കോന്നി താലൂക്കിലെ വിവിധ പ്രദേശങ്ങളില്‍ ഗ്യാസ് ഏജന്‍സിയിലെ ജീവനക്കാര്‍ എന്ന വ്യാജേന വീടുകളിലെത്തി അനധികൃതമായി പണപ്പിരിവ് നടത്തുകയും ആധാറിന്‍റെ പകര്‍പ്പ് വാങ്ങുകയും ചെയ്യുന്നതായി ശ്രദ്ധയില്‍പ്പെട്ടിട്ടുള്ളതിനാല്‍ ഗ്യാസ് ഉപഭോക്താക്ക ള്‍ ജാഗ്രത പാലിക്കണമെന്ന് കോന്നി താലൂക്ക് സപ്ലൈ ഓഫീസര്‍ അറിയിച്ചു.

വടക്കന്‍ കേരളത്തില്‍ ഉയര്‍ന്ന അന്തരീക്ഷ താപനില ശരാശരിയില്‍ നിന്നും നാല് മുതല്‍ 10 ഡിഗ്രി വരെ ഉയരാന്‍ സാധ്യതയുളളതായി കേന്ദ്ര കാലാവസ്ഥാ വകുപ്പിന്‍റെ മുന്നറിയിപ്പ് ലഭിച്ചിട്ടുള്ളതിനാല്‍ പൊതുജനങ്ങള്‍ സൂര്യാഘാതമേല്‍ക്കാതിരിക്കാന്‍ ജാഗ്രത പാലിക്കണമെന്ന് ദുരന്തനിവാരണവിഭാഗം അറിയിച്ചു. രാവിലെ 11 മുതല്‍ ഉച്ചയ്ക്ക് ശേഷം മൂന്നു വരെയെങ്കിലും സൂര്യപ്രകാശം നേരിട്ട് ഏല്‍ക്കുന്നത് ഒഴിവാക്കണം. നിര്‍ജലീകരണം തടയാന്‍ എപ്പോഴും കുപ്പിയില്‍ വെള്ളം കരുതുക. അയഞ്ഞ ഇളം നിറത്തിലുള്ള പരുത്തി വസ്ത്രങ്ങള്‍ ധരിക്കാന്‍ ശ്രദ്ധിക്കുക എന്നീ മുന്‍കരുതലുകള്‍ എല്ലാവരും സ്വീകരിക്കണം.

പ്രമുഖ തൊഴില്‍ ദാതാക്കളെ പങ്കെടുപ്പിച്ചുകൊണ്ട് ന്യൂഡല്‍ഹി ഡയറക്ടര്‍ ജനറല്‍ റിസെറ്റില്‍മെന്റിന്റെ ആഭിമുഖ്യത്തില്‍ തൊഴില്‍രഹിതരായ വിമുക്ത ഭടന്‍മാര്‍ക്കായി മാര്‍ച്ച് 8 ന് കൊച്ചിന്‍ നേവല്‍ ബേസിലെ ഹോക്കി സ്റ്റേഡിയത്തില്‍ എംപ്ലോയ്‌മെന്റ് സെമിനാര്‍ നടത്തുന്നു.  താല്‍പര്യമുള്ള വിമുക്ത ഭടന്‍മാര്‍ ഡി ജി ആര്‍ വെബ്‌സൈറ്റില്‍ (htt://www.dgrinfia.com or htt://www.triviz.com) ഓണ്‍ലൈനായി അപേക്ഷിക്കണം.  സ്‌പോട്ട് രജിസ്‌ട്രേഷനും അനുവദിച്ചിട്ടുണ്ട്. 
പി.എന്‍.സി/389/2018
 

