കൊറോണ ബാധിത പ്രദേശങ്ങളില്‍ നിന്നും മറ്റു വിദേശരാജ്യങ്ങളില്‍ നിന്നും വരുന്നവരെ അകറ്റി നിര്‍ത്താതെ  കൂടുതല്‍ ജന സൗഹാര്‍ദ പ്രവര്‍ത്തനങ്ങള്‍ പൊതുജനങ്ങളുടെ ഭാഗത്തുനിന്നുണ്ടാകണമെന്ന് ജില്ലാ കളക്ടര്‍ ഡോ. ഡി.സജിത് ബാബു  അറിയിച്ചു. കൊറോണ ബാധിത പ്രദേശങ്ങളില്‍ നിന്നും വരുന്നവരുടെ സംശയ നിവാരണത്തിനും ആരോഗ്യ പ്രവര്‍ത്തകരുടെ സഹായം ലഭ്യമാക്കുന്നതിനുമായി എല്ലാ പി എച്ച് സി കളിലും സി എച്ച് സി കളിലും ആശുപത്രികളിലും കൊറോണ ഹെല്‍പ്പ് ഡെസ്‌ക്കുകള്‍ സജ്ജീകരിച്ചിട്ടുണ്ട്.

ജില്ലയിലെ പ്രാഥമികാരോഗ്യ കേന്ദ്രങ്ങളിലും കൊറോണ പ്രതിരോധ സഹായത്തിനായി ഹെല്‍പ് ഡെസ്‌ക് ആരംഭിച്ചതായി ജില്ലാ മെഡിക്കല്‍ ഓഫീസര്‍ ഇന്‍ ചാര്‍ജ് ഡോ.എ.വി രാംദാസ് പറഞ്ഞു. ഇത് ജില്ലയില്‍ കൊറോണ നിയന്ത്രണ പ്രവര്‍ത്തനങ്ങള്‍ക്ക് സഹായകമാവും. വാര്‍ഡുകള്‍ തോറും ആരോഗ്യ ജാഗ്രതാ സമിതികള്‍ വിപുലപ്പെടുത്തും. വ്യാജ വാര്‍ത്തകള്‍ പ്രചരിപ്പിക്കുന്നത് തടയാന്‍ സൈബര്‍ ടീമിനെ ഉള്‍പ്പെടുത്തി മീഡിയ സര്‍വെലന്‍സ് വിപുലപെടുത്താനും ജില്ലാ മെഡിക്കല്‍ ഓഫീസറുടെ കാര്യാലയത്തില്‍ ചേര്‍ന്ന കൊറോണ പ്രതിരോധത്തിനായുള്ള പതിനഞ്ച് കമ്മിറ്റികളുടെ ഏകോപന യോഗം തീരുമാനിച്ചു.

മാര്‍ച്ച് 13 ന് കാഞ്ഞങ്ങാട് നെഹ്‌റു കോളേജില്‍ നടത്താനിരുന്ന ജില്ലയിലെ സ്‌കൂളുകളിലെ ഇക്കോ ക്ലബ് ടീച്ചര്‍മാരുടെ ഏകദിന കപ്പാസിറ്റി ബില്‍ഡിങ്  പരിശീലനം് മാറ്റി വെച്ചതായി ജില്ലാ കോ ഓര്‍ഡിനേറ്റര്‍ പ്രൊഫ. വി. ഗോപിനാഥന്‍ അറിയിച്ചു. 

സംസ്ഥാന യുവജനക്ഷേമ ബോര്‍ഡിന്റെ  സ്വാമി വിവേകാനന്ദന്‍  യുവപ്രതിഭാ പുരസ്‌കാരത്തിന് അപേക്ഷ ക്ഷണിച്ചു. വ്യക്തിഗത അവാര്‍ഡിനായി 18 നും 40 നും ഇടയില്‍  പ്രായമുള്ള യുവജനങ്ങള്‍ക്ക് അപേക്ഷിക്കാം. സാമൂഹ്യപ്രവര്‍ത്തനം, മാധ്യമപ്രവര്‍ത്തനം,  കല, സാഹിത്യം, ഫൈന്‍ ആര്‍ട്‌സ്, കായികം (വനിത), കായികം (പുരുഷന്‍്), ശാസ്ത്രം, സംരംഭകത്വം, കൃഷി, എന്നീ മേഖലകളില്‍ നിന്നും മികച്ച ഓരോ വ്യക്തിയെയാണ് പുരസ്‌ക്കാരത്തിന് തിരഞ്ഞെടുക്കുന്നത്. പുരസ്‌ക്കാരത്തിന് അര്‍ഹരാകുന്നവര്‍ക്ക് 50,000 രൂപയും പ്രശസ്തി പത്രവും    പുരസ്‌കാരവും ലഭിക്കും.

