ജില്ലയിൽ നിയമസഭാ തിരഞ്ഞെടുപ്പിനോടനുബന്ധിച്ച് ഹോം വോട്ടിംഗ്  ആരംഭിച്ചു. ജില്ലയിൽ 111 ടീമുകളെയാണ്  തിങ്കളാഴ്ച ഹോം വോട്ടിംഗിനായി നിയോഗിച്ചിരുന്നത്. രാവിലെ എട്ട് മണി മുതൽ ഉദ്യോഗസ്ഥർ വോട്ടർമാരുടെ വീടുകളിലെത്തി വോട്ട് ചെയ്യാൻ അവസരം ഒരുക്കും. 
വോട്ടിന്റെ രഹസ്യ സ്വഭാവം ഉറപ്പാക്കി സുരക്ഷിതമായ രീതിയിലാണ് വോട്ടെടുപ്പ് നടത്തുക. പ്രിസൈഡിംഗ് ഓഫീസർ, പോളിംഗ് ഓഫീസർ, മൈക്രോ ഒബ്‌സർവർ, പൊലീസ് ഉദ്യോഗസ്ഥൻ, വീഡിയോ ഗ്രാഫർ എന്നിവരടങ്ങിയ സംഘമാണ് ഹോം വോട്ടിംഗിന് എത്തുക.

നിയമസഭാ തെരഞ്ഞെടുപ്പുമായി ബന്ധപ്പെട്ട് സുൽത്താൻ ബത്തേരി (എസ്.ടി) നിയോജക മണ്ഡലത്തിലെ അവശ്യസർവ്വീസ് മേഖലയിൽ ജോലി ചെയ്യുന്ന ജീവനക്കാരിൽ പോസ്റ്റൽ ബാലറ്റിന് അപേക്ഷ സമർപ്പിച്ചവർക്കായി പോസ്റ്റൽ വോട്ടിംഗ് സൗകര്യം ഇന്ന് (മാർച്ച് 31) മുതൽ ആരംഭിക്കും. ഏപ്രിൽ ആറ് വരെ സൗകര്യമുണ്ടാകും. രാവിലെ ഒൻപത് മണി മുതൽ വൈകീട്ട് അഞ്ച് വരെ സുൽത്താൻ ബത്തേരി മിനി സിവിൽ സ്റ്റേഷനിൽ വോട്ട് ചെയ്യുന്നതിന് പോളിംഗ് ബൂത്തുകൾ സജ്ജീകരിച്ചിട്ടുണ്ടെന്ന് റിട്ടേണിംഗ് ഓഫീസർ അറിയിച്ചു.

നിയമസഭാ തിരഞ്ഞെടുപ്പുമായി ബന്ധപ്പെട്ട് വോട്ടവകാശത്തിന്റെ പ്രാധാന്യം ജനങ്ങളിലെത്തിക്കുന്നതിന്റെ ഭാഗമായി സൈക്കിൾ റാലി സംഘടിപ്പിച്ചു. 'പെഡൽ ചെയ്യൂ ഭാവികെട്ടിപ്പടുക്കൂ' എന്ന മുദ്രാവാക്യവുമായി സ്വീപിന്റെ (സിസ്റ്റമാറ്റിക് വോട്ടേഴ്‌സ് എഡ്യൂക്കേഷൻ ആൻഡ് ഇലക്ടറൽ പാർട്ടിസിപ്പേഷൻ) ആഭിമുഖ്യത്തിൽ സംഘടിപ്പിച്ച സൈക്കിൾ റാലി സിവിൽ സ്റ്റേഷനിൽ നടന്ന ചടങ്ങിൽ ജില്ലാ കളക്ടർ കെ ഇമ്പശേഖർ ഉദ്ഘാടനം ചെയ്തു. സിവിൽ സ്റ്റേഷൻ മുതൽ ആലപ്പുഴ ബീച്ച് വരെയാണ് റാലി നടത്തിയത്.

