തളിപ്പറമ്പ് മൊറാഴ ഗവ. ഹയർസെക്കൻഡറി സ്‌കൂൾ മൈതാനം നവീകരിക്കുന്നതിന്‌ ഒരു കോടി രൂപ അനുവദിച്ചു. കായിക വകുപ്പും ആന്തൂർ നഗരസഭയും 50 ശതമാനം വീതം ഫണ്ട് നൽകും. നിലവിലുള്ള മൈതാനം  ക്രമീകരിച്ച്‌ പവലിയനുകൾ, ലൈറ്റുകൾ,  ഓപ്പൺ സ്‌റ്റേജ് എന്നിവ നിർമിക്കാനാണ് ഫണ്ട് അനുവദിച്ചത്. മൊറാഴ സ്കൂളിൻ്റെ വികസനവുമായി ബന്ധപ്പെട്ട് എം.വി ഗോവിന്ദൻ എംഎൽഎയുടെ നേതൃത്വത്തിൽ നടത്തിയ ശ്രമങ്ങൾക്കൊടുവിലാണ് കായിക വകുപ്പും നഗരസഭയും സംയുക്തമായി ഫണ്ട് അനുവദിച്ചത്.

പേരിനൊരു പദ്ധതിയല്ല ഇരിണാവ് വനിതാ ഫിറ്റ്നെസ് സെന്റര്‍. പഞ്ചായത്തിലെ 400 സ്ത്രീകളുടെ ജീവിതശൈലി മാറ്റിമറിച്ച വലിയൊരു തീരുമാനമാണ്. ചിട്ടയായ വ്യായാമം, മികച്ച ആരോഗ്യശീലങ്ങള്‍, വിനോദ യാത്രകള്‍, വിശേഷ ദിവസങ്ങളിലെ ആഘോഷങ്ങള്‍, ആരോഗ്യ ബോധവല്‍ക്കരണ ക്ലാസ്സുകള്‍ എന്നിങ്ങനെ ഫിറ്റ്‌നസ് സെന്റര്‍ ഒരുക്കിയ വിശാലമായ സാധ്യതകളില്‍ ജീവിതത്തിന്റെ താളം കണ്ടെത്തിയെന്ന വലിയ സന്തോഷവും കൂടിയാണ്. 

ഇന്ത്യന്‍ ഇന്‍സ്റ്റിറ്റ്യൂട്ട് ഓഫ് ഹാന്റ്‌ലൂം ടെക്‌നോളജി കണ്ണൂരിന് കീഴിലുള്ള കോസ്റ്റ്യൂം ആന്റ് ഫാഷന്‍ ഡിസൈനിങ്ങ് കോളേജില്‍ അസിസ്റ്റന്റ് പ്രൊഫസര്‍ (ഗസ്റ്റ്)- മലയാളം തസ്തികയില്‍ നിയമനം നടത്തുന്നു. ജൂലൈ ഏഴിന് രാവിലെ 11 മണിക്ക് തോട്ടടയിലെ ഇന്‍സ്റ്റിറ്റ്യൂട്ട് കാമ്പസില്‍ വാക്-ഇന്‍-ഇന്റര്‍വ്യൂ നടക്കും. മലയാളത്തില്‍ ബിരുദാനന്തര ബിരുദവും, യൂജിസി നെറ്റ് , അധ്യാപന പരിചയവുമുള്ള ഉദ്യോഗാര്‍ഥികള്‍ യോഗ്യതയും പ്രവര്‍ത്തി പരിചയവും തെളിയിക്കുന്ന എല്ലാ അസ്സല്‍ സര്‍ട്ടിഫിക്കറ്റുകളും കോപ്പിയും ബയോഡാറ്റയും സഹിതം എത്തണം. ഫോണ്‍ :0497 2835390

കണ്ണൂര്‍ കുടിവെള്ള പദ്ധതിയുടെ ട്രാന്‍സ്മിഷന്‍ മെയിന്‍ വാള്‍വിന്റെ അടിയന്തിര അറ്റകുറ്റപ്പണികള്‍ നടക്കുന്നതിനാല്‍ കണ്ണൂര്‍ കോര്‍പറേഷനിലെ പുഴാതി, പള്ളിക്കുന്ന് സോണുകളില്‍ ജൂലൈ നാല്, അഞ്ച്, ആറ് തീയതികളില്‍ ജലവിതരണം മുടങ്ങുമെന്ന് അസിസ്റ്റന്റ് എക്‌സിക്യൂട്ടീവ് എഞ്ചിനീയര്‍ അറിയിച്ചു.