സാമൂഹ്യ പ്രശ്‌നങ്ങള്‍ നേരിടുന്ന മിശ്ര വിവാഹ ദമ്പതികള്‍ക്ക് ഒരു വര്‍ഷം സുരക്ഷിതമായി താമസിക്കുന്നതിന് സേഫ് ഹോമുകള്‍ തുടങ്ങുന്നു. ഒരു ഹോമില്‍ 10 ദമ്പതികള്‍ക്ക് താമസ സൗകര്യമൊരുക്കാന്‍ താത്പര്യമുള്ള സന്നദ്ധ സംഘടനകള്‍ക്ക്   പ്രൊപ്പോസില്‍ സമര്‍പ്പിക്കാം.  വിശദമായ പ്രൊപ്പോസലുകള്‍ മാര്‍ച്ച് 20 നകം ജില്ലാ സാമൂഹ്യനീതി ഓഫീസില്‍ ലഭിക്കണം.

ജില്ലയുടെ വികസന പ്രവര്‍ത്തനങ്ങള്‍ ത്വരിതപ്പെടുത്തുന്നതിനും സുതാര്യമാക്കുന്നതിനും ജില്ലാ വികസന സമിതി മാതൃകയാവുന്നു. ജില്ലാ വികസന സമിതിയില്‍ ഒരു വര്‍ഷത്തിനിടെ പരിഹാരം കണ്ടെത്തിയത് 400 ഓളം വിഷയങ്ങളിലാണ്. ചുവപ്പുനാടയില്‍ കുരുങ്ങി കിടക്കാന്‍ സാധ്യതയുണ്ടായിരുന്ന സാങ്കേതിക അനുമതി ആവശ്യമുള്ള വിഷയങ്ങളും ഇതില്‍പെടുന്നു. ജില്ലാ കളക്ടര്‍ ഡോ.ഡി.സജിത് ബാബു അധ്യക്ഷനായ സമിതിയാണ് സത്വര വേഗത്തില്‍ വിവിധ പ്രശ്നങ്ങളില്‍ നടപടി കൈകൊണ്ട് ജില്ലയുടെ വികസന സ്വപ്നങ്ങള്‍ക്ക് പച്ചക്കൊടി വീശുന്നത്.

* GOK Direct മൊബൈൽ ആപ്പ് മുഖ്യമന്ത്രി ഉദ്ഘാടനം ചെയ്തു
*ടെക്സ്റ്റ് മെസേജ് അലർട്ട് സംവിധാനത്തിലൂടെ സാധാരണ ഫോണിലും വിവരം ലഭിക്കും
കോവിഡ് 19 നെക്കുറിച്ചുള്ള യഥാർത്ഥ വിവരങ്ങൾ ജനങ്ങളിലേക്ക് ഇനി നേരിട്ടെത്തും. ഇതിനായി ജിഒകെ ഡയറക്ട്  (GOK Direct) മൊബൈൽ ആപ്പ് സർക്കാർ തയ്യാറാക്കി. ഇൻഫർമേഷൻ പബ്ളിക് റിലേഷൻസ് വകുപ്പ് തയ്യാറാക്കിയ മൊബൈൽ ആപ്പ് മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. ആധുനിക സാങ്കേതിക വിദ്യയുടെ സഹായത്തോടെ കോവിഡ് 19നെ നേരിടുന്നതിന്റെ ഭാഗമായാണ് മൊബൈൽ ആപ്പ് പി. ആർ. ഡി തയ്യാറാക്കിയത്.