വോട്ടര്‍ അവബോധം ശക്തിപ്പെടുത്തുന്നതിന് വയനാട് ജില്ലാ ഭരണകൂടത്തിന്റെ ആഭിമുഖ്യത്തില്‍ സ്വീപ് പദ്ധതിയുടെ ഭാഗമായി ജില്ലയിലെ വിവിധ ഭാഗങ്ങളില്‍ പരിപാടികള്‍ സംഘടിപ്പിച്ചു. പടിഞ്ഞാറത്തറ ബാണാസുര സാഗറില്‍  അസിസ്റ്റന്റ് കളക്ടര്‍ പി.പി അര്‍ച്ചന പരിപാടികള്‍ ഉദ്ഘാടനം ചെയ്തു. എന്റെ വോട്ട് എന്റെ ശബ്ദം, എന്റെ ആരോഗ്യം എന്റെ ഉത്തരവാദിത്തം എന്നീ ആശയങ്ങള്‍ മുന്‍നിര്‍ത്തി ആരോഗ്യ വകുപ്പിന്റെ സഹകരണത്തോടെ നടത്തിയ തീമാറ്റിക് നൃത്തം ശ്രദ്ധേയമായി. വോട്ടിങ് ബോധവത്ക്കരണവും ചൂടുകാല ആരോഗ്യ മുന്‍കരുതലുകളും പനമരം സ്‌കൂള്‍ ഓഫ് നഴ്സിങിലെ വിദ്യാര്‍ത്ഥികള്‍ നൃ ത്തത്തിലൂടെ അവതരിപ്പിച്ചു. 

തിരഞ്ഞെടുപ്പ് ബോധവൽക്കരണത്തിൻ്റെ ഭാഗമായി ജില്ലാ കളക്ടർ ജി പ്രിയങ്കയും സ്വീപ് നോഡൽ ഓഫീസർ കൂടിയായ അസിസ്റ്റൻ്റ് കളക്ടർ പാർവതി ഗോപകുമാറും ഇൻഫോപാർക്ക് ക്യാമ്പസിൽ ഐടി  പ്രൊഫഷണൽസുമായി സംവദിച്ചു. 

വോട്ട് ചെയ്യേണ്ടത് എല്ലാവരുടെയും കടമയും അവകാശവും ആണെന്ന് ജില്ലാ തിരഞ്ഞെടുപ്പ് ഓഫീസർ കൂടിയായ ജില്ലാ കളക്ടർ പറഞ്ഞു. 

തുടർന്ന് 'പ്രോഗ്രസീവ് ടെക്കിസിൻ്റെ' ആഭിമുഖ്യത്തിൽ ഐടി പ്രൊഫഷണൽസിന്റെ ഫ്ലാഷ് മോബ് അരങ്ങേറി. ഇൻഫോപാർക്ക് സിഇഒ സുശാന്ത് കുറുന്തിൽ, ഇൻഫോപാർക്ക് അഡ്മിനിസ്ട്രേഷൻ എജിഎം എൻ.ജി സജിത്ത് തുടങ്ങിയവർ പങ്കെടുത്തു.

വൈപ്പിൻ നിയോജകമണ്ഡലത്തിലെ അവശ്യ സർവീസ്, പോളിംഗ് ഉദ്യോഗസ്ഥർക്കു വോട്ട് രേഖപ്പെടുത്തുന്നതിനുള്ള സൗകര്യങ്ങൾ സജ്ജമായതായി വരണാധികാരി അറിയിച്ചു.

​രണ്ടു വിഭാഗങ്ങളിൽ ഉള്ളവർക്കും ഏപ്രിൽ ഒന്നു മുതൽ ആറുവരെ വോട്ട് ചെയ്യാം. അവശ്യ സർവീസ് വിഭാഗത്തിൽപ്പെട്ട ജീവനക്കാർക്കായി  പുതുവൈപ്പിലെ സാന്താക്രൂസ് ഹയർ സെക്കണ്ടറി സ്കൂളിൽ പോസ്റ്റൽ വോട്ടിംഗ് സെന്റർ പ്രവർത്തിക്കും. അപേക്ഷ സമർപ്പിച്ചിട്ടുള്ള ജീവനക്കാർക്ക് രാവിലെ 9  മുതൽ വൈകുന്നേരം 5 വരെ ഈ കേന്ദ്രത്തിലെത്തി വോട്ടവകാശം വിനിയോഗിക്കാവുന്നതാണ്.

