കേരള സംസ്ഥാന വനിതാ വികസന കോര്‍പ്പറേഷന്‍ ലളിതമായ നടപടിക്രമത്തിലൂടെ അതിവേഗ വ്യക്തിഗത/ഗ്രൂപ്പ്/വിദ്യാഭ്യാസ വായ്പകള്‍ നല്‍കുന്നു. നിശ്ചിത വരുമാന പരിധിയിലുള്ള 18-നും 55-നും മദ്ധ്യേ പ്രായമുള്ള തൊഴില്‍രഹിതരായ വനിതകള്‍ക്ക് മൂന്ന് മുതല്‍ അഞ്ച് വര്‍ഷം വരെ തിരിച്ചടവ് കാലാവധിയില്‍ 4-8% പലിശനിരക്കില്‍ ഉദ്യോഗസ്ഥ/വസ്തു ജാമ്യത്തിന്റെ അടിസ്ഥാനത്തിലാണ് വ്യക്തിഗത വായ്പ നല്‍കുന്നത്.

​പുതിയ അധ്യായന വർഷത്തിലേക്ക് ചുവടുവെക്കുന്ന കാക്കനാട് ചിൽഡ്രൻസ് ഹോമിലെ കുട്ടികൾക്ക് പഠനോപകരണങ്ങളും സ്പോർട്സ് കിറ്റുകളും സമ്മാനങ്ങളും വിതരണം ചെയ്തു.

 എറണാകുളം ചൈൽഡ് വെൽഫെയർ കമ്മിറ്റിയുടെ  നേതൃത്വത്തിൽ റിലയൻസ് ജിയോ കൊച്ചി യൂണിറ്റുമായി സഹകരിച്ചാണ് പദ്ധതി നടപ്പിലാക്കിയത്.

​കമ്പനി ജീവനക്കാർ  സമാഹരിച്ച തുക ഉപയോഗിച്ചാണ് കുട്ടികൾക്ക് ആവശ്യമായ പഠനോപകരണങ്ങളും കായിക പരിശീലനത്തിനുള്ള സ്പോർട്സ് കിറ്റുകളും മറ്റു സമ്മാനങ്ങളും നൽകിയത്. പരിപാടിയുടെ ഉദ്ഘാടനം എറണാകുളം സി.ഡബ്ല്യു.സി ചെയർപേഴ്സൺ അഡ്വ. ഉല്ലാസ് മധു നിർവഹിച്ചു.

 2026-27 അധ്യയന വർഷത്തിന് മുന്നോടിയായി മോട്ടോർ വാഹന വകുപ്പിന്റെ നേതൃത്വത്തിൽ സ്കൂൾ ബസുകളുടെ സുരക്ഷാ പരിശോധന മെയ് 20, 23 തീയതികളിൽ കളമശ്ശേരി സി.എഫ് ഗ്രൗണ്ടിൽ രാവിലെ എട്ട് മുതൽ നടക്കും. 

 കുട്ടികളുടെ സുരക്ഷ മുൻനിർത്തി ട്രാൻസ്പോർട്ട് കമ്മീഷണർ നൽകിയിട്ടുള്ള എല്ലാ നിർദ്ദേശങ്ങളും കൃത്യമായി പാലിക്കപ്പെടുന്നുണ്ടെന്ന് ഉറപ്പുവരുത്തിയതിന് ശേഷം മാത്രമേ വാഹനങ്ങൾക്ക് അനുമതി നൽകുകയുള്ളൂ എന്ന് ജില്ലാ റീജണൽ ട്രാൻസ്പോർട്ട് ഓഫീസർ കെ ആർ സുരേഷ് അറിയിച്ചു. 

