ഇതര സംസ്ഥാനങ്ങളില്‍ നിന്നായി ചൊവ്വാഴ്ച (ജൂലൈ 7) നിസാമുദീന്‍ - എറണാകുളം, മുംബൈ-തിരുവനന്തപുരം, ന്യൂഡല്‍ഹി-തിരുവനന്തപുരം സ്‌പെഷ്യല്‍ ട്രെയിനുകളിലായി പത്തനംതിട്ട ജില്ലക്കാരായ 28 പേര്‍കൂടി എത്തി. ഇവരില്‍ മൂന്നുപേരെ കോവിഡ് കെയര്‍ സെന്ററുകളിലും 25 പേരെ വീടുകളിലും നിരീക്ഷണത്തില്‍ പ്രവേശിപ്പിച്ചു.

തിരുവനന്തപുരം, കൊച്ചി, കരിപ്പൂര്‍, അന്താരാഷ്ട്ര വിമാനത്താവളങ്ങള്‍ വഴി ചൊവ്വാഴ്ച (ജൂലൈ 7) 12 വിമാനങ്ങളിലായി പത്തനംതിട്ട ജില്ലക്കാരായ 154 പ്രവാസികള്‍കൂടി എത്തി. ഇവരില്‍ 34 പേരെ വിവിധ കോവിഡ് കെയര്‍ സെന്ററുകളിലും ഒരു ഗര്‍ഭിണി ഉള്‍പ്പെടെ 120 പേരെ വീടുകളിലും നിരീക്ഷണത്തിലാക്കി.

സുഭിക്ഷ കേരളം പദ്ധതിയുടെ ഭാഗമായി നടപ്പിലാക്കുന്ന പച്ചക്കറി കൃഷി വികസന പദ്ധതിയില്‍ ഏറത്ത് ഗ്രാമപഞ്ചായത്തിലെ നാലാം വാര്‍ഡ് ജനപ്രതിനിധി രാജേഷ് അമ്പാടി വേറിട്ട ഒരു പരിപാടിയുമായി രംഗത്തിറങ്ങിയത് ശ്രദ്ധയമാകുന്നു. തന്റെ വാര്‍ഡിലെ മുഴുവന്‍  കുടുംബങ്ങള്‍ക്കും പച്ചക്കറിതൈ നേരിട്ട് എത്തിക്കുന്നതിനായി 'തൈ വണ്ടി' എന്ന ആശയം നടപ്പാക്കിയിരിക്കുകയാണ്.  

കോവിഡ് 19 സമൂഹ വ്യാപനം തടയുന്നതിനായി ജില്ലാ ആസ്ഥാനമായ പത്തനംതിട്ട നഗരസഭാ പരിധിയിലും തിരുവല്ലാ നഗരസഭാ പരിധിയിലും പൊതുസമ്മേളനങ്ങള്‍, പ്രകടനങ്ങള്‍, ധര്‍ണകള്‍ തുടങ്ങിയ പൊതുജന കൂടിച്ചേരലുകള്‍ ജൂലൈ ഏഴു മുതല്‍ ജൂലൈ 14 വരെ കേരളാ ദുരന്ത നിവാരണ നിയമം 2005 സെക്ഷന്‍ 34 വകുപ്പ് പ്രകാരം നിരോധിച്ച് ജില്ലാ കളക്ടര്‍ ഉത്തരവായി.

ജില്ലയിലെ  തീരദേശ മേഖലയിലെ  എട്ട് സ്‌കൂളുകള്‍ക്ക് ഇനി പുതിയ ഹൈടെക് കെട്ടിടം. നിര്‍മാണ പ്രവര്‍ത്തനങ്ങളുടെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയന്‍ വീഡിയോ കോണ്‍ഫറന്‍സിംഗിലൂടെ  നിര്‍വഹിച്ചു.

മത്സ്യകര്‍ഷക ദിനാചരണത്തിന്റെയും  സുഭിക്ഷ കേരളം ബയോഫ്‌ലോക്ക് മത്സ്യ സംരംഭകര്‍ക്കായുള്ള പരിശീലന പരിപാടിയുടെയും ഉദ്ഘാടനം ഇന്ന്(ജൂലൈ 10) രാവിലെ 10 ന് ഫിഷറീസ് വകുപ്പ് മന്ത്രി ജെ മേഴ്‌സിക്കുട്ടിയമ്മ തേവള്ളി സീഡ് സെന്ററില്‍ വീഡിയോ കോണ്‍ഫറന്‍സിംഗിലൂടെ നിര്‍വഹിക്കും.

