കോവിഡ് 19 പ്രതിരോധവുമായി ബന്ധപ്പെട്ട് കേരള തയ്യല്‍ തൊഴിലാളി ക്ഷേമനിധി ബോര്‍ഡ് നല്‍കി വരുന്ന 1,000 രൂപ ധനസഹായത്തിന് അപേക്ഷ സമര്‍പ്പിക്കുന്നതിനുള്ള അവസാന തീയതി ഓഗസ്റ്റ്  10ന് വൈകീട്ട് അഞ്ചിന് അവസാനിക്കും. ഓണ്‍ലൈന്‍ അപേക്ഷ സമര്‍പ്പിച്ചിട്ടുള്ള തൊഴിലാളികളും പുതിയതായി സമര്‍പ്പിക്കുന്നവരും രേഖകളുടെ പകര്‍പ്പ് അപ്‌ലോഡ് ചെയ്തിട്ടില്ലെങ്കില്‍  ഓഗസ്റ്റ് 10നകം ജില്ലാ ഓഫീസില്‍ എത്തിക്കണം. അല്ലാത്ത പക്ഷം അപേക്ഷകള്‍ നിരസിക്കുമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.

ആനിമല്‍ റിസോഴ്‌സ് ഡെവലപ്‌മെന്റ് പദ്ധതിയുടെ ഭാഗമായി വാണിജ്യ അടിസ്ഥാനത്തിലുള്ള ആടുവളര്‍ത്തല്‍ പദ്ധതിക്കായി ജില്ലക്കനുവദിച്ചിട്ടുള്ള 15 യൂനിറ്റിലേക്ക് താത്പര്യമുള്ള ഗുണഭോക്താക്കളില്‍ നിന്നും അപേക്ഷ ക്ഷണിച്ചു. അപേക്ഷ സമര്‍പ്പിക്കേണ്ട അവസാന തീയതി ഓഗസ്റ്റ് 18. അപേക്ഷകള്‍ക്കും മറ്റ് വിവരങ്ങള്‍ക്കും തൊട്ടടുത്ത മൃഗാശുപത്രിയുമായി ബന്ധപ്പെടണം.
 

കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗത്വമെടുത്ത തൊഴിലാളികള്‍ക്ക് പ്രഖ്യാപിച്ചിട്ടുള്ള കോവിഡ് 19 ധനസഹായത്തിന് അപേക്ഷ സമര്‍പ്പിക്കാനുള്ള അവസാന തീയതി ഓഗസ്റ്റ് 31 വരെ നീട്ടിയതായി എക്‌സിക്യൂട്ടീവ് ഓഫീസര്‍ അറിയിച്ചു.
 

പ്രളയ രക്ഷാപ്രവര്‍ത്തനത്തിന്റെ ഭാഗമായി കൊണ്ടോട്ടി താലൂക്കില്‍ 66ലധികം കുടുംബങ്ങളെ മാറ്റിപാര്‍പ്പിച്ചു. ചാലിയാര്‍ കരകവിഞ്ഞൊഴുകിയതിനെ തുടര്‍ന്ന് വീടുകളിലേക്ക് വെള്ളം കയറിയ കുടുംബങ്ങളും മണ്ണിടിച്ചില്‍ ഭീഷണിമൂലം ജിയോളജി വകുപ്പിന്റെ നിര്‍ദേശപ്രകാരം മാറ്റി പാര്‍പ്പിച്ച കുടുംബങ്ങളുമാണ് വിവിധ ബന്ധുവീടുകളിലും ക്യാമ്പുകളിലുമുള്ളത്.