. ഉയര്‍ന്ന പ്രായ പരിധി ഇല്ല. അപേക്ഷകള്‍ ജൂലൈ 31 നകം ലഭിക്കണം.

വനിത ശിശുവികസന വകുപ്പിന് കീഴിലുള്ള പുഴക്കല്‍ ഐ.സി.ഡി.എസ് പ്രോജക്ട് ഓഫീസിന്റെ ആവശ്യത്തിനായി വാഹനം ഡ്രൈവര്‍ ഉള്‍പ്പെടെ ഒരു വര്‍ഷത്തേക്ക് കരാര്‍ അടിസ്ഥാനത്തില്‍ ലഭ്യമാക്കുന്നതിന് താല്‍പര്യമുള്ള വ്യക്തികളില്‍നിന്നോ സ്ഥാപനങ്ങളില്‍ നിന്നോ മത്സരസ്വഭാവമുള്ള മുദ്രവെച്ച ദര്‍ഘാസ് ക്ഷണിച്ചു. ദര്‍ഘാസ് ജൂലൈ 31 ന് ഉച്ചയ്ക്ക് 2.30 വരെ സ്വീകരിക്കും. കൂടുതല്‍ വിവരങ്ങള്‍ക്കായി ഫോണ്‍: 9526924862.  

കേരള സ്റ്റേറ്റ് എയ്ഡ്സ് കണ്ട്രോള്‍ സൊസൈറ്റിയും സംസ്ഥാന ആരോഗ്യ കുടുംബ ക്ഷേമ വകുപ്പും ചേര്‍ന്ന് കോളേജ് വിദ്യാര്‍ത്ഥികള്‍ക്കായി മാരത്തണ്‍ മത്സരം സംഘടിപ്പിക്കുന്നു. അന്താരാഷ്ട്ര യുവജന ദിനത്തിനു മുന്നോടിയായി എച്ച്.ഐ.വി/ എയ്ഡ്സിനെക്കുറിച്ച് കോളേജ് വിദ്യാര്‍ത്ഥികളില്‍ അവബോധം ഉണ്ടാക്കുന്നതിനായായാണ് ജില്ലാ അടിസ്ഥാനത്തില്‍ മത്സരം സംഘടിപ്പിക്കുന്നത്.

കേരള ഖാദി തൊഴിലാളി ക്ഷേമനിധി ബോര്‍ഡില്‍ നിന്നും 2025 ഡിസംബര്‍ 31 വരെ പെന്‍ഷന്‍ അനുവദിക്കപ്പെട്ട ഗുണഭോക്താക്കള്‍ 2026 സെപ്തംബര്‍ 30 വരെയുള്ള കാലയളവില്‍ ബന്ധപ്പെട്ട അക്ഷയകേന്ദ്രങ്ങളില്‍ നിന്നും അംഗീകൃത സര്‍വ്വീസ്ചാര്‍ജ്ജ് നല്‍കി വാര്‍ഷിക മസ്റ്ററിംഗ് നടത്തേണ്ടതാണെന്ന് ചീഫ് എക്‌സിക്യുട്ടീവ് ഓഫീസര്‍ അറിയിച്ചു.
 

ചേലക്കര ഗവ. പോളിടെക്‌നിക് കോളേജിലേക്ക് ഡിപ്ലോമ (റഗുലര്‍) സ്‌പോട്ട് അഡ്മിഷന്‍ ജൂലൈ 30 ന് നടക്കും. രജിസ്‌ട്രേഷന്‍ രാവിലെ 9.30 മുതല്‍ 10.30 വരെ. നിലവില്‍ അപേക്ഷിച്ചിട്ടില്ലാത്തവര്‍ക്ക് ജൂലൈ 28 വരെ ഓണ്‍ലൈനായി https://polyadmission.org എന്ന അഡ്മിഷന്‍ പോര്‍ട്ടല്‍ വഴി അപേക്ഷിക്കാം. ആര്‍ട്ടിഫിഷ്യല്‍ ഇന്റലീജന്‍സ് ആന്‍ഡ് മെഷീന്‍ ലേണിംഗ്, സിവില്‍ എഞ്ചിനീയറിംഗ്, കമ്പ്യൂട്ടര്‍ എഞ്ചിനീയറിംഗ്, ഇക്ട്രോണിക്‌സ് എഞ്ചിനീയറിംഗ്, മെക്കാനിക്കല്‍ എഞ്ചിനീയറിംഗ് എന്നീ ഡിപ്ലോമ കോഴ്‌സുകളുടെ വേക്കന്‍സി അഡ്മിഷന്‍ പോര്‍ട്ടലില്‍ ലഭ്യമാണ്.