മലപ്പുറം ജില്ലയില്‍ ഇടിമിന്നലേറ്റ് നാല് വിദ്യാര്‍ഥികള്‍ മരിച്ച സാഹചര്യത്തില്‍ ജാഗ്രത നിര്‍ദ്ദേശം പുറത്തിറക്കി ജില്ലാ ദുരന്ത നിവാരണ അതോറിറ്റി. മനുഷ്യന്റെയും മൃഗങ്ങളുടെയും ജീവനും വൈദ്യുത-ആശയവിനിമയ ശൃംഖലകള്‍ക്കും വൈദ്യുത ചാലകങ്ങളുമായി ബന്ധിപ്പിച്ചിട്ടുള്ള വീട്ടുപകരണങ്ങള്‍ക്കും വലിയ നാശനഷ്ടമാണ് ഇടിമിന്നല്‍ സൃഷ്ടിക്കുന്നത്. കാര്‍മേഘം കണ്ട് തുടങ്ങുന്ന സമയം മുതല്‍ തന്നെ പൊതുജനങ്ങള്‍ മുന്‍കരുതലുകള്‍ സ്വീകരിക്കണം.

ഇടിമിന്നലിന്റെ ആദ്യ ലക്ഷണം കണ്ടുകഴിഞ്ഞാല്‍ ഉടന്‍ തന്നെ സുരക്ഷിതമായ കെട്ടിടത്തിനുള്ളിലേക്ക് മാറുക. തുറസായ സ്ഥലങ്ങളില്‍ തുടരുന്നത് ഇടിമിന്നലേല്‍ക്കാനുള്ള സാധ്യത വര്‍ധിപ്പിക്കും.

മലപ്പുറം ഗവ. ഹയര്‍സെക്കന്‍ഡറി സ്‌കൂളില്‍ വിവിധ എച്ച്.എസ്.എസ്.ടി. തസ്തികകളിലേക്ക് ദിവസ വേതനാടിസ്ഥാനത്തില്‍ നിയമനം നടത്തുന്നു. കൊമേഴ്സ് (സീനിയര്‍, ജൂനിയര്‍), ഇംഗ്ലീഷ്, കമ്മ്യൂണിക്കേറ്റീവ് ഇംഗ്ലീഷ് (സീനിയര്‍), കംപ്യൂട്ടര്‍ ആപ്ലിക്കേഷന്‍, ഹിസ്റ്ററി, മലയാളം, (ജൂനിയര്‍) ഉദ്യോഗാര്‍ഥികള്‍ മെയ് 21 രാവിലെ ഒന്‍പതിനും ഇക്കണോമിക്സ് (സീനിയര്‍, ജൂനിയര്‍), ബോട്ടണി, സോഷ്യോളജി, പൊളിറ്റിക്കല്‍ സയന്‍സ്, അറബിക് (ജൂനിയര്‍) ഉദ്യോഗാര്‍ത്ഥികള്‍ ഉച്ചക്ക് രണ്ടിനും അസ്സല്‍ സര്‍ട്ടിഫിക്കറ്റുകളുമായി ഓഫീസില്‍ അഭിമുഖത്തിന് ഹാജരാകണം. ഫോണ്‍: 0483 2731542.

കൊല്ലന്‍പടി കറുകത്തുരുത്തി വളവ് റോഡില്‍  ഇന്റര്‍ലോക്ക് പ്രവൃത്തി നടക്കുന്നതിനാല്‍  റോഡിലൂടെയുള്ള വാഹനഗതാഗതം മെയ് 15 മുതല്‍ പ്രവൃത്തി തീരുന്നത് വരെ നിരോധിച്ചു. ഈ റോഡിലൂടെ പോകേണ്ട വാഹനങ്ങള്‍ ഗുരുവായൂര്‍- ആല്‍ത്തറ-പൊന്നാനി റോഡ് വഴി പോകണം.

ആരോഗ്യ കേരളം മലപ്പുറത്തിന് കീഴില്‍ മെയ് 14ന് നടത്താനിരുന്ന ഡെന്റല്‍ സര്‍ജന്‍, എപ്പിഡമയോളജിസ്റ്റ്, ഫിസിയോതെറാപ്പിസ്റ്റ് എന്നീ തസ്തികകളിലേക്കുള്ള എഴുത്തു പരീക്ഷ മാറ്റി. പുതുക്കിയ തീയതി പിന്നീട് അറിയിക്കും.

മലപ്പുറം ജില്ലയിലെ മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെ ജില്ല, ബ്ലോക്ക്, ഗ്രാമ പഞ്ചായത്തുകളുടെ 2025-26 സാമ്പത്തിക വര്‍ഷത്തെ അക്കൗണ്ടുകള്‍ സ്റ്റാറ്റിയൂട്ടറി ഓഡിറ്റ് ചെയ്യുന്നതിന് ചാര്‍ട്ടേഡ് അക്കൗണ്ടന്റിനെ നിയമിക്കുന്നു. മഹാത്മാ ഗാന്ധി ദേശീയ ഗ്രാമീണ തൊഴിലുറപ്പ് പദ്ധതി, കേന്ദ്ര/ സംസ്ഥാന സര്‍ക്കാരുകള്‍ നടപ്പിലാക്കുന്ന പദ്ധതികള്‍ സ്റ്റാറ്റിയൂട്ടറി ഓഡിറ്റ് ചെയ്തു മുന്‍പരിചയമുള്ള അംഗീകൃത ചാര്‍ട്ടേഡ് അക്കൗണ്ടന്റുമാര്‍/സ്ഥാപനങ്ങള്‍ എന്നിവര്‍ക്ക് അപേക്ഷിക്കാം.

