നിയമസഭാ തിരഞ്ഞെടുപ്പ് പൂർണ്ണമായും പരിസ്ഥിതി സൗഹൃദമാക്കാനൊരുങ്ങി ജില്ലാ ഭരണകൂടം. ജില്ലയിലെ ആകെയുള്ള 1898 പോളിംഗ് സ്റ്റേഷനുകളിലും ഹരിതചട്ടം കർശനമായി പാലിക്കും.  എല്ലാ തദ്ദേശ സ്വയംഭരണ സ്ഥാപന പരിധിയിലും ഓരോ 'മാതൃകാ ഹരിത ബൂത്ത്' സജ്ജീകരിച്ചിട്ടുണ്ട്. പൊതുജനങ്ങൾക്കിടയിൽ പരിസ്ഥിതി സംരക്ഷണ സന്ദേശം എത്തിക്കുകയെന്നതാണ് ഇതിലൂടെ ലക്ഷ്യമിടുന്നത്. കുടിവെള്ളം  സ്റ്റീൽ കുപ്പികളിൽ ഇവിടെ ലഭ്യമാക്കും. ജൈവ-അജൈവ മാലിന്യങ്ങൾ തരംതിരിക്കാൻ പ്രത്യേകം ബിന്നുകളും ഒരുക്കിയിട്ടുണ്ട്. ചില്ല് ഗ്ലാസ്സുകൾ, സ്റ്റീൽ, സെറാമിക് പ്ലേറ്റുകൾ എന്നിവ മാത്രമേ ഭക്ഷണത്തിനായി ഉപയോഗിക്കൂ.

 
കണ്ണൂർ ജില്ലയിലെ 21,76,984 വോട്ടർമാർ ഇന്ന് (ഏപ്രിൽ 9) 11 നിയമസഭ മണ്ഡലങ്ങളിലെ  പോളിംഗ് ബൂത്തുകളിലേക്ക്‌. രാവിലെ ഏഴ് മുതൽ വൈകീട്ട് ആറ് വരെയാണ് വോട്ടെടുപ്പ്. 

ബൂത്തുകളിലേക്കുള്ള വോട്ടിംഗ് സാധന സാമഗ്രികൾ 11  മണ്ഡലങ്ങളിലെയും അതാത് വിതരണ കേന്ദ്രങ്ങളിൽ ബുധനാഴ്ച്ച രാവിലെ 8 മുതൽ വിതരണം ചെയ്തു. ഉച്ച 12 ന് മുമ്പ് തന്നെ എല്ലായിടത്തും വിതരണം പൂർത്തിയാക്കി ഉദ്യോഗസ്ഥർ ബസുകളിൽ ബൂത്തിലേക്ക് യാത്രയായി. 

കുഞ്ഞുങ്ങളെയും എടുത്തു വോട്ടിടാൻ എത്തുന്നവർക്ക് ആശ്വാസമായി ജില്ലയിലെ 70 പോളിംഗ് ബൂത്തുകളിൽ കുട്ടികൾക്കായി ക്രഷ് സൗകര്യം ഒരുക്കും. ഇതിൽ എല്ലാ നിയമസഭ മണ്ഡലങ്ങളിലെയും മാതൃക പോളിങ് സ്റ്റേഷനുകളും 15 പിങ്ക് പോളിങ് സ്റ്റേഷനുകളും ഉൾപ്പെടും. വനിത-ശിശു വികസന വകുപ്പാണ് സൗകര്യമൊരുക്കുന്നത് . 

അമ്മമാർക്ക് കുഞ്ഞുങ്ങളെ സുരക്ഷിതമായി മുലയൂട്ടുന്നതിനുള്ള ഫീഡിങ് സൗകര്യവുമുണ്ടാകും. കുട്ടികൾക്ക് കളിക്കാനുള്ള കളിപ്പാട്ടങ്ങൾ, ഊഞ്ഞാൽ, കിടക്ക എന്നിവ ക്രഷ് സൗകര്യമുള്ള പോളിംഗ് ബൂത്തിൽ ഉണ്ടാകും.
ഓരോ ബൂത്തിലും രണ്ട് വീതം അംഗൻവാടി പ്രവർത്തകരാണ് ഇതിന്റെ മേൽനോട്ടം വഹിക്കുക. 

സ്വീപ് ഇങ്ക് ഇറ്റ് കണ്ണൂർ ക്യാമ്പയിന്റെ ഭാഗമായി ഓരോ നിയമസഭ മണ്ഡലത്തിലും ഒരു ബൂത്ത്‌ വീതം വ്യത്യസ്ത തീമിൽ അണിഞ്ഞൊരുങ്ങി വ്യാഴാഴ്ച്ച വോട്ടർമാർക്ക് സ്വാഗതമരുളും. കണ്ണൂർ മണ്ഡലത്തിന്റെ കണ്ണൂർ പൈതൃകം തീമിൽ കണ്ണൂർ കോട്ടയും കളരിപ്പയറ്റും ബൂത്ത്‌ ആർച്ചും കൊടിതോരണങ്ങളും കൊണ്ട് അലങ്കരിക്കുമ്പോൾ മനം കുളിർപ്പിക്കുന്ന പ്രകൃതിയും വനം-വന്യജീവി ജീവിതവുമാണ് തളിപ്പറമ്പിലെ ബൂത്തിന്റെ തീം. 

നിയമസഭ തിരഞ്ഞെടുപ്പിൽ ജില്ലയിലെ 11 മണ്ഡലങ്ങളിലെ പോളിങ് ബൂത്തുകളിലേക്കുള്ള ഉദ്യോഗസ്ഥരുടെ വിന്യാസം പൂർത്തിയായി. 

