2018 ഫെബ്രുവരി 16 ലെ 7-ാം നമ്പര്‍ ഗസറ്റ് വിജ്ഞാപനപ്രകാരം കേരളാ സ്റ്റേറ്റ് ഇലക്ട്രിസിറ്റി ലൈസന്‍സിംഗ് ബോര്‍ഡ് കേരളത്തിലെ എല്ലാ ജില്ലകളിലും 2018 മെയില്‍ വയര്‍മാന്‍ എഴുത്ത് പരീക്ഷയ്ക്ക് നിശ്ചിത യോഗ്യതയുള്ളവരില്‍ നിന്നും അപേക്ഷകള്‍ ക്ഷണിച്ചു.  ഫോറവും വിശദ വിവരങ്ങളും www.ceikerala.gov.in ലും ജില്ലാ ഇലക്ട്രിക്കല്‍ ഇന്‍സ്‌പെക്ടര്‍മാരുടെ കാര്യാലയത്തിലും ലഭ്യമാണ്.  

സംസ്ഥാന സര്‍ക്കാരിന്റെ റബ്ബര്‍ ഉല്‍പാദന പ്രോത്സാഹന പദ്ധതി പ്രകാരം 2018 ഫെബ്രുവരി എഴു വരെ ബോര്‍ഡ് പരിശോധിച്ച് അംഗീകരിച്ച മുഴുവന്‍ ബില്ലുകളിലെയും (2018 ജനുവരി 15 വരെയുള്ളത്) സബ്‌സിഡി തുക റബ്ബര്‍ കര്‍ഷകരുടെ ബാങ്ക് അക്കൗണ്ടിലേയ്ക്ക് കൈമാറി. ഫെബ്രുവരി 15 വരെയുള്ള ബില്ലുകള്‍ സബ്‌സിഡിയ്ക്കായി കര്‍ഷകര്‍ക്ക് വെബ്‌സൈറ്റില്‍ അപ്‌ലോഡ് ചെയ്യാം.  ഇതുവരെ 188.69 കോടി രൂപയാണ് നടപ്പു സാമ്പത്തിക വര്‍ഷം കര്‍ഷകര്‍ക്ക് സബ്‌സിഡിയിനത്തില്‍ വിതരണം ചെയ്തത്.

പി.എന്‍.എക്‌സ്.732/18

ദേശീയ സ്‌കൂള്‍ കായിക മേളയില്‍ മെഡല്‍ നേടിയ കേരള കായിക താരങ്ങള്‍ക്കുള്ള പ്രൈസ്മണി കുടിശിക തുക അനുവദിച്ചു.  ദേശീയ സ്‌കൂള്‍ കായിക മേളയില്‍ മെഡല്‍ നേടുന്ന കായിക താരങ്ങള്‍ക്ക് നല്‍കുന്ന പ്രൈസ് മണി കഴിഞ്ഞ അഞ്ചുവര്‍ഷമായി മുടങ്ങിയിരുന്നു.  2012-13 മുതല്‍ 2015-16 വരെയുള്ള കാലയളവിലെ 2,54,60,000 രൂപയാണ് സര്‍ക്കാര്‍ അനുവദിച്ചത്.  നിയമസഭയുടെ ഏഴാം സമ്മേളനത്തില്‍ സമ്മേളനത്തില്‍ ഇതു സംബന്ധിച്ച ചോദ്യങ്ങള്‍ക്ക് മറുപടിയായി  കുടിശിക ഉടന്‍ വിതരണം ചെയ്യുമെന്ന് വിദ്യാഭ്യാസ മന്ത്രി സി. രവീന്ദ്രനാഥ് നല്‍കിയ ഉറപ്പാണ് പാലിക്കപ്പെട്ടത്..

പി.എന്‍.എക്‌സ്.731/18

അക്ഷയ ഊര്‍ജ്ജ ഉത്സവത്തിന്റെ ഭാഗമായി രണ്ടു ദിവസങ്ങളിലായി സംഘടിപ്പിക്കുന്ന അക്ഷയ ഊര്‍ജ്ജകോണ്‍ഗ്രസിന്റെ ഉദ്ഘാടനം വൈദ്യുതി മന്ത്രി എം.എം. മണി നിര്‍വഹിച്ചു.  കെ. മുരളീധരന്‍ എം.എല്‍.എ അധ്യക്ഷനായിരുന്നു.  സാമൂഹ്യപുരോഗതിയ്ക്കു വൈദ്യുതി അത്യന്താപേക്ഷിതമാണെന്നും ചെറുകിട വൈദ്യുതി പദ്ധതിയും സൗരോര്‍ജവും കാറ്റില്‍ നിന്നുള്ള ഊര്‍ജ്ജവും കൂടുതയായി പ്രയോജനപ്പെടുത്തണമെന്നും മന്ത്രി പറഞ്ഞു.  

വനിത-ശിശു വികസന വകുപ്പില്‍ പ്രോഗ്രാം ഓഫീസര്‍, വിമണ്‍ പ്രൊട്ടക്ഷന്‍ ഓഫീസര്‍, ഐ.സി.ഡി.എസ് സൂപ്പര്‍വൈസര്‍, ശിശു വികസന പദ്ധതി ഓഫീസര്‍, കെയര്‍ ടേക്കര്‍ തസ്തികയിലെ സ്ഥിരം ജീവനക്കാരില്‍ നിന്ന് 2018 ലെ പൊതുസ്ഥലം മാറ്റത്തിന് അപേക്ഷ ക്ഷണിച്ചു. അപേക്ഷകള്‍ 28 നകം മേലധികാരിയുടെ ശുപാര്‍ശയോടെ രണ്ടു പകര്‍പ്പുകള്‍ സഹിതം ജില്ലാ സാമൂഹ്യനീതി ഓഫീസില്‍ സമര്‍പ്പിക്കണം. ജില്ലാ ഓഫീസര്‍ അപേക്ഷയുടെ ഓരോ പകര്‍പ്പ് കാറ്റഗറി തിരിച്ച് വിവരം രേഖപ്പെടുത്തി മാര്‍ച്ച് 10 നകം വനിത ശിശു വികസന ഡയറക്‌ട്രേറ്റില്‍ നല്‍കണം.

