സംസ്ഥാനസര്‍ക്കാര്‍ രണ്ടാംവാര്‍ഷികാഘോഷങ്ങളുടെ ഭാഗമായി  മെയ് 19 മുതല്‍ 26 വരെ  കാഞ്ഞങ്ങാട് അലാമിപ്പളളിയില്‍ നടക്കുന്ന പ്രദര്‍ശന-വിപണന മേള സംബന്ധിച്ച ഉപസമിതി യോഗം ഇന്ന് (27) നടക്കും.  വൈകുന്നേരം മൂന്നു മണിക്ക് കാഞ്ഞങ്ങാട്  നഗരസഭ ചെയര്‍മാന്‍ വി വി രമേശന്റെ അധ്യക്ഷതയില്‍ നഗരസഭാ കോണ്‍ഫറന്‍സ് ഹാളിലാണ് യോഗം ചേരുക. 

    പ്രവാസി ഭാരതീയര്‍(കേരളീയര്‍) കമ്മീഷന്‍ ചെയര്‍മാന്‍ ജസ്റ്റിസ് (റിട്ട) പി.ഭവദാസന്റെ അധ്യക്ഷതയില്‍ കാസര്‍കോട് ഗസ്റ്റ് ഹൗസില്‍ അദാലത്ത് നടത്തി. കമ്മീഷന്‍ അംഗങ്ങളായ സുബൈര്‍ കണ്ണൂര്‍, ആസാദ് തിരൂര്‍, മെമ്പര്‍ സെക്രട്ടറി എച്ച്.നിസാര്‍, നോര്‍ക്ക റൂട്ട്‌സ് പ്രതിനിധി ബാബുരാജ് തുടങ്ങിയവര്‍ പങ്കെടുത്തു. മൊത്തം 36 പരാതികളാണ് ജില്ലയില്‍ ആദ്യമായി നടത്തിയ കമ്മീഷന്‍ സിറ്റിംഗില്‍ പരിഗണിച്ചത്. 20 പരാതികള്‍ തീര്‍പ്പാക്കി. മറ്റുള്ള പരാതികള്‍ തുടര്‍നടപടികള്‍ക്കായി മാറ്റി. അടുത്ത സിറ്റിംഗ് മെയ് 16ന് എറണാകുളം ഗസ്റ്റ് ഹൗസില്‍ നടക്കും. 

  സൂദി അറേബ്യയിലെ അല്‍ മൗവ്വാസാത്ത് ഹെല്‍ത്ത് ഗ്രൂപ്പിലേക്ക് ബി.എസ്.സി/ഡിപ്ലോമ നഴ്‌സുമാരെ (സ്ത്രീകള്‍ മാത്രം) നിയമിക്കുന്നതിനായി ഒ.ഡി.ഇ.പി.സി തിരുവനന്തപുരം, വഴുതക്കാട് ഓഫീസില്‍ മെയ് മൂന്നിന് സ്‌കൈപ്പ് ഇന്റര്‍വ്യൂ ചെയ്യും.  താത്പര്യമുളളവര്‍ www.odepc.kerala.gov.in എന്ന വെബ്‌സൈറ്റില്‍ കൊടുത്തിരിക്കുന്ന നോട്ടിഫിക്കേഷന്‍ അനുസരിച്ച് അപേക്ഷിക്കണം. ഫോണ്‍: 0471 2329440, 41, 42, 43, 45, 9446444522.
പി.എന്‍.എക്‌സ്.1536/18

