കല്‍പ്പറ്റ ബ്ലോക്ക് പഞ്ചായത്ത്  പ്രളയക്കെടുതിയില്‍ കേടുപാടു പറ്റിയ വീടുകളുടെ പുനര്‍ നിര്‍മ്മാണത്തിന് അധിക ധനസഹായം അനുവദിച്ചു. പദ്ധതിയുടെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്റ് ഉഷ തമ്പി നിര്‍വ്വഹിച്ചു. 

2019- 20 പ്രത്യേക ഘടക പദ്ധതിയില്‍ ഉള്‍പ്പെടുത്തിയാണ് പ്രളയക്കെടുതിയില്‍ കേടുപാടു പറ്റിയ വീടുകള്‍ക്ക് അധിക ധനസഹായം പദ്ധതി നടപ്പിലാക്കിയത്. പട്ടികജാതി വിഭാഗത്തിലെ 28 കുടുംബങ്ങള്‍ക്ക് 50,000 രൂപയുടെ അധിക ധനസഹായമാണ് പദ്ധതിയിലൂടെ ലഭിച്ചത്. പ്രളയത്തില്‍ 16 ശതമാനത്തില്‍ കൂടുതല്‍ കേടുപാടു പറ്റിയ വീടുകളെയാണ് പദ്ധതിയില്‍ ഉള്‍പ്പെടുത്തിയത്. 

കേരള സംസ്ഥാന കളിമണ്‍പാത്ര നിര്‍മ്മാണ വിപണന ക്ഷേമ വികസന കോര്‍പ്പറേഷന്‍ കളിമണ്‍ ഉല്‍പന്ന നിര്‍മ്മാണം കുലത്തൊഴിലായി സ്വീകരിച്ച സമുദായത്തില്‍ ഉള്‍പ്പെട്ട വ്യക്തികള്‍ക്ക് നിലവിലെ സംരംഭങ്ങളുടെ ആധുനിക വല്‍കരണത്തിനും നൂതന സംരംഭങ്ങള്‍ ആരംഭിക്കുന്നതിനും വായ്പ നല്‍കുന്നു. വായ്പ തുക പരമാവധി രണ്ട് ലക്ഷം രൂപയും പലിശ നിരക്ക് 6 ശതമാനവും തിരിച്ചടവ് കാലാവധി 60 മാസവുമാണ്. ജാമ്യ വ്യവസ്ഥകള്‍ ബാധകമാണ്. അപേക്ഷകര്‍ പരമ്പരാഗത കളിമണ്‍ ഉല്‍പന്ന നിര്‍മ്മാണ മേഖലയില്‍ തൊഴില്‍ ചെയ്യുന്നവരോ അവരുടെ ആശ്രിതരോ ആയിരിക്കണം.  പ്രായം 18 നും 55 നുമിടയില്‍. കുടുംബ വാര്‍ഷിക വരുമാനം മൂന്ന് ലക്ഷം രൂപയില്‍ കവിയരുത്.

വനമഹോത്സവത്തോടനുബന്ധിച്ച് സാമൂഹ്യവനവല്‍കരണ വിഭാഗം വയനാട് ഡിവിഷന്റെ കീഴില്‍ സുല്‍ത്താന്‍ ബത്തേരി താലൂക്ക്തല തൈനടീല്‍ സംഘടിപ്പിച്ചു. കുപ്പാടി ഗവ.ഹൈസ്‌കൂളില്‍ നഗരസഭ ചെയര്‍മാന്‍ ടി.എല്‍.സാബു തൈനടീല്‍ ഉദ്ഘാടനം നിര്‍വഹിച്ചു. സോഷ്യല്‍ ഫോറസ്ട്രി അസിസ്റ്റന്റ് ഫോറസ്റ്റ് കണ്‍സര്‍വേറ്റര്‍ എം.ടി.ഹരിലാല്‍ മുഖ്യപ്രഭാഷണം നടത്തി.  പ്രധാനാധ്യാപകന്‍ സിറിയക് സെബാസ്റ്റ്യന്‍, അധ്യാപകരായ കെ.എസ്.ജയരാജന്‍, പി.സി.സന്തോഷ്, വി.കെ.സുനിത, വാര്‍ഡ് കൗണ്‍സിലറും പി.ടി.എ. പ്രസിഡന്റുമായ കെ.റഷിം, മദര്‍ പി.ടി.എ. പ്രസിഡന്റ് കവിത സന്തോഷ് തുടങ്ങിയവര്‍ പങ്കെടുത്തു.
 