കാര്‍ഷിക വികസന കര്‍ഷക ക്ഷേമ വകുപ്പും ചേലോറ കൃഷിഭവനും സംയുക്തമായി സംഘടിപ്പിച്ച കര്‍ഷക സഭയും ഞാറ്റുവേല ചന്തയും വില്‍പയും  കണ്ണൂര്‍ കോര്‍പറേഷന്‍ സ്ഥിരസമിതി അധ്യക്ഷ വി.കെ ശ്രീലത ഉദ്ഘാടനം ചെയ്തു. ചേലോറ കമ്മ്യൂണിറ്റി ഹാളില്‍ നടന്ന പരിപാടിയില്‍ കോര്‍പറേഷന്‍ കൗണ്‍സിലര്‍ കെ പ്രദീപന്‍ അധ്യക്ഷനായി. ചെലോറ കൃഷി ഓഫീസര്‍ അനുപ്രസാദ് പദ്ധതി വിശദീകരിച്ചു. കാലാവസ്ഥാ അധിഷ്ഠിത വിള ഇന്‍ഷുറന്‍സ് പദ്ധതിയെപ്പറ്റി വിഷ്ണു പഠന ക്ലാസും നടത്തി. ഡിവിഷന്‍  കൗണ്‍സിര്‍മാരായ ശ്രീജ ആരമ്പന്‍, മിനി അനില്‍ കുമാര്‍, നിര്‍മല, രജനി,അസിസ്റ്റന്റ് കൃഷി ഓഫീസര്‍ പ്രഭ എന്നിവര്‍ സംസാരിച്ചു.

ചിറക്കല്‍ ഗ്രാമപഞ്ചായത്ത് കൃഷിഭവന്റെ ആഭിമുഖ്യത്തില്‍ സംഘടിപ്പിച്ച കര്‍ഷകസഭയും ഞാറ്റുവേലച്ചന്തയും പഞ്ചായത്ത് പ്രസിഡന്റ് പി ശ്രുതി ഉദ്ഘാടനം ചെയ്തു. കൃഷിഭവന്‍ പരിസരത്ത് നടന്ന പരിപാടിയില്‍ വൈസ് പ്രസിഡന്റ് പി അനില്‍കുമാര്‍ അധ്യക്ഷനായി. കാര്‍ഷിക രംഗത്തെ നൂതന സാധ്യതകളെക്കുറിച്ചും കാര്‍ഷിക മേഖലയുമായി ബന്ധപ്പെട്ട വിവിധ പദ്ധതികളെക്കുറിച്ചും കര്‍ഷകസഭ ചര്‍ച്ചചെയ്തു. തുടര്‍ന്ന് വിവിധ വിഷയങ്ങളില്‍ കാര്‍ഷിക ക്ലാസുകളും വിവിധ തരത്തിലുള്ള നടീല്‍ രീതികളെക്കുറിച്ചുള്ള വിശദീകരണങ്ങളും നല്‍കി.

കണ്ണപുരം ഗ്രാമപഞ്ചായത്തിന്റെയും കൃഷിഭവന്റേയും ആഭിമുഖ്യത്തില്‍ ഞാറ്റുവേല ചന്തയും കര്‍ഷക സഭയും ഫലവൃക്ഷ തൈ വിതരണവും കണ്ണപുരം പഞ്ചായത്ത് പ്രസിഡന്റ് കെ രതി ഉദ്ഘാടനം ചെയ്തു. പഞ്ചായത്തിന്റെ കാര്‍ബണ്‍ ന്യൂട്രല്‍ പ്രവര്‍ത്തനങ്ങളില്‍ ഉള്‍പ്പെടുത്തി പഴവര്‍ഗ്ഗ കൃഷി പ്രോത്സാഹിപ്പിക്കുന്നതിന്റെ ഭാഗമായാണ് ഫലവൃക്ഷ തൈ വിതരണം നടത്തിയത്. കണ്ണപുരം കാര്‍ഷിക കര്‍മ്മസേനയുടെ നേതൃത്വത്തില്‍ വിവിധ നടീല്‍ വസ്തുക്കള്‍ കര്‍ഷകര്‍ക്ക് വിപണനത്തിന് ലഭ്യമാക്കി. കൃഷിഭവനു സമീപം ഇ എം.എസ് ഹാളില്‍ നടന്ന പരിപാടിയില്‍ പഞ്ചായത്ത് വൈസ് പ്രഡിഡന്റ് എം ഗണേശന്‍ അധ്യക്ഷത വഹിച്ചു.

കാര്‍ഷിക വികസന കര്‍ഷക ക്ഷേമ വകുപ്പിന്റെ കീഴില്‍ പ്രവര്‍ത്തിക്കുന്ന പട്ടാമ്പി ഫെര്‍ട്ടിലൈസര്‍ ക്വാളിറ്റി കണ്‍ട്രോള്‍ ലാബിന് എന്‍.എ.ബി.എല്‍ (നാഷണല്‍ അക്രഡിറ്റേഷന്‍ ബോര്‍ഡ് ഫോര്‍ ടെസ്റ്റിംഗ് ആന്‍ഡ് കാലിബറേഷന്‍ ലബോറട്ടറീസ്) ന്റെ അംഗീകാരം ലഭിച്ചു. എന്‍.എ.ബി.എല്‍ സര്‍ട്ടിഫിക്കേഷന്‍ ലഭിച്ചതോടെ സ്ഥാപനം ദേശീയ - അന്തര്‍ദേശീയ തലത്തിലേക്ക് ഉയര്‍ന്നു.

പാലക്കാട് ചെമ്പൈ സ്മാരക സര്‍ക്കാര്‍ സംഗീത കോളേജില്‍ 2025-26 അധ്യയന വര്‍ഷത്തേക്കുള്ള ഒന്നാം വര്‍ഷ ബി.എ. ഓണേഴ്സ് കോഴ്സുകളായ മൃദംഗം, വീണ, വയലിന്‍ എന്നിവയില്‍ ഏതാനും സീറ്റുകള്‍ ഒഴിവുണ്ട്. ഫോണ്‍: 8943767684, 8921883049.