മത്സ്യ കർഷക ദിനാചരണത്തിന്റെയും സുഭിക്ഷ കേരളം ബയോ ഫ്‌ളോക് മത്സ്യ സംരംഭകർക്കായുള്ള പരിശീലന പരിപാടിയുടേയും ഉദ്ഘാടനം ഫിഷറീസ് മന്ത്രി ജെ. മേഴ്‌സിക്കുട്ടി അമ്മ 10 ന് രാവിലെ 10 മണിക്ക് ഓൺലൈനായി നിർവഹിക്കും. 

ആരോഗ്യ കേരളത്തില്‍  (നാഷണല്‍ ഹെല്‍ത്ത് മിഷന്‍, ഇടുക്കി) വിവിധ തസ്തികകളിലേക്ക് അപേക്ഷ ക്ഷണിച്ചു.
 തസ്തികകളും യോഗ്യതയും:
സ്‌പെഷ്യലിസ്റ്റ് മെഡിസിന്‍ - എം.ഡി/ ഡി.എന്‍.ബി, റ്റി.സി.എം.സി രജിസ്‌ട്രേഷന്‍.
സ്‌പെഷ്യലിസ്റ്റ് അനസ്‌തേഷ്യ-എം.ഡി/ ഡി.എ/ ഡി.എന്‍.ബി, റ്റി.സി.എം.സി രജിസ്‌ട്രേഷന്‍ .
സ്‌പെഷ്യലിസ്റ്റ് മൈക്രോബയോളജി - എം.ഡി, റ്റി.സി.എം.സി രജിസ്‌ട്രേഷന്‍
മെഡിക്കല്‍ ഓഫീസര്‍: എം.ബി.ബി.എസ്, റ്റി.സി.എം.സി രജിസ്‌ട്രേഷന്‍.

പുതുതായി ആരംഭിക്കുന്ന സൂക്ഷ്മ ചെറുകിട ഇടത്തരം സംരംഭങ്ങള്‍ വര്‍ഗ്ഗീകരിക്കുന്നതിനും രജിസ്‌ട്രേഷന്‍ നടത്തുന്നതിനും ആഗ്രഹിക്കുന്നവര്‍ക്ക് കേന്ദ്രസര്‍ക്കാരിന്റെ  രജിസ്‌ട്രേഷന്‍ സംവിധാനമായ ഉദ്യം രജിസ്‌ട്രേഷന്‍ പോര്‍ട്ടല്‍  ( www.udyamregistration.gov.in) വഴി സ്വയം സാക്ഷ്യപ്പെടുത്തിയ രേഖകളുടെ അടിസ്ഥാനത്തില്‍ മറ്റു രേഖകള്‍ അപ്‌ലോഡ് ചെയ്യാതെ ആധാര്‍ നമ്പര്‍ മാത്രം നല്‍കി സൗജന്യമായി രജിസ്‌ട്രേഷന്‍ നടത്താം.

സാമൂഹ്യനീതി വകുപ്പ് മുഖേന നടപ്പിലാക്കുന്ന പ്രൊബേഷന്‍ സംവിധാനത്തിന്റെ ഭാഗമായി വിവിധ പദ്ധതികള്‍ക്ക് ധനസഹായം അനുവദിക്കുന്നതിനായി അപേക്ഷ ക്ഷണിച്ചു. അതിക്രമത്തിനിരയായി കൊല്ലപ്പെട്ടവരുടെയും, കിടപ്പിലായവരുടെയും ഗുരുതരമായി പരിക്കേറ്റവരുടെയും മക്കള്‍ക്ക് വിദ്യാഭ്യാസത്തിന് ധനസഹായം നല്‍കും. കുടുംബത്തിന്റെ വാര്‍ഷിക വരുമാനം 1 ലക്ഷം രൂപയില്‍ താഴെയായിരിക്കണം. മറ്റ് ധനസഹായ പദ്ധതിയില്‍ നിന്നും തുക കൈപ്പറ്റിക്കൊണ്ടിരിക്കുന്ന കുട്ടികള്‍ക്ക് വീണ്ടും തുക അനുവദിക്കുന്നതല്ല.

കൊവിഡ് കാലത്ത് വിവിധ ആദിവാസി മേഖലകളിലും വിദ്യാര്‍ത്ഥികള്‍ ഓണ്‍ലൈന്‍ പഠനത്തില്‍ വ്യാപൃതരാണ്. കുമളി ഗ്രാമപഞ്ചായത്തിലെ മന്നാക്കുടി കമ്മ്യൂണിറ്റി ഹാളില്‍ ക്രമീകരിച്ചിട്ടുള്ള ഓണ്‍ലൈന്‍ പഠനകേന്ദ്രത്തില്‍ 97 കുട്ടികളാണ് പുതിയ രീതിയില്‍ പഠനം നടത്തുന്നത്. മന്നാക്കുടി ആദിവാസി മേഖലയില്‍ ഓണ്‍ലൈന്‍ പഠനസൗകര്യമൊരുക്കാന്‍ പഞ്ചായത്തിന്റെയും ട്രൈബല്‍, വനം വകുപ്പുകളുടെയും സഹകരണമുണ്ടായി. കമ്പ്യൂട്ടറിന്റെയും ടെലിവിഷന്റെയും സഹായത്തോടെയാണ് കുട്ടികള്‍ക്ക് പഠനം സാധ്യമാക്കിയിട്ടുള്ളത്. രാവിലെ 8 മുതല്‍ മന്നാക്കുടിയിലെ ഓണ്‍ലൈന്‍ പഠന കേന്ദ്രം സജീവമാണ്.

