ഹോം വോട്ടിംഗ് നടപടികൾ കാര്യക്ഷമമായി നടപ്പിലാക്കുന്നതിനായി നിയോഗിച്ച ഉദ്യോഗസ്ഥർക്ക് പരിശീലനം നൽകി. ജില്ലാ തിരഞ്ഞെടുപ്പ് അധികൃതരുടെ നേതൃത്വത്തിൽ കലക്ടറേറ്റ് എക്സിക്യൂട്ടീവ് ഹാളിൽ സംഘടിപ്പിച്ച പരിശീലനത്തിൽ ഹോം വോട്ടിങ്ങിന്റെ നടപടിക്രമങ്ങൾ, സുരക്ഷാ മാനദണ്ഡങ്ങൾ, തുടങ്ങിയ വിഷയങ്ങളിൽ നിർദേശങ്ങൾ നൽകി. 25,26,28 തിയതികളിലായി 192 ടീമുകൾക്കാണ് പരിശീലനം നടത്തിയത്.

ജില്ലയിലെ 13 നിയോജകമണ്ഡലങ്ങളിലായി വോട്ടർപട്ടികയിൽ 85 വയസ്സ് പൂർത്തിയായവർ, വോട്ടർപട്ടികയിൽ ഭിന്നശേഷി മാർക്ക് ചെയ്തതും 40 ശതമാനത്തിലധികം ഭിന്നശേഷിയുളളതുമായ വോട്ടർമാർ എന്നിവർക്ക് അപേക്ഷിച്ച പ്രകാരം വീട്ടിലിരുന്ന് വോട്ട് ചെയ്യുന്നതിനുളള സൗകര്യം മാർച്ച്‌ 30 മുതൽ ലഭിക്കും.

 പോളിംഗ് ഡ്യൂട്ടിയ്ക്ക് നിയോഗിച്ചിട്ടുള്ളതും മറ്റ് ഇലക്ഷൻ ഡ്യൂട്ടികളിൽ നിയോഗിച്ചിട്ടുള്ളതുമായ ഉദ്യോഗസ്ഥർ, പോലീസ് ഉദ്യോഗസ്ഥർ, ഡ്രൈവർമാർ, സ്പെഷ്യൽ പോലീസ് ഓഫീസർമാർക്കും പോസ്റ്റൽ ബാലറ്റിനുള്ള അപേക്ഷകൾ ഇന്ന് (29/3/26) സമർപ്പിക്കണം. അപേക്ഷ ഫോം 12 വരണാധികാരികളുടെ ഓഫീസിലോ ജില്ലയിലെ പോളിംഗ് ഉദ്യോഗസ്ഥർക്കുള്ള പരിശീലന കേന്ദ്രങ്ങളിലോ  കളക്ടറേറ്റിലുള്ള പോസ്റ്റൽ ബാലറ്റ് നോഡൽ ഓഫീസറായ ലാൻഡ് ബോർഡ് ചെയർമാൻ്റെ ഓഫീസിലോ ഇന്ന് വൈകിട്ട് ആറുമണിക്കുള്ളിൽ സമർപ്പിക്കണം.  വരണാധികാരികളുടെ ഓഫീസുകളും പോസ്റ്റൽ ബാലറ്റ് നോഡൽ ഓഫീസറുടെ ഓഫീസും ഇന്ന് (29/03/26) തുറന്നു പ്രവർത്തിക്കും.

എല്‍.പി.ജി /പെട്രോള്‍/ ഡീസല്‍ വിതരണ പ്രതിസന്ധിയും പരാതികളും പരിഹരിക്കുന്നതിനും നിരീക്ഷിക്കുന്നതിനുമായി  ജില്ലാ സപ്ലൈ ഓഫീസില്‍ 24 മണിക്കൂര്‍ പ്രവര്‍ത്തിക്കുന്ന കണ്‍ട്രോള്‍ റൂം തുടങ്ങിയതായി ജില്ലാ സപ്ലൈ ഓഫീസര്‍ അറിയിച്ചു.   9188527569, 0474 2794818 നമ്പരുകളില്‍ പൊതുജനങ്ങള്‍ക്ക് പരാതികള്‍ അറിയിക്കാം.

  ജില്ലാ പൊലീസ് പരാതി സമിതി ഏപ്രില്‍ എട്ട്, ഒമ്പത് തീയതികളില്‍ ജില്ലാ കലക്ട്രേറ്റ് കോണ്‍ഫറന്‍സ് ഹാളില്‍ നടത്താനിരുന്ന സിറ്റിംഗ് മാറ്റിവെച്ചതായി സമിതി സെക്രട്ടറി കൂടിയായ ഹുസൂര്‍ ശിരസ്തദാര്‍ അറിയിച്ചു.
 
