2017 നവംബറില്‍ നടത്തിയ ഓണ്‍ലൈന്‍ അപ്രന്റീസ് പരീക്ഷയില്‍ പങ്കെടുക്കാത്ത ട്രെയിനികള്‍ക്കും പരാജയപ്പെട്ട ട്രെയിനികള്‍ക്കും രണ്ടാംഘട്ട ഓണ്‍ലൈന്‍ പരീക്ഷ ഫെബ്രുവരി 20, 21, 22 തീയതികളില്‍ നടക്കും.  തിരുവനന്തപുരം ജില്ലയിലെ സ്റ്റേറ്റ് എസ്റ്റാബ്ലിഷ്‌മെന്റുകളില്‍ അപ്രന്റീസ് പൂര്‍ത്തിയാക്കിയവരുടെ ഹാള്‍ ടിക്കറ്റ് 16 മുതല്‍ ചാക്ക ആര്‍.ഐ. സെന്ററില്‍ നിന്നും വിതരണം ചെയ്യും പരീക്ഷാര്‍ത്ഥികള്‍ ഹാള്‍ ടിക്കറ്റ് വാങ്ങുന്നതിന് രണ്ട് ഫോട്ടോ കൊണ്ടുവരണം.

പി.എന്‍.എക്‌സ്.569/18

സിവില്‍ സര്‍വീസിന്റെ കാര്യക്ഷമത ഉറപ്പു വരുത്തുന്നത് സംബന്ധിച്ച് സര്‍വീസ് സംഘടനയുമായി 16 ന് രാവിലെ 11 മണിക്ക് സെക്രട്ടേറിയറ്റിലെ സൗത്ത് കോണ്‍ഫറന്‍സ് ഹാളില്‍ നടത്താന്‍ തീരുമാനിച്ചിരുന്ന ഉദ്യോഗസ്ഥ ഭരണ പരിഷ്‌കാര വകുപ്പിന്റെ യോഗം മാറ്റിവച്ചു.

പി.എന്‍.എക്‌സ്.568/18

സംസ്ഥാനത്തെ താലൂക്ക് സപ്ലൈ ഓഫീസ്/സിറ്റി റേഷനിംഗ് ഓഫീസുകളില്‍ പുതിയ റേഷന്‍കാര്‍ഡിനുള്ള അപേക്ഷകള്‍ ഇന്നു മുതല്‍ സ്വീകരിക്കും.  ഇക്കഴിഞ്ഞ റേഷന്‍ കാര്‍ഡ് പുതുക്കല്‍ പ്രക്രിയയില്‍ ഫോട്ടോ എടുത്ത് റേഷന്‍കാര്‍ഡ് പുതുക്കുവാന്‍ കഴിയാത്തവര്‍, റേഷന്‍കാര്‍ഡ് പുതുക്കലുമായി ബന്ധപ്പെട്ട് ആര്‍.സി.എം.എസ് മരവിപ്പിച്ചതിനാല്‍ പുതിയ റേഷന്‍കാര്‍ഡിന് പകരം താല്‍ക്കാലിക കാര്‍ഡ് ലഭിച്ചവര്‍, ഇതുവരെ റേഷന്‍കാര്‍ഡ് സ്വന്തമായി ലഭിക്കാത്തവര്‍ എന്നിവര്‍ക്ക് ആദ്യ ഘട്ടത്തില്‍ അപേക്ഷ നല്‍കാം.

കെ. എസ്. ആര്‍. ടി. സി പെന്‍ഷന്‍ കുടിശിക പ്രാഥമിക സഹകരണ ബാങ്കുകള്‍ മുഖേന ഈ മാസം 20 മുതല്‍ വിതരണം ചെയ്യാന്‍ ആലോചിക്കുന്നതായി സഹകരണ മന്ത്രി കടകംപള്ളി സുരേന്ദ്രന്‍ പറഞ്ഞു. പെന്‍ഷന്‍ വിതരണവുമായി ബന്ധപ്പെട്ട് ഡര്‍ബാര്‍ ഹാളില്‍ നടന്ന സഹകരണ ബാങ്ക് പ്രതിനിധികളുടെ യോഗത്തിനു ശേഷം മാദ്ധ്യമപ്രവര്‍ത്തകരോടു സംസാരിക്കുകയായിരുന്നു അദ്ദേഹം. 