ഇത്തവണത്തെ എസ്.എസ്.എൽ.സി പരീക്ഷയിൽ മിന്നും വിജയം നേടി എറണാകുളം ജില്ല. ജില്ലയിൽ  99.61 ശതമാനം വിദ്യാർത്ഥികളാണ് ഉപരിപഠനത്തിന് അർഹത നേടിയത്. പരീക്ഷ എഴുതിയ 30,578 വിദ്യാർത്ഥികളിൽ 30,458 പേരും  വിജയം കൈവരിച്ചു.  പെൺകുട്ടികളാണ് മുന്നിൽ. 
പരീക്ഷ എഴുതിയ 15,715 ആൺകുട്ടികളിൽ 15,649 പേരും, 14,863 പെൺകുട്ടികളിൽ 14,809 പേരും വിജയിച്ചു.

​ജില്ലയിലാകെ 2203 വിദ്യാർത്ഥികൾ എല്ലാ വിഷയങ്ങളിലും എ പ്ലസ്നേടി. ഇതിൽ 1553 പെൺകുട്ടികളും 650 ആൺകുട്ടികളുമാണ് ഉള്ളത്. 

എറണാകുളം സർക്കാർ മെഡിക്കൽ കോളേജിൽ ജനറൽ മെഡിസിൻ, നെഫ്രോളജി, ജനറൽ സർജറി ആൻഡ് കാർഡിയോളജി എന്നീ വിഭാഗങ്ങളിലേക്കായി ജൂനിയർ റെസിഡന്റുമാരെ നാൽപ്പത്തി അയ്യായിരം രൂപ വേതനത്തിൽ കരാർ അടിസ്ഥാനത്തിൽ 90 ദിവസത്തേക്ക് നിയമിക്കുന്നു. ഉദ്യോഗാർത്ഥികൾ മെയ് 19ന് രാവിലെ 11 ന് മുൻപായി യോഗ്യത, വയസ്, ജോലി പരിചയം ടി.സി.എം.സി രജിസ്ട്രേഷൻ എന്നിവ തെളിയിക്കുന്ന അസൽ രേഖകൾ സഹിതം അഡ്മിനിസ്ട്രേറ്റീവ് ബ്ലോക്കിൽ ഹാജരാകേണ്ടതാണ്. പ്രവർത്തിപരിചയം അഭികാമ്യം. ഫോൺ 0484 2754000

ഒ.ബി.സി. ഹയർ സെക്കൻഡറി വിഭാഗം വിദ്യാർത്ഥികൾക്കുള്ള കേന്ദ്രാവിഷ്കൃത പദ്ധതിയായ പി.എം വൈ.എ.എസ്‌.എ. എസ്‌.വി.ഐ ഒ.ബി.സി, ഇ.ബി.സി പോസ്റ്റ്മെട്രിക് സ്കോളർഷിപ്പിനായി പിന്നാക്ക വിഭാഗ വികസന വകുപ്പ് മുഖേന അപേക്ഷ സമർപ്പിച്ച യോഗ്യരായ വിദ്യാർത്ഥികൾക്ക് അർഹമായ തുക അനുവദിച്ചിരുന്നു. വിദ്യാർത്ഥികളുടെ ആധാർ സീഡ് ( ബന്ധിപ്പിച്ചിട്ടുള്ള) ചെയ്‌തിട്ടുള്ള ബാങ്ക് അക്കൗണ്ടിലേക്കാണ് തുക ലഭ്യമാകുന്നത്. ബാങ്ക് അക്കൗണ്ട് ആധാർ സീഡ് ചെയ്യാത്തത് മൂലം ആനുകൂല്യം ലഭിക്കാത്ത അർഹരായ വിദ്യാർത്ഥികൾ മെയ് 20 നകം ബാങ്ക് അക്കൗണ്ടും ആധാറുമായി ബന്ധിപ്പിക്കേണ്ടതാണ്.