സാക്ഷരതാമിഷന്‍ അതോറിറ്റി നടത്തുന്ന ഹയര്‍സെക്കന്‍ഡറി തുല്യതാ കോഴ്‌സില്‍ 2025 ജൂലൈയില്‍ ഒന്നാം വര്‍ഷ തുല്യതാപരീക്ഷ എഴുതിയവര്‍ക്കുള്ള രണ്ടാം വര്‍ഷ പരീക്ഷ, ഒന്നാം വര്‍ഷ ഇംപ്രൂവ്‌മെന്റ് പരീക്ഷ/ തുല്യതാപരീക്ഷയില്‍ പരാജയപ്പെട്ടവരുടെ പരാജയപ്പെട്ട വിഷയങ്ങളുടെ ഒന്നും രണ്ടും വര്‍ഷ സപ്ലിമെന്ററി പരീക്ഷയും പുതുതായി ഒന്നാം വര്‍ഷ രജിസ്‌ട്രേഷന്‍ നടത്തിയ പഠിതാക്കളുടെ ഒന്നാം വര്‍ഷ പരീക്ഷ എന്നിവ ജൂലൈ മൂന്ന് മുതല്‍ 26 വരെ നടക്കും.

കുടിശ്ശിക വരുത്തിയ 6,48,708 രൂപയും പലിശയും മറ്റു ചെലവുകളും ഈടാക്കുന്നതിനായി തിരൂരങ്ങാടി വില്ലേജിലെ ബ്ലോക്ക് 03ല്‍, റീസ: 272/4 ലെ 0.016 ഹെക്ടര്‍ പുരയിടവും വസ്തുക്കളും മെയ് 30ന് രാവിലെ 11ന് തിരൂരങ്ങാടി വില്ലേജ് ഓഫീസില്‍ പുനര്‍ലേലം ചെയ്യും. ഫോണ്‍-0494 2461055.

കുടിശ്ശിക വരുത്തിയ 51,055 രൂപയും പലിശയും മറ്റു ചെലവുകളും ഈടാക്കുന്നതിനായി പരപ്പനങ്ങാടി വില്ലേജിലെ ബ്ലോക്ക് 24ലെ റീസ: 570/66  0.0040 ഹെക്ടര്‍ പുരയിടവും വസ്തുക്കളും മെയ് 20ന് രാവിലെ 11ന് പരപ്പനങ്ങാടി വില്ലേജ് ഓഫീസില്‍ പുനര്‍ലേലം ചെയ്യും. ഫോണ്‍ - 0494 2461055.

പുതിയ അധ്യയന വര്‍ഷം ആരംഭിക്കുന്നതിന്റെ ഭാഗമായി കൊണ്ടോട്ടി താലൂക്കിലെ സ്‌കൂള്‍വാഹനങ്ങളുടെ ക്ഷമത പരിശോധന മെയ് 16ന് രാവിലെ എട്ടു മുതല്‍ 11വരെ ചിറയില്‍ ടെസ്റ്റ് ഗ്രൗണ്ടില്‍ നടക്കും. സ്‌കൂള്‍ വിദ്യാര്‍ഥികളുടെ സുരക്ഷ ഉറപ്പു വരുത്തുന്നതിനായാണ് മോട്ടോര്‍ വാഹന വകുപ്പ്  സ്‌കൂള്‍ ബസുകളുടെ പരിശോധന നടത്തി സ്റ്റിക്കര്‍ പതിച്ചു നല്‍കുന്നത്.

കോട്ടക്കല്‍ ആയുര്‍വേദ കോളേജ് ജംഗ്ഷനില്‍ മെയ് 15ന് കള്‍വര്‍ട്ട് നിര്‍മ്മാണ പ്രവൃത്തി ആരംഭിക്കുന്നതിനാല്‍ പുതുപ്പറമ്പ് റോഡിലൂടെയുള്ള ഗതാഗതത്തിന് നിയന്ത്രം ഏര്‍പ്പെടുത്തി. വാഹനങ്ങള്‍ പുതുപ്പറമ്പ് -അരീക്കല്‍ സിറ്റി -ആലച്ചുള്ളി -കോട്ടക്കല്‍ റോഡിലൂടെയും പുതുപ്പറമ്പ് -ഒറ്റത്തെങ്ങ് -മലബാര്‍സ്‌കൂള്‍ - ആലച്ചുള്ളി - കോട്ടക്കല്‍ റോഡിലൂടെയും തിരിഞ്ഞ് പോകണം.