ഡി.പി.എം.എസ്.യു കോഴിക്കോടിന്റെ  ഫിംഗര്‍ടിപ്പ് പള്‍സ് ഓക്‌സി മീറ്റര്‍ ടെണ്ടര്‍  അഡ്മിനിസ്ട്രേറ്റീവ് തീരുമാനപ്രകാരം റദ്ദാക്കാന്‍ തീരുമാനിച്ചതായി ആരോഗ്യകേരളം (നാഷണല്‍ ഹെല്‍ത്ത് മിഷന്‍) ജില്ലാ പ്രോഗ്രാം മാനേജര്‍ അറിയിച്ചു. ഫോണ്‍ : 0495 2374990.

പലചരക്ക് കടകള്‍, പച്ചക്കറികടകള്‍ എന്നിവിടങ്ങളില്‍  കടയുടമകള്‍ ഉപഭോക്താക്കള്‍ക്ക് നിര്‍ബന്ധമായും വാങ്ങുന്ന സാധനത്തിന്റെ ബില്ല് നല്‍കണമെന്ന് വടകര താലൂക്ക് സപ്ലൈ ഓഫീസര്‍ അറിയിച്ചു.   ഉപഭോക്താക്കള്‍ ആവശ്യപ്പെട്ടില്ലെങ്കിലും ചീട്ട് നല്‍കണം.  ചീട്ടില്‍ നിര്‍ബന്ധമായും വാങ്ങുന്ന സാധനത്തിന്റെ  പേര്, അളവ്, വില  എന്നിവ ഉണ്ടായിരിക്കണം.  കൂടാതെ കടയുടമയുടെ വിലാസവും സൂചിപ്പിക്കണം. ബില്ല് നല്‍കിയശേഷം മാത്രമേ ഉപഭോക്താക്കളില്‍ നിന്നും തുക ഈടാക്കാന്‍ പാടുള്ളു. 

രക്തദാന സന്നദ്ധ സംഘടനകളുടെ കൂട്ടായ്മയായ രക്തവാഹിനിയുടെ നേതൃത്വത്തില്‍ വിവിധ സ്ഥലങ്ങളിലെ രക്തദാതാക്കളെ സംഘടിപ്പിച്ച് ജനറല്‍ ആശുപത്രി രക്ത ബാങ്കില്‍ രക്തദാനം നടത്തി. രക്ത വാഹിനിയുടെ ജില്ലയിലെ ഇരുപതാമത്തെ ബസ്സാണ് രക്തദാനത്തിനായി എത്തിച്ചേര്‍ന്നത്. മുപ്പതു പേരെ സ്‌ക്രീന്‍ ചെയ്ത് അതില്‍ നിന്നും യോജ്യരായ 20 പേര്‍ രക്ത ദാനം നടത്തി. ജനറല്‍ ആശുപത്രി സൂപ്രണ്ട് ഡോ. ഉമ്മര്‍ ഫാറുൂഖ് വി. ചടങ്ങ് ഉദ്ഘാടനം ചെയ്തു. ജില്ലാ ടി.ബി. ആന്‍ഡ് എയഡ്സ് നിയന്ത്രണ ഓഫീസര്‍ ഡോ.പി.പി.പ്രമോദ്കുമാര്‍  മുഖ്യപ്രഭാഷണം നടത്തി. ജില്ല എയ്ഡ്സ് നിയന്ത്രണ യൂണിറ്റിലെ പ്രിയേഷ് എന്‍.ടി.നന്ദി പറഞ്ഞു.

 കോഴിക്കോട് സിവില്‍സ്റ്റേഷനു സമീപം ടൂറിസം വകുപ്പിനു കീഴില്‍ പ്രവര്‍ത്തിക്കുന്ന ഫുഡ് ക്രാഫ്റ്റ് ഇന്‍സ്റ്റിറ്റ്യൂട്ടില്‍ തൊഴിലധിഷ്ഠിത ഹോട്ടല്‍ മാനേജ്മെന്റ് മേഖലയിലെ പിഎസ്‌സി അംഗീകൃത കോഴ്സുകളിലേക്ക് പ്രവേശനം ആരംഭിച്ചു. ഒരു വര്‍ഷം ദൈര്‍ഘ്യമുള്ള കോഴ്‌സില്‍ എല്ലാവിധ സര്‍ക്കാര്‍ ആനുകൂല്യങ്ങളും ലഭിക്കും.  www.fcikerala.org ല്‍ ഓണ്‍ലൈനായി അപേക്ഷിക്കണം.  അവസാന തീയതി ആഗസ്റ്റ് ആറ്. ഫോണ്‍: 0495 2372131, 9995025076.

കൈതപ്പൊയില്‍ ലിസ കോളേജില്‍ പുതുപ്പാടി ഗ്രാമപഞ്ചായത്തിന്റെ നേതൃത്വത്തില്‍ ആരംഭിക്കുന്ന ഫസ്റ്റ്‌ലൈന്‍ ട്രീറ്റ്‌മെന്റ് സെന്റര്‍ ഉദ്ഘാടനത്തിനൊരുങ്ങുന്നു. ആദ്യഘട്ടത്തില്‍ മൂന്ന് നിലകളിലായി 160 കിടക്കകളാണ് ഒരുക്കിയിട്ടുള്ളത്. 250 കിടക്കകള്‍ ഒരുക്കുവാനുള്ള സൗകര്യം ഇവിടെയുണ്ട്. ആവശ്യമായ മെഡിക്കല്‍  ഉപകരണങ്ങള്‍ സെന്ററില്‍ എത്തിക്കഴിഞ്ഞു. മൂന്ന് വീതം ഡോക്ടര്‍മാര്‍ നഴ്‌സുമാര്‍, നാല് ശുചീകരണ ജീവനക്കാര്‍ തുടങ്ങിയവരെയും നിയമിച്ചു.