സംസ്ഥാന ഫിഷറീസ് വകുപ്പിന് കീഴിൽ പ്രവർത്തിക്കുന്ന ഏജൻസി ഫോർ ഡെവലപ്‌മെൻ്റ് ഓഫ് അക്വാകൾച്ചർ കേരള (എ.ഡി.എ.കെ ) എറണാകുളം സെൻട്രൽ റീജിയനു കീഴിലുള്ള ഞാറക്കൽ ഫാമിലേക്ക് ഫാം തൊഴിലാളികളെ ദിവസവേതനത്തിൽ താൽകാലികമായി നിയമിക്കുന്നതിന് അപേക്ഷ ക്ഷണിച്ചു. ഏഴാം ക്ലാസ് പൂർത്തിയാക്കിയ 45 വയസ്സിൽ താഴെ പ്രായമുള്ളവർക്ക് അപേക്ഷിക്കാം. വീശുവല ഉപയോഗിച്ച് മൽസ്യബന്ധനം, നീന്തൽ, വഞ്ചി തുഴയൽ എന്നിവ അറിയുന്നവരായിരിക്കണം അപേക്ഷകർ. പ്രായോഗിക പരീക്ഷയുടെയും കൂടികാഴ്‌ചയുടെയും അടിസ്ഥാനത്തിലാണ് തിരഞ്ഞെടുപ്പ്.

വനിതാ ശിശു വികസന വകുപ്പിൻ്റെ കീഴിലുള്ള മൂവാറ്റുപുഴ ഐ.സി.ഡി.എസിലെ ഔദ്യോഗിക ആവശ്യങ്ങൾക്കായി കരാർ അടിസ്ഥാനത്തിൽ വാഹനം ലഭ്യമാക്കുന്നതിന് ടെൻഡർ ക്ഷണിച്ചു. ടെൻഡർ സമർപ്പിക്കേണ്ട അവസാന തീയതി മെയ് 25 വൈകിട്ട് 3 വരെ. ടെൻഡർ ഫോമിനും കൂടുതൽ വിവരങ്ങൾക്കും മൂവാറ്റുപുഴ ഐ.സി.ഡി.എസ് പ്രൊജക്ട് ഓഫീസ്, മിനിസിവിൽ സ്റ്റേഷൻ, രണ്ടാം നില, മുടവൂർ പി.ഒ-686669 എന്ന വിലാസത്തിൽ നേരിട്ടോ 0485-2814205 എന്ന ഫോൺ നമ്പറിലോ ബന്ധപ്പെടുക.
 

കളമശ്ശേരി ഗവ.പോളിടെക്‌നിക് കോളേജിലെ 2026-2027 അദ്ധ്യയന വർഷത്തേക്കുള്ള വർക്കിംഗ് പ്രൊഫഷണൽസിനുള്ള ഡിപ്ലോമ (ലാറ്ററൽ എൻട്രി) കോഴ്‌സിലേക്കുളള അഡ്മിഷൻ ആരംഭിച്ചു. ഐ.ടി.ഐ / പ്ലസ്‌ടു (സയൻസ് & മാത്തമാറ്റിക്‌സ്) ആണ് യോഗ്യത. അപേക്ഷ സ്വീകരിക്കുന്ന അവസാന തീയതി മെയ് 22. കൂടുതൽ വിവരങ്ങൾക്ക് https://polyadmission.org/ എന്ന വെബ്സൈറ്റ് സന്ദർശിക്കുക.
 

കാലാവസ്ഥാ വ്യതിയാനത്തെ ചെറുക്കുന്നതിനായി പ്രാദേശിക സമൂഹത്തെ സജ്ജമാക്കുക എന്ന ലക്ഷ്യത്തോടെ നടപ്പിലാക്കുന്ന 'മഴയറിവ്' മഴമാപിനി സ്ഥാപിക്കൽ ജില്ലയിലെ കൂടുതൽ ഗ്രാമപഞ്ചായത്തുകളിലേക്ക് വ്യാപിപ്പിക്കുന്നതിനു മുന്നോടിയായി  അവലോകന യോഗം ചേർന്നു. ജില്ലാ കളക്ടർ ജി പ്രിയങ്ക ഉദ്ഘാടനം ചെയ്തു.