    നെയ്യാറ്റിന്‍കര സര്‍ക്കാര്‍ പോളിടെക്‌നിക് കോളേജില്‍ 2010-11 അദ്ധ്യയന വര്‍ഷം മുതല്‍ പഠനം നടത്തിയിരുന്നതും, അര്‍ഹതയുണ്ടായിരുന്നിട്ടും യഥാസമയം വിദ്യാഭ്യാസാനുകൂല്യം ലഭിക്കാത്തതുമായ വിദ്യാര്‍ത്ഥികള്‍ക്ക് അനുകൂല്യം നല്‍കും.  അര്‍ഹര്‍ മേയ് 10 ന് മുന്‍പ് തിരിച്ചറിയല്‍ രേഖയുമായി സ്ഥാപനത്തില്‍ നേരിട്ട് ഹാജരായി  തുക കൈപ്പറ്റണം.  നിശ്ചിത കാലയളവിനകം  കൈപ്പറ്റിയില്ലെങ്കില്‍ ഇനിയൊരറിയിപ്പ് കൂടാതെ തുക സര്‍ക്കാര്‍ ഫണ്ടിലേയ്ക്ക് തിരിച്ചടയ്ക്കും. അര്‍ഹരായ വിദ്യാര്‍ത്ഥികളുടെ വിവരങ്ങള്‍ നെയ്യാറ്റിന്‍കര സര്‍ക്കാര്‍ പോളിടെക്‌നിക് കോളേജില്‍ നിന്നോ 0471-2222935 എന്ന നമ്പര്‍ വഴിയോ അറിയാം.    

    ആലപ്പുഴ ഇന്‍ഡസ്ട്രിയല്‍ ട്രൈബ്യൂണല്‍ എം.ബി. പ്രജിത്ത് മേയ് മൂന്ന്, നാല്, 10, 11, 17, 18, 24, 25, 31 തീയതികളില്‍ എറണാകുളം ലേബര്‍ കോടതിയിലും, എട്ടിന് മൂവാറ്റുപുഴ കച്ചേരിത്താഴം കോര്‍ട്ട് കോംപ്ലക്‌സിലുള്ള ഓള്‍ഡ് ഫാമിലി കോര്‍ട്ട്  ഹാളിലും, 29 ന് പത്തനംതിട്ട ജില്ലാ മീഡിയേഷന്‍ സെന്ററിലും, മറ്റ് പ്രവൃത്തി ദിവസങ്ങളില്‍ ആസ്ഥാനത്തുവച്ചും തൊഴില്‍ തര്‍ക്ക കേസുകളും, എംപ്ലോയീസ് ഇന്‍ഷ്വറന്‍സ് കേസുകളും, എംപ്ലോയീസ് കോമ്പന്‍സേഷന്‍ കേസുകളും വിചാരണ ചെയ്യും.  
പി.എന്‍.എക്‌സ്.1544/18

    ഇന്ത്യയിലെ സൗദി അംബാസിഡര്‍ ഡോ. സൗദ് ബിന്‍ മുഹമ്മദ് അല്‍ സാദി മുഖ്യമന്ത്രി പിണറായി വിജയനുമായി ക്ലിഫ് ഹൗസില്‍ കൂടിക്കാഴ്ച നടത്തി. മലയാളിക്ക് സൗദി അറേബ്യ ജന്‍മദേശം പോലെ പ്രിയപ്പെട്ടതാണെന്ന് മുഖ്യമന്ത്രി പറഞ്ഞു. കേരളത്തിന്റെ അതിഥി മര്യാദയും സംസ്‌കാരവും തന്നെ ഏറെ ആകര്‍ഷിക്കുകയുണ്ടായെന്ന് ഡോ. സൗദ് വ്യക്തമാക്കി.

    തദ്ദേശസ്വയംഭരണസ്ഥാപനങ്ങള്‍ക്കായുള്ള ഓംബുഡ്‌സ്മാന്‍ ജസ്റ്റിസ് കെ.കെ. ദിനേശന്‍ ഏപ്രില്‍ 28 ന് കോഴിക്കോട് കളക്ടറേറ്റ് കോണ്‍ഫറന്‍സ് ഹാളില്‍ നടത്താന്‍ നിശ്ചയിച്ചിരുന്ന സിറ്റിംഗ് സാങ്കേതിക കാരണങ്ങളാല്‍ മാറ്റിവച്ചു.  ഈ തീയതികളില്‍ പോസ്റ്റ് ചെയ്തിരുന്ന കേസുകള്‍ ജൂണ്‍ 29 ന് പരിഗണിക്കും.  
പി.എന്‍.എക്‌സ്.1545/18

