കോവിഡ് 19 സ്ഥിരീകരിച്ച് മലപ്പുറം ജില്ലയില്‍ ഐസൊലേഷന്‍ കേന്ദ്രങ്ങളില്‍ ചികിത്സയിലായിരുന്ന ഏഴ് പേര്‍ കൂടി ഇന്നലെ (ജൂണ്‍ 29) രോഗമുക്തരായി. രോഗബാധിതരായി 235 പേര്‍ ചികിത്സയില്‍ കഴിയുന്നു. ജില്ലയില്‍ ഇതുവരെ 484 പേര്‍ക്കാണ് വൈറസ് ബാധ സ്ഥിരീകരിച്ചത്. രോഗ വ്യാപനം തടയുന്നതിന്റെ ഭാഗമായി ഇന്നലെ (ജൂണ്‍ 29) 1,946 പേര്‍ക്ക് കൂടി പ്രത്യേക നിരീക്ഷണം ഏര്‍പ്പെടുത്തിയതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു.

   ജില്ലയില്‍ 13 പേര്‍ക്ക് കൂടി ഇന്നലെ (ജൂണ്‍ 29) കോവിഡ് 19 സ്ഥിരീകരിച്ചു. ഇതില്‍ ഒരാള്‍ ബംഗളൂരുവില്‍ നിന്നും 12 പേര്‍ വിവിധ വിദേശ രാജ്യങ്ങളില്‍ നിന്നുമെത്തിയവരാണെന്ന് ജില്ലാ കലക്ടര്‍ കെ. ഗോപാലകൃഷ്ണന്‍ അറിയിച്ചു. ഇവരെല്ലാം മഞ്ചേരി ഗവ. മെഡിക്കല്‍ കോളജ് ആശുപത്രിയില്‍ ചികിത്സയിലാണ്. ഇവര്‍ക്കു പുറമെ ജില്ലയില്‍ ചികിത്സയിലുള്ള ഇതര ജില്ലക്കാരായ അഞ്ച് പേര്‍ക്കും ഇന്നലെ രോഗബാധ സ്ഥിരീകരിച്ചിട്ടുണ്‍്.

 മത്സ്യതൊഴിലാളി ക്ഷേമനിധി ബോര്‍ഡിലൂടെ പെന്‍ഷന്‍ ലഭിക്കുന്ന മത്സ്യതൊഴിലാളി, അനുബന്ധ തൊഴിലാളി, വിധവ പെന്‍ഷണര്‍മാര്‍ എന്നിവരില്‍ ഇനിയും മസ്റ്റര്‍ ചെയ്യാത്തവര്‍ അക്ഷയ കേന്ദ്രങ്ങള്‍ മുഖേന ജൂലൈ 15നകം ആധാര്‍ കാര്‍ഡ്, മത്സ്യതൊഴിലാളി പെന്‍ഷന്‍ ബുക്ക് സഹിതം മസ്റ്റര്‍ ചെയ്യണമെന്ന് കോഴിക്കോട് മത്സ്യബോര്‍ഡ് റീജിയനല്‍ എക്‌സിക്യൂട്ടീവ് അറിയിച്ചു

    കുറ്റിപ്പുറം ഗവണ്‍മെന്റ് ടെക്‌നിക്കല്‍ ഹൈസ്‌കൂളില്‍ (ഇംഗ്ലീഷ് മീഡിയം) എച്ച്.എസ്.എ മാത്‌സ്, എച്ച്.എസ്.എ സോഷ്യല്‍ സയന്‍സ്, പാര്‍ട്ട് ടൈം മലയാളം ടീച്ചര്‍ തുടങ്ങിയ വിഷയങ്ങളില്‍ ദിവസ വേതനാടിസ്ഥാനത്തില്‍ അധ്യാപകരെ നിയമിക്കുന്നു. താത്പര്യമുള്ളവര്‍ അസ്സല്‍ സര്‍ട്ടിഫിക്കറ്റുകള്‍ സഹിതം ജൂലൈ ഏഴിന് രാവിലെ 10ന് സ്‌കൂളില്‍ ഹാജരാകണമെന്ന് സൂപ്രണ്ട് അറിയിച്ചു.
 

