ആര്‍ദ്രം മിഷന്റെ ഭാഗമായി നവീകരിച്ച പുലാമന്തോള്‍ ചെമ്മലശ്ശേരി കുടുംബാരോഗ്യകേന്ദ്രത്തിന്റെ ഉദ്ഘാടനം വീഡിയോ കോണ്‍ഫറന്‍സിങിലൂടെ ആരോഗ്യവകുപ്പ് മന്ത്രി കെ.കെ ശൈലജ ടീച്ചര്‍ നിര്‍വഹിച്ചു. ആര്‍ദ്രം മിഷനിലൂടെ ഗുണപരമായ മാറ്റങ്ങള്‍ സംസ്ഥാനത്ത് ഉണ്ടായെന്നും ഇത് കോവിഡ് പ്രതിരോധത്തിന് സഹായകമായെന്നും മന്ത്രി പറഞ്ഞു.

കൊണ്ടോട്ടി താലൂക്കിലെ സപ്ലൈകോ സൂപ്പര്‍ മാര്‍ക്കറ്റ് ഭക്ഷ്യ പൊതുവിതരണ വകുപ്പ് മന്ത്രി പി.തിലോത്തമന്‍ വീഡിയോ കോണ്‍ഫറന്‍സിങ് വഴി ഇന്ന് (ജൂലൈ മൂന്ന്) രാവിലെ 11ന് ഉദ്ഘാടനം ചെയ്യും. കൊണ്ടോട്ടി മേലങ്ങാടിയില്‍ നടക്കുന്ന പരിപാടിയില്‍ ടി.വി ഇബ്രാഹീം എം.എല്‍.എ ആദ്യ വിതരണോദ്ഘാടനം നിര്‍വഹിക്കും.

മലപ്പുറം ജില്ലയിലെ അക്ഷയ സംരംഭകരുടെ കൂട്ടായ്മ മുഖ്യമന്ത്രിയുടെ ദുരിതാശ്വാസ നിധിയിലേക്ക് 52,835 രൂപ ജില്ലാ കലക്ടര്‍ കെ.ഗോപാലകൃഷ്ണന്  കൈമാറി.  

കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗമായവര്‍ക്ക് കോവിഡ് -19 സൗജന്യ ധനസഹായത്തിന് അപേക്ഷ സമര്‍പ്പിക്കുന്നതിനുള്ള അവസാന തീയതി    ഓഗസ്റ്റ് 31 വരെ നീട്ടിയതായി     ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു. 
 

തിരൂര്‍ ബ്ലോക്ക് പഞ്ചായത്തിന് കീഴില്‍ തലക്കാട് ഗ്രാമപഞ്ചായത്തിലെ ഏഴാം വാര്‍ഡില്‍ നിര്‍മിക്കുന്ന പുതിയ അങ്കണവാടി കെട്ടിടത്തിന്റെ ശിലാസ്ഥാപനം ബ്ലോക്ക് പഞ്ചായത്ത് പ്രസിഡന്റ്  സി.പി. റംല നിര്‍വഹിച്ചു. 12  ലക്ഷം രൂപ  ചെലവിലാണ് കെട്ടിടം നിര്‍മിക്കുന്നത്. പരിപാടിയില്‍ തിരൂര്‍ ബ്ലോക്ക് പഞ്ചായത്ത് വൈസ്  പ്രസിഡന്റ് സി.പി.അബ്ദുല്‍ ഷുക്കൂര്‍, ബ്ലോക്ക് മെമ്പര്‍ കെ. വസന്ത, തലക്കാട് ഗ്രാമപഞ്ചായത്ത് പ്രസിഡന്റ് എം. കുഞ്ഞിബാവ, വാര്‍ഡ്  മെമ്പര്‍  ടി. ഇസ്മയില്‍  എന്നിവര്‍ പങ്കെടുത്തു.
 

വേങ്ങര ഐ.സി.ഡി.എസ് പ്രൊജക്ടിലെ വേങ്ങര, എ.ആര്‍ നഗര്‍ ഗ്രാമപഞ്ചായത്തുകളില്‍ അങ്കണവാടി വര്‍ക്കര്‍, ഹെല്‍പ്പര്‍ തസ്തികകളിലേക്ക് അപേക്ഷ ക്ഷണിച്ചു. അപേക്ഷകര്‍ ഗ്രാമപഞ്ചായത്തില്‍ സ്ഥിരതാമസക്കാരായിരിക്കണം. അപേക്ഷയുടെ മാതൃക വേങ്ങര ബ്ലോക്ക് ഓഫീസ്, ബന്ധപ്പെട്ട പഞ്ചായത്തുകള്‍ എന്നിവിടങ്ങളില്‍ നിന്ന് ലഭിക്കും. താത്പര്യമുള്ളവര്‍ ജൂലൈ 20ന് വൈകീട്ട് അഞ്ചിനകം വേങ്ങര ഐ.സി.ഡി.എസ് ഓഫീസില്‍ അപേക്ഷ നല്‍കണമെന്ന് ശിശുവികസന പദ്ധതി ഓഫീസര്‍ അറിയിച്ചു. ഫോണ്‍: 0494 2450276.