ക്ഷീര വികസന വകുപ്പിന്റെ 2020-21 വാര്‍ഷിക പദ്ധതിയിലെ ക്ഷീര ഗ്രാമം  പദ്ധതിയില്‍ ഉള്‍പ്പെടുത്തി കോട്ടത്തറ ഗ്രാമ പഞ്ചായത്തില്‍ നടപ്പിലാക്കുന്ന അന്യസംസ്ഥാനങ്ങളില്‍ നിന്നും കിടാരി/പശുക്കളെ വാങ്ങി ചെറുകിട ഇടത്തരം ഡയറി ഫാമുകള്‍ തുടങ്ങുന്നതിനും, കറവയന്ത്രം, കാലിത്തൊഴുത്ത് നിര്‍മ്മാണം, കാലികള്‍ക്ക് അന്തരീക്ഷ സമ്മര്‍ദ്ദം ലഘൂകരിക്കുന്നതിനുള്ള ഘടകങ്ങള്‍, മിനറല്‍ മിക്സ്ചര്‍ വിതരണം തുടങ്ങിയ പദ്ധതികള്‍ക്ക് ധനസഹായം നല്‍കുന്നു.

ജില്ലയിലെ ഹോമിയോ ആശുപത്രികളില്‍ ദേശീയ ആയുഷ് മിഷന്‍ മുഖേന നേഴ്‌സ് (ജി എന്‍ എം) തസ്തികയില്‍  നിയമനം നടത്തുന്നു. എഴുത്ത് പരീക്ഷയുടെ അടിസ്ഥാനത്തിലാണ് കൂടിക്കാഴ്ച. 18-നും 40-നും ഇടയില്‍ പ്രായമുള്ളവര്‍ യോഗ്യത തെളിയിക്കുന്ന അസ്സല്‍ സര്‍ട്ടിഫിക്കറ്റും, തിരിച്ചറിയല്‍ രേഖയും, സ്വയം സാക്ഷ്യപ്പെടുത്തിയ പകര്‍പ്പും സഹിതം സെപ്റ്റംബര്‍ 14 ന്  രാവിലെ 10 ന് കാഞ്ഞങ്ങാടുള്ള ജില്ലാ മെഡിക്കല്‍ ഓഫീസ് (ഹോമിയോ)-ല്‍ ഹാജരാകണം. കൂടുതല്‍ വിവരങ്ങള്‍ക്ക് 0467-2206886

സി.കെ.ശശീന്ദ്രന്‍ എം.എല്‍.എ.യുടെ പ്രത്യേക വികസന നിധിയില്‍ നിന്ന് കണിയാമ്പറ്റ ഗ്രാമപഞ്ചായത്തിലെ ചിറ്റാലൂര്‍ക്കുന്ന് കുടിവെള്ള പദ്ധതിക്ക് 2,05,000 രൂപയും ഐ.സി.ബാലകൃഷ്ണന്‍ എം.എല്‍.എ.യുടെ വികസന നിധിയില്‍ നിന്ന് ചിത്രാലക്കര വയല്‍വരമ്പ് റോഡ് റീ ടാറിംഗിനും സൈഡ് കെട്ടലിനും കള്‍വര്‍ട്ട് നിര്‍മ്മിക്കുന്നതിനുമായി 25 ലക്ഷം രൂപയും മുള്ളന്‍കൊല്ലി അക്ഷര വായനശാലയ്ക്ക് കെട്ടിടം നര്‍മ്മിക്കുന്നതിന്  10 ലക്ഷം രൂപയും അനുവദിച്ച് ജില്ലാ കളക്ടര്‍ ഭരണാനുമതി നല്‍കി.

