പതിനഞ്ചാം ധനകാര്യ കമ്മീഷന്റെ പരിഗണനാ വിഷയങ്ങള്‍ സംബന്ധിച്ച അഭിപ്രായങ്ങളും ആശങ്കകളും പങ്കുവയ്ക്കുന്നതിനായി കേരളത്തിന്റെ നേതൃത്വത്തില്‍ ദക്ഷിണേന്ത്യന്‍ സംസ്ഥാനങ്ങളിലെ ധനമന്ത്രിമാരുടെ യോഗം ഇന്ന് (ഏപ്രില്‍ 10) തിരുവനന്തപുരത്ത് നടക്കുമെന്ന് ധനമന്ത്രി ഡോ. ടി. എം. തോമസ് ഐസക്ക് വാര്‍ത്താസമ്മേളനത്തില്‍ പറഞ്ഞു. തമിഴ്‌നാട്, കര്‍ണാടകം, ആന്ധ്രാപ്രദേശ്, പുതുച്ചേരി എന്നിവിടങ്ങളില്‍ നിന്നുള്ള മന്ത്രിമാര്‍ യോഗത്തിനെത്തും. മാസ്‌കറ്റ് ഹോട്ടലില്‍ നടക്കുന്ന പരിപാടി രാവിലെ പത്തിന് മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും. ധനസെക്രട്ടറിമാരും യോഗത്തില്‍ സംബന്ധിക്കും.

കൊച്ചി: അങ്കമാലി സബ്‌റീജിയണല്‍ ട്രാന്‍സ്‌പോര്‍ട്ട് ഓഫീസില്‍ നടന്ന വാശിയേറിയ ലേലത്തില്‍ കെ എല്‍ 63 എഫ് 1 എന്ന ഫാന്‍സി നമ്പര്‍ 510,000 രൂപയ്ക്ക് അങ്കമാലി കോതകുളങ്ങര ടെമ്പിള്‍ നഗര്‍ സൂപര്‍ സാന്റ് ആന്റ് അഗ്രിഗേറ്റ്‌സ് മാനേജിംഗ് പാര്‍ട്ണര്‍ കെ ബിനില്‍ ജോണ്‍ കരസ്ഥമാക്കി. ടൊയോട്ട ലാന്റ് ക്രൂയിസര്‍ 200 സീരിസ് വാഹനത്തിനായാണ് നമ്പര്‍ സ്വന്തമാക്കിയത്. ലേലത്തില്‍ എറണാകുളം ആര്‍ടിഒ റെജി പി വര്‍ഗീസ്, അങ്കമാലി ജോയിന്റ് ആര്‍ടിഒ ജി അനന്തകൃഷ്ണന്‍ എന്നിവരുടെ സാന്നിദ്ധ്യത്തിലാണ് ലേലം നടന്നത്. 

മുന്നാക്ക സമുദായങ്ങളിലെ സാമ്പത്തികമായി പിന്നാക്കം നില്‍ക്കുന്ന വിഭാഗങ്ങളുടെ വിവിധ പ്രശ്‌നങ്ങള്‍ പഠിച്ച് സര്‍ക്കാരിന് റിപ്പോര്‍ട്ട് സമര്‍പ്പിക്കുന്നതിന് നിലവിലുളള  കമ്മീഷന്‍ കേരളത്തിലെ മുന്നാക്ക വിഭാഗങ്ങളെ പ്രതിനിധാനം ചെയ്യുന്ന അംഗീകൃത സംഘടനകളില്‍ നിന്നും മുന്നാക്ക വിഭാഗങ്ങളുടെ പട്ടികയില്‍ ഉള്‍പ്പെടാത്തതും എന്നാല്‍ നാളിതുവരെ സംവരണാനുകൂല്യങ്ങള്‍ ഒന്നും ലഭിക്കാത്തതുമായ വിഭാഗക്കാരില്‍ നിന്നും സാമ്പത്തിക സഹായമൊഴികെയുളള നിവേദനങ്ങളും നിര്‍ദേശങ്ങളും ക്ഷണിച്ചു.

കുറ്റിപ്പുറം - ഇടപ്പള്ളി സെക്ഷനില്‍ ദേശീയപാത വികസിപ്പിക്കുന്നതിന് ഭൂമി ഏറ്റെടുക്കുന്നതിനുള്ള 3 എ വിജ്ഞാപനം കേന്ദ്രസര്‍ക്കാര്‍ പ്രസിദ്ധീകരിച്ചു. ദേശീയപാതയുടെ  318 - 349.565 കിലോമീറ്ററില്‍ വരുന്ന തവനൂര്‍, കാലടി, ഈഴവത്തുരുത്തി, പെരുമ്പടപ്പ്, വെളിയങ്കോട്, പൊന്നാനി നഗരം എന്നീ വില്ലേജുകളാണ് ഏപ്രില്‍ രണ്ടിന് പുറത്തിറക്കിയ വിജ്ഞാപനത്തില്‍ ഉള്‍പ്പെട്ടിട്ടുള്ളത്.  ആക്ഷേപമുള്ള ഭൂവുടമകള്‍ വിജ്ഞാപന തീയതി മുതല്‍ 21 ദിവസത്തിനകം ബോധിപ്പിക്കണം.