     ഫിഷറീസ് വകുപ്പ് മുഖേന നടപ്പാക്കുന്ന ബയോഫ്‌ളോക്ക് യൂനിറ്റിനായി ് അപേക്ഷ ക്ഷണിച്ചു.  താത്പര്യമുള്ളവര്‍ രേഖകള്‍  സഹിതം അതത് പഞ്ചായത്ത് തല അക്വാകള്‍ച്ചര്‍ പ്രൊമോട്ടര്‍മാര്‍ക്കോ പൊന്നാനി മത്സ്യകര്‍ഷക വികസന ഏജന്‍സിയിലോ അപേക്ഷ നല്‍കണം. അവസാന തീയതി ജൂലൈ ആറ്. ഫോണ്‍: 0494  2666428
 

ജില്ലാ പ്രൊബേഷന്‍ ഓഫീസിലെ ഔദ്യോഗിക ആവശ്യങ്ങള്‍ക്ക് ടാക്‌സി പെര്‍മിറ്റുള്ള എ.സി വാഹനം വാടകക്ക് നല്‍കുന്നതിന് താത്പര്യമുള്ള വാഹന ഉടമകളില്‍ നിന്നും ടെന്‍ഡര്‍ ക്ഷണിച്ചു. താത്പര്യമുള്ളവര്‍ ജൂലൈ ആറിന് ഉച്ചക്ക് രണ്ടിനകം മഞ്ചേരി കോര്‍ട്ട് കോംപ്ലക്‌സില്‍ പ്രവര്‍ത്തിക്കുന്ന ജില്ലാ പ്രൊബേഷന്‍ ഓഫീസില്‍ ടെന്‍ഡര്‍ നല്‍കണം. ഫോണ്‍: 04832970066/8281999044.
 

   മലപ്പുറം ബോയ്‌സ് ഹയര്‍ സെക്കന്‍ഡറി സ്‌കൂളിന് രണ്ടു കോടി രൂപ ചെലവഴിച്ച്  നിര്‍മിച്ച കെട്ടിടത്തിന്റെ ഉദ്ഘാടനം ഇന്ന് ( ജൂണ്‍ 30) രാവിലെ 10.30 പി.ഉബൈദുള്ള എം.എല്‍.എ നിര്‍വഹിക്കും. ചടങ്ങില്‍ മലപ്പുറം നഗരസഭ ചെയര്‍പേഴ്‌സണ്‍ സി.എച്ച്.ജമീല ടീച്ചര്‍ അധ്യക്ഷയാവും.
 

   കോഡൂര്‍ ഗ്രാമപഞ്ചായത്തില്‍ നവീകരിച്ച പുലിയോടം റോഡിന്റെ ഉദ്ഘാടനം പി. ഉബൈദുള്ള എം.എല്‍.എ നിര്‍വഹിച്ചു. എം.എല്‍.എയുടെ ആസ്തി വികസന ഫണ്ടില്‍ നിന്ന്  10 ലക്ഷം രൂപ ചെലവിലാണ് റോഡ് നിര്‍മിച്ചത്. കോഡൂര്‍ പഞ്ചായത്ത് പ്രസിഡന്റ് സി.പി ഷാജി അധ്യക്ഷനായി. വാര്‍ഡ് മെമ്പര്‍ സജീന മേനമണ്ണില്‍, കെ.എന്‍.എ.ഹമീദ് മാസ്റ്റര്‍, പി.ടി സബാഹ് മാസ്റ്റര്‍, സി.കെ. സൈതലവി, മണ്ണില്‍ അബ്ദുല്‍ ഖാദിര്‍, എം.അബ്ദുസമദ്, കെ.എം.ഫൈസല്‍ എന്നിവര്‍ പങ്കെടുത്തു.