കോഴിക്കോട് ജില്ലയില്‍ ലേബര്‍ വെല്‍ഫെയര്‍ ഫണ്ട് ബോര്‍ഡില്‍ ഉള്‍പെട്ട സ്ഥാപനങ്ങളില്‍ കോവിഡ് 19 ആശ്വാസ ധനസഹായം 1000 രൂപ കൈപറ്റാത്തവര്‍ കേരള ലേബര്‍ വെല്‍ഫയര്‍ ഫണ്ട് ഓഫീസുമായി ബന്ധപെടണം. എഫ്&ബി ലൈസന്‍സ് പ്രകാരം പ്രവര്‍ത്തിക്കുന്നവ, പ്ലാന്റേഷന്‍ ഇന്‍സ്‌പെക്ടരില്‍ നിന്നും സഹായധനം കൈപ്പറ്റാത്ത ചെറുകിട വന്‍കിട തോട്ടങ്ങള്‍ മുതലായവ പദ്ധതിയില്‍ ഉള്‍പ്പെടും. ഫോണ്‍ 04952372480
 

നെന്മേനി ഗ്രാമപഞ്ചായത്തിലെ മലങ്കരവയല്‍ പള്ളി റോഡ് കോണ്‍ക്രീറ്റ് ചെയ്യുന്നതിന് ഐ.സി.ബാലകൃഷ്ണന്‍ എം.എല്‍.എ.യുടെ ആസ്തി വികസന ഫണ്ടില്‍ ഉള്‍പ്പെടുത്തി പത്ത് ലക്ഷം രൂപയുടെ പ്രവൃത്തിക്ക് ജില്ലാ കളക്ടര്‍ ഭരണാനുമതി നല്‍കി.

കല്‍പ്പറ്റ മണ്ഡലത്തില്‍ നടപ്പാക്കുന്ന ഇ - പാഠശാല പദ്ധതിയുടെ ഭാഗമായി സി.കെ. ശശീന്ദ്രന്‍ എം.എല്‍.എയുടെ പ്രാദേശിക വികസന ഫണ്ട് ഉപയോഗിച്ച് 100 ടെലിവിഷന്‍ വാങ്ങി നല്‍കും. മണ്ഡലത്തിലെ മുഴുവന്‍ പൊതുവിദ്യാലയങ്ങളിലും ടെലിവിഷന്‍ ലഭ്യമാക്കുന്നതിനാണ് തുക അനുവദിച്ചത്. എല്ലാ വിദ്യാര്‍ത്ഥികള്‍ക്കും ഓണ്‍ലൈന്‍ പഠനം സാധ്യമാക്കുക എന്ന ലക്ഷ്യത്തോടെയാണ് പദ്ധതി നടപ്പിലാക്കുന്നത്. ഇ - പാഠശാല പദ്ധതിയുടെ ഭാഗമായി വിവിധ വകുപ്പുകളുടെയും സംഘടനകളുടെയും വ്യക്തികളുടെയും സഹകരണത്തോടെ 279 പൊതു പഠന കേന്ദ്രങ്ങളില്‍ ഇതിനോടകം ഓണ്‍ലൈന്‍ പഠന സൗകര്യം ഒരുക്കിയിട്ടുണ്ട്.