തിരഞ്ഞെടുപ്പ് ഡ്യൂട്ടിക്കായി നിയോഗിക്കപ്പെട്ടിട്ടുള്ള ജില്ലയിലെ പോലീസ് ഉദ്യോഗസ്ഥർക്ക് തപാൽ വോട്ട്  രേഖപ്പെടുത്തുന്നതിനായി പ്രത്യേക സൗകര്യം ഒരുക്കി. 

ഇന്ന് (ഏപ്രിൽ 6)  രാവിലെ 7  മുതൽ കാക്കനാട് മാർ അത്തനേഷ്യസ് സ്കൂളിലെ ഫെസിലിറ്റി സെന്ററിൽ വോട്ട് രേഖപ്പെടുത്താം.

​  പോലീസ് ഉദ്യോഗസ്ഥർക്ക്
കൃത്യനിർവഹണത്തിന്​ തടസ്സമില്ലാതെ തങ്ങളുടെ സമ്മതിദാനാവകാശം വിനിയോഗിക്കാനാണ് ഈ സംവിധാനം ഒരുക്കിയിരിക്കുന്നത്. ഇതിനാവശ്യമായ എല്ലാ സജ്ജീകരണങ്ങളും പൂർത്തിയായതായി  നോഡൽ ഓഫീസർ അറിയിച്ചു.

​വോട്ട് രേഖപ്പെടുത്താൻ എത്തുന്ന ഉദ്യോഗസ്ഥർ ആവശ്യമായ തിരിച്ചറിയൽ രേഖകൾ കരുതേണ്ടതാണ്.

നിയമസഭാ തിരഞ്ഞെടുപ്പിന്റെ ഭാഗമായി തിരഞ്ഞെടുപ്പ് ഡ്യൂട്ടിയുള്ള ഉദ്യോഗസ്ഥർക്കും  പോലീസുകാർക്കും തപാൽ വോട്ട് രേഖപ്പെടുത്തുന്ന പ്രക്രിയ കൂടുതൽ കാര്യക്ഷമമാക്കാൻ പുതിയ മാർഗനിർദ്ദേശങ്ങൾ പുറപ്പെടുവിച്ചു. 

തപാൽ ബാലറ്റുകളുടെ നീക്കം സുരക്ഷിതവും വേഗത്തിലുമാക്കാൻ ജില്ലാ വരണാധികാരി കൂടിയായ ജില്ലാ കളക്ടറുടെ നേതൃത്വത്തിൽ വിപുലമായ സജ്ജീകരണങ്ങളാണ് ഒരുക്കുന്നത്.  

നിയമസഭാ തിരഞ്ഞെടുപ്പുമായി ബന്ധപ്പെട്ട് പോളിംഗ് ഉദ്യോഗസ്ഥർക്കായി സംഘടിപ്പിച്ച പരിശീലന പരിപാടികളിൽ വിവിധ കാരണങ്ങളാൽ പങ്കെടുക്കാൻ സാധിക്കാത്തവർക്കായി പ്രത്യേക പരിശീലനം സംഘടിപ്പിക്കുന്നു. ഇന്ന് (ഏപ്രിൽ 06 ) രാവിലെ 10.00 ന്  ഓർഡറിൽ നിശ്ചയിച്ചിട്ടുള്ള അതത്  കേന്ദ്രങ്ങളിൽ പരിശീലനത്തിന് എത്തണം.
​നേരത്തെ നടന്ന ക്ലാസുകളിൽ ഹാജരാകാത്ത എല്ലാ പോളിംഗ് ഉദ്യോഗസ്ഥരും ഈ പരിശീലന പരിപാടിയിൽ നിർബന്ധമായും പങ്കെടുക്കേണ്ടതാണെന്ന് ഇലക്ഷൻ വിഭാഗം ഡെപ്യൂട്ടി കളക്ടർ അറിയിച്ചു.
 മറ്റു  പോളിംഗ് ഉദ്യോഗസ്ഥർക്കും സംശയ നിവാരണങ്ങൾക്കായി പ്രസ്തുത പരിശീലന പരിപാടിയിൽ പങ്കെടുക്കാവുന്നതാണ്.