കളക്ട്രേറ്റ് കോൺഫറൻസ് ഹാളിൽ തിരഞ്ഞെടുപ്പ് നിരീക്ഷകരുടെ സാന്നിധ്യത്തിലാണ് ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടറുടെ നേതൃത്വത്തിൽ മൂന്നാം ഘട്ട റാൻഡമൈസേഷൻ പൂർത്തിയായത്.

നിയമസഭ തിരഞ്ഞെടുപ്പിന്റെ ഭാഗമായി ബൂത്തുകളിലെ തത്സമയ ദൃശ്യങ്ങൾ നിരീക്ഷിക്കുന്ന വെബ് കാസ്റ്റിംഗുമായി ബന്ധപ്പെട്ട് റിട്ടേണിംഗ് ഓഫീസർമാർക്കും മറ്റ് ജീവനക്കാർക്കും ജില്ലാതല പരിശീലന പരിപാടി സംഘടിപ്പിച്ചു. 

കളക്ടറേറ്റ് ഓഡിറ്റോറിയത്തിൽ സജ്ജീകരിച്ചിട്ടുള്ള  കൺട്രോൾ റൂമിലായിരുന്നു പരിശീലനം.
 നിയോജകമണ്ഡലാടിസ്ഥാനത്തിൽ സ്ഥാപിച്ചിട്ടുള്ള ക്യാമറകളിൽ നിന്നുള്ള ദൃശ്യങ്ങൾ ഒരേസമയം വീക്ഷിക്കുന്നതിനായി 100 മോണിറ്ററുകളാണ് കൺട്രോൾ റൂമിൽ ഒരുക്കിയിരിക്കുന്നത്. ജില്ലയിലെ മുഴുവൻ പോളിംഗ് ബൂത്തുകളിലുമായി  ഒരു ബൂത്തിൽ രണ്ട് ക്യാമറകൾ വീതം 4800 ക്യാമറകളാണ് സ്ഥാപിച്ചിട്ടുള്ളത്. 

ജില്ലാ തിരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ അരുൺ കെ വിജയൻ, സിറ്റി പോലീസ് കമ്മീഷണർ പി. നിധിൻ രാജ് എന്നിവർ വോട്ട് രേഖപ്പെടുത്തി. കണ്ണൂർ തോട്ടട എസ്.എൻ കോളേജിലെ വോട്ടർ ഫെസിലിറ്റേഷൻ സെന്ററിൽ എത്തിയാണ് ഇരുവരും വോട്ട് ചെയ്തത്. 

കണ്ണൂർ നിയമസഭ നിയോജക മണ്ഡലത്തിലാണ് ജില്ലാ കളക്ടർക്ക് വോട്ടുള്ളത്. കമ്മീഷണറുടെ വോട്ട് കാഞ്ഞങ്ങാട് മണ്ഡലത്തിലാണ്. 

ജില്ലയിൽ തിരഞ്ഞെടുപ്പ് ജോലികളിൽ ഏർപ്പെട്ടിരിക്കുന്ന ജീവനക്കാരുടെ പോസ്റ്റൽ വോട്ടുകൾ രേഖപ്പെടുത്താൻ ഏപ്രിൽ എട്ട് വരെയാണ് സമയം അനുവദിച്ചിരിക്കുന്നത്. 

ഏപ്രിൽ 9ന് നടക്കുന്ന നിയമസഭ തിരഞ്ഞെടുപ്പിനായി ജില്ല പൂർണ സജ്ജമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനും ജില്ലാ കളക്ടറുമായ അരുൺ കെ വിജയൻ വാർത്താസമ്മേളനത്തിൽ അറിയിച്ചു. 

രാവിലെ 7 മുതൽ വൈകുന്നേരം 6 വരെയാണ് വോട്ടെടുപ്പ്. സുതാര്യവും നീതിപൂർവവുമായ വോട്ടെടുപ്പ് ഉറപ്പാക്കാൻ എല്ലാ മുന്നൊരുക്കങ്ങളും പൂർത്തിയായി. ജില്ലയിൽ 11,24,959 സ്ത്രീകളും 10,52,014 പുരുഷന്മാരും 11 ട്രാൻസ്ജൻഡറും ഉൾപ്പെടെ 21,76,084 വോട്ടർമാരാണുള്ളത്. 

ഏപ്രിൽ 9ന് നടക്കുന്ന നിയമസഭ തിരഞ്ഞെടുപ്പിനായി ജില്ല പൂർണ സജ്ജമെന്ന് ജില്ലാ തിരഞ്ഞെടുപ്പ് ഉദ്യോഗസ്ഥനും ജില്ലാ കളക്ടറുമായ അരുൺ കെ വിജയൻ വാർത്താസമ്മേളനത്തിൽ അറിയിച്ചു. 

രാവിലെ 7 മുതൽ വൈകുന്നേരം 6 വരെയാണ് വോട്ടെടുപ്പ്. സുതാര്യവും നീതിപൂർവവുമായ വോട്ടെടുപ്പ് ഉറപ്പാക്കാൻ എല്ലാ മുന്നൊരുക്കങ്ങളും പൂർത്തിയായി. ജില്ലയിൽ 11,24,959 സ്ത്രീകളും 10,52,014 പുരുഷന്മാരും 11 ട്രാൻസ്ജൻഡറും ഉൾപ്പെടെ 21,76,084 വോട്ടർമാരാണുള്ളത്.