കേരള മോട്ടോര്‍ തൊഴിലാളി ക്ഷേമനിധി ബോര്‍ഡില്‍ അംഗത്വം എടുത്ത തൊഴിലാളികള്‍ക്ക് കോവിഡ് 19 ധനസഹായത്തിനുള്ള അപേക്ഷ ഓഗസ്റ്റ് 31 വരെ സമര്‍പ്പിക്കാമെന്ന് ജില്ലാ എക്‌സിക്യൂട്ടീവ് ഓഫീസര്‍ അറിയിച്ചു.
(പി.ആര്‍.കെ നമ്പര്‍ 1776/2020)

കൊട്ടാരക്കര ബ്ലോക്കിലെ പൂയപ്പള്ളി ഗ്രാമപഞ്ചായത്തിനെ 'സന്‍സദ് ആദര്‍ശ് ഗ്രാമയോജന' പദ്ധതിയില്‍ സാഗി ഫേസ് രണ്ടില്‍ ഉള്‍പ്പെടുത്തി. പൂയപ്പള്ളി ഗ്രാമപഞ്ചായത്തില്‍ നടന്ന പരിപാടിയില്‍ എന്‍ കെ പ്രേമചന്ദ്രന്‍ എം പി പ്രഖ്യാപനം നടത്തി.  ഗ്രാമപഞ്ചായത്തിന്റെ സുസ്ഥിരമായ വികസനം നടപ്പാക്കുന്നതിന് സാഗി പദ്ധതി ഉപയോഗിക്കും.  കേന്ദ്ര-സംസ്ഥാന സര്‍ക്കാരുകളുടെ വിവിധ വികസന പ്രവര്‍ത്തനങ്ങള്‍ ഏകോപിപ്പിച്ച് നടപ്പിലാക്കുന്നതിന് സാഗി പദ്ധതി നിലവില്‍ വരുന്നതിലൂടെ സാധ്യമാകും.  സാഗി പദ്ധതിയുടെ വരവ് അറിയിച്ച് കൊണ്ട് പ്രാരംഭഘട്ട പ്രവര്‍ത്തനങ്ങള്‍ നടത്തും.

മത്സ്യഫെഡിന്റെ ആഭിമുഖ്യത്തില്‍ ജില്ലയിലെ ഉള്‍നാടന്‍ മേഖലയില്‍ ഓണ്‍ലൈന്‍ പഠന കേന്ദ്രങ്ങള്‍ ആരംഭിക്കുന്നു. 16 ഓണ്‍ലൈന്‍ പഠന കേന്ദ്രങ്ങളുടെ ഉദ്ഘാടനം നാളെ(ജൂലൈ 4) ഉച്ചയ്ക്ക് 12 ന് കുണ്ടറ കച്ചേരി മുക്കിലെ സഹൃദയ കാലാകേന്ദ്രത്തില്‍ മന്ത്രി ജെ മേഴ്‌സിക്കുട്ടിയമ്മ ഉദ്ഘാടനം ചെയ്യും.

കൃഷി വകുപ്പിന്റെ ആഭിമുഖ്യത്തില്‍ 2019-20 ലെ മികച്ച കര്‍ഷകര്‍, പാടശേഖര സമിതികള്‍, കര്‍ഷക തൊഴിലാളികള്‍, ശാസ്ത്രജ്ഞര്‍, കാര്‍ഷിക മേഖലകളില്‍ മികച്ച പ്രവര്‍ത്തനം കാഴ്ച്ചവയ്ക്കുന്ന വിവിധ തുറകളിലെ വ്യക്തികള്‍ എന്നിവര്‍ക്ക് അവാര്‍ഡുകളും സമ്മാനങ്ങളും നല്‍കുന്നതിന് അപേക്ഷ ക്ഷണിച്ചു. അപേക്ഷ ജൂലൈ ആറിനകം അതത് സ്ഥലത്തെ കൃഷിഭവനുകളില്‍ നല്‍കണം.

കേരള സംസ്ഥാന കളിമണ്‍പാത്ര നിര്‍മാണ വിപണന ക്ഷേമവികസന കോര്‍പ്പറേഷന്‍ കളിമണ്‍ ഉല്പന്ന നിര്‍മാണം കുലത്തൊഴിലായി സ്ഥീകരിച്ചിട്ടുള്ള സമുദായത്തില്‍പ്പെട്ട വ്യക്തികള്‍ക്ക് നിലവിലെ സംരംഭങ്ങളുടെ ആധുനികവത്കരണത്തിനും നൂതന സംരംഭങ്ങള്‍ ആരംഭിക്കുന്നതിനും വായ്പ നല്‍കുന്നു. വായ്പ തുക പരമാവധി രണ്ടു ലക്ഷം രൂപയും പലിശ നിരക്ക് ആറ് ശതമാനവും തിരിച്ചടവ് കാലാവധി 60 മാസവും ആയിരിക്കും. ജാമ്യ വ്യവസ്ഥകള്‍ ബാധകമാണ്.