 

ശാരീരികഅവശതയുള്ള 85 വയസിനു മുകളില്‍ പ്രായമുള്ള മുതിര്‍ന്ന പൗരര്‍, ഭിന്നശേഷിവിഭാഗം വോട്ടര്‍മാര്‍ എന്നിവര്‍ക്കുള്ള ഹോം വോട്ടിംഗ് ജില്ലയില്‍ മാര്‍ച്ച് 30 മുതല്‍ ആരംഭിക്കുമെന്ന് ജില്ലാ തിരഞ്ഞെടുപ്പ് ഓഫീസറായ ജില്ലാ കലക്ടര്‍ എന്‍ ദേവിദാസ്.   രാഷ്ട്രീയകക്ഷി പ്രതിനിധികളുടെ യോഗത്തില്‍ അധ്യക്ഷത വഹിക്കവെ 12 ഡി ഫോമില്‍ അപേക്ഷിച്ചവര്‍ക്കാണ് ഹോം വോട്ടിങ്ങിന് അവസരമെന്ന് വ്യക്തമാക്കി. ഏപ്രില്‍ നാലു വരെ പ്രക്രിയ തുടരും. ജില്ലയില്‍ 14,905 വോട്ടര്‍മാര്‍ക്കാണ് ഹോം വോട്ടിങ്ങിന് അംഗീകാരം ലഭിച്ചത്. ഇതില്‍ 10,853 വോട്ടര്‍മാര്‍ മുതിര്‍ന്ന പൗരരും, 4,052 പേര്‍ ഭിന്നശേഷി വിഭാഗത്തിലുള്ളവരുമാണ്.

ജില്ലയിലെ തിരഞ്ഞെടുപ്പു തയ്യാറെടുപ്പുകളുടെ രണ്ടാംഘട്ടവും സുഗമമായി പുരോഗമിക്കുന്നവെന്ന് ജില്ലാ തിരഞ്ഞെടുപ്പ് ഓഫീസറായ ജില്ലാ കലക്ടര്‍ എന്‍. ദേവിദാസ്. അഡിഷനല്‍ ചീഫ് ഇലക്ട്രല്‍ ഓഫീസര്‍ പി.ബി. നൂഹ്, ഡെപ്യൂട്ടി ചീഫ് ഇലക്ട്രല്‍ ഓഫീസര്‍ ഹര്‍ഷില്‍ മീണ എന്നിവര്‍ പങ്കെടുത്ത യോഗത്തിലാണ് അധ്യക്ഷനായ ജില്ലാ കലക്ടര്‍ പ്രവര്‍ത്തനപുരോഗതി വിശദമാക്കിയത്. രണ്ടാംഘട്ട പരിശീലനത്തിന് ഒരുക്കങ്ങളായി. തിരഞ്ഞെടുപ്പ് ജോലികള്‍ കൃത്യതയോടെ എന്നുറപ്പാക്കാന്‍ പ്രത്യേക പരിശീലനവുമുണ്ടാകും.

ഭിന്നശേഷി വിഭാഗത്തിലെ വോട്ടര്‍മാര്‍ക്കായി വോട്ടിംഗ്ദിനത്തില്‍  പ്രത്യേക സൗകര്യങ്ങള്‍ ഏര്‍പ്പെടുത്തിയതായി ജില്ലാ കലക്ടര്‍ എന്‍ ദേവിദാസ്. എല്ലാ പോളിങ് സ്റ്റേഷനുകളിലും റാമ്പ്, ഇരിപ്പിടം, അടിയന്തിര ചികിത്സ സൗകര്യങ്ങള്‍ എന്നിവ ഏര്‍പ്പെടുത്തും. കുടിവെള്ളം, വാഹന സൗകര്യവും വോട്ടര്‍മാര്‍ക്കായി ഉറപ്പാക്കും.  ഭിന്നശേഷി വോട്ടര്‍മാര്‍ക്കായി ഒരുക്കിയ ഭിന്നശേഷി സൗഹൃദ പോളിങ് സ്റ്റേഷനില്‍ (ഇന്ക്ലൂസീവ് പോളിങ് സ്റ്റേഷന്‍) വോട്ടര്‍മാരെ സഹായിക്കാന്‍ നാലു അംഗനവാടി പ്രവര്‍ത്തകരെയും ഇതര പോളിങ് സ്റ്റേഷനുകളില്‍ ഓരോ അംഗനവാടി ജീവനക്കാരിയും എന്‍ എസ് എസ് വോളന്റിയറും ഉണ്ടാകും.