കാലവര്‍ഷം ആരംഭിച്ചതിനെ തുടര്‍ന്ന് ഭീഷണിയുയര്‍ത്തുന്ന കാലപ്പഴക്കംകൊണ്ട് ജീര്‍ണിച്ച കെട്ടിടങ്ങള്‍ ഉടമകള്‍ സ്വന്തം ചിലവില്‍ പൊളിച്ചു മാറ്റണമെന്ന് അഴിയൂര്‍ ഗ്രാമപഞ്ചായത്ത് സെക്രട്ടറി അറിയിച്ചു.  ഇത്തരം കെട്ടിടങ്ങള്‍ അപകടത്തിന് കാരണമായാല്‍ കെട്ടിട ഉടമ മാത്രമായിരിക്കും ഉത്തരവാദി. അഴിയൂര്‍ പഞ്ചായത്ത് പരിധിയില്‍ ഇത്തരം ജീര്‍ണിച്ച കെട്ടിടങ്ങള്‍ ഉണ്ടെങ്കില്‍  9496285245 എന്ന  നമ്പറില്‍ ഫോട്ടോ സഹിതം വിവരം വാട്‌സ്ആപ്പ് ചെയ്യണമെന്നും അറിയിച്ചു.

2018, 2019 വര്‍ഷങ്ങളിലെ പ്രളയകാലത്ത് ദുരിതാശ്വാസ ക്യാമ്പുകളായി പ്രവര്‍ത്തിച്ച 63 സ്‌കൂളുകളില്‍ അധിക ടോയ്‌ലറ്റ് നിര്‍മ്മിക്കുന്നതിന് ശുചിത്വകേരളം (റൂറല്‍ ) പദ്ധതിയില്‍ ഉള്‍പ്പെടുത്തി ഭരണാനുമതി നല്‍കി ഉത്തരവായി. പത്തനംതിട്ട ജില്ലയില്‍ പ്രളയദുരിതാശ്വാസ ക്യാമ്പുകളായി പ്രവര്‍ത്തിച്ച സര്‍ക്കാര്‍/എയ്ഡഡ് മേഖലയില്‍ പ്രവര്‍ത്തിക്കുന്ന 63 സ്‌കൂളുകളിലാണ് അധിക ടോയ്‌ലറ്റ് നിര്‍മ്മിക്കുന്നത്.

ലോക പരിസ്ഥിതി ദിനാചരണവുമായി ബന്ധപ്പെട്ട് ഹരിത കേരളം മിഷന്റെ ഭാഗമായി പത്തനംതിട്ട റിങ്  റോഡിന്റെ ഇരുവശങ്ങളിലുമായി വൃക്ഷത്തൈകള്‍ നടുന്നു. ഇന്ന് (ജൂണ്‍ 5) രാവിലെ 11ന് വീണാ ജോര്‍ജ് എംഎല്‍എ വൃക്ഷത്തൈ നട്ട് ഉദ്ഘാടനം നിര്‍വഹിക്കും.

തിരുവല്ല റെയില്‍വേ സ്റ്റേഷനില്‍ നിന്നും പശ്ചിമ ബംഗാളിലേക്ക് പുറപ്പെട്ട സ്‌പെഷല്‍ ട്രെയിനില്‍ സ്വദേശത്തേക്ക് മടങ്ങിയത് 1564 അതിഥി തൊഴിലാളികള്‍.  തിരുവല്ലയില്‍ നിന്ന് ഇന്നലെ(ജൂണ്‍ 4) വൈകിട്ട് 5 ന് പുറപ്പെട്ട ട്രെയിനില്‍ വിവിധ താലൂക്കുകളില്‍ നിന്നും മുപ്പതില്‍പരം ബസുകളിലായിട്ടാണ് ഇവരെ സ്റ്റേഷനില്‍ എത്തിച്ചത്. മേയ് 27ന് തിരുവല്ലയില്‍ നിന്ന് പശ്ചിമ ബംഗാളിലേക്ക് പുറപ്പെട്ട ആദ്യ ട്രെയിനില്‍ 1468 പേര്‍ യാത്രയായിരുന്നു.