ദേശീയ പോഷകാഹാര വാരാചരണത്തിന്റെ ഭാഗമായി സാമൂഹ്യനീതി വകുപ്പും കുടുംബശ്രീ മിഷനും സംയുക്തമായി അമൃതം ന്യൂട്രീമിക്‌സ് ഗുണഭോക്താക്കളായുള്ള ആറു മാസം മുതല്‍ മൂന്ന് വയസ്സുവരെ പ്രായമുള്ള കുട്ടികളുടെ അമ്മമാര്‍ക്കുവേണ്ടി നടത്തിയ സംസ്ഥാനതല പാചക മത്സരത്തില്‍ ഒന്നാംസ്ഥാനം ശ്രുതി ലജിന്‍ കരസ്ഥമാക്കി. കണ്ണൂര്‍ റൂറല്‍ ഐസിഡിഎസ് പരിധിയിലെ ചിറക്കല്‍ പഞ്ചായത്ത് പനങ്കാവ് റൈസ്മില്‍ അങ്കണവാടിയിലെ ഗുണഭോക്താവിന്റെ അമ്മയാണ് ശ്രുതി. ഒന്നാം സമ്മാനമായ ഒരു ലക്ഷം രൂപയും ട്രോഫിയും സര്‍ട്ടിഫിക്കറ്റും മാര്‍ച്ച് എട്ടിന് തിരുവനന്തപുരത്ത് നടക്കുന്ന വനിതാദിനാചരണ പരിപാടിയില്‍ വിതരണം ചെയ്യും.

കൂത്തുപറമ്പ് താലൂക്കാശുപത്രിയില്‍ പ്രവര്‍ത്തിക്കുന്ന സഖി വണ്‍ സ്‌റ്റോപ്പ് സെന്റര്‍ കുടുംബത്തിലും സമൂഹത്തിലും തൊഴിലിടത്തും അതിക്രമത്തിന് ഇരയാക്കപ്പെടുന്ന സ്ത്രീകള്‍ക്ക് താങ്ങും തണലുമാവുന്നു. ശാരീരികവും ലൈംഗികവും വൈകാരികവും മാനസികവും സാമ്പത്തികവുമായ പീഡനങ്ങള്‍ക്ക് ഇരയാവുന്നവര്‍ക്ക് പിന്തുണയേകുകയാണ് സഖി. ഇത്തരത്തില്‍ ചൂഷണങ്ങള്‍ക്കും പീഡനന്നവര്‍ക്കും വിധേയരാവുന്നവര്‍ക്ക് ചികിത്സാ സഹായം, നിയമസഹായം, മനഃശാസ്ത്ര കൗണ്‍സലിംഗ് എന്നിവ ഒരു മേല്‍ക്കൂരക്ക് കീഴില്‍ ഇവിടെ നല്‍കുന്നു. 18 വയസ്സിന് താഴെയുള്ള പെണ്‍കുട്ടികള്‍ക്കുള്‍പ്പെടെ സഹായം നല്‍കുന്നുണ്ട്. 

വിദ്യാര്‍ഥികള്‍ ശേഖരിക്കുന്ന പ്ലാസ്റ്റിക്കുകള്‍ സ്‌കൂളുകളില്‍നിന്ന് സംഭരിച്ച് പുനരുപയോഗം സാധ്യമാക്കുന്ന ജില്ലാ ഭരണകൂടത്തിന്റെ കലക്‌ടേഴ്‌സ് അറ്റ് സ്‌കൂള്‍ പദ്ധതി വിജയവഴിയിലൂടെ ഒരു അധ്യയന വര്‍ഷം പിന്നിടുന്നു. പദ്ധതിയില്‍ മികച്ച പ്രകടനം നടത്തിയ സ്‌കൂളുകള്‍ക്ക് കലക്ടറേറ്റില്‍ നടന്ന ചടങ്ങില്‍ പി.കെ ശ്രീമതി എം.പി ഉപഹാരം വിതരണം ചെയ്തു. പങ്കാളികളായ 150 ഓളം സ്‌കൂളുകള്‍ക്ക് സര്‍ട്ടിഫിക്കറ്റുകള്‍ നല്‍കി. അക്ലിയത്ത് എല്‍.പി സ്‌കൂള്‍ അഴീക്കോട്, ചിന്‍മയ വിദ്യാലയ തളിപ്പറമ്പ്, എസ്.എന്‍ വിദ്യാമന്ദിര്‍ തളാപ്പ്, കടമ്പൂര്‍ ഹൈസ്‌കൂള്‍ എന്നിവയാണ് മികച്ച പ്രകടനം നടത്തി ആദ്യ നാല് സ്ഥാനങ്ങളിലെത്തിയത്.