* റോബോട്ടിന്റെ അനാച്ഛാദനവും പ്രവര്‍ത്തനോദ്ഘാടനവും മുഖ്യമന്ത്രി നിര്‍വഹിച്ചു

സാമൂഹ്യപ്രതിബദ്ധതയോടെ നൂതനാശയങ്ങളുമായി മുന്നോട്ടുവരാനുള്ള യുവസംരംഭകരുടെ കഴിവിന്റെ ഉദാഹരണമാണ് 'ബന്‍ഡിക്കൂട്ട്' റോബോട്ടെന്ന് മുഖ്യമന്ത്രി പിണറായി വിജയന്‍ പറഞ്ഞു. സ്റ്റാര്‍ട്ട് അപ്പ് മിഷനിലൂടെ ഇത്തരത്തില്‍ വലിയ സൗകര്യമാണ് യുവപ്രതിഭകള്‍ക്ക് ലഭ്യമാകുന്നതെന്നും അദ്ദേഹം പറഞ്ഞു. ആള്‍നൂഴികള്‍ ശുചിയാക്കുന്ന 'ബന്‍ഡിക്കൂട്ട്' റോബോട്ടിന്റെ അനാച്ഛാദനവും പ്രവര്‍ത്തനോദ്ഘാടനവും ജലഭവന്‍ അങ്കണത്തില്‍ നിര്‍വഹിച്ചു സംസാരിക്കുകയായിരുന്നു അദ്ദേഹം.

യാത്രക്കാര്‍ക്ക് അടിയന്തിര വൈദ്യസഹായം സൗജന്യമായി നല്‍കുന്ന വഴികാട്ടി പദ്ധതി സംസ്ഥാനത്ത് നടപ്പാക്കുമെന്ന് ആരോഗ്യമന്ത്രി കെ.കെ. ശൈലജ ടീച്ചര്‍ വാര്‍ത്താ സമ്മേളനത്തില്‍ പഠഞ്ഞു. ആരോഗ്യ വകുപ്പ് ദേശീയ ആരോഗ്യ ദൗത്യത്തിന്റെ സഹകരണത്തോടെയാണ് പദ്ധതി നടപ്പാക്കുന്നത്. ദീര്‍ഘദൂര യാത്രക്കാര്‍ക്കും പ്രാദേശിക ജനങ്ങള്‍ക്കും അടിയന്തിര ഘട്ടങ്ങളില്‍ കേന്ദ്രം പ്രയോജനപ്പെടും.  യാത്രക്കിടെ അപകടത്തില്‍പ്പെടുന്നവര്‍ക്കും മറ്റുദേഹാസ്വാസ്ഥ്യങ്ങള്‍ ഉണ്ടാകുന്നവര്‍ക്കും  പ്രഥമശുശ്രൂഷ നല്‍കി ഉടനടി ആശുപത്രികളില്‍ എത്തിച്ച് ജീവന്‍ രക്ഷിക്കുക എന്നതാണ് പദ്ധതിയിലൂടെ ലക്ഷ്യമിടുന്നത്.

പി. എസ്. സിയുടെ പ്രവര്‍ത്തനങ്ങളിലും വിവിധ വകുപ്പുകളിലേക്ക് നിയമനം നടത്തുന്നതിലും ആധുനിക സാങ്കേതിക വിദ്യ പരമാവധി പ്രയോജനപ്പെടുത്തണമെന്ന് ഗവര്‍ണര്‍ പി. സദാശിവം പറഞ്ഞു. കേരള പി. എസ്. സിയുടെ വജ്രജൂബിലി ആഘോഷങ്ങളുടെ സമാപനം ഉദ്ഘാടനം ചെയ്യുകയായിരുന്നു അദ്ദേഹം. 

         മൊഗ്രാല്‍പുത്തൂര്‍ ഗവ. ടെക്‌നിക്കല്‍ ഹൈസ്‌കൂള്‍ ക്യാമ്പസില്‍ പ്രവര്‍ത്തിക്കുന്ന ഗവ. ഇന്‍സ്റ്റിറ്റ്യൂട്ട് ഓഫ് ഫാഷന്‍ ഡിസൈനിംഗില്‍  ഇംഗ്ലീഷ്  അധ്യാപക ഒഴിവിലേക്ക് ദിവസവേതനാടിസ്ഥാനത്തില്‍ നിയമനം നടത്തുന്നു.  ഹയര്‍സെക്കന്ററി അധ്യാപക യോഗ്യതയുളളവര്‍ മാര്‍ച്ച് ഒന്നിന് രാവിലെ 11 ന്  അസല്‍ സര്‍ട്ടിഫിക്കറ്റുകള്‍ സഹിതം കൂടിക്കാഴ്ചക്ക് ഹാജരാകണം.  സര്‍വ്വീസില്‍  നിന്നും  വിരമിച്ചവരെയും  പരിഗണിക്കും. ഫോണ്‍ 9400006496, 04994 232969.