സംസ്ഥാനത്തു നിലനിൽക്കുന്ന കൊറോണ ഭീഷണി കണക്കിലെടുത്ത് മ്യൂസിയം, പുരാരേഖ, പുരാവസ്തു വകുപ്പിന്റെ കീഴിലുള്ള പത്മനാഭപുരം കൊട്ടാരം ഉൾപ്പെടെ വകുപ്പുകളുടെ അധീനതയിലുള്ള സ്മാരകങ്ങൾ, മ്യൂസിയങ്ങൾ തുടങ്ങിയ ഇടങ്ങളിലെ പൊതുജന സന്ദർശനാനുമതി മാർച്ച് 31വരെ നിർത്തിവെച്ച് ഉത്തരവായി. സ്ഥാപനങ്ങളിലെ ജീവനക്കാർ യഥാവിധി ഹാജരാകണം.
പി.എൻ.എക്സ്.1025/2020

വ്യവസായ വാണിജ്യ വകുപ്പ് മാർച്ച് 29 മുതൽ ഏപ്രിൽ 12 വരെ കണ്ണൂർ പോലീസ് മൈതാനത്ത് സംഘടിപ്പിക്കാൻ തീരുമാനിച്ചിരുന്ന എട്ടാമത് മലബാർ ക്രാഫ്റ്റ്‌സ് മേള മാറ്റിവച്ചു. കേരളം ഉൾപ്പെടെ 25 സംസ്ഥാനങ്ങളിൽ നിന്നും ശ്രീലങ്ക, നേപ്പാൾ, ഉസ്‌ബെക്കിസ്ഥാൻ എന്നീ വിദേശ രാജ്യങ്ങളിൽ നിന്നും 500 ഓളം കരകൗശല വിദഗ്ധർ ഉൽപ്പന്നങ്ങൾ പ്രദർശിപ്പിക്കുന്ന ഏറ്റവും വലിയ മേളയായിരുന്ന മലബാർ ക്രാഫ്റ്റ്‌സ് മേള.
സർക്കാർതല കൊറോണ വൈറസ് പ്രതിരോധ നടപടികളുടെ ഭാഗമായാണ് മേള മാറ്റിവച്ചത്. പുതുക്കിയ തീയതി പിന്നീട് അറിയിക്കുമെന്ന് വ്യവസായ വാണിജ്യ വകുപ്പ് അറിയിച്ചു.
പി.എൻ.എക്സ്.1024/2020

കോവിഡ് 19ന്റെ പശ്ചാത്തലത്തിൽ മാർച്ച് മാസത്തിൽ കേരള സംസ്ഥാന യുവജനകമ്മീഷൻ നടത്താനിരുന്ന എല്ലാ പരിപാടികളും മാറ്റിവച്ചു.
മാർച്ച് 24,25,26 തീയതികളിലായി തിരുവനന്തപുരത്ത്  'Reading the Future"(Youth Resistance and Survival) എന്ന വിഷയത്തിൽ സംഘടിപ്പിക്കാനിരുന്ന ത്രിദിന ദേശീയ സെമിനാർ മാറ്റി വച്ചു.

മുഖാവരണം, ശുചീകരണ വസ്തുക്കൾ വിൽപ്പന ശാലകളിൽ നടത്തിയ മിന്നൽ പരിശോധനയിൽ 16 കടകൾക്കെതിരെ ലീഗൽ മെട്രോളജി വകുപ്പ് നടപടിയെടുത്തു. 121 വ്യാപാര സ്ഥാപനങ്ങളിലാണ് മിന്നൽ പരിശോധന നടത്തിയത്. എറണാകുളം, തൃശൂർ, പാലക്കാട്, ഇടുക്കി എന്നീ ജില്ലകളിലെ സ്ഥാപനങ്ങളിലായിരുന്നു പരിശോധന. മെഡിക്കൽ സ്റ്റോറുകൾ കൂടാതെ സർജിക്കൽ ഷോപ്പുകൾ സൂപ്പർ മാർക്കറ്റുകൾ എന്നിവിടങ്ങളിലും പരിശോധനകൾ നടത്തി. പാക്കേജ്ഡ് കമ്മോഡിറ്റീസ് നിയമം ലംഘിച്ച വിൽപനശാലകൾക്കെതിരെയാണ് നടപടി. പരിശോധന തുടരുമെന്നും കുറ്റക്കാർക്കെതിരെ ശക്തമായ നിയമനടപടി സ്വീകരിക്കുമെന്നും ഡെപ്യൂട്ടി കൺട്രോളർ ജെ.സി. ജീസൺ അറിയിച്ചു.

ചാവക്കാട് ബ്ലോക്ക് പഞ്ചായത്തിന്റെ 2020-21 വാർഷിക ബജറ്റ് അവതരിപ്പിച്ചു. സമ്പൂർണ്ണ പാർപ്പിടം, കൃഷി, സമഗ്ര വികസനം, ശുചിത്വം, മാലിന്യ സംസ്‌ക്കരണം എന്നീ പദ്ധതികൾക്കാണ് മുൻഗണന. ഭവന നിർമ്മാണത്തിന് ഊന്നൽ നൽകി സമ്പൂർണ്ണ പാർപ്പിട ബ്ലോക്ക് പഞ്ചായത്താക്കി ഉയർത്തുന്നതിന് ബജറ്റിൽ പ്രത്യേകം ശ്രദ്ധ നൽകിയിട്ടുണ്ട്.

