കോവിഡ് 19 സ്ഥിരീകരിച്ച് മലപ്പുറം ജില്ലയില്‍ ഐസൊലേഷന്‍ കേന്ദ്രങ്ങളില്‍ ചികിത്സയിലായിരുന്ന 10 പേര്‍ കൂടി ഇന്നലെ (ജൂലൈ ഏഴ്) രോഗമുക്തരായി. രോഗബാധിതരായി 349 പേര്‍ ചികിത്സയില്‍ കഴിയുന്നു. ജില്ലയില്‍ ഇതുവരെ 766 പേര്‍ക്കാണ് വൈറസ് ബാധ സ്ഥിരീകരിച്ചത്. രോഗ വ്യാപനം തടയുന്നതിന്റെ ഭാഗമായി ഇന്നലെ 1,734 പേര്‍ക്ക് കൂടി പ്രത്യേക നിരീക്ഷണം ഏര്‍പ്പെടുത്തിയതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു.

ജില്ലയില്‍ 63 പേര്‍ക്ക് കൂടി ഇന്നലെ (ജൂലൈ ഏഴ്) കോവിഡ് 19 സ്ഥിരീകരിച്ചു. 12 പേര്‍ക്കാണ് ഇന്നലെ സമ്പര്‍ക്കത്തിലൂടെ രോഗബാധ സ്ഥിരീകരിച്ചത്. രണ്ട് പേര്‍ ഇതര സംസ്ഥാനങ്ങളില്‍ നിന്നും 49 പേര്‍ വിവിധ വിദേശ രാജ്യങ്ങളില്‍ നിന്നും എത്തിയവരാണെന്ന് ജില്ലാ കലക്ടര്‍ കെ. ഗോപാലകൃഷ്ണന്‍ അറിയിച്ചു.

    മക്കരപ്പറമ്പ് ഇലക്ട്രിക്കല്‍ സെക്ഷന്‍ പരിധിയില്‍ വരുന്ന കോഴിയൂര്‍ക്കുന്ന്, മീനാര്‍ക്കുഴി, ചെണ്ടക്കോട്, നാറാണത്ത്, വറ്റലൂര്‍, ബ്ലോക്ക് പടി എന്നീ ഭാഗങ്ങളില്‍  ഇന്ന് (ജൂലൈ എട്ടിന്) രാവിലെ എട്ട് മുതല്‍ വൈകീട്ട് അഞ്ച് വരെ വൈദ്യുതി വിതരണം തടസ്സപ്പെടുമെന്ന് അസിസ്റ്റന്റ് എഞ്ചിനീയര്‍ അറിയിച്ചു.
 

   മങ്കട നിയോജക മണ്ഡലത്തിലെ മുഴുവന്‍ വീടുകളിലേക്കും ഗാര്‍ഹിക കുടിവെള്ള കണക്ഷന്‍ നല്‍കുന്ന ജലജീവന്‍ മിഷന്‍ പദ്ധതിയുടെ  അവലോകന യോഗം ചേര്‍ന്നു. ടി.എ അഹമ്മദ് കബീര്‍ എം.എല്‍.എയുടെ അധ്യക്ഷതയില്‍ ചേര്‍ന്ന യോഗത്തില്‍  മണ്ഡലത്തിലെ ഓരോ പഞ്ചായത്തുകളിലും പദ്ധതി വഴി  വെള്ളമെത്തിക്കേണ്ട വീടുകളുടെ  കണക്ക്  വിലയിരുത്തി.  സംസ്ഥാന - കേന്ദ്ര- പഞ്ചായത്ത് ഫണ്ടുകള്‍ ചെലവഴിച്ച് നടപ്പിലാക്കുന്ന പദ്ധതിയുടെ പത്ത് ശതമാനം ഗുണഭോക്താവ് വഹിക്കും. 

      വനമഹോത്സവത്തിന്റെ ഭാഗമായി അലിഗഡ് യൂനിവേഴ്‌സിറ്റിയുടെ പെരിന്തല്‍മണ്ണ ക്യാമ്പസില്‍ വൃക്ഷത്തൈ വച്ചുപിടിപ്പിക്കുന്നതിന് തുടക്കമായി. ജില്ലാ സോഷ്യല്‍ ഫോറസ്ട്രിയുടെ നേതൃത്വത്തിലാണ് വൃക്ഷതൈകള്‍ വച്ചുപിടിപ്പിക്കുന്നത്. ആലിപറമ്പ് ഏലംകുളം ഗ്രാമപഞ്ചായത്തിലെ തൊഴിലുറപ്പ് പദ്ധതിയില്‍ ഉള്‍പ്പെടുത്തിയാണ് വൃക്ഷതൈകള്‍ നട്ടു വളര്‍ത്തുന്നത.് 

     വണ്ടൂര്‍ ബ്ലോക്ക് പഞ്ചായത്തിന് കീഴില്‍ പ്രവര്‍ത്തിക്കുന്ന ഭിന്നശേഷിക്കാരുടെ തെറാപ്പി സെന്ററിന് സ്വന്തം കെട്ടിടം ഒരുങ്ങുന്നു. വണ്ടൂര്‍ അമ്പലപ്പടിയില്‍ കെ.എസ.്ഇ.ബി സബ് സ്റ്റേഷന് സമീപമാണ് 35 ലക്ഷം രൂപയില്‍ ആധുനിക സൗകര്യങ്ങളോടു കൂടിയ തെറാപ്പി സെന്റര്‍ നിര്‍മിക്കുന്നത്. നാല് മാസത്തിനകം നിര്‍മാണം പൂര്‍ത്തിയാക്കും.    

ജില്ലാ ആരോഗ്യകേരളം വഴി നടപ്പാക്കുന്ന മൊബൈല്‍ മെഡിക്കല്‍ ആന്‍ഡ് സര്‍വെലെന്‍സ് യൂനിറ്റിലേക്കായി ലബോറട്ടറി, ഡി.ജിസെറ്റ് മറ്റ് അനുബന്ധ ഉപകരണങ്ങള്‍ ലഭ്യമായിട്ടുള്ള ട്രാവലര്‍/ഫോഴ്‌സ്/റ്റാറ്റവിങര്‍ വാഹനങ്ങള്‍ ജില്ലാ ഓഫീസിനുവേണ്ടി കരാര്‍ അടിസ്ഥാനത്തില്‍ ഓടുന്നതിന് ടെന്‍ഡര്‍ ക്ഷണിച്ചു. ടെന്‍ഡര്‍ സ്വീകരിക്കുന്ന അവസാന തീയതി ജൂലൈ 14. ഫോണ്‍: 0483: 2730313.
 

പെരിന്തല്‍മണ്ണ താലൂക്കില്‍ ജില്ലാ കലക്ടറുടെ  പൊതുജന പരാതി പരിഹാര അദാലത്ത് ജൂലൈ 18ന് രാവിലെ 10ന് വീഡിയോ കോണ്‍ഫറന്‍സ് മുഖേന നടത്തും. അദാലത്തിലേക്കുള്ള അപേക്ഷകള്‍ ജൂലൈ 14 വൈകീട്ട് അഞ്ച് വരെ അക്ഷയകേന്ദ്രങ്ങള്‍ മുഖേന സ്വീകരിക്കുമെന്ന് ഡെപ്യൂട്ടി കലക്ടര്‍ (ജനറല്‍) അറിയിച്ചു.