കൊച്ചി: സാമ്പത്തിക വര്‍ഷം പൂര്‍ത്തിയായപ്പോള്‍ പദ്ധതി നടത്തിപ്പില്‍ ലക്ഷ്യം ഭേദിച്ച് റെക്കോര്‍ഡ് നേട്ടവുമായി എറണാകുളം ജില്ല ഒന്നാം സ്ഥാനത്ത്. 549.7 കോടി രൂപയില്‍ 495 കോടി ചെലവഴിച്ച് 90% നേട്ടമാണ് ജില്ല കൈവരിച്ചത്. എറണാകുളം ജില്ല പഞ്ചായത്ത് 84% നേട്ടത്തോടെ സംസ്ഥാനത്ത് ജില്ല പഞ്ചായത്തുകളില്‍ ഒന്നാം സ്ഥാനം കരസ്ഥമാക്കി. 100% നേട്ടം കൈവരിച്ച തദ്ദേശ സ്ഥാപനങ്ങളുടെ എണ്ണത്തിലും ജില്ല റെക്കോര്‍ഡിട്ടു. മൂന്ന് മുനിസിപ്പാലിറ്റികളിലും എട്ട് ബ്ലോക്ക് പഞ്ചായത്തുകളും 25 ഗ്രാമപഞ്ചായത്തുകളും ഉള്‍പ്പടെ ആകെ 111 തദ്ദേശഭരണ സ്ഥാപനങ്ങളില്‍ 36 എണ്ണം 100% പദ്ധതി തുക വിനിയോഗിച്ചു. 

കൊച്ചി: എറണാകുളം ജനറല്‍ ആശപത്രിയിലേക്ക് കരാര്‍ അടിസ്ഥാനത്തില്‍ മെഡിക്കല്‍ റെക്കോര്‍ഡ് ലൈബ്രേറിയന്‍ കം ഡേറ്റ എന്‍ട്രി ഓപ്പറേറ്റര്‍ (യോഗ്യത-ഡിഗ്രി/ഡിപ്ലോമ ഇന്‍ മെഡിക്കല്‍ റെക്കോര്‍ഡ്‌സ്), ഡേറ്റ എന്‍ട്രി ഓപ്പറേറ്റര്‍ (യോഗ്യത-ഡിഗ്രി/എംഎസ് ഓഫീസ് പ്രവൃത്തി പരിചയം (മലയാളം ടൈപ്പിംഗ് അറിയണം) എന്നീ തസ്തികകളില്‍ താത്കാലികമായി നിയമിക്കുന്നു. ഒറിജിനല്‍ സര്‍ട്ടിഫിക്കറ്റുകള്‍ സഹിതം ഏപ്രില്‍ 11 രാവിലെ 11 ന് സൂപ്രണ്ടിന്റെ ഓഫീസില്‍ നടക്കുന്ന വാക്ക് ഇന്‍ ഇന്റര്‍വ്യൂവില്‍ പങ്കെടുക്കണം.  

കൊച്ചി: ബ്രഹ്മപുരത്ത് മാലിന്യത്തില്‍ നിന്നും വൈദ്യുതി ഉല്‍പാദിപ്പിക്കുന്നതിനുള്ള പുതിയ പ്ലാന്റ് യാഥാര്‍ത്ഥ്യമാകുന്നതിന് പിന്നില്‍ സര്‍ക്കാരിന്റെ ഫലപ്രദമായ ഇടപെടലാണെന്ന് മുഖ്യമന്ത്രി പിണറായി വിജയന്‍. ആശങ്കകള്‍ പരിഹരിച്ചും പരിസ്ഥിതിക്ക് കോട്ടം വരാത്ത രീതിയിലുമാണ് പ്ലാന്റ് സ്ഥാപിക്കുന്നത്. മുഖ്യമന്ത്രിയുടെ ശാസ്‌ത്രോപദേശകനായ എം. ചന്ദ്രദത്തന്‍ ഇക്കാര്യത്തില്‍ സുപ്രധാനപങ്കാണ് വഹിച്ചതെന്നും അദ്ദേഹം പറഞ്ഞു.

ബ്രഹ്മപുരത്ത് മാലിന്യത്തില്‍ നിന്നും വൈദ്യുതി ഉല്‍പ്പാദിപ്പിക്കുന്നതിനുള്ള പ്ലാന്റിന്റെ ശിലാസ്ഥാപനം എറണാകുളം ടൗണ്‍ഹാളില്‍ നിര്‍വഹിക്കുകയായിരുന്നു മുഖ്യമന്ത്രി.