പീരുമേട് താലൂക്ക്തല വായനാപക്ഷാചരണപരിപാടികള്‍ സമാപിച്ചു.കുമളി പളിയക്കുടി അക്ഷര ജ്യോതി ട്രൈബല്‍ ലൈബ്രറിയില്‍ നടന്ന സമാപന സമ്മേളനം ഇടുക്കി ജില്ല ലൈബ്രറി കൗണ്‍സില്‍ പ്രസിഡന്റ് ആര്‍ തിലകന്‍ ഉദ്ഘാടനം ചെയ്തു.പുതിയ ലോകത്തെ വായനയുടെ പ്രാധാന്യം ആര്‍ തിലകന്‍ ഉദ്ഘാടന പ്രസംഗത്തില്‍ വിശദീകരിച്ചു.പീരുമേട് താലൂക്ക് ലൈബ്രറി കൗണ്‍സില്‍ വൈസ് പ്രസിഡന്റ് മുഹമ്മദ് എം ചടങ്ങില്‍ അധ്യക്ഷത വഹിച്ചു.എസ് എസ് എല്‍ സി പരീക്ഷയില്‍ മികച്ച വിജയം നേടിയ പളിയക്കുടിയിലെ വിദ്യാര്‍ത്ഥികളെ യോഗത്തില്‍ ആദരിച്ചു.

അടിമാലി താലൂക്ക് ആശുപത്രിയിലെ  എന്‍.റ്റി.ഇ.പി ലാബില്‍  ക്ഷയരോഗ നിര്‍ണയത്തിനായുള്ള പുതിയ ബയോസേഫ്റ്റി ക്യാബിനറ്റ്  സ്ഥാപിച്ചു. ജില്ലയില്‍ ക്ഷയ രോഗ നിര്‍ണയത്തിനുള്ള നൂതന സാങ്കേതികവിദ്യയുള്ള രണ്ടാമത്തെ ലാബാണ് അടിമാലി താലൂക്ക് ആശുപത്രിയില്‍ ക്രമീകരിച്ചിരിക്കുന്നത്. ബയോസേഫ്റ്റി ക്യാബിനറ്റിന്റെ സമര്‍പ്പണം ജില്ലാ ടി.ബി ഓഫീസര്‍ ഡോ.ബി. സെന്‍സി  നിര്‍വ്വഹിച്ചു. നാഷണല്‍ ഹെല്‍ത്ത് മിഷന്റെ ഫണ്ടില്‍ നിന്നാണ് ആശുപത്രിക്കായി പുതിയ ബയോ സേഫ്റ്റി ക്യാബിനറ്റ് അനുവദിച്ചത്.

കൃഷിവകുപ്പ് നടപ്പാക്കുന്ന 'ഓണത്തിന് ഒരു മുറം പച്ചക്കറി' പദ്ധതിയുടെ ഭാഗമായി നെടുങ്കണ്ടം ബ്ലോക്ക്തല പച്ചക്കറി വിത്തുകളുടെ വിതരണ ഉദ്ഘാടനം നടന്നു. ഓണത്തിന് വിഷരഹിതമായ പച്ചക്കറി വീട്ടുവളപ്പില്‍ തന്നെ ലഭ്യമാക്കുകയെന്ന ലക്ഷ്യത്തോടെയാണ് സംസ്ഥാന സര്‍ക്കാര്‍ പദ്ധതി ആവിഷ്‌കരിച്ചരിക്കുന്നത്.   പദ്ധതിയുടെ ഭാഗമായി പച്ചക്കറി വിത്തുകളുടെ വിതരണോദ്ഘാടനം  നെടുങ്കണ്ടം ബ്ലോക്ക് പഞ്ചായത്ത് പ്രസിഡന്റ്  റെജി പനച്ചിക്കല്‍ നിര്‍വ്വഹിച്ചു. കര്‍ഷകരായ ഓമനക്കുട്ടന്‍, ജെസി കുര്യന്‍, വിദ്യാര്‍ത്ഥിയായ അശ്വിന്‍ എന്നിവര്‍ പച്ചക്കറി വിത്തുകള്‍ ഏറ്റുവാങ്ങി.