അന്നമനട ഗ്രാമപഞ്ചായത്തും കൃഷിഭവനും സംയുക്തമായി ഞാറ്റുവേല സംഘടിപ്പിച്ചു. കെ. കരുണാകരൻ സ്മൃതി മണ്ഡപത്തിൽ നടന്ന പരിപാടി ഗ്രാമപഞ്ചായത്ത് പ്രസിഡന്റ് പി. വി. വിനോദ് ഉദ്ഘാടനം ചെയ്തു.

വിവിധയിനം നാടൻ പച്ചക്കറി വിത്തുകൾ, ചെണ്ടുമല്ലി തൈകൾ, ടിഷ്യൂ കൾചർ വാഴ തൈകൾ, ഫലവൃക്ഷ തൈകൾ, പച്ചക്കറി തൈകൾ, അലങ്കാര ചെടികൾ, ഔഷധസസ്യങ്ങൾ, ജൈവവളങ്ങൾ, കർഷകരിൽ നിന്ന് സംഭരിച്ച നേന്ത്രക്കായയും മറ്റു പച്ചക്കറികളും വിപണനത്തിനായി ഒരുക്കിയിരുന്നു.

വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ടി. കെ. സതീശൻ അധ്യക്ഷനായി. കൃഷി ഓഫിസർ ബിജു മോൻ, പഞ്ചായത്തംഗങ്ങൾ എന്നിവർ പങ്കെടുത്തു.

കണ്ണൂര്‍ ഗവ: വനിതാ ഐടിഐയില്‍ ഐഎംസി നടത്തുന്ന ഹ്രസ്വകാല തൊഴിലധിഷ്ഠിത കോഴ്‌സുകളിലേക്ക് അപേക്ഷിക്കാം.
ഡിപ്ലോമ ഇന്‍ ഇന്ത്യന്‍ ആന്‍ഡ് ഫോറിന്‍ അക്കൌണ്ടിംഗ് (ആറ് മാസം), സര്‍ട്ടിഫിക്കറ്റ് കോഴ്‌സ് ഇന്‍ ടാലി - തിയറി (മൂന്ന് മാസം), മൈക്രോസോഫ്ട് ഓഫീസ് (മൂന്ന് മാസം), സര്‍ട്ടിഫിക്കറ്റ് കോഴ്‌സ് ഇന്‍ ടാലി (രണ്ട് മാസം), മൈക്രോസോഫ്ട് എക്‌സല്‍ (ഒരു മാസം), സര്‍ട്ടിഫിക്കറ്റ് കോഴ്‌സ് റിട്ടേണ്‍ ഫയലിംഗ് (ഒരു മാസം) കോഴ്‌സുകളിലേക്കാണ് അഡ്മിഷന്‍ ആരംഭിച്ചത്. ഫോണ്‍: 9745479354

ഇരിങ്ങാലക്കുട ഞാറ്റുവേല മഹോത്സവം -2025 ൻ്റെ വയോജന സംഗമത്തിന്റെ ഉദ്ഘാടനം മുകുന്ദപുരം തഹസിൽദാർ സിമീഷ് സാഹു നിർവഹിച്ചു. കാർഷിക സമൃദ്ധിയിലേക്ക് നാടിനൊപ്പം എന്ന ആപ്തവാക്യവുമായി ഇരിങ്ങാലക്കുട നഗരസഭ ജൂൺ 27 മുതൽ ജൂലായ് ആറ് വരെ മുനിസിപ്പൽ മൈതാനിയിലാണ് ഞാറ്റുവേല സംഘടിപ്പിക്കുന്നത്.

മുനിസിപ്പൽ ചെയർപേഴ്സൺ മേരിക്കുട്ടി ജോയ് അധ്യക്ഷത വഹിച്ചു. കലാഭവൻ ജോഷി മുഖ്യാതിഥിയായി. 

പാലക്കാട് സര്‍ക്കാര്‍ പോളിടെക്‌നിക് കോളേജില്‍ ട്രേഡ് ഇന്‍സ്ട്രക്ടര്‍, ട്രേഡ്‌സ്മാന്‍ തസ്തികകളില്‍ താല്‍കാലിക നിയമനം. ട്രേഡ് ഇന്‍സ്ട്രക്ടര്‍ തസ്തികയിലേക്ക് ഐ.ടി.ഐ സര്‍വേ(എന്‍.സി.വി.ടി) തത്തുല്യമാണ് യോഗ്യത. ട്രേഡ്‌സ്മാന്‍ തസ്തികയിലേക്ക് ബന്ധപ്പെട്ട ട്രേഡില്‍ ടി.എച്ച്.എസ്.എല്‍.സി, എന്‍.ടിസി, കെ.ജി.സി.ഇ, വി.എച്ച്.എസ്.സി, ഐ.ടി.ഐ തത്തുല്യമാണ് യോഗ്യത. അഭിമുഖം ജൂലൈ ഒമ്പതിന്  രാവിലെ 10ന് നടക്കും.

