സിവില്‍ സ്റ്റേഷനില്‍ ജീവനക്കാരുടെ നേത്യത്വത്തില്‍ ദേശീയ ഭരണ ഘടന ദിനം ആചരിച്ചു. ഭരണ ഘടന നിര്‍മ്മാണസഭ ഭരണ ഘടന അംഗീകരിച്ച 1949 നവംബര്‍ 26 ന്റെ ഓര്‍മ പുതുക്കലാണ് ദേശീയ ഭരണ ഘടന ദിനമായി ആചരിക്കുന്നത്.
കലക്‌ട്രേറ്റ് കോണ്‍ഫ്രന്‍സ് ഹാളില്‍ നടന്ന പരിപാടിയില്‍ എ.ഡി.എം. ടി. വിജയന്‍ പ്രതിജ്ഞ ചൊല്ലിക്കൊടുത്തു.ഡപ്യുട്ടി കലക്ടര്‍മാരായ സി.അബ്ദുല്‍ റഷീദ്, ജയശങ്കര്‍ പ്രസാദ് സി.രാമചന്ദ്രന്‍, ഡോ. ജെ.ഒ.അരുണ്‍, എ.നിര്‍മ്മലകുമാരി എന്നിവര്‍ സന്നിഹിതരമായിരുന്നു.

ജീവന്‍ രക്ഷാ പ്രവര്‍ത്തനങ്ങളുടെ പ്രധാന്യം പൊതുജനങ്ങളില്‍ എത്തിക്കുന്നതിന് സ്‌കൂളുകള്‍ കേന്ദ്രീകരിച്ച്  പരിശീലനം നല്‍കുമെന്ന് ജില്ലാ കലക്ടര്‍ അമിത് മീണ. 'യു കാന്‍' എന്ന പേരിലാണ് പദ്ധതി നടപ്പാക്കുക.  കലക്ടറേറ്റില്‍ നടന്ന ഏയ്ഞ്ചല്‍സ് യോഗത്തില്‍ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം. ഹൃദയം നിശ്ചലമാകുന്ന സമയത്ത് അടിയന്തര ശുശ്രൂഷ നല്‍കുന്ന പ്രവര്‍ത്തനമാണ് നടപ്പാക്കുന്നത്.

തങ്ങളുടെ സ്ഥാപനത്തിലെ മുഴുവന്‍ കുട്ടികളും എംആര്‍ വാക്‌സിനേഷന്‍ എടുത്തിട്ടുണ്ടെന്ന് സ്ഥാപനമേധാവികള്‍ ഉറപ്പുവരുത്തണമെന്ന് ജില്ലാ കലക്ടര്‍ ഉത്തരവിട്ടു. കുട്ടികള്‍ക്ക് വാക്‌സിന്‍ എടുക്കുന്നതിന് സമ്മതപത്രവും വാക്‌സിനേഷന്‍ ഫോറവും നിര്‍ബന്ധമില്ല. അതേ സമയം തന്റെ കുട്ടിക്ക് കുത്തിവയ്പ്പ് എടുക്കേണ്ടതില്ലെന്ന് രക്ഷിതാവ് അധികാരികളെ അറിയിക്കുകയാണെങ്കില്‍ നിര്‍ബന്ധപൂര്‍വും കുത്തിവെപ്പെടുക്കേണ്ടതില്ല. ഇങ്ങനെ കുത്തിവെപ്പില്‍ നിന്നും മാറി നില്‍ക്കുന്നവര്‍ വിവരം ജില്ലാ കലക്ടറെ രേഖാമൂലം അറിയിക്കണമെന്നും കലക്ടര്‍ അറിയിച്ചു.

    ജില്ലാ കലക്ടറുടെ അധീനതയിലുണ്ടായിരുന്ന കെഎല്‍ 10 ക്യു 5070 അംബാസിഡര്‍ കാര്‍ ഡിസംബര്‍ 20ന് രാവിലെ 11ന് ലേലം ചെയ്യും. നിരത ദ്രവ്യം 2500 രൂപ. കൂടുതല്‍ വിവരങ്ങള്‍ക്ക് കലക്ടറേറ്റ് ജി സെക്ഷനില്‍ ബന്ധപ്പെടാം. ഫോണ്‍ 0483 2739576

മലയാളസര്‍വകലാശാല എന്‍.എസ്.എസ് യൂണിറ്റിന്റെ  ആഭിമുഖ്യത്തില്‍ 'സ്ത്രീകളും മാനസികാരോഗ്യ പ്രശ്‌നങ്ങളും' എന്ന വിഷയത്തില്‍  ഡോ. ഹണി ഹസ്സന്‍ പ്രഭാഷണം നടത്തി. ഡോ. അശോക് ഡിക്രൂസിന്റെ അദ്ധ്യക്ഷതയില്‍ നടന്ന ചടങ്ങില്‍ ഡോ. സലീന ബാപ്പുട്ടി, ഡോ. മഞ്ജുഷ ആര്‍.വര്‍മ്മ, കെ.ഹര്‍ഷ എന്നിവര്‍ സംസാരിച്ചു.  