വിനോദസഞ്ചാരികളെ വോട്ടിംഗിന്റെ ഭാഗമാകാന്‍ പ്രേരിപ്പിക്കുന്നതിന് ഡി.ടി.പി.സിക്ക് കീഴിലുള്ള എല്ലാ ടൂറിസം കേന്ദ്രങ്ങളിലും പ്രത്യേക സെല്‍ഫി പോയിന്റുകള്‍ സജ്ജീകരിച്ചു. സോഷ്യല്‍ മീഡിയ വഴിയുള്ള വിപുലമായ പ്രൊമോഷന്‍ പരിപാടികളും ഇതിനോടനുബന്ധിച്ച് നടക്കും.

വോട്ടെടുപ്പ് ദിവസമായ ഏപ്രില്‍ ഒന്‍പതിന് രാവിലെ എട്ട് മുതല്‍ വൈകിട്ട് ആറ് വരെ വോട്ട് ചെയ്തതിന്റെ തെളിവായി മഷി പുരട്ടിയ വിരല്‍ കാണിക്കുന്ന വോട്ടര്‍മാര്‍ക്ക് ചീങ്ങേരി മലയിലേക്ക് സൗജന്യ പ്രവേശനം അനുവദിക്കുമെന്ന് അധികൃതര്‍ അറിയിച്ചു.

പത്രങ്ങളിലും ടെലിവിഷനിലും മാത്രം കണ്ടിട്ടുള്ള ജില്ലാ കളക്ടറെ നേരിട്ട് കണ്ടപ്പോൾ സുബലക്ഷ്മിക്ക് അമ്പരപ്പും ആഹ്ലാദവും.  

ഹോം വോട്ടിങ് ചെയ്ത എറണാകുളം  നിയോജകമണ്ഡലത്തിലെ വോട്ടർ 91കാരിയായ സുബലക്ഷമിക്ക് ആശംസകൾ നേരുന്നതിന് വേണ്ടിയാണ് ജില്ലാ കളക്ടർ ജി പ്രിയങ്ക  അവരുടെ വീട്ടിലെത്തിയത്. 

പാലക്കാട് ലക്കിടിയില്‍ പ്രവര്‍ത്തിക്കുന്ന അസാപ് കേരളയുടെ കമ്മ്യൂണിറ്റി സ്‌കില്‍ പാര്‍ക്കിന് കീഴില്‍ നടത്തുന്ന ഡ്രോണ്‍ പൈലറ്റ് കോഴ്സിലേക്ക് അപേക്ഷ ക്ഷണിച്ചു. 18 വയസ്സ് പൂര്‍ത്തിയായവര്‍ക്ക് അപേക്ഷിക്കാം. അഞ്ച് ദിവസത്തെ പരിശീലനം വിജയകരമായി പൂര്‍ത്തിയാക്കുന്നവര്‍ക്ക് ഡയറക്ടര്‍ ജനറല്‍ ഓഫ് സിവില്‍ ഏവിയേഷന്‍ നല്‍കുന്ന 25 കിലോ ഗ്രാം വരെ ഭാരമുള്ള ഡ്രോണ്‍ ഉപയോഗിക്കാനുള്ള ലൈസന്‍സ് ലഭിക്കും. എപ്രിൽ നാല് വരെ അപേക്ഷിക്കാം. അസാപ്പിന്റെ കാസര്‍ഗോഡ് വിദ്യാനഗറിലുള്ള കമ്മ്യൂണിറ്റി സ്‌കില്‍ പാര്‍ക്കിലാണ് കോഴ്സ് നടക്കുക. കൂടുതല്‍ വിവരങ്ങള്‍ക്കായി ഫോണ്‍: 9495999667, 9895967998.

 അസാപ് കേരള കമ്മ്യൂണിറ്റി സ്കിൽ പാർക്ക് ചാത്തന്നൂരിൽ ബേസിക് പ്രൊഫിഷ്യൻസി ഇൻ ഇംഗ്ലീഷ് എന്ന അവധിക്കാല കോഴ്സിലേക്ക് അഡ്മിഷൻ ആരംഭിച്ചു. താത്‌പര്യമുള്ളവർക്ക് https://forms.gle/QHGnKbGv9YdPtjFg8 എന്ന വെബ്സൈറ്റ് മുഖേന രജിസ്റ്റർ ചെയ്യാവുന്നതാണ്. വിശദവിവരങ്ങൾക്കായി ഫോൺ: 9495999721.