മലപ്പുറം - മഞ്ചേരി റോഡില്‍ ആനക്കയം മുതല്‍ വായ്പ്പാറപ്പടി വരെ റോഡ് പുനരുദ്ധാരണ പ്രവൃത്തി നടക്കുന്നതിനാല്‍ പ്രവൃത്തി തീരുന്നത് വരെ വലിയ വാഹനങ്ങള്‍ ആനക്കയം ജംങ്ഷനില്‍ നിന്നും ആനക്കയം - ഒറുവമ്പ്രം റോഡില്‍ പുള്ളിലങ്ങാടി - വേട്ടേക്കോട്-വായ്പ്പാറപ്പടി വഴിയും മഞ്ചേരി - പൂക്കോട്ടൂര്‍ വഴിയും പോകണം.  ചെറിയ വാഹനങ്ങള്‍ ആനക്കയം ജംങ്ഷനില്‍ നിന്നും ആനക്കയം - ഒറുവമ്പ്രം റോഡില്‍ പുള്ളിലങ്ങാടി - കെ.പി.പി.എം കോളേജ് റോഡ് - വായ്പ്പാറപ്പടി വഴിയും മഞ്ചേരി - പൂക്കോട്ടൂര്‍ റോഡില്‍ നിന്ന് മുള്ളമ്പാറ - കോണിക്കല്ല് - ഇരുമ്പുഴി വഴിയും പോകണം.

ജില്ലാ ആരോഗ്യ കുടുംബക്ഷേമ സമിതിക്കു കീഴില്‍ ജില്ലയില്‍ ആര്‍.എന്‍.ടി.സി പ്രോഗ്രാമില്‍ സീനിയര്‍ ട്രീറ്റ്‌മെന്റ് സൂപ്പര്‍വൈസര്‍ തസ്തികയിലെ രണ്ട് ഒഴിവിലേക്ക് കരാര്‍ വ്യവസ്ഥയില്‍ നിയമിക്കുന്നതിന് അപേക്ഷ ക്ഷണിച്ചു.  ഡിഗ്രി, അംഗീകൃത സാനിറ്ററി ഇന്‍സ്‌പെക്ടര്‍ കോഴ്‌സ്,   ചുരുങ്ങിയത്ത് രണ്ട് മാസത്തെ കമ്പ്യൂട്ടര്‍ പരിജ്ഞാനം തെളിയിക്കുന്നതിനുള്ള സര്‍ട്ടിഫിക്കറ്റ്, ഇരുചക്ര വാഹനം ഓടിക്കാനുള്ള കഴിവും സ്ഥിരം ലൈസന്‍സും എന്നിവ നിര്‍ബന്ധ യോഗ്യതയാണ്.

    ജില്ലാ പഞ്ചായത്ത് വാര്‍ഷിക പദ്ധതിയില്‍പ്പെടുത്തി ജില്ലാ പട്ടികജാതി വികസന ഓഫീസ് മുഖേന നടപ്പിലാക്കുന്ന മെറിറ്റോറിയല്‍ സ്‌കോളര്‍ഷിപ്പ്, യുവതികള്‍ക്ക് വസ്ത്ര നിര്‍മ്മാണ പരിശീലനം എന്നിവയിലേക്ക് നിശ്ചിത യോഗ്യതയുള്ളവരില്‍ നിന്ന് അപേക്ഷ ക്ഷണിച്ചു.  അപേക്ഷ നവംബര്‍ 18നകം അതത് പഞ്ചായത്ത് ഓഫീസില്‍ നല്‍കണം.

    പൊന്നാനി താലൂക്ക് നന്നമുക്ക് പഞ്ചായത്ത് 11-ാം വാര്‍ഡ് കല്ലൂര്‍മ്മ എന്ന സ്ഥലത്ത് പുതുതായി 81-ാം നമ്പര്‍ റേഷന്‍ കട സ്ഥിരമായി നടത്തുന്നതിന് അംഗീകൃത ചില്ലറ റേഷന്‍ വ്യാപാരിയായി നിയമിക്കുന്നതിന് താല്‍പര്യമുള്ള പട്ടികജാതിക്കാരില്‍ നിന്നും അപേക്ഷ ക്ഷണിച്ചു.  അപേക്ഷ ഡിസംബര്‍ ഏഴിന് വൈകീട്ട് മൂന്നിനകം ജില്ലാ സപ്ലൈ ഓഫീസില്‍ ലഭിക്കണം.

    മലപ്പുറം ഡിവിഷനിലെ നിലവില്‍ വിറ്റുപോയിട്ടില്ലാത്തതും ലൈസന്‍സ് ദീര്‍ഘിപ്പിച്ചിട്ടില്ലാത്തതുമായ കള്ളുഷാപ്പുകളുടെ വില്‍പ്പന നവംബര്‍ 16ന് രാവിലെ 11 ന് കലക്‌ട്രേറ്റ് സമ്മേളന ഹാളില്‍ നടത്തും.  പങ്കെടുക്കുന്നവര്‍ മതിയായ രേഖകളുടമായി എത്തണം.  കൂടുതല്‍ വിവരങ്ങള്‍ ബന്ധപ്പെട്ട എക്‌സൈസ് സര്‍ക്കിള്‍ ഓഫീസുമായോ മലപ്പുറം എക്‌സൈസ് ഡിവിഷന്‍ ഓഫീസുമായോ ബന്ധപ്പെടണം.