കോവിഡ് വൈറസിനെ സംബന്ധിച്ച് ജനങ്ങൾക്കിടയിൽ ഭീതിയും ആശങ്കയും വേണ്ടെന്നും കൊടുങ്ങല്ലൂരിൽ സ്ഥിതി നിയന്ത്രണ വിധേയമാണെന്നും നഗരസഭാ ചെയർമാൻ കെ ആർ ജൈത്രൻ പറഞ്ഞു. കോവിഡ് വൈറസിന്റെ പശ്ചാത്തലത്തിൽ പ്രതിരോധ- ബോധവൽക്കരണ പ്രവർത്തനങ്ങൾ ശക്തിപ്പെടുത്തുവാൻ ചേർന്ന അടിയന്തിര കൗൺസിൽ യോഗത്തിലാണ് ചെയർമാന്റെ പ്രസ്താവന.
താലൂക്കാശുപത്രിയിൽ ഏഴ് പേർ നിരീക്ഷണത്തിലാണെങ്കിലും ആർക്കും രോഗം സ്ഥിരീകരിച്ചിട്ടില്ല. വ്യാജ പ്രചരണങ്ങളും തെറ്റായ വാർത്തകളും നൽകുന്നവർക്കെതിരെ കർശന നടപടി സ്വീകരിക്കും.

എസ്എസ്എൽസി പരീക്ഷ എഴുതുകയായിരുന്ന വിദ്യാർത്ഥിയെ തെരുവ് നായ കടിച്ച പശ്ചാത്തലത്തിൽ ചെറുതുരുത്തി പ്രദേശത്ത് തെരുവ് നായകളുടെ ശല്യം ഇല്ലാതാക്കാൻ ആവശ്യമായ ഉത്തരവ് ബന്ധപ്പെട്ട തദ്ദേശസ്വയം ഭരണ സ്ഥാപനത്തിന് നൽകണമെന്ന് മനുഷ്യാവകാശ കമ്മീഷൻ.
തൃശൂർ ജില്ലാ കളക്ടർക്കാണ് കമ്മീഷൻ ജുഡീഷ്യൽ അംഗം പി മോഹനദാസ് നിർദ്ദേശം നൽകിയത്. നടപടി സ്വീകരിച്ച ശേഷം കളക്ടർ റിപ്പോർട്ട് സമർപ്പിക്കണം.

പുഴയ്ക്കൽ ബ്ലോക്ക് പഞ്ചായത്തിൽ വികസന പദ്ധതിയിൽ ഉൾപ്പെടുത്തി വയോജനങ്ങൾക്ക് കട്ടിൽ വിതരണം ചെയ്തു. അടാട്ട്, അവണൂർ ഗ്രാമപഞ്ചായത്തിലെ ഗുണഭോക്താക്കൾക്കാണ് കട്ടിൽ വിതരണം ചെയ്തത്. ബ്ലോക്ക് പഞ്ചായത്ത് പ്രസിഡന്റ് സി വി കുരിയാക്കോസ് ഉദ്ഘാടനം ചെയ്തു. വൈസ് പ്രസിഡന്റ് ഷീബാ ഗിരീഷ് അധ്യക്ഷത വഹിച്ചു. അടാട്ട് ഗ്രാമ പഞ്ചായത്ത് പ്രസിഡന്റ് ടി ആർ ജയചന്ദ്രൻ, ബ്ലോക്ക് പഞ്ചായത്ത് സ്ഥിരംസമിതി അധ്യക്ഷൻ എം ടി സന്തോഷ്, സെക്രട്ടറി വി എം ഷൈല, പട്ടികജാതി വികസന ഓഫീസർ സിനി, ഹെൽത്ത് ഇൻസ്പെക്ടർ പി ജെ തോമസ്, വനിതാ ക്ഷേമ ഓഫീസർ പി ബി ശശീധരൻ തുടങ്ങിയവർ പങ്കെടുത്തു.
 

കുന്നംകുളം നഗരസഭയുടെ കെ ആർ നാരായണൻ സ്മാരക ഹാളിന്റെ ദിവസവാടക 10,000 രൂപയാക്കി കുറച്ചു. കഴിഞ്ഞ ദിവസം നടന്ന കൗൺസിൽ യോഗത്തിലാണ് തീരുമാനം. 17,000 രൂപയാണ് നിലവിലുണ്ടായിരുന്ന വാടക നിരക്ക്.
18 ശതമാനം നികുതിയും വൈദ്യുതി, ഹാൾ വൃത്തിയാക്കൽ എന്നിവയ്ക്ക് വേറെയും തുക നൽകണം. എന്നാൽ നഗരസഭാ പ്രദേശത്തുള്ളവരും അല്ലാത്തവരുമായ എസ് സി, എസ് ടി വിഭാഗക്കാർക്ക് വാടക നിരക്കിൽ 50 ശതമാനം ഇളവുണ്ട്.