കൊണ്ടോട്ടി ഐ.സി.ഡി.എസ് പ്രൊജക്ട് ഓഫീസ് പരിധിയിലെ പുളിക്കല്‍, വാഴക്കാട്, മുതുവല്ലൂര്‍ ഗ്രാമപഞ്ചായത്തുകളിലെ അങ്കണവാടി വര്‍ക്കര്‍, ഹെല്‍പ്പര്‍  തസ്തികളിലേക്ക് അപേക്ഷ സ്വീകരിക്കുന്നതും ലിസ്റ്റ് തയ്യാറാക്കുന്നതുമായി ബന്ധപ്പെട്ട കാര്യങ്ങള്‍ താത്ക്കാലികമായി നിര്‍ത്തിവച്ചതായി ശിശുവികസന പദ്ധതി ഓഫീസര്‍ അറിയിച്ചു.
 

കേരള വനം വന്യജീവി വകുപ്പ് സോഷ്യല്‍ ഫോറസ്ട്രി ഡിവിഷന്റെ നേതൃത്വത്തില്‍ ജില്ലാ പഞ്ചായത്തില്‍  അന്താരാഷ്ട്ര കടുവ ദിനം ആചരിച്ചു. പഞ്ചായത്ത് കോമ്പൗണ്ടില്‍ നടന്ന ചടങ്ങ് ജില്ലാ പഞ്ചായത്ത് പ്രസിഡന്റ് എ. പി.ഉണ്ണികൃഷ്ണന്‍ ഉദ്ഘാടനം ചെയ്തു. ജില്ലാ പഞ്ചായത്ത് സ്ഥിരം സമിതി ചെയര്‍മാന്‍ ഉമ്മര്‍ അറക്കല്‍, മലപ്പുറം സോഷ്യല്‍ ഫോറസ്ട്രി അസിസ്റ്റന്റ് കണ്‍സര്‍വേറ്റര്‍ എ.പി. ഇംത്യാസ്, സോഷ്യല്‍ ഫോറസ്റ്ററി റേഞ്ച് ഓഫീസീര്‍ കെ.പി.അബ്ദുസമദ്, സെക്ഷന്‍ ഫോറസ്റ്റ് ഓഫീസര്‍മാരായ സി.എം.അഷറഫ്, പി.രഘുനാഥ്, കെ.രാജേഷ്, ജില്ലാ പഞ്ചായത്ത് സെക്രട്ടറി അബ്ദുള്‍ റഷീദ് തുടങ്ങിയവര്‍ പങ്കെടുത്തു.
 

കോവിഡ് കാലത്ത് സാധാരണ രോഗങ്ങള്‍ക്കും ജീവിത ശൈലീ രോഗങ്ങള്‍ക്കും ആരോഗ്യവകുപ്പും ആരോഗ്യകേരളവും തയ്യാറാക്കിയ ഇ-സഞ്ജീവനി ടെലിമെഡിസിന്‍ സംവിധാനം കൂടുതല്‍ ജനകീയമാകുന്നു. ഇതുവഴി ഇന്നലെ വരെ ജില്ലയില്‍ 1997 പേര്‍ക്കാണ് ചികിത്സ നല്‍കിയത്. എല്ലാ ദിവസവും രാവിലെ എട്ടുമുതല്‍ രാത്രി എട്ടുവരെ സേവനം ലഭിക്കും. ജില്ലയില്‍ ഇതിനായി 125 ഡോക്ടര്‍മാരടങ്ങുന്ന ഒരു പാനല്‍ രൂപീകരിച്ചിട്ടുണ്ട്. ജില്ലയില്‍  ഇ-സഞ്ജീവനിയില്‍   150 ലധികം പ്രതിദിന ഒ.പി നടക്കുന്നുണ്ട്.  അവശനിലയിലുളളവര്‍ക്കും കുട്ടികള്‍ക്കും വയോധികര്‍ക്കും ഏറെ സഹായകരമാണ് ഇ-സഞ്ജീവനി ടെലിമെഡിസിന്‍.

സുഭിക്ഷ കേരളം പദ്ധതിയുടെ ഭാഗമായി ക്ഷീര കര്‍ഷകര്‍ക്ക് നല്‍കുന്ന കിസാന്‍ ക്രെഡിറ്റ് കാര്‍ഡ് വേങ്ങര ബ്ലോക്കിലെ 21 കര്‍ഷകര്‍ക്ക് നല്‍കി.  ക്ഷീര സഹകരണ സംഘങ്ങളുടെ സഹായത്തോടെ ബാങ്കുകള്‍ വഴിയാണ് കിസാന്‍ ക്രെഡിറ്റ് കാര്‍ഡ് നല്‍കുന്നത്. 78 പേരാണ് വേങ്ങരയില്‍ നിന്ന്  അപേക്ഷ ഫോം കൈപ്പറ്റിയത്. ഇനിയും കൂടുതല്‍  അപേക്ഷകള്‍ ലഭിക്കുന്നുണ്ടെന്ന്  വേങ്ങര ക്ഷീര വികസന വകുപ്പ് ഓഫീസര്‍ അറിയിച്ചു. ഒന്‍പത് ശതമാനം പലിശയുള്ള കിസാന്‍ ക്രഡിറ്റ് കാര്‍ഡിന്റെ  നാല് ശതമാനം മാത്രമാണ് കര്‍ഷകരില്‍ നിന്നും ഈടാക്കുന്നത്.

കടപ്പാക്കടയിലെ ഗവണ്‍മെന്റ് ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ടില്‍ ഹോട്ടല്‍ മാനേജ്‌മെന്റ് കോഴ്‌സിലേക്ക് ഓഗസ്റ്റ് ആറുവരെ അപേക്ഷിക്കാം. www.fcikerala.org  വെബ്‌സൈറ്റ് വഴി ഓണ്‍ലൈനായി അപേക്ഷ സമര്‍പ്പിക്കാം. വിശദ വിവരങ്ങള്‍ 0474-2767635, 8089561251, 9946320222 എന്നീ നമ്പരുകളില്‍ ലഭിക്കും.
(പി.ആര്‍.കെ നമ്പര്‍ 2028/2020)

അഭിഭാഷകര്‍ക്ക് പിന്നാക്ക വിഭാഗ വികസന വകുപ്പ് നല്‍കുന്ന ധനസഹായത്തിന് അപേക്ഷിക്കാം. ഒ ബി സി വിഭാഗത്തില്‍പ്പെട്ട വാര്‍ഷിക വരുമാനം ഒരു ലക്ഷത്തിനകത്തുള്ളവര്‍ യോഗ്യരാണ്. കേരള ബാര്‍ കൗണ്‍സിലില്‍ 2019 ജൂലൈ ഒന്നിനും 2020 ജൂണ്‍ 30 നും ഇടയില്‍ എന്റോള്‍ ചെയ്ത് സംസ്ഥാനത്ത് പ്രാക്ടീസ് ചെയ്യുന്നവരാകണം. തിരുവനന്തപുരം മുതല്‍ എറണാകുളം വരെയുള്ളവര്‍ അപേക്ഷയും അനുബന്ധ രേഖകളും ഓഗസ്റ്റ് 20 നകം ഡെപ്യൂട്ടി ഡയറക്ടര്‍, പിന്നാക്ക വിഭാഗ വികസന വകുപ്പ്, രണ്ടാം നില, സിവില്‍ സ്റ്റേഷന്‍ കാക്കനാട്, എറണാകുളം-682030 വിലാസത്തില്‍ നല്‍കണം.