ഐ എച്ച് ആര്‍ ഡി യുടെ ടെക്‌നിക്കല്‍ ഹയര്‍ സെക്കണ്ടറി സ്‌കൂളുകളില്‍ 11-ാം ക്ലാസ് പ്രവേശനത്തിന് അപേക്ഷിക്കാം.  ihrd.kerala.gov.in/thss  എന്ന വെബ്‌സൈറ്റ് മുഖേന ഓണ്‍ലൈനായും സ്‌കൂളുകളില്‍ നേരിട്ടും അപേക്ഷിക്കാം. അപേക്ഷ സമര്‍പ്പിക്കുന്നതിനുള്ള ലിങ്ക്  ihrd.ac.in  എന്ന വെബ്‌സൈറ്റില്‍ ലഭിക്കും. വിശദ വിവരങ്ങള്‍ക്ക്  ihrd.itd@gmail.com എന്ന ഇ-മെയില്‍ വിലാസത്തില്‍ ബന്ധപ്പെടാം.
 (പി.ആര്‍.കെ നമ്പര്‍ 1844/2020)  

കലഞ്ഞൂര്‍ ഗവ. ഹയര്‍ സെക്കന്‍ഡറി സ്‌കൂളിന്റെ മൂന്നു കോടി രൂപയുടെ പുതിയ കെട്ടിടത്തിന്റെ ശിലാസ്ഥാപനം അഡ്വ.കെ.യു.ജനീഷ് കുമാര്‍ എംഎല്‍എ  നിര്‍വഹിച്ചു.  പൊതു വിദ്യാഭ്യാസ സംരക്ഷണ യജ്ഞത്തിന്റെ ഭാഗമായി കിഫ്ബിയില്‍ ഉള്‍പ്പെടുത്തിയാണ് മൂന്നു കോടിയുടെ പദ്ധതി അനുവദിച്ചത്.
        വിഎച്ച്എസ്ഇ ബ്ലോക്കുകളും, ഹയര്‍ സെക്കന്‍ഡറി ലാബും, വിഎച്ച്എസ്‌സി ബ്ലോക്കിന്റെ റൂഫിംഗും, സെപ്റ്റിക് ടാങ്കും, ഇലക്ട്രിക്കല്‍ വര്‍ക്കുമാണ് പുതിയതായി നിര്‍മിക്കുന്നത്. അന്താരാഷ്ട്ര നിലവാരത്തിലാണ് സ്‌കൂള്‍ പുനര്‍നിര്‍മിക്കുന്നത്.

ഇതര ജില്ലകളില്‍ കോവിഡ്  രോഗബാധ വര്‍ദ്ധിക്കുന്ന സാഹചര്യത്തില്‍ ജില്ലയില്‍ നിയന്ത്രണങ്ങള്‍ കടുപ്പിക്കുമെന്ന് ജില്ലാ കലക്ടര്‍ ബി അബ്ദുള്‍ നാസര്‍. ജനങ്ങള്‍ ജാഗ്രത കൈവിടരുതെന്നും കലക്ടര്‍ അഭ്യര്‍ത്ഥിച്ചു. പുറത്തിറങ്ങുന്നവര്‍ മാസ്‌ക്ക് ധരിക്കാന്‍ മറക്കരുത്. സ്ഥാപനങ്ങളില്‍ കൈ കഴുകലും  സാനിറ്റൈസറും ഉറപ്പാക്കണം. സാമൂഹിക അകലം പാലിക്കണം. വഴിയോരക്കച്ചവടവും മത്സ്യ വില്പനയും നിരോധിച്ചിട്ടില്ലെങ്കിലും അവ അപകടകരമായ സ്ഥിതിവിശേഷമുണ്ടാക്കരുത്. ഓഫീസുകളില്‍ നിയന്ത്രണം ഏര്‍പ്പെടുത്തിയതും  ഹാര്‍ബറുകള്‍ അടച്ചിട്ടതും പൊതുന• മാത്രം ലക്ഷ്യം വച്ചാണ്.

മത്സ്യബന്ധനത്തിന് ഉള്‍പ്പടെ മറ്റ് സംസ്ഥാനങ്ങളില്‍ നിന്നും തൊഴിലാളികളെ കൊണ്ടുവരുന്നവര്‍ എത്തുന്നവരുടെ ക്വാറന്റയിന്‍ സൗകര്യങ്ങള്‍ സ്വന്തം ചെലവില്‍ ഉറപ്പാക്കിയിരിക്കണം. വരുന്നവരുടെ താമസ സൗകര്യം ഉള്‍പ്പടെ വിശദ വിവരങ്ങള്‍    കലക്‌ട്രേറ്റിലെ ദുരന്ത നിവാരണ സെല്ലില്‍ നല്‍കണമെന്നും ജില്ലാ കലക്ടര്‍ ബി അബ്ദുല്‍ നാസര്‍ അറിയിച്ചു. അല്ലാതെയുള്ള തൊഴിലാളികളുടെ വരവ് അനുവദിക്കുന്നതല്ല.
(പി.ആര്‍.കെ നമ്പര്‍ 1842/2020)