കേരള സംസ്ഥാന പട്ടികജാതി പട്ടികവര്‍ഗ വികസന സഹകരണ ഫെഡറേഷന്‍ 17 വര്‍ഷത്തിനുശേഷം പ്രവര്‍ത്തനലാഭത്തിലായതായി സഹകരണ-ടൂറിസം മന്ത്രി കടകംപള്ളി സുരേന്ദ്രന്‍ വാര്‍ത്താസമ്മേളനത്തില്‍ അറിയിച്ചു.
    2017-18 സാമ്പത്തികവര്‍ഷം 17.51 ലക്ഷം രൂപയുടെ പ്രവര്‍ത്തനലാഭമാണ് ഫെഡറേഷന്‍ നേടിയത്. മുന്‍വര്‍ഷത്തെ അപേക്ഷിച്ച് ഫെഡറേഷന്റെ വില്‍പന 2017-18 സാമ്പത്തിക വര്‍ഷം 67.74 ശതമാനം വര്‍ധിച്ചു. ഈ സാമ്പത്തികവര്‍ഷം 200 ശതമാനം വര്‍ധന ലക്ഷ്യമിടുന്നുവെന്നും പട്ടികജാതി/പട്ടികവര്‍ഗ ജനവിഭാഗങ്ങള്‍ക്കായി ഫെഡറേഷനിലൂടെ 1000 പുതിയ തൊഴിലവസരങ്ങള്‍ സൃഷ്ടിക്കുമെന്നും മന്ത്രി പറഞ്ഞു.

കുടുംബശ്രീ 20-ാംവാർഷികത്തോടനൂബന്ധിച്ച  അരങ്ങ് - 2018' താലൂക്ക്തല കലാ-കായിക മത്സരങ്ങൾ തുടങ്ങി. കണ്ണൂർ, തലശ്ശേരി, ഇരിട്ടി, പയ്യന്നൂർ എന്നിവിടങ്ങളിലെ സ്റ്റേജിതര മത്സരങ്ങൾക്കാണ് തുടക്കമായത്. ഇന്ന്(ഏപ്രിൽ 27) സ്റ്റേജ് ഇനങ്ങൾ അരങ്ങേറും. 29 ഇനങ്ങളിലായി രണ്ടായിരത്തോളം കുടുംബശ്രീ അംഗങ്ങൾ മത്സരങ്ങളിൽ മാറ്റുരയ്ക്കും. 'അരങ്ങ് - 2018' ജില്ലാതല മത്സരങ്ങൾ 29, 30, മെയ് 1 തീയ്യതികളിൽ ധർമ്മടത്ത് നടക്കും. പാലയാട് ഡയറ്റ് ഹാൾ, പാലയാട് ഹൈസ്‌കൂൾ, അബു ചാത്തുക്കുട്ടി സ്മാരക മിനി സ്റ്റേഡിയം എന്നിവയാണ് വേദികൾ.

ജില്ലയിലെ കുടിവെള്ളം വിതരണം ചെയ്യുന്ന ടാങ്കർ ലോറികളിൽ ജി പി എസ് സംവിധാനം ഘടിപ്പിക്കുന്നതിനും അത് നിരീക്ഷിക്കുന്നതിനും മാസവാടക നിരക്കിൽ പരിചയ സമ്പന്നരായ സ്ഥാപനങ്ങളിൽ നിന്ന് ക്വട്ടേഷൻ ക്ഷണിച്ചു.  വാഹനത്തിൽ ജി പി എസ് സംവിധാനം ഘടിപ്പിച്ച് ഇന്റർനെറ്റ് വഴി നിരീക്ഷിക്കുന്നതിനും അതിന്റെ പ്രിന്റ് എടുത്ത് തരുന്നതിനുമുള്ള വാടകയാണ് രേഖപ്പെടുത്തേണ്ടത്.  ക്വട്ടേഷനുകൾ മെയ് 3 ന് രാവിലെ 11 മണിക്ക് മുമ്പ് പഞ്ചായത്ത് ഡെപ്യൂട്ടി ഡയറക്ടർ, കണ്ണൂർ എന്ന വിലാസത്തിൽ സീൽ ചെയ്ത കവറിൽ സമർപ്പിക്കണം.  ഫോൺ: 0497 2700081.

കേരളാ മോട്ടോർ തൊഴിലാളി ക്ഷേമനിധി ബൊർഡ് തൊഴിലാളികൾക്ക് അംഗത്വം എടുക്കുന്നതിനുള്ള നടപടികൾ പരിഷ്‌കരിക്കുന്നതിന്റെ ഭാഗമായി ഫോറം 3 ൽ പേരുള്ളതും എന്നാൽ അംഗത്വം എടുക്കുന്നതിൽ കാലതാമസം വരുത്തുകയും ചെയ്തിട്ടുള്ള അമ്പത്തഞ്ചോ അതിൽ താഴെയോ പ്രായമുള്ള തൊഴിലാളികൾക്ക് കുടിശ്ശിക തുക പലിശ സഹിതം ഒടുക്കി മുൻകാല പ്രാബല്യത്തോടെ അംഗത്വം എടുക്കുന്നതിനുള്ള സമയപരിധി ജൂൺ 30 വരെ നീട്ടിയതായി ജില്ലാ എക്‌സിക്യുട്ടീവ് ഓഫീസർ അറിയിച്ചു.  

