കോവിഡാനന്തര കേരളത്തിന്റെ ഭക്ഷ്യഭദ്രത ഉറപ്പുവരുത്താന്‍ സംസ്ഥാന സര്‍ക്കാര്‍ നടപ്പിലാക്കുന്ന സുഭിക്ഷ കേരളം പദ്ധതി കാസര്‍കോട് ജില്ലയില്‍ ഹൈടെക്കാവുന്നു. പദ്ധതിയുമായി ബന്ധപ്പെട്ട് ഏറ്റെടുക്കുന്ന വിവരങ്ങളെല്ലാം ജില്ലയില്‍ ശേഖരിക്കുന്നത് മൊബൈല്‍ ആപ്പ് വഴിയാണ്. ഇനി ഉത്പാദിപ്പിക്കുന്ന വിളകളും ആപ്പ് വഴി വിപണനം നടത്താനുള്ള ഒരുക്കങ്ങളാണ് പുരോഗമിക്കുന്നത്. സുഭിക്ഷ കേരളം പദ്ധതിയുമായി ബന്ധപ്പെട്ട ഭൂമിയുടെ വിവരങ്ങള്‍ കര്‍ഷകര്‍ മൊബൈല്‍ ആപ്പ് വഴിയാണ് അപ്ലോഡ് ചെയ്യുന്നത്. ഇതിനായി ജില്ലയില്‍ പ്രത്യേകമായി രൂപകല്‍പന ചെയ്ത 'സുഭിക്ഷ കേരളം'  ആപ്പാണ് ഉപയോഗിക്കുന്നത്.

കോഴിക്കോട് ജില്ലയില്‍ ആര്‍ദ്രം മിഷന്‍ രണ്ടാം ഘട്ടത്തില്‍ ഉള്‍പ്പെടുത്തിയ ബേപ്പൂര്‍ പ്രാഥമിക ആരോഗ്യ കേന്ദ്രം കുടുംബാരോഗ്യ കേന്ദ്രമായി ഉയര്‍ത്തി നാടിന് സമര്‍പ്പിച്ചു.  വികെസി മമ്മദ് കോയ എംഎല്‍എയുടെ അദ്ധ്യക്ഷതയില്‍  ആരോഗ്യ വകുപ്പ് മന്ത്രി  കെ.കെ. ശൈലജ ടീച്ചര്‍ വീഡിയോ കോണ്‍ഫറന്‍സ് വഴി  ഉദ്ഘാടനം  നിര്‍വഹിച്ചു. എന്‍എച്ച്എം പ്ലാന്‍ ഫണ്ടും കോര്‍പ്പറേഷന്‍ ഫണ്ടും ഉപയോഗിച്ചാണ് കെട്ടിടം നവീകരിച്ചത്.

ഓൺലൈൻ വിതരണത്തിന് തയ്യാറായി സപ്ലൈകോ. ആഗസ്റ്റ് മാസത്തോടെ വീടുകളിൽ ഭക്ഷ്യവസ്തുക്കൾ എത്തിക്കാനാണ് തീരുമാനം. കോവിഡിന്റെ പശ്ചാത്തലത്തിൽ സപ്ലൈകോ ആസ്ഥാനത്താണ് ആദ്യമായി ഓൺലൈൻ വിതരണം നടപ്പാക്കിയത്. സംവിധാനം വിജയകരമായതോടെ ആഗസ്റ്റോടെ സംസ്ഥാനത്താകെ വ്യാപിപ്പിക്കാനാണ് സപ്ലൈകോ ഡയറക്ടർ ബോർഡ് തീരുമാനിച്ചിരിക്കുന്നത്. സപ്ലൈകോ ലഭ്യമാക്കുന്ന ആപ്പുകൾ വഴി ബന്ധപ്പെട്ടാൽ ഭക്ഷ്യവസ്തുക്കൾ വീടുകളിലെത്തിക്കുന്ന സംവിധാനമാണിത്. വീടുകളിൽ ഭക്ഷ്യവസ്തുക്കളെത്തിക്കുന്നതിനുള്ള ഗതാഗത ചിലവ് ഉപഭോക്താക്കളിൽ നിന്ന് ഈടാക്കും.

രാമവർമ്മപുരം ജില്ലാ സായുധസേനയിലെ ഡെപ്യൂട്ടി കമാണ്ടിന്റെ കാര്യാലയത്തിൽ സൂക്ഷിച്ചിട്ടുളളതും പോലീസ് വകുപ്പിന് ഉപയോഗയോഗ്യമല്ലാത്തതുമായ കെഎൽ 01 എക്‌സ് 9143 അംബാസഡർ കാർ, കെഎൽ 01 എഎൻ 3659 ടാറ്റാ സുമോ എന്നിവ ആഗസ്റ്റ് 18 രാവിലെ 11 ന് ലേലം ചെയ്യും. ഫോൺ: 0487 2423511.
 

കോവിഡ് 19 സുരക്ഷാ മാനദണ്ഡങ്ങൾ പാലിച്ച് ജില്ലയിൽ മെഡിക്കൽ എഞ്ചിനീയറിംഗ് പ്രവേശനപരീക്ഷ എഴുതിയത് 9769 വിദ്യാർത്ഥികൾ. 11,800 വിദ്യാർത്ഥികളാണ് രജിസ്റ്റർ ചെയ്തിരുന്നത്. വിവിധ കാരണങ്ങളാൽ 2031 കുട്ടികൾ പരീക്ഷ എഴുതിയില്ല. 65 വിദ്യാർത്ഥികൾ പരീക്ഷാസെന്ററുകളിൽ ഒരുക്കിയ ക്വാറന്റൈൻ മുറികളിലാണ് പരീക്ഷ എഴുതിയത്.

നാട്ടിക ഗ്രാമ പഞ്ചായത്ത് വാതക ശ്മശാനത്തിൽ ജോലി ഒഴിവ്. താൽപര്യമുള്ളവർ ജൂലൈ 22 വൈകീട്ട് 4 മണിക്കകം അപേക്ഷ സമർപ്പിക്കണം. വിശദാംശങ്ങൾ പ്രവർത്തന സമയത്ത് പഞ്ചായത്തോഫീസിൽ നിന്ന് നേരിട്ട് അറിയാമെന്ന് സെക്രട്ടറി അറിയിച്ചു.