വോട്ടെടുപ്പ് കേന്ദ്രങ്ങളിൽ മൊബൈൽ ഫോൺ ഉപയോഗത്തിന് നിയന്ത്രണമേർപ്പെടുത്തി തിരഞ്ഞെടുപ്പ് കമ്മിഷൻ. 

വോട്ടിന്റെ രഹസ്യസ്വഭാവം സംരക്ഷിക്കുന്നതിനും സുരക്ഷാ ക്രമീകരണങ്ങളുടെ ഭാഗമായും പോളിങ് ബൂത്തിനകത്ത് ഫോൺ പ്രവേശിപ്പിക്കുന്നത് പൂർണ്ണമായും തടയാനാണ് നിർദേശം.

ഫോണിലെ സ്വകാര്യ വിവരങ്ങളുടെ സുരക്ഷ മുൻനിർത്തി, വോട്ടർമാർ തങ്ങളുടെ ഫോണുകൾ വാഹനങ്ങളിലോ മറ്റ് സുരക്ഷിത ഇടങ്ങളിലോ സൂക്ഷിക്കേണ്ടതാണ്. അല്ലാത്തപക്ഷം ബൂത്തിലേക്ക് കടക്കുന്നതിന് മുൻപ് ഫോൺ 'മൊബൈൽ ഫോൺ കീപ്പിങ് പൗച്ചി'ൽ നിക്ഷേപിച്ച് വളണ്ടിയർമാരിൽ നിന്ന്  ടോക്കൺ വാങ്ങണം. 

നിയമസഭാ തിരഞ്ഞെടുപ്പിൽ വോട്ടിങ് ശതമാനം വർദ്ധിപ്പിക്കുന്നതിന്റെ ഭാഗമായി എറണാകുളം ജില്ലയിലെ വിവിധ ഉന്നതികളിൽ വോട്ടർ ബോധവൽക്കരണ പരിപാടികൾ ഊർജ്ജിതമാക്കി. 

​നിയമസഭാ തിരഞ്ഞെടുപ്പ് ഡ്യൂട്ടിക്കായി നിയോഗിക്കപ്പെട്ട ഉദ്യോഗസ്ഥർക്കുള്ള പരിശീലന ക്ലാസുകളിൽ പങ്കെടുക്കാത്തവർക്കെതിരെ കർശന വകുപ്പുതല നടപടികൾ സ്വീകരിക്കാൻ ജില്ലാ തിരഞ്ഞെടുപ്പ് ഉദ്യോഗസ്ഥ കൂടിയായ ജില്ലാ കളക്ടർ നിർദ്ദേശം നൽകി.

 തിരഞ്ഞെടുപ്പ് നടപടിക്രമങ്ങൾ കുറ്റമറ്റ രീതിയിൽ പൂർത്തിയാക്കുന്നതിന്റെ ഭാഗമായാണ് പരിശീലന പരിപാടികൾ സംഘടിപ്പിച്ചത്.
​പരിശീലന ക്ലാസുകളിൽ നിന്നും വിട്ടുനിന്ന ഉദ്യോഗസ്ഥർ, തങ്ങൾ ഹാജരാകാത്തതിന്റെ കൃത്യമായ കാരണം വ്യക്തമാക്കുന്ന വിശദീകരണം അതത് വരണാധികാരികൾ  മുൻപാകെ അടിയന്തരമായി സമർപ്പിക്കേണ്ടതാണെന്നും നിർദേശിച്ചിട്ടുണ്ട്.

ഏപ്രിൽ ഒമ്പതിന് നടക്കാനിരിക്കുന്ന നിയമസഭാ തിരഞ്ഞെടുപ്പിനോടനുബന്ധിച്ച് പോളിങ് സ്റ്റേഷനുകളിൽ ഭിന്നശേഷിക്കാർക്കും മുതിർന്ന പൗരന്മാർക്കും ആവശ്യമായ സൗകര്യങ്ങൾ ഉറപ്പാക്കുന്നതിനുള്ള നടപടികളുടെ ഭാഗമായി ചൈൽഡ് ഡെവലപ്മെൻറ് പ്രൊജക്റ്റ് ഓഫീസർമാർക്ക് (സി.ഡി.പി.ഒ) പരിശീലന ക്ലാസുകൾ സംഘടിപ്പിച്ചു.

