കേന്ദ്ര - സംസ്ഥാന സംയുക്ത പദ്ധതിയായ ജല ജീവന്‍ മിഷന്‍ പദ്ധതിയുടെ ഭാഗമായി ജില്ലയിലെ 99865 ഗ്രാമീണ വീടുകളില്‍ ശുദ്ധജലം പൈപ്പുവഴി എത്തിക്കും.  ഇത് ജില്ലയില്‍ ആകെയുളള 2.49 ലക്ഷം കുടുംബങ്ങളുടെ 37 ശതമാനമാണെന്ന് ജില്ലാകളക്ടര്‍ ഡോ.ഡി.സജിത് ബാബു പറഞ്ഞു. ആദ്യഘട്ടത്തില്‍ 52865 പുതിയ കണക്ഷന്‍ നല്‍കുന്നതിന് ജില്ലയിലെ 26 ഗ്രാമപഞ്ചായത്തുകളില്‍ നിന്ന് ലഭിച്ച പ്രമേയങ്ങളുടെ അടിസ്ഥാനത്തില്‍ 197.37 കോടിരൂപയുടെ കര്‍മപദ്ധതിക്ക് ജില്ലാതല വാട്ടര്‍ സാനിറ്റേഷന്‍ മിഷന്‍ യോഗം അംഗീകാരം നല്‍കി.

അരീക്കോട് ഐ.സി.ഡി.എസ് പ്രൊജക്ടിന് കീഴില്‍ കീഴുപറമ്പ് ഗ്രാമപഞ്ചായത്തിന്റെ പരിധിയില്‍ വരുന്ന അങ്കണവാടികളിലേക്ക് വര്‍ക്കര്‍, ഹെല്‍പ്പര്‍ തസ്തികകളിലേക്ക് അപേക്ഷ സ്വീകരിക്കുന്ന തീയതി ഓഗസ്റ്റ് 14 വരെ നീട്ടിയതായി ശിശുവികസന പദ്ധതി ഓഫീസര്‍ അറിയിച്ചു.

കൊണ്ടോട്ടി കൂടുതല്‍ പോസിറ്റീവ് കേസുകള്‍ റിപ്പോര്‍ട്ട് ചെയ്യുന്ന സാഹചര്യത്തില്‍ അഗ്നിരക്ഷാ സേനയും താലൂക്ക് ദുരന്ത നിവാരണ സേനയും സംയുക്തമായി കോവിഡ് പോസ്റ്റീവായ ആളുകള്‍ താമസിച്ച  വീടുകളും നഗരസഭാ പ്രദേശങ്ങളും അണുവിമുക്തമാക്കി. അന്‍പതിലേറേ വീടുകളാണ് അണുവിമുക്തമാക്കിയത്. തൈതോടീ, ചെരിച്ചങ്ങാടി, കൊടിമരം, മാധവന്‍ കുന്നത്ത് ഭാഗങ്ങളിലാണ് അണുനശീകരണം നടത്തിയത്.

കൊണ്ടോട്ടി മുതുവല്ലൂര്‍ മുണ്ടക്കുളം ഇലക്ട്രിക്കല്‍ സെക്ഷന്‍ ഓഫീസ് വൈദ്യുതി വകുപ്പ് മന്ത്രി എം.എം മണി വീഡിയോ കോണ്‍ഫറന്‍സിലൂടെ ഉദ്ഘാടനം ചെയ്തു. എയര്‍പോര്‍ട്ട് അടക്കം സ്ഥിതി ചെയ്യുന്ന വലിയ പ്രദേശമായ കൊണ്ടോട്ടി - കിഴിശ്ശേരി- പുളിക്കല്‍ - എടവണ്ണപ്പാറ എന്നീ നാല് സെക്ഷനുകള്‍ വിഭജിച്ചാണ് ഇരുപതിനായിരത്തിലധികം ഉപഭോക്താക്കളുമായി മുണ്ടക്കുളം സെക്ഷന്‍ രൂപീകരിച്ചിട്ടുള്ളത്.

34 പേര്‍ രോഗ മുക്തരായി
ഉറവിടമറിയാതെ 15 പേര്‍ക്ക് വൈറസ്ബാധ
രോഗബാധിതരായി ചികിത്സയില്‍ 641 പേര്‍
ഇതുവരെ രോഗബാധ സ്ഥിരീകരിച്ചത് 1,962 പേര്‍ക്ക്
1,099 പേര്‍ക്ക് കൂടി പ്രത്യേക നിരീക്ഷണം
ആകെ നിരീക്ഷണത്തിലുള്ളത് 34,709 പേര്‍