 പകര്‍ച്ചവ്യാധി നിയന്ത്രണ നിയമ പ്രകാരം ജില്ലയില്‍ എടുക്കുന്ന കേസുകള്‍ക്ക് ഇന്ന് മുതല്‍ ( സെപ്റ്റംബര്‍ ഏഴ്) നിലവില്‍ ഈടാക്കുന്നതിന്റെ പത്തിരട്ടി പിഴ ഈടാക്കുമെന്ന് ജില്ലാ ദുരന്ത നിവാരണ അതോറിറ്റി ചെയര്‍മാന്‍ കൂടിയായ ജില്ലാ കളക്ടര്‍ ഡോ ഡി സജിത് ബാബു അറിയിച്ചു. ഐ ഇ സി കോ-ഓര്‍ഡിനേഷന്‍ കമ്മിറ്റി ജില്ലാതല യോഗത്തിലാണ് തിരുമാനം. ലോക് ഡൗണ്‍ നിര്‍ദ്ദേശ ലംഘനം, ക്വാറന്റൈന്‍ ലംഘനം, സാമൂഹ്യ അകലം പാലിക്കത്തവര്‍, മാസ്‌ക് ധരിക്കാത്തവര്‍ തുടങ്ങിയ നിയമ ലംഘനങ്ങള്‍ക്കാണ് പിഴയില്‍ വര്‍ധനവ്.

2020-22 വര്‍ഷത്തേക്കുള്ള ഓക്സിലറി നഴ്സസ് ആന്‍ഡ് മിഡ്വൈഫറി കോഴ്സിലേക്കുള്ള അപേക്ഷാ തീയതി സെപ്തംബര്‍ 17 വരെ നീട്ടിയതായി കാസര്‍ഗോഡ് ജെ.പി.എച്ച്.എന്‍. ട്രെയിനിംഗ് സ്‌കൂള്‍ പ്രിന്‍സിപ്പാള്‍ അറിയിച്ചു.

സമഗ്ര ശിക്ഷാ കേരള ജില്ലാ പ്രൊജക്ട് ഓഫീസിന്  കീഴിലുള്ള ബി.ആര്‍.സി.കളില്‍ ട്രെയ്നര്‍മാരെ നിയമിക്കുന്നതിനുള്ള കൂടിക്കാഴ്ച സെപ്തംബര്‍ 15 ന് രാവിലെ 10.30 ന് സുല്‍ത്താന്‍ ബത്തേരി ഡയറ്റില്‍ നടക്കും. നിലവില്‍ എച്ച്.എസ്.എസ്.ടി/ വി.എച്ച്.എസ്.എസ്.ടി/എച്ച്.എസ്.എസ്.ടി. (ജൂനിയര്‍/എച്ച്.എസ്ടി/പ്രൈമറി അധ്യാപക രായി അംഗീകാരത്തോടെ ജോലി ചെയ്യുന്ന സര്‍ക്കാര്‍/എയ്ഡഡ് അധ്യാപകര്‍ക്ക് പങ്കെടുക്കാം.  ഉദ്യോഗാര്‍ത്ഥികള്‍ അസല്‍ സര്‍ട്ടിഫിക്കറ്റുകളും പകര്‍പ്പും മാതൃ വകുപ്പിന്റെ നിരാക്ഷേപ പത്രവുമായി ഹാജരാകണം.

റീ ബില്‍ഡ് കേരളയുടെ ഭാഗമായി ബാണാസുര സാഗര്‍ അണക്കെട്ടില്‍ ആരംഭിക്കുന്ന  കൂട് മത്സ്യകൃഷി പദ്ധതിയുടെ ഉദ്ഘാടനം ഇന്ന് (സെപ്തംബര്‍ 8) രാവിലെ 11 ന് ഫിഷറീസ് വകുപ്പ് മന്ത്രി ജെ.മേഴ്സികുട്ടിയമ്മ ഓണ്‍ലൈനായി നിര്‍വ്വഹിക്കും. അണക്കെട്ട് പരിസരത്തെ കുറ്റിയാം വയലില്‍ നടക്കുന്ന ചടങ്ങില്‍ സി.കെ ശശീന്ദ്രന്‍ എം.എല്‍.എ അധ്യക്ഷത വഹിക്കും.