സ്വീപ് (സിസ്റ്റമാറ്റിക് വോട്ടർ എഡ്യൂക്കേഷൻ ആൻഡ് ഇലക്ടോറൽ പാർട്ടിസിപ്പേഷൻ) ബോധവൽക്കരണ പരിപാടികളുടെ ഭാഗമായി ജില്ലാ കളക്ടർ ജി. പ്രിയങ്ക , സ്വീപ് നോഡൽ ഓഫീസറും അസിസ്റ്റൻ്റ് കളക്ടറുമായ പാർവതി ഗോപകുമാർ എന്നിവർ കാളമുക്ക് ഫിഷിങ് ഹാർബർ സന്ദർശിച്ചു. ഇരുവരും മത്സ്യത്തൊഴിലാളികളുമായി  സംവദിച്ചു.

2026-ലെ കേരള നിയമസഭാ തിരഞ്ഞെടുപ്പുമായി ബന്ധപ്പെട്ട് ശേഖരിക്കപ്പെട്ട പേപ്പർ മാലിന്യങ്ങളെ പുനരുപയോഗിച്ച് ഇന്ത്യൻ ഭരണഘടനയുടെ ആമുഖവും ഇലക്ഷൻ കമ്മീഷൻ ലോഗോയും നിർമ്മിച്ചിരിക്കുകയാണ് ജില്ലാ ഭരണകൂടം. സെന്റ് തെരേസാസ് കോളേജും,  ജില്ലാ ശുചിത്വ മിഷനും നവകേരളകർമ പദ്ധതിയും സംയുക്തമായാണ് പദ്ധതി  നടപ്പിലാക്കിയത്.

തിരഞ്ഞെടുപ്പ് പ്രചാരണത്തിന് ഉപയോഗിച്ച കടലാസ്, കുളവാഴ, ടെയ്ലറിംഗ് വേസ്റ്റ് തുടങ്ങിയ വസ്തുക്കൾ ഉപയോഗിച്ചാണ് ഇവ നിർമ്മിച്ചത്. 

യുവതലമുറയിൽ പരിസ്ഥിതി ബോധവും പൗരബോധവും വളർത്തുന്നതിന് ഇത്തരം പ്രവർത്തനങ്ങൾ സഹായകരമാണെന്ന് ജില്ലാ കളക്ടർ പറഞ്ഞു.

തിരഞ്ഞെടുപ്പ് പ്രക്രിയയെ കൂടുതൽ പരിസ്ഥിതി സൗഹാർദ്ദപരമാക്കുന്നതിനായി  ഉപയോഗശൂന്യമായ വസ്ത്രങ്ങൾ പുനരുപയോഗപ്പെടുത്തി 'ഹരിത മൊബൈൽ ഫോൺ കീപ്പിങ് പൗച്ചുകൾ' നിർമ്മിച്ച് ജില്ലാ ഭരണകൂടം. ശുചിത്വ മിഷൻ ,ഹരിത കേരളം മിഷൻ, ക്ലീൻ കേരള കമ്പനി എന്നിവയുടെ  സഹകരണത്തോടെയാണ് പദ്ധതി നടപ്പിലാക്കിയത്. 

“വാർഡ്രോബിൽ ഐഡിൽ, പോളിങ് ബൂത്തിൽ വൈറൽ” എന്ന ടാഗ്‌ലൈനോടെയാണ് പദ്ധതി നടപ്പിലാക്കിയത്.

ജില്ലാ ഭരണകൂടത്തിന്റെ നേതൃത്വത്തിൽ സംഘടിപ്പിച്ച ക്ലോത്ത് കളക്ഷൻ ഡ്രൈവിലൂടെ ശേഖരിച്ച കോട്ടൺ വസ്ത്രങ്ങൾ ഉപയോഗിച്ചാണ് പൗച്ചുകൾ നിർമ്മിച്ചത്.