ലോക്ക് ഡൗണിന്റെ പശ്ചാത്തലത്തില്‍ ബുദ്ധിമുട്ട് അനുഭവിക്കുന്ന സൂക്ഷമ-ചെറുകിട-ഇടത്തരം വ്യവസായ സംരംഭങ്ങളെ സഹായിക്കുന്നതിന് സര്‍ക്കാര്‍ വ്യവസായ ഭദ്രത എന്ന പദ്ധതി നടപ്പാക്കുന്നു. പദ്ധതി പ്രകാരം 2020 ഏപ്രില്‍ ഒന്നിനും ഡിസംബര്‍ 31 നും ഇടയ്ക്കുള്ള ദീര്‍ഘകാല വായ്പയ്‌ക്കോ പ്രവര്‍ത്തന മൂലധന വായ്പയ്‌ക്കോ ആറു മാസത്തേക്ക് ധനസഹായം ലഭിക്കും. ഉദ്യോഗ് ആധാര്‍ മെമ്മോറാണ്ടം ഫയല്‍ ചെയ്തിട്ടുള്ളതും 2020 ജനുവരി ഒന്നിനും മാര്‍ച്ച് 15 നും ഇടയില്‍ പ്രവര്‍ത്തിച്ചിട്ടുള്ളതുമായ എം എസ് എം ഇ യൂണിറ്റുകള്‍ക്കാണ് ധനസഹായം ലഭിക്കുക.

ലീഗല്‍ മെട്രോളജി ഓഫീസില്‍ ഓട്ടോമീറ്റര്‍ മുദ്ര ചെയ്യുന്നത് നിയന്ത്രണങ്ങളോടെ തുടരും. 2020 ജൂണ്‍ വരെ മുദ്ര ചെയ്യേണ്ടവര്‍(എ, ബി ക്വാര്‍ട്ടര്‍) 8590529011 ഫോണ്‍ നമ്പരില്‍ ബന്ധപ്പെട്ട് പുനപരിശോധന തീയതിയും സമയവും ടോക്കണ്‍ നമ്പരും വാങ്ങണം. ബുക്ക് ചെയ്യുന്നവര്‍ അനുവദിച്ച സമയത്ത് മാത്രം പുനപരിശോധനയ്ക്ക് ഹാജരാകണം.

ഒരു കുടുംബത്തിലെ മൂന്നുപേര്‍ ഉള്‍പ്പടെ ജില്ലയില്‍ ഇന്നലെ(ജൂലൈ 2) ഒന്‍പത് പേര്‍ക്ക് കോവിഡ് സ്ഥിരീകരിച്ചു. ഏഴു പേര്‍ വിദേശത്ത് നിന്നും രണ്ടുപേര്‍ ഇതര സംസ്ഥാനത്തു നിന്നും എത്തിയവരാണ്. നാലുപേര്‍ ഒമാനില്‍ നിന്നും ഷാര്‍ജ, ബഹ്റിന്‍, ഐവറി കോസ്റ്റ് എന്നിവിടങ്ങളില്‍ നിന്ന് ഒരാള്‍ വീതവും , ഡല്‍ഹി,ഹരിയാന എന്നിവിടങ്ങളില്‍ നിന്നും എത്തിയവരാണ്.

വനം-വന്യജീവി വകുപ്പ് ആവിഷ്‌ക്കരിച്ച നഗര വനം പദ്ധതി വടക്കാഞ്ചേരി ഓട്ടുപാറ ടൗണിൽ വനം വകുപ്പ് മന്ത്രി അഡ്വ. കെ. രാജു ഉദ്ഘാടനം ചെയ്തു. നഗര ഹൃദയത്തിൽ വനം വകുപ്പിന്റെ ഉടമസ്ഥതയിലുള്ള ചെറു  സ്ഥലങ്ങളിൽ ഹ്രസ്വവനം സൃഷ്ടിച്ച്, വായുമലിനീകരണം കുറയ്ക്കാനായി ശുദ്ധവായു പ്രദാനം ചെയ്യുകയാണ് പദ്ധതിയുടെ ലക്ഷ്യം. പൂങ്ങോട് ഫോറസ്റ്റ് സ്‌റ്റേഷൻ പരിധിയിൽ നേരത്തെ ചെക്ക്‌പോസ്റ്റ് ആയിരുന്ന 5.78 സെന്റ് ഭൂമി മാലിന്യ നിക്ഷേപ കേന്ദ്രമായി മാറിയിരുന്നു. ഈ മാലിന്യങ്ങൾ നീക്കിയാണ് മരങ്ങളും ചെറു മരങ്ങളും വള്ളിചെടികളും നട്ടത്.

സംസ്ഥാന വനം വകുപ്പിന്റെ പരിസ്ഥിതി പുനരുദ്ധാരണ സംസ്ഥാന തല പദ്ധതി തൃശൂർ വനം ഡിവിഷനു കീഴിലെ പൂങ്ങോട് കൊറ്റമ്പത്തൂർ വനത്തിൽ അത്തിക്കച്ചാലിൽ വനം വകുപ്പ് മന്ത്രി അഡ്വ. കെ.രാജു ഉദ്ഘാടനം  ചെയ്തു. വടക്കാഞ്ചേരി റേഞ്ചിൽപ്പെട്ട ഈ വനമേഖലയിൽ ഹിന്ദുസ്ഥാൻ ന്യൂസ് പ്രിന്റ് കമ്പനിക്ക് പാട്ടത്തിന് നൽകിയിരുന്ന വനഭൂമി തിരിച്ചെടുത്താണ് പരിസ്ഥിതി പുനരുദ്ധാരണ പദ്ധതി നടപ്പിലാക്കുന്നതെന്ന് മന്ത്രി പറഞ്ഞു. 475 ഹെക്ടർ തിരിച്ചെടുത്തതിൽ ആദ്യ ഘട്ടത്തിൽ 10 ഹെക്ടറിലാണ് ഫലവൃക്ഷത്തൈകൾ ഉൾപ്പെടെ നടുന്നത്. പദ്ധതി അടുത്ത ഘട്ടത്തിൽ വ്യാപിപ്പിക്കും.