നിലവില്‍ വിദേശത്ത് നിന്നു വരുന്നവരെ ജില്ലാ ഭരണകൂടത്തിന്റെ നേതൃത്വത്തിലാണ് ക്വാറന്റീന്‍ ചെയ്ത് വരുന്നത്. എന്നാല്‍ ഇത്തരത്തില്‍ ക്വാറന്റീന്‍ ചെയ്യുന്നതിന് പ്രായോഗിക ബുദ്ധിമുട്ടുകള്‍ നേരിടുന്നതിനാല്‍, ഇനിമുതല്‍ വിദേശത്ത് നിന്ന് വരുന്നവര്‍ക്ക് അതത് തദ്ദേശ സ്വയംഭരണ സ്ഥാപനങ്ങള്‍ സൗകര്യം ഒരുക്കി നല്‍കണം. 

ജില്ലയിലെ എല്ലാ വ്യാപാര സ്ഥാപനങ്ങളിലും സന്ദര്‍ശകരുടെ പേര് വിവരം അടങ്ങുന്ന രജിസ്റ്റര്‍ സൂക്ഷിക്കേണ്ടതാണ്.  ഇത്തരത്തില്‍ രജിസ്റ്റര്‍ സൂക്ഷിക്കാത്ത സ്ഥാപനങ്ങള്‍ക്കെതിരെ കര്‍ശന നടപടികള്‍ സ്വീകരിക്കുന്നതാണ്. അതത് തഹസില്‍ദാരുടെ നേതൃത്വത്തില്‍ താലുക്കുകളിലെ കടകള്‍ പരിശോധിക്കുന്നതിന് സ്‌പെഷ്യല്‍ സ്‌ക്വാഡുകളെ നിയമിക്കും. 

നിലവില്‍ ജില്ലയില്‍ കോണ്‍ടാക്ട് ട്രേസിംഗ് നടത്തുന്നത് ജില്ലാ തലത്തിലാണ്. കൂടുതല്‍ കേസുകള്‍ റിപ്പോര്‍ട്ട് ചെയ്യാന്‍ സാഹചര്യമുള്ളതിനാല്‍ അതത് ബ്ലോക്ക് സിഎച് സികളുടെ ചുമതലയില്‍ കോണ്‍ടാക്റ്റുകള്‍ ട്രേസ് ചെയ്യാനുള്ള നടപടികള്‍ സ്വീകരിക്കണമെന്ന് ജില്ലാ കലക്ടര്‍ നിര്‍ദ്ദേശിച്ചു. ഇതിനായി സ്റ്റൂഡന്റ് വളണ്ടിയര്‍മാര്‍, അസാപിലെ ഉദ്യോഗസ്ഥര്‍ എന്നിവര്‍ ഉള്‍പ്പെടെയുള്ളവരുടെ സേവനം ഉപയോഗപ്പെടുത്താം.

തദ്ദേശസ്വയംഭരണ സ്ഥാപനങ്ങളിലെ മുഴുവന്‍ വാര്‍ഡുകളിലും നല്ല രീതിയില്‍ ജാഗ്രതാ സമിതികള്‍(റാപ്പിഡ് റെസ്‌പോണ്‍സ് ടീമുകള്‍) പ്രവര്‍ത്തിച്ചുവരുന്നുണ്ട്. വാര്‍ഡുതല ജാഗ്രതാ സമിതികളുടെ ചിട്ടയോടെയുള്ള പ്രവര്‍ത്തനം രോഗബാധ പടരാതെ നിര്‍ത്തുന്നതിന് ഇടയായിട്ടുണ്ട്. ഇത്തരം സമിതികളുടെ പ്രവര്‍ത്തനം തുടര്‍ന്നും മികച്ച് രീതിയില്‍ മുന്നോട്ട് പോകണം. അതത് തദ്ദേശ സ്വയംഭരണ സ്ഥാപനങ്ങള്‍ ജാഗ്രതാ സമിതികളെ ശക്തീകരിക്കാനുള്ള നടപടി സ്വീകരിക്കണമെന്ന് കലക്ടര്‍ നിര്‍ദ്ദേശിച്ചു. 