ജില്ലയിൽ എക്‌സൈസ് വകുപ്പിൽ ഡ്രൈവർ ഗ്രേഡ് 2 തസ്തികയുടെ തെരഞ്ഞെടുപ്പിനായി 2017 ഡിസംബർ 28 ന് പ്രസിദ്ധീകരിച്ച ചുരുക്കപ്പട്ടികയിൽ ഉൾപ്പെട്ട ഉദേ്യാഗാർത്ഥികളുടെ ശാരീരിക അളവെടുപ്പും ഡ്രൈവിങ്ങ് ടെസ്റ്റും കോട്ടയം ജില്ലയിലെ തൃക്കോതമംഗലം ഗവ. വി എച്ച് എസ് എസ് ഗ്രൗണ്ടിൽ മെയ് 3 ന് നടത്തും.  ഉദേ്യാഗാർത്ഥികൾക്കുള്ള അറിയിപ്പ് എസ് എം എസ്, പ്രൊഫൈൽ മെസേജ്, കത്ത് എന്നിവ വഴി അറിയിച്ചിട്ടുണ്ട്.    ഉദേ്യാഗാർത്ഥികൾ അഡ്മിഷൻ ടിക്കറ്റ്, ഡ്രൈവിങ്ങ് ലൈസൻസ്, ഡ്രൈവിങ്ങ് ലൈസൻസ് പർട്ടിക്കുലേർസ്, ഏഴാം ക്ലാസ് യോഗ്യതാ സർക്കിഫിക്കറ്റ്/എസ് എസ് എൽ സി എന്നിവയുടെ അസ്സൽ സഹിതം രാവിലെ 6 മണിക്ക് ഹാജരാകണം.

കണ്ണൂർ ഗവ.എഞ്ചിനീയറിങ്ങ് കോളേജിലെ ഇലക്‌ട്രോണിക്‌സ് & കമ്മ്യൂണിക്കേഷൻ എഞ്ചിനീയറിങ്ങ് വിഭാഗത്തിലെ റോബോസേക് ക്ലബ്ബിന്റെ ആഭിമുഖ്യത്തിൽ മെയ് 2, 3 തീയതികളിൽ പരിശീലന ശിൽപശാല നടത്തുന്നു.  താൽപര്യമുള്ള എസ് എസ് എൽ സി, പ്ലസ്ടു, ഡിപ്ലോമ എഞ്ചിനീയറിങ്ങ് വിദ്യാർത്ഥികൾ രജിസ്‌ട്രേഷൻ ഫീസായ 450 രൂപ സഹിതം മെയ് 2 ന് രാവിലെ 10 മണിക്ക് കോളേജിൽ എത്തണം.  ഫോൺ: 9605636081.

കിണവക്കൽ-ചമ്പാട് റോഡ് നവീകരണ പ്രവൃത്തി നടക്കുന്നതിനാൽ ഒരുമാസത്തേക്ക് അതുവഴിയുള്ള ഗതാഗതം നിരോധിച്ചു.  പ്രസ്തുത റോഡിലൂടെ പാതിരിയാട്/അഞ്ചരക്കണ്ടി ഭാഗത്തേക്ക് പോകേണ്ട വാഹനങ്ങൾ കണ്ണൂർ കൂത്തുപറമ്പ് റോഡിലെ പാച്ചപൊയ്കയിൽ നിന്നും വലത്തോട്ട് തിരിഞ്ഞ് വെള്ളപ്പന്തലിലേക്ക് എത്തിച്ചേരേണ്ടതും അഞ്ചരക്കണ്ടി/പാതിരിയാട് ഭാഗത്തുനിന്നും വരുന്ന വാഹനങ്ങൾ വെള്ളപ്പന്തൽ ജംഗ്ഷനിൽ നിന്ന് ഇടത്തോട്ട്   തിരിഞ്ഞ് വെള്ളപ്പന്തൽ-കൈതച്ചാൽ വഴി കിണവക്കൽ-വേങ്ങാട് റോഡിൽ പ്രവേശിച്ച് കൂത്തുപറമ്പിൽ എത്തിച്ചേരേണ്ടതുമാണെന്ന് എക്‌സിക്യുട്ടീവ് എഞ്ചിനീയർ അറിയിച്ചു.

ചാലോട് ടി X ഡി പോളിനേഷൻ യൂണിറ്റിൽ നിന്നും  ജില്ലയിലെ കൃഷിഭവനുകളിലേക്ക് തൈകൾ വിതരണം ചെയ്യുന്നതിന് 60000 മല്ലിക വിത്തുകൾ, 60000 വാടാ മല്ലിക വിത്തുകൾ എന്നിവയ്ക്ക് ടെണ്ടർ ക്ഷണിച്ചു.   മെയ് 8 ന് 11.30 വരെ ടെണ്ടറുകൾ സ്വീകരിക്കും.  ഫോൺ: 0490 2486220.

ജില്ലാ വികസന സമിതി യോഗം ഏപ്രിൽ 28 രാവിലെ 11 മണിക്ക് കലക്ടറേറ്റ് കോൺഫറൻസ് ഹാളിൽ ചേരും.

മുഖ്യമന്ത്രി പിണറായി വിജയന്റെ എം.എൽ.എമാരുടെ പ്രത്യേക വികസനനിധിയിൽനിന്ന് 46,00,850 രൂപ വിനിയോഗിച്ച് ധർമ്മടം മണ്ഡലത്തിലെ 145 സ്‌കൂളുകളിലെ സ്മാർട്ട് ക്ലാസ്‌റൂമുകളിലേക്ക് ഉപകരണങ്ങൾ വാങ്ങുന്നതിന് ജില്ലാ കലക്ടർ ഭരണാനുമതി നൽകി. ഒരു സ്‌കൂളിന് 31,730 രൂപ നിരക്കിൽ മൾട്ടി മീഡിയ പ്രൊജക്ടർ, പ്രൊജക്ടർ സീലിംഗ് മൗണ്ടിംഗ് കിറ്റ്, പ്രൊജക്ടർ സ്‌ക്രീൻ, യു.എസ്.ബി സ്പീക്കർ എന്നിവയാണ് വാങ്ങുക.