    തിരൂര്‍ താലൂക്ക് പുറത്തൂര്‍ വില്ലേജ് എടക്കനാട് ദേശം റി.സ 253/3ല്‍പ്പെട്ട നാല് സെന്റ് ഭൂമിയും കുഴിക്കൂറ് ചയമങ്ങളും നവംബര്‍ 22ന് രാവിലെ 11ന് വസ്തു നില്‍ക്കുന്ന സ്ഥലത്ത് ലേലം ചെയ്യും.

    പട്ടികവര്‍ഗ്ഗ വികസന വകുപ്പിന് കീഴില്‍ നിലമ്പൂരില്‍ പ്രവര്‍ത്തിക്കുന്ന ടൈലറിങ് ആന്‍ഡ് ഗാര്‍മെന്റ് മേക്കിങ് ട്രെയിനിങ് സെന്ററിലേക്ക് ദിവസ വേതനാടിസ്ഥാനത്തില്‍ ഇന്‍സ്ട്രക്ടറെ നിയമിക്കുന്നതിന് പട്ടികവര്‍ഗ്ഗ വിഭാഗക്കാരില്‍ നിന്ന് അപേക്ഷ ക്ഷണിച്ചു.  10-ാം ക്ലാസ്സ്, കെ.ജി.ടി.ഇ ടൈലറിങ് എന്നിവയാണ് യോഗ്യത.  താല്‍പര്യമുള്ളവര്‍ യോഗ്യത, ജാതി, പരിചയം എന്നിവ തെളിയിക്കുന്ന അസ്സല്‍ രേഖകളുമായി നവംബര്‍ 14ന് രാവിലെ 10ന് കൂടിക്കാഴ്ചയ്ക്കായി നിലമ്പൂര്‍ ഐ.റ്റി.ഡി.പി ഓഫീസില്‍ എത്തണം. ഫോണ്‍ 04931 220315.

    ദേശീയ തെരഞ്ഞെടുപ്പ് കമ്മീഷന്‍ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്കായി ക്വിസ് മത്സരം നടത്തുന്നു.  തെരഞ്ഞെടുപ്പും തെരഞ്ഞെടുപ്പ് നടപടി ക്രമങ്ങളും എന്ന വിഷയത്തില്‍ നാളെ (നവംബര്‍ 10) ഉച്ചക്ക് രണ്ടിനാണ് സ്‌കൂളുകളില്‍ മത്സരം നടത്തുന്നത്.  വിജയികള്‍ക്ക് ജില്ല, സംസ്ഥാന, ദേശീയ തലത്തില്‍ പങ്കെടുക്കാന്‍ അവസരം ലഭിക്കുമെന്ന് ജില്ലാ കലക്ടര്‍ അറിയിച്ചു.

    സാക്ഷരതാ മിഷന്‍ അതോറിറ്റി നടപ്പാക്കുന്ന പദ്ധതികള്‍ വിശദീകരിക്കുന്നതിനും നിര്‍ദ്ദേശങ്ങള്‍ നല്‍കുന്നതിനും പ്രേരകക്മാരുടെ മേഖലാതല യോഗം ഇന്ന് (നവംബര്‍ ഒമ്പത്) നടക്കും.  കോട്ടപ്പടി ബസ്റ്റാന്റ് ഓഡിറ്റോറിയത്തില്‍ നടക്കുന്ന യോഗം ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ ഉദ്ഘാടനം ചെയ്യും. നഗരസഭാ ചെയര്‍പേഴ്‌സണ്‍ സി.എച്ച് ജമീല അധ്യക്ഷത വഹിക്കും.  സാക്ഷരതാ മിഷന്‍ അതോറിറ്റി ഡയറക്ടര്‍ ഡോ. പി.എസ്. ശ്രീകല മുഖ്യ പ്രഭാഷണം നടത്തും.  

കോഴിക്കോട് വിമാനത്താവള ഉപദേശക സമിതിയില്‍ പുതിയ അംഗങ്ങളെ തെരഞ്ഞെടുക്കാന്‍ തീരുമാനിച്ചു.  വ്യാപാരം, വ്യവസായം, ട്രാവല്‍ ആന്‍ഡ് ടൂറിസ്സം, ടാക്‌സി അസോസിയേഷന്‍ എന്നീ മേഖലകളില്‍ നിന്നാണ് അംഗങ്ങളെ തെരഞ്ഞെടുക്കുന്നത്.  അതത് മേഖലകളില്‍ പ്രാഗല്‍ഭ്യം തെളിയിച്ചവര്‍ നവംബര്‍ 15നകം രേഖകള്‍ സഹിതം ജില്ലാ കലക്ടര്‍ക്ക് അപേക്ഷ സമര്‍പ്പിക്കണം.