ലോക സാക്ഷരതാ ദിനത്തോടനുബന്ധിച്ച് ജില്ലയിലെ 26 തദ്ദേശ സ്വയംഭരണ സ്ഥാപനങ്ങളിലെ മുതിര്‍ന്ന സാക്ഷരതാ പഠിതാക്കളെ ജനപ്രതിനിധികള്‍ ആദരിക്കും. ഇന്ന് (സെപ്തംബര്‍ 8) രാവിലെ 9 മണിക്ക്  ജില്ലാ സാക്ഷരതാ സമിതിയുടെ നേതൃത്വത്തില്‍ പഠിതാക്കളുടെ ഭവനങ്ങളില്‍ എത്തി ജനപ്രതിനിധികളും സാക്ഷരതാ പ്രവര്‍ത്തകരും ചേര്‍ന്നാണ് ആദരിക്കുന്നത്. പൊഴുതന പഞ്ചായത്തിലെ സുഗന്ധഗിരി ചെന്നായ്കവല കോളനിയിലെ 80 കാരിയായ കുങ്കി അമ്മയെ സി.കെ ശശീന്ദ്രന്‍ എം.എല്‍.എ ആദരിക്കും. പടിഞ്ഞാറത്തറ പഞ്ചായത്തിലെ പുഞ്ചവയല്‍ കോളനിയിലെ 80 കാരികളായ കര്‍ത്ത, കറുമ എന്നീ മുതിര്‍ന്ന പഠിതാക്കളെ ജില്ലാ പഞ്ചായത്ത് പ്രസിഡന്റ് കെ.ബി നസീമ ആദരിക്കും.

കോടോം- ബേളൂര്‍ പഞ്ചായത്തിലെ ക്ലിനിപ്പാറ പട്ടികവര്‍ഗ്ഗ കോളനിയില്‍  കുടുംബശ്രീ ബ്രിഡ്ജ് കോഴ്സ് സെന്റര്‍ ആരംഭിച്ചു. കോടോം ബേളൂര്‍ ഗ്രാമപഞ്ചായത്ത് പ്രസിഡന്റ് സി കുഞ്ഞിക്കണ്ണന്‍ ഉദ്ഘാടനം നിര്‍വഹിച്ചു. കുടുംബശ്രീ ജില്ലാ മിഷന്‍ കോര്‍ഡിനേറ്റര്‍ ടി ടി സുരേന്ദ്രന്‍ മുഖ്യാതിഥിയായി. അസിസ്റ്റന്റ് ജില്ലാ മിഷന്‍ കോര്‍ഡിനേറ്റര്‍ പ്രകാശന്‍ പാലായി, വാര്‍ഡ് മെമ്പര്‍ പുഷ്പ എന്നിവര്‍ ചടങ്ങില്‍ പങ്കെടുത്തു.

ചെറുവത്തൂര്‍ പഞ്ചായത്തിന്റെ നോതൃത്വത്തില്‍  കാടങ്കോട് നിര്‍മ്മിച്ച ബ്ലോസ്സം ബഡ്സ് സ്‌കൂള്‍  എം രാജഗോപാലന്‍ എം എല്‍ എ ഉദ്ഘാടനം ചെയ്തു.  ജില്ലയില്‍ പുതിയതായി വിഭാവനം ചെയ്ത് 11 ബഡ്സ് സ്‌കൂളുകളില്‍ പൂര്‍ത്തീകരിച്ച നാലാമത്തെ ബഡ്്സ് സ്‌കൂളാണിത്. 2017-18 വാര്‍ഷിക പദ്ധതിയില്‍ ഉള്‍പ്പെടുത്തി നിര്‍മ്മാണം ആരംഭിച്ച ബഡ്സ് 35 ലക്ഷം രൂപ ചിലവിലാണ് കെട്ടിട നിര്‍മ്മാണം പൂര്‍ത്തിയാക്കിയത് .അടിസ്ഥാന സൗകര്യളൊരുക്കാന്‍ ജില്ലാ മിഷന്റെ ഭാഗമായി 12.5 ലക്ഷം രൂപയും ലഭിച്ചു.  രണ്ട് ക്ലാസ് മുറിയും രണ്ട് ടോയ്ലെറ്റും  വിശാലമായ ഹാളും അടുക്കളയും ചേര്‍ന്നതാണ് പൂതിയ ബഡ്സ് സ്‌കൂള്‍ കെട്ടിടം.