ജനാധിപത്യസമ്പ്രദായത്തിലെ ഗുണപരമായ സാമൂഹ്യമാറ്റങ്ങള്‍ മുന്നോട്ടുകൊണ്ടുപോകുന്നതിനുള്ള ഉത്തരവാദിത്തം യുവതലമുറയ്ക്കുണ്ടെന്ന് ഡെപ്യൂട്ടി സ്പീക്കര്‍ വി. ശശി പറഞ്ഞു. കേരള നിയമസഭയുടെ പാര്‍ലമെന്ററി പഠന പരിശീലന കേന്ദ്രത്തിലെ സര്‍ട്ടിഫിക്കറ്റ് കോഴ്‌സ് പഠിതാക്കളുടെ മാതൃകാ നിയമസഭ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.

സംസ്ഥാന സാമ്പത്തികരംഗത്തിന്റെ നിര്‍ണായകപ്രാധാന്യമുള്ള ഘടകമായി മാറാന്‍ ഭാഗ്യക്കുറി വകുപ്പിനായത് ജീവനക്കാരുടെ പ്രയത്‌നം കൂടി മൂലമാണെന്ന് തുറമുഖ-പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി പറഞ്ഞു. ഭാഗ്യക്കുറി വകുപ്പിന്റെ സുവര്‍ണ ജൂബിലി ആഘോഷ സമാപനവുമായി ബന്ധപ്പെട്ട് വിരമിച്ച ഉദ്യോഗസ്ഥരെ ആദരിക്കുന്ന ചടങ്ങ് ഉദ്ഘാടനം ചെയ്യുകയായിരുന്നു അദ്ദേഹം.

ഐ.എച്ച്.ആര്‍.ഡി 2017 ഡിസംബറില്‍ നടത്തിയ പി.ജി.ഡി.സി.എ/ഡി.സി.എ/ഡി.ഡി.റ്റി.ഒ.എ/സി.സി.എല്‍.ഐ.സി പരീക്ഷാ ഫലം പ്രസിദ്ധീകരിച്ചു. പരീക്ഷാ ഫലവും മാര്‍ക്കിന്റെ വിശദാംശങ്ങളും അതാത് പരീക്ഷാ കേന്ദ്രങ്ങളില്‍ ലഭിക്കും. ഐ.എച്ച്.ആര്‍.ഡി യുടെ വെബ്‌സൈറ്റിലും (www.ihrd.ac.in)ഫലം പ്രസിദ്ധീകരിച്ചിട്ടുണ്ട്. പുനര്‍മൂല്യനിര്‍ണയത്തിനുള്ള അപേക്ഷകള്‍ 26 വരെ പരീക്ഷാ കേന്ദ്രങ്ങളില്‍ സ്വീകരിക്കും.

പി.എന്‍.എക്‌സ്.562/18

കൊച്ചി: കേരള സംസ്ഥാന മത്സ്യത്തൊഴിലാളി കടാശ്വാസ കമ്മീഷന്‍ എറണാകുളം  ഗവണ്മണ്ട് ഗസ്റ്റ് ഹൗസില്‍ നടന്ന സിറ്റിങില്‍ കടാശ്വാസത്തിന് അര്‍ഹത നിശ്ചയിക്കുന്നതുമായി ബന്ധപ്പെട്ട 17 കേസുകള്‍ പരിഗണിച്ചു. സഹകരണ സംഘങ്ങളുമായി ബന്ധപ്പെട്ട ജോയിന്റ്‌രജിസ്ട്രാരുടെ റിപ്പോര്‍ട്ട് ആവശ്യപ്പെട്ടുകൊണ്ട് 42 കേസുകളും ദേശസാല്‍ക്യത/ഷെഡ്യൂള്‍ഡ് ബാങ്കുമായി ബന്ധപ്പെട്ട് 15 കേസുകളും സിറ്റിംഗില്‍ പരിഗണിച്ചിരുന്നു.