ജില്ലയിലെ തദ്ദേശ സ്വയംഭരണ സ്ഥാപനങ്ങള്‍/ആരോഗ്യ വകുപ്പ് നല്‍്കുന്ന പ്രപ്പോസല്‍ പരിശോധിച്ച് കണ്ടൈന്‍മെന്റ് സോണുകളാക്കി മാറ്റുന്നതിന് വേണ്ട നടപടി സ്വീകരിക്കുന്നതിനും തുടര്‍ പരിശോധനകള്‍ ഏകോപിപ്പിക്കുന്നതിനും അഡീഷണല്‍ ജില്ലാ മജിസ്‌ട്രേറ്റിന്റെ നേതൃത്വത്തില്‍ പ്രത്യേക ടീം രൂപികരിച്ചു.

വയനാട് ജില്ലയില്‍ ഏകദേശം 20% ത്തോളം പട്ടിക വര്‍ഗ വിഭാഗമാണുള്ളത്.  കോവിഡ് 19 രോഗ വ്യാപനം  ജില്ലയില്‍ അധികരിച്ചാല്‍ ഇവരെ പ്രത്യേകമായി സംരക്ഷിക്കേണ്ടി വരും. ഇവര്‍ ഭൂരിപക്ഷവും കോളനികളിലാണ് ജീവിച്ചുവരുന്നത് എന്നത് വേഗത്തില്‍ രോഗം വ്യാപിക്കുന്നതിന് കാരണമാകും. 

ജില്ലയില്‍ നിലവിലുള്ള കോവിഡ് ആശുപത്രിക്ക് പുറമെ, രോഗബാധിതരെ ചികിത്സക്കുന്നതിനുള്ള താല്കാലിക ആശുപത്രി  സംവിധാനങ്ങളായ കോവിഡ് ഫസ്റ്റ്‌ലൈന്‍ ട്രീറ്റ്‌മെന്റ് സെന്ററുകള്‍ (എഫ്.എല്‍.ടി.സി) പഞ്ചായത്തുകള്‍ തോറും ആരംഭിക്കുന്നതിന് സംവിധാനങ്ങള്‍ കണ്ടെത്തിയതായി ജില്ലാ കലക്ടര്‍ ഡോ. അദീല അബ്ദുള്ള അറിയിച്ചു. ആരോഗ്യവകുപ്പിന്റെ കണക്കുകൂട്ടല്‍ പ്രകാരം ആഗസ്റ്റ്, സെപ്റ്റബര്‍ മാസങ്ങളില്‍ രോഗബാധിതരുടെ എണ്ണം ക്രമാതീതമായി വര്‍ധിക്കാന്‍ സാധ്യതയുണ്ട്. 

തൊണ്ടര്‍നാട്, പൂതാടി പഞ്ചായത്തുകളിലും പുതിയ കണ്ടെയ്ന്‍മെന്റ് സോണുകള്‍

കോവിഡ് വ്യാപനവുമായി ബന്ധപ്പെട്ട് തിരുനെല്ലി ഗ്രാമപഞ്ചായത്തിലെ എല്ലാ വാര്‍ഡുകളും തൊണ്ടര്‍നാട് ഗ്രാമപഞ്ചായത്തിലെ 1, 2, 10, 15 വാര്‍ഡുകളും പൂതാടി ഗ്രാമപഞ്ചായത്തിലെ 3, 6, 7, 8, 15 വാര്‍ഡുകളും കൂടി കണ്ടെയ്ന്‍മെന്റ് സോണുകളായി ജില്ലാ കലക്ടര്‍ ഡോ. അദീല അബ്ദുല്ല പ്രഖ്യാപിച്ചു. ഇതോടൊപ്പം നിലവില്‍ കണ്ടെയ്ന്‍മെന്റ് സോണുകളായ തൊണ്ടര്‍നാട് ഗ്രാമപഞ്ചായത്തിലെ 3, 4, 11, 12, 13 വാര്‍ഡുകള്‍, പൂതാടി ഗ്രാമപഞ്ചായത്തിലെ 4, 5 വാര്‍ഡുകള്‍ കണ്ടെയ്ന്‍മെന്റ് സോണായി തുടരും.

വയനാട് ജില്ലയില്‍ ഇന്ന് (12.07.20) 19 പേര്‍ക്ക് കോവിഡ് സ്ഥിരീകരിച്ചതായി ജില്ലാ മെഡിക്കല്‍ ഓഫീസര്‍ ഡോ.ആര്‍. രേണുക അറിയിച്ചു.