    ചെങ്ങന്നൂര്‍ ഉപതിരഞ്ഞെടുപ്പ് പ്രഖ്യാപിച്ച സാഹചര്യത്തില്‍ ഇന്നലെ (ഏപ്രില്‍ 26) മുതല്‍ ആലപ്പുഴ ജില്ലയില്‍ പെരുമാറ്റച്ചട്ടം നിലവില്‍ വന്നതായി ചീഫ് ഇലക്ട്രല്‍ ഓഫീസര്‍ ടിക്കാറാം മീണ വാര്‍ത്താസമ്മേളനത്തില്‍ പറഞ്ഞു. മേയ് 28 ന് വോട്ടെടുപ്പും 31 ന് വോട്ടെണ്ണലും നടക്കും. 

    കോവളത്ത് മരിച്ച നിലയില്‍ കാണപ്പെട്ട ലാത്വിയന്‍ യുവതി ലിഗയുടെ സഹോദരി ഇല്‍സയെ യാത്രിനിവാസിലെത്തി വിനോദസഞ്ചാര വകുപ്പ് മന്ത്രി കടകംപള്ളി സുരേന്ദ്രന്‍ സന്ദര്‍ശിച്ചു. ലിഗയുടെ മരണവുമായി ബന്ധപ്പെട്ട പോലീസ് അന്വേഷണം ശരിയായ ഗതിയില്‍ മുന്നോട്ടുപോകുകയാണെന്ന് മന്ത്രി ഇല്‍സയെ അറിയിച്ചു.
    സംസ്ഥാന സര്‍ക്കാരിന്റെ സമാശ്വാസമായി അഞ്ചുലക്ഷം രൂപയുടെ ചെക്ക് യൂറോ ആയി മന്ത്രി ഇല്‍സയ്ക്ക് കൈമാറി. ലിഗയുടെ ഭര്‍ത്താവിനും ഇല്‍സയ്ക്കും കേസുമായി ബന്ധപ്പെട്ട് സംസ്ഥാനത്ത് എത്ര ദിവസം തങ്ങണമോ അത്രയും ദിവസത്തെ ചെലവ് സര്‍ക്കാര്‍ വഹിക്കും. നാട്ടിലേക്ക് തിരികെ പോകാനാവശ്യമായ വിമാന ടിക്കറ്റും സൗജന്യമായി നല്‍കും.

    സംസ്ഥാനത്തെ അഞ്ച് കുടിവെള്ള പദ്ധതികള്‍ കിഫ്ബി ഫണ്ട് ഉപയോഗിച്ച് നടപ്പാക്കാന്‍ ഉത്തരവായി.  131 കോടി രൂപയാണ് പദ്ധതിക്കായി ചെലവഴിക്കുക.
    കുഞ്ഞിമംഗലം, ചെറുതാഴം, ഏഴിമല നേവല്‍ അക്കാദമി കുടിവെള്ള വിതരണ പദ്ധതിയുടെ ഒന്നാംഘട്ടം 44 കോടി രൂപയും മൂവാറ്റുപുഴ, പൈങ്ങോട്ടൂര്‍ പദ്ധതി 23 കോടി രൂപയും കൊഴിഞ്ഞാമ്പാറ, വടകരപ്പതി, എരുത്തമ്പതി, സമ്പൂര്‍ണ കുടിവെള്ള പദ്ധതി 29 കോടി രൂപയും ചെലവഴിച്ച് നടപ്പാക്കും.
    പെരുമാട്ടി, പട്ടണച്ചേരി, എലപ്പുള്ളി, നല്ലേപ്പള്ളി രണ്ടാംഘട്ട സമ്പൂര്‍ണ കുടിവെള്ള പദ്ധതിക്ക് 25 കോടി രൂപയും അമ്പലപ്പാറ സമഗ്ര കുടിവെള്ള പദ്ധതിക്ക് 10 കോടി രൂപയും ചെലവഴിക്കും.