പഴയന്നൂർ ബ്ലോക്ക് പട്ടികജാതി വികസന ഓഫീസ് മുഖേന നടപ്പിലാക്കുന്ന പഠനമുറി നിർമ്മിക്കുന്നതിനുള്ള സഹായം നൽകൽ, വിദ്യാർത്ഥികൾക്ക് സ്‌കോളർഷിപ്പ് എന്നീ പദ്ധതികൾക്ക് അപേക്ഷ സമർപ്പിക്കുന്നതിനുള്ള തിയ്യതി നീട്ടി. കോവിഡ് 19 സാഹചര്യത്തിൽ വിവിധ പഞ്ചായത്തുകളിലെ വാർഡുകൾ കണ്ടെയ്ൻമെന്റ് സോണുകളായി പ്രഖ്യാപിച്ചതിനാൽ പലർക്കും അപേക്ഷ നൽകാൻ കഴിയാത്ത സാഹചര്യത്തിലാണിത്. രണ്ട് ആനുകൂല്യങ്ങൾക്കുമുള്ള അപേക്ഷകൾ ബന്ധപ്പെട്ട രേഖകൾ സഹിതം സ്വീകരിക്കുന്ന അന്തിമ തിയ്യതി ആഗസ്ത് 10 ആയിരിക്കുമെന്ന് ബ്ലോക്ക് പഞ്ചായത്ത് പ്രസിഡന്റ് വി.തങ്കമ്മ അറിയിച്ചു.

കേരളത്തിൽ ആദ്യമായി കോവിഡ് രോഗികൾക്ക് എല്ലാ ഐ.പി. ബെഡിലും പൈപ്പ്ലൈൻ വഴി ഓക്സിജൻ ലഭ്യമാക്കുന്നതിനായി തൃശൂർ മെഡിക്കൽ കോളജിൽ ആരംഭിച്ച 'പ്രാണ-എയർ ഫോർ കെയർ' പദ്ധതി മാതൃകാ പദ്ധതിയാണെന്ന് ഉദ്ഘാടനം നിർവഹിച്ച ആരോഗ്യ മന്ത്രി കെ.കെ. ശൈലജ ടീച്ചർ. കോവിഡ് ബാധിച്ച് മരണം സംഭവിക്കുന്നത് ശരീരത്തിൽ ഓക്സിജൻ കുറയുന്നത് കൊണ്ടാണ്. രോഗലക്ഷണം കാണിക്കാതെയാണ് ശരീരത്തിൽ ഓക്സിജൻ കുറയുന്നത്. ഓക്സിജൻ കുറയുന്നില്ലെന്ന് ഉറപ്പുവരുത്തിയാൽ ഒരുപാട് രോഗികളെ നമുക്ക് രക്ഷിക്കാൻ കഴിയുമെന്നും ആരോഗ്യ മന്ത്രി പറഞ്ഞു.

കോവിഡ് 19 ന്റെ പശ്ചാത്തലത്തിൽ ജില്ലാ കളക്ടറുടെ നിർദ്ദേശാനുസരണം ആർ ടി ഒ ഓഫീസിനകത്തേക്ക് ജീവനക്കാരല്ലാത്ത ആരെയും പ്രവേശിപ്പിക്കില്ല. രോഗവ്യാപനം തടയുന്നതിന്റെ ഭാഗമായി വാഹന രജിസ്ട്രേഷനും ഫിറ്റ്നസ് ടെസ്റ്റും ഇ-ടോക്കൺ മുഖേനയാണ് നടത്തുക. തുടർന്ന് ഉത്തരവുണ്ടാകുന്നത് വരെ ഓഫീസ് കൗണ്ടറുകൾ പ്രവർത്തിക്കുകയില്ല. ഓൺലൈനിൽ ഫീസടച്ച് കളക്ടറേറ്റ് കവാടത്തിൽ സ്ഥാപിച്ചിട്ടുള്ള ഡ്രോപ് ബോക്സിൽ അപേക്ഷകൾ നിക്ഷേപിക്കാവുന്നതാണ്. ഫോൺ - 0487-2360262.

ട്രിപ്പിൾ ലോക്ക് ഡൗൺ പ്രഖ്യാപിച്ച ഇരിങ്ങാലക്കുട നഗരസഭയിലും മുരിയാട് ഗ്രാമപഞ്ചായത്തിലും ബാങ്കുകൾക്ക് ഇന്ന് (ജൂലൈ 30) മാത്രം രാവിലെ പത്ത് മുതൽ വൈകീട്ട് അഞ്ച് വരെ പരിമിതമായ ജീവനക്കാരുമായി പ്രവർത്തിക്കാമെന്ന് ജില്ലാ കളക്ടർ അറിയിച്ചു. പക്ഷേ, ഇടപാടുകാർക്ക് പ്രവേശനമുണ്ടാവില്ല. ജീവനക്കാരുടെ എണ്ണം പരമാവധി അഞ്ചോ അല്ലെങ്കിൽ ആകെ ജീവനക്കാരുടെ പകുതി, ഇതിൽ ഏതാണ് കുറവ് അതായിരിക്കണം. മറ്റ് ജില്ലകളിൽനിന്നും, ട്രിപ്പിൾ ലോക്ക് ഡൗൺ, കണ്ടെയ്ൻമെൻറ് സോൺ പ്രദേശങ്ങളിൽനിന്നുമുള്ള ജീവനക്കാർക്ക് ജോലി ചെയ്യാൻ അനുമതിയില്ല. ബാങ്കിൽ സാമൂഹിക അകലം ഉൾപ്പെടെ കോവിഡ് പെരുമാറ്റച്ചട്ടം പാലിച്ചിരിക്കണമെന്നും വ്യക്തമാക്കി.

തപാല്‍ അദാലത്ത് 14ന്

ലൈഫ് സമ്പൂര്‍ണ്ണ പാര്‍പ്പിട സുരക്ഷാ പദ്ധതിയുടെ ഗുണഭോക്തൃ പട്ടികയില്‍ ഉള്‍പ്പെടാതെ പോയ ഭൂരഹിത ഭവനരഹിതര്‍ക്ക് ആഗസ്ത് ഒന്നു മുതല്‍ അപേക്ഷകള്‍ സമര്‍പ്പിക്കാം. ഒന്ന്, രണ്ട് ഘട്ടങ്ങളില്‍ ഉള്‍പ്പെടാത്ത അര്‍ഹരായ ഗുണഭോക്താക്കളാണ് മൂന്നാം ഘട്ടത്തില്‍ അപേക്ഷിക്കേണ്ടത്. ഭൂമിയുള്ള ഭവനരഹിതരേയും, ഭൂരഹിത ഭവനരഹിതരേയും ഈ ഘട്ടത്തില്‍ പരിഗണിക്കും. ഗുണഭോക്താക്കള്‍ ഓണ്‍ലൈന്‍ വഴിയാണ് അതത് തദ്ദേശ സ്വയംഭരണ സ്ഥാപനങ്ങളിലേക്ക് അപേക്ഷ സമര്‍പ്പിക്കണം. ആഗസ്ത് 14 വരെ അപേക്ഷസ്വീകരിക്കും.