കേരളത്തിലെ ആദ്യത്തെ സമ്പൂര്‍ണ്ണ പച്ചത്തുരുത്ത് ഗ്രാമമായി പ്രഖ്യാപിച്ച കൊടുമണ്‍ ഗ്രാമപഞ്ചായത്തിലെ 30-ാം പച്ചത്തുരുത്ത് ഇന്ന് (ജൂണ്‍ 5) ലോക പരിസ്ഥിതി ദിനത്തില്‍ രാവിലെ 10ന് ചിറ്റയം ഗോപകുമാര്‍ എം.എല്‍.എ  ഉദ്ഘാടനം ചെയ്യും. കൊടുമണ്‍ ഗ്രാമപഞ്ചായത്തിലെ അങ്ങാടിക്കല്‍ ഗവ.ആയുര്‍വേദ ആശുപത്രിയില്‍ 15 സെന്റില്‍ തയ്യാറാക്കുന്ന പച്ചത്തുരുത്തില്‍ ഔഷധ സസ്യങ്ങളും ഫലവൃക്ഷ തൈകളും ഉള്‍പ്പെടെ 20 തൈകളാണ് ആദ്യ ഘട്ടത്തില്‍ നടുന്നത്

പരിസ്ഥിതി ദിനത്തില്‍ പച്ചത്തുരുത്ത് പദ്ധതിയുമായി മല്ലപ്പുഴശ്ശേരി ഗ്രാമ പഞ്ചായത്ത്. മല്ലപ്പുഴശേരി ഇടപാറ മഹാദേവര്‍ മലനട ക്ഷേത്ര പരിസരത്ത് അഞ്ചു സെന്റ് ഭൂമിയിലാണ് പച്ചത്തുരുത്ത് ഒരുങ്ങുന്നത്. ഇന്ന് (ജൂണ്‍ 5)  ഉച്ചയ്ക്ക് 12ന് വീണാ ജോര്‍ജ് എം.എല്‍.എ തൈ നട്ട് ഉദ്ഘാടനം നിര്‍വഹിക്കും. ഔഷധചെടികള്‍, ഫലവൃക്ഷത്തെകള്‍ എന്നിവ ഉള്‍പ്പടെ 50 തൈകളാണ് പച്ചത്തുരുത്തില്‍ ഒരുങ്ങുന്നത്.                            

ലോക്ഡൗണ്‍ കാലത്ത് ഹരിത കേരളം മിഷന്‍  ജില്ലയിലെ കുട്ടികളെ പങ്കെടുപ്പിച്ചുകൊണ്ട് നടത്തിയ മനോഹരിതം ക്യാമ്പയിന്‍  പരിസ്ഥിതിദിനത്തോടെ സമാപിക്കും. ക്യാമ്പയിന്‍ സമാപനത്തിന്റെ ഉദ്ഘാടനം ലോക പരിസ്ഥിതിദിനമായ ഇന്ന് (ജൂണ്‍ 5) ആറന്മുള മണ്ഡലത്തിലെ ഓമല്ലൂര്‍ ആര്യഭാരതി ഹൈസ്‌കൂളില്‍ ഫലവൃക്ഷത്തെകള്‍ വിതരണം ചെയ്ത് വീണാ ജോര്‍ജ് എംഎല്‍എ നിര്‍വഹിക്കും.

പ്രകൃതി പുനസ്ഥാപന പ്രക്രിയയില്‍ ഹരിതകേരളം മിഷന്റെ ഫലപ്രദമായ ഇടപെടലായി മാറിയ പച്ചത്തുരുത്തുകളും ജൈവവൈവിധ്യവും വിഷയമാക്കി ലോക പരിസ്ഥിതി ദിനത്തില്‍ ഹരിതകേരളം മിഷന്‍ ഫേസ്ബുക്ക് ലൈവ് സംഘടിപ്പിക്കുന്നു. ഇന്ന് (5) രാവിലെ 10.30 മുതല്‍ 12 വരെയാണ് പരിപാടി. പ്രമുഖ പരിസ്ഥിതി ശാസ്ത്രജ്ഞരായ പ്രൊഫ.ഇ.കുഞ്ഞിക്കൃഷ്ണന്‍,  ഡോ.എന്‍.മോഹനന്‍, ഡോ.ടി.എസ്.പ്രീത എന്നിവരും ഹരിതകേരളം മിഷന്‍ എക്സിക്യുട്ടീവ് വൈസ് ചെയര്‍പേഴ്സണ്‍ ഡോ.ടി.എന്‍.സീമ, കൃഷി ഉപവിഭാഗം കണ്‍സള്‍ട്ടന്റ് എസ്.യു.സഞ്ജീവ്, ടെക്നിക്കല്‍ ഓഫീസര്‍ വി.വി.ഹരിപ്രിയാദേവി എന്നിവരും പങ്കെടുക്കും.