 കോവിഡ് പ്രതിസന്ധിക്കിടയിലും ലൈഫ് പദ്ധതി സമയബന്ധിതമായി പൂര്‍ത്തീകരിക്കുമെന്നും പദ്ധതിയിലുള്‍പ്പെടുത്തി സംസ്ഥാനത്ത് 2,21,206 വീടുകളുടെ പ്രവൃത്തി പൂര്‍ത്തീകരിച്ചതായും തദ്ദേശ സ്വയംഭരണ വകുപ്പ് മന്ത്രി എ.സി മൊയ്തീന്‍ പറഞ്ഞു. ലൈഫ് പദ്ധതി മൂന്നാം ഘട്ടത്തിന്റെ ഭാഗമായി ചാത്തമംഗലം ഗ്രാമപഞ്ചായത്തിലെ കോട്ടോല്‍ക്കുന്നില്‍ നിര്‍മ്മിക്കുന്ന ഭവന സമുച്ചയത്തിന്റെ പ്രവൃത്തി ഉദ്ഘാടനം വീഡിയോ കോണ്‍ഫറന്‍സ് മുഖേന നിര്‍വ്വഹിച്ച് സംസാരിക്കുകയായിരുന്നു അദ്ദേഹം.

കോഴിക്കോട് ജില്ലയില്‍ കേന്ദ്ര കാലാവസ്ഥ വകുപ്പ് നാളെ (ജൂലൈ 30) ഓറഞ്ച് അലേര്‍ട്ട് പ്രഖ്യാപിച്ചു.  ഒറ്റപ്പെട്ടയിടങ്ങളില്‍ അതിശക്തമായ മഴയാണ് പ്രവചിക്കപ്പെട്ടിരിക്കുന്നത്. 24 മണിക്കൂറില്‍ 115.6 മില്ലീ മീറ്റര്‍ മുതല്‍ 204.4 മില്ലീ മീറ്റര്‍ വരെ മഴ ലഭിക്കും.  കേരളത്തില്‍ കാലവര്‍ഷം ശക്തമാകുന്നതിനാല്‍ അടുത്ത ദിവസങ്ങളില്‍ വ്യാപകമായി മഴ ലഭിക്കാന്‍ സാധ്യതയുണ്ടെന്നും ചില ജില്ലകളില്‍ കനത്ത മഴയുണ്ടാകുമെന്നും കേന്ദ്ര കാലാവസ്ഥ വകുപ്പ് അറിയിച്ചിട്ടുണ്ട്. 

 ഓണ്‍ലൈന്‍ അധ്യാപനത്തില്‍ പരിശീലനം നല്‍കാനായി സമഗ്ര ശിക്ഷാ കോഴിക്കോട് നടത്തുന്ന ഡിജിഫിറ്റ് (ഡിജിറ്റല്‍ ടീച്ചര്‍ എംപവര്‍മെന്റ് ഡ്രൈവ് ) വന്‍ ഹിറ്റിലേക്ക്.  ഹയര്‍ സെക്കന്ററി അധ്യാപകര്‍ക്കായി നടത്തുന്ന ആദ്യഘട്ട പരിശീലനത്തില്‍ തന്നെ ജില്ലയില്‍ 1,600 പേര്‍ രജിസ്റ്റര്‍ ചെയ്തു.  വിക്ടേഴ്സ് ചാനല്‍ വഴിയുള്ള   ക്ലാസുകള്‍ക്ക് ശേഷം കുട്ടികള്‍ക്ക് ഓണ്‍ലൈനിലൂടെ തുടര്‍  പ്രവര്‍ത്തനങ്ങള്‍ നല്‍കാന്‍ ആവശ്യമായ ഇ-കണ്ടന്റുകള്‍ വികസിപ്പിക്കുക, ലേണിംഗ് മാനേജ്മെന്റ് സിസ്റ്റങ്ങള്‍ പരിചയപ്പെടുത്തുക എന്നിവയിലൂന്നിക്കൊണ്ടാണ് പരിശീലനം രൂപകല്‍പന ചെയ്തിട്ടുള്ളത്.      

ഭിന്നശേഷിക്കാര്‍ക്ക് താങ്ങും തണലുമായി നൊച്ചാട് ഗ്രാമപഞ്ചായത്ത്. വാര്‍ഡുകളിലെ ഭിന്നശേഷിക്കാരായ 23 പേര്‍ക്ക് സന്തോഷത്തിന്റെ വെളിച്ചം പകരുകയാണ് പഞ്ചായത്ത് ആരംഭിച്ച ബഡ്സ് റിഹാബിലിറ്റേഷന്‍ സെന്റര്‍. 

ഭിന്നശേഷിക്കാരിലെ സന്തോഷവും ആനന്ദവും നിലനിര്‍ത്തുകയെന്ന ലക്ഷ്യത്തോടെ   മൂന്നുവര്‍ഷം മുന്‍പാണ് താത്കാലിക കെട്ടിടത്തില്‍  ബഡ്സ് റിഹാബിലിറ്റേഷന്‍ സെന്റര്‍ ആരംഭിച്ചത്.  സെന്ററിന്റെ പുതിയ കെട്ടിടത്തിന്റെ നിര്‍മ്മാണം പൂര്‍ത്തിയായിട്ടുണ്ട്. ഉല്‍ഘാടനം ആഗസ്തില്‍ നടക്കുമെന്ന് പഞ്ചായത്ത് പ്രസിഡന്റ് പി.എം.കുഞ്ഞിക്കണ്ണന്‍ പറഞ്ഞു.