    
    സാമൂഹത്തിന്റെ ആവശ്യങ്ങളാണ് സാമൂഹ്യശാസ്ത്രസിദ്ധാന്തങ്ങള്‍ക്ക് വഴി തെളിയിക്കുന്നതെന്നും അവ സമൂഹത്തെ മുന്നോട്ടുനയിക്കുന്ന ദീപസ്തംഭങ്ങളാണെന്നും പ്രസിദ്ധ സാമൂഹ്യശാസ്ത്രജ്ഞയും കോഴിക്കോട് ഗുരുവായൂരപ്പന്‍ കോളേജ് സോഷ്യോളജി വകുപ്പ് മേധാവിയുമായ എന്‍. രാഖി അഭിപ്രായപ്പെട്ടു. മലയാളസര്‍വകലാശാലയില്‍ 'സോഷ്യോളജിയുടെ സൈദ്ധാന്തിക വീക്ഷണങ്ങള്‍' എന്ന വിഷയത്തില്‍ പ്രഭാഷണം നടത്തുകയായിരുന്നു അവര്‍.

ജീവതശൈലീ രോഗങ്ങള്‍ക്കെതിരെ സംസ്ഥാന ആരോഗ്യ വകുപ്പും ശ്രീ ചിത്ര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സ് ആന്‍ഡ് ടെക്‌നോളജിയും സംയുക്തമായിനടത്തുന്ന ബോധവത്കരണ പരിപാടിയുടെ ഭാഗമായി ഇന്ന് (നവംബര്‍ 29) മലപ്പുറം ഗവ. കോളേജില്‍ ജില്ലാ സമ്മിറ്റ് നടത്തും. ബോധവത്കരണത്തിന്റെ ഭാഗമായി അധ്യാപകര്‍ക്കും തിരഞ്ഞെടുക്കപ്പെട്ട വിദ്യാര്‍ഥികള്‍ക്കും പരിശീലനം നല്‍കിയിരുന്നു. ഇതിന്റെ തുടര്‍പരിപാടിയായാണ് ഇന്ന് സമ്മിറ്റ് നടത്തുന്നത്. ജീവത ശൈലീ രോഗം സംബന്ധിച്ച സര്‍വെ റിപ്പോര്‍ട്ടും പരിപാടിയില്‍ അവതരിപ്പിക്കും.

കുടുംബശ്രീ ജില്ലാ മിഷന് കീഴില്‍ ജേണലിസ്റ്റ് ഇന്റേണിനെ നിയമിക്കുന്നതിനായുള്ള കൂടിക്കാഴ്ച ഡിസംബര്‍ ഒന്നിന് രാവിലെ 10ന് കുടുംബശ്രീ ജില്ലാ മിഷന്‍ ഓഫീസില്‍ നടക്കും. 18നും 30നും ഇടയില്‍ പ്രായമുള്ള ജേണലിസ്റ്റ് ബിരുദവും കംപ്യൂട്ടര്‍ പരിജ്ഞാനവുമുള്ളവര്‍ക്ക് കൂടിക്കാഴ്ചയില്‍ പങ്കെടുക്കാം. ഡിസംബര്‍ ഒന്ന് മുതല്‍ 2018 മെയ് 31 വരെയുള്ള കാലയളവിലേക്കാണ് നിയമനം. ഫോണ്‍ 9072625628.

പാങ്ങ് ഹയര്‍സെക്കന്‍ഡറി സ്‌കൂളില്‍ നിന്നും 2015, 2016, 2017 വര്‍ഷങ്ങളില്‍ പ്ലസ് ടു കഴിഞ്ഞ ഒബിസി വിദ്യാര്‍ഥികള്‍ക്കുള്ള ഇ ഗ്രാന്റ്‌സ് സ്‌കോളര്‍ഷിപ്പ് തുക ഡിസംബര്‍ നാല് മുതല്‍ 15 വരെ വിതരണം ചെയ്യും.