പട്ടികജാതി വകുപ്പിന് കീഴിലുള്ള മാടായി ഗവ. ഐ.ടി.ഐയില്‍ ഒരുവര്‍ഷ പ്ലംബര്‍, രണ്ട് വര്‍ഷ പെയിന്റര്‍ ജനറല്‍ ട്രേഡുകളിലേക്ക് അപേക്ഷ ക്ഷണിച്ചു. എസ് സി വിഭാഗത്തിന് 80 ശതമാനവും എസ് ടി വിഭാഗത്തിന് 10 ശതമാനവും ജനറലിന് 10 ശതമാനവും സീറ്റുകളുമാണുള്ളത്. www.scdditiadmission.kerala.gov.in വെബ്സൈറ്റ് വഴി ജൂലൈ 16 വരെ അപേക്ഷിക്കാം. ഫോണ്‍: 9447228499, 9995178614

വാളയാറിലെ എയ്ഡ്സ് പരിശോധനാ കേന്ദ്രം ആലത്തൂര്‍ താലൂക്ക് ആശുപത്രിയിലേക്ക് മാറ്റിയ സര്‍ക്കാര്‍ നടപടി സ്റ്റേ ചെയ്യണമെന്ന് ആവശ്യപ്പെട്ട് സ്റ്റേറ്റ് ഹ്യൂമന്‍ റൈറ്റ്‌സ് പ്രൊട്ടക്ഷന്‍ സെന്റര്‍ സമര്‍പ്പിച്ച ഹര്‍ജി പാലക്കാട് മുന്‍സിഫ് കോടതി തള്ളി. അടിസ്ഥാന വികസന പദ്ധതികള്‍ക്കെതിരെ നിരോധന ഉത്തരവ് പുറപ്പെടുവിക്കാന്‍ സാധ്യമല്ലെന്ന് നിരീക്ഷിച്ചുകൊണ്ടാണ് കോടതിയുടെ ഈ നടപടി.

19-ാം ദേശീയ സ്റ്റാറ്റിസ്റ്റിക്‌സ് ദിനാഘോഷത്തിന്റെ ഭാഗമായി സാമ്പത്തിക സ്ഥിതിവിവരക്കണക്ക് വകുപ്പിലെ ഉദ്യോഗസ്ഥർക്ക് വേണ്ടി സംവാദസദസ്സ് ടൗൺ ഹാളിൽ സംഘടിപ്പിച്ചു. ജില്ലാ ഓഫീസിൽ നിന്നും തൃശൂർ, തലപ്പിള്ളി, ചാവക്കാട്, മുകുന്ദപുരം എന്നീ താലൂക്ക് സ്റ്റാറ്റിസ്റ്റിക്കൽ ഓഫീസുകളിൽ നിന്നും രണ്ട് പേരടങ്ങുന്ന ടീമുകളാണ് മത്സരത്തിൽ പങ്കെടുത്തത്.

കുഴല്‍മന്ദം, കോട്ടായി കോളേജ് അപ്ലൈഡ് സയന്‍സില്‍ ഇലക്ട്രോണിക്‌സ് വിഷയത്തില്‍ ഗസ്റ്റ് അധ്യാപക ഒഴിവ്. നിയമനത്തിനുള്ള അഭിമുഖം നാളെ (ജൂലൈ അഞ്ച്)ഉച്ചക്ക് രണ്ടിന് കോളേജില്‍ നടക്കും. ബിരുദാനന്തര ബിരുദവും യു.ജി.സി/നെറ്റ് അല്ലെങ്കില്‍ പി.എച്ച്.ഡിയുമാണ് യോഗ്യത. താല്‍പര്യമുള്ളവര്‍ സര്‍ട്ടിഫിക്കറ്റുകളുടെ പകര്‍പ്പ് സഹിതം കോളേജ് ഓഫീസില്‍ എത്തണമെന്ന് പ്രിന്‍സിപ്പല്‍ അറിയിച്ചു.

പട്ടികജാതി വികസന വകുപ്പിന് കീഴില്‍ കണ്ണൂര്‍ താണയില്‍ പ്രവര്‍ത്തിക്കുന്ന ഗവ. പോസ്റ്റ് മെട്രിക് ഹോസ്റ്റലിലേക്ക് 2025-26 അധ്യയന വര്‍ഷം പോസ്റ്റ് മെട്രിക് കോഴ്സുകളില്‍ പഠിക്കുന്ന പട്ടികജാതി/പട്ടികവര്‍ഗ്ഗ വിഭാഗം വിദ്യാര്‍ഥികളുടെ രക്ഷിതാക്കളില്‍ നിന്നും അപേക്ഷ ക്ഷണിച്ചു. താമസവും ഭക്ഷണവും സൗജന്യമാണ്. വിദ്യാര്‍ഥികള്‍ക്ക് പ്രതിമാസ പോക്കറ്റ് മണിയും നല്‍കും.

കുഴൂർ ഗ്രാമപഞ്ചായത്ത് നിവാസികളുടെ വളരെക്കാലത്തെ ആവശ്യമായിരുന്നു ഒരു ഗ്രാമവണ്ടി. നാടിനെ ഉണർത്തി ഇനി ഗ്രാമ വണ്ടി കുഴൂരിൻ്റെ ഗ്രാമ വീഥികളിലൂടെ സഞ്ചരിക്കും. ബെന്നി ബെഹ്നാൻ എം.പിയും വി.ആർ സുനിൽകുമാർ എം. എൽ.എയും ചേർന്ന് ഗ്രാമ വണ്ടി ഫ്ലാഗ് ഓഫ് ചെയ്തു.
 
പഞ്ചായത്താശുപത്രിയിലേക്കും മറ്റ് അടിയന്തര ആവശ്യങ്ങൾക്കുമായി   ഇനി ഗ്രാമവാസികൾക്ക് ഈ വണ്ടിയെ ആശ്രയിക്കാം. ജില്ലയിലെ മൂന്നാമത്തെയും മാള ബ്ലോക്ക് പഞ്ചായത്തിലെ ആദ്യത്തേയും ഗ്രാമവണ്ടിയാണ് ഇന്നലെ ഫ്ലാഗ് ഓഫ് ചെയ്തത്.