സാക്ഷരതാ മിഷന്‍ അതോറിറ്റി നടപ്പാക്കുന്ന പദ്ധതികള്‍ വിശദീകരിക്കുന്നതിനും നിര്‍ദ്ദേശങ്ങള്‍ നല്‍കുന്നതിനും പ്രേരകക്മാരുടെ മേഖലാതല യോഗം ഇന്ന് (നവംബര്‍ ഒമ്പത്) നടക്കും.  കോട്ടപ്പടി ബസ്റ്റാന്റ് ഓഡിറ്റോറിയത്തില്‍ നടക്കുന്ന യോഗം ജില്ലാ പഞ്ചായത്ത് പ്രസിഡന്റ് എ.പി. ഉണ്ണികൃഷ്ണന്‍ ഉദ്ഘാടനം ചെയ്യും. നഗരസഭാ ചെയര്‍പേഴ്‌സണ്‍ സി.എച്ച് ജമീല അധ്യക്ഷത വഹിക്കും.  സാക്ഷരതാ മിഷന്‍ അതോറിറ്റി ഡയറക്ടര്‍ ഡോ. പി.എസ്. ശ്രീകല മുഖ്യ പ്രഭാഷണം നടത്തും.  

കോഴിക്കോട് വിമാനത്താവള ഉപദേശക സമിതിയില്‍ പുതിയ അംഗങ്ങളെ തെരഞ്ഞെടുക്കാന്‍ തീരുമാനിച്ചു.  വ്യാപാരം, വ്യവസായം, ട്രാവല്‍ ആന്‍ഡ് ടൂറിസ്സം, ടാക്‌സി അസോസിയേഷന്‍ എന്നീ മേഖലകളില്‍ നിന്നാണ് അംഗങ്ങളെ തെരഞ്ഞെടുക്കുന്നത്.  അതത് മേഖലകളില്‍ പ്രാഗല്‍ഭ്യം തെളിയിച്ചവര്‍ നവംബര്‍ 15നകം രേഖകള്‍ സഹിതം ജില്ലാ കലക്ടര്‍ക്ക് അപേക്ഷ സമര്‍പ്പിക്കണം.

നാട്ടാന പരിപാലന ചട്ടവും ആന എഴുന്നള്ളിപ്പും എന്ന വിഷയത്തില്‍ കലക്‌ട്രേറ്റ് സമ്മേളന ഹാളില്‍ ശില്‍പശാല സംഘടിപ്പിച്ചു.  ജില്ലാ കലക്ടര്‍ അമിത് മീണ ഉദ്ഘാടനം ചെയ്തു. മലപ്പുറം സോഷ്യല്‍ ഫോറസ്ട്രി അസിസ്റ്റന്റ് കണ്‍സര്‍വേറ്റര്‍ ഓഫ് ഫോറസ്റ്റ് കെ.എസ്.  സുദര്‍ശനന്‍, സോഷ്യല്‍ ഫോറസ്ട്രി റെയ്ഞ്ച് ഫോറസ്റ്റ് ഓഫീസര്‍ എം. മോഹന്‍ദാസ് എന്നിവര്‍ നേതൃത്വം നല്‍കി.  റിട്ട. ചീഫ് വെറ്റിനറി ഓഫീസര്‍ ഡോ. സുനില്‍കുമാര്‍ ക്ലാസ്സെടുത്തു.  ഫോറസ്റ്റ് ഓഫീസര്‍ കെ. മനോജ്കുമാര്‍, ഉത്സവ കമ്മിറ്റി ഭാരവാഹികള്‍, ആന ഉടമകള്‍, പാപ്പാന്‍മാര്‍ എന്നിവര്‍ ശില്‍പശാലയില്‍ പങ്കെടുത്തു.  

എക്‌സ് ഒഫിഷ്യോ അംഗങ്ങളെയും സര്‍ക്കാര്‍ നിര്‍ദ്ദേശിച്ച അംഗങ്ങളെയും ഉള്‍പ്പെടുത്തി ജില്ലാ സ്‌പോട്‌സ് കൗണ്‍സിലും എക്‌സിക്യൂട്ടീവ് കമ്മിറ്റിയും കായിക യുവജന കാര്യ വകുപ്പ് പുനസംഘടിപ്പിച്ചു.

 ഭാഷ സംസ്‌കാരത്തിന്റെ പ്രതീകമാണെന്നും ഭാഷയെ കൈവിട്ടാല്‍ നമുക്ക് സ്വന്തമായുള്ള കലയും സംസ്‌കാരവും പാരമ്പര്യവും നഷ്ടമാവുമെന്നും അഡ്വ എം.ഉമ്മര്‍ എം.എല്‍.എ.  ഔദേ്യാഗിക ഭാഷാ വാരാചരണത്തിന്റെ ജില്ലാതല സമാപനം മഞ്ചേരി ഗവ. ഹയര്‍സെക്കന്ററി സ്‌കൂളില്‍ ഉദ്ഘാടനം ചെയ്യുകയായിരുന്നു എം.എല്‍.എ. മലയാളത്തെ സ്വീകരിക്കാനും സ്വായത്തമാക്കാനും പ്രചരിപ്പിക്കാനും പുതിയ തലമുറ മുന്നോട്ട് വരണമെന്നും അദ്ദേഹം ആവശ്യപ്പെട്ടു.

ന്യൂനപക്ഷ വിഭാഗങ്ങള്‍ക്കായി പുതുതായി ആരംഭിച്ച ഭവന വായ്പാ പദ്ധതിയുടെ ഉദ്ഘാടനവും മദ്രസ്സ അധ്യാപകര്‍ക്ക് നല്‍കി വരുന്ന ഭവന വായ്പയുടെ വിതരണോദ്ഘാടനവും ഇന്ന് (നവംബര്‍ 10ന്) രാവിലെ 10ന് തദ്ദേശ സ്വയംഭരണ - ന്യൂനപക്ഷക്ഷേമ വകുപ്പ് മന്ത്രി ഡോ. കെ.ടി ജലീല്‍ നിര്‍വ്വഹിക്കും.  വളാഞ്ചേരി സര്‍വ്വീസ് കോ-ഓപ്പറേറ്റീവ് ബാങ്ക് ഓഡിറ്റോറിയത്തില്‍ നടക്കുന്ന പരിപാടിയില്‍ ആബിദ് ഹുസൈന്‍ തങ്ങള്‍  എം.എല്‍.എ അധ്യക്ഷത വഹിക്കും.  
കെ.എസ്.എം.ഡി.എഫ്.സി  ചെയര്‍മാന്‍ എ.പി. അബ്ദുല്‍ വഹാബ്, വളാഞ്ചേരി നഗരസഭ ചെയര്‍പേഴ്‌സണ്‍ ഷാഹിന എം, നഗരസഭ പ്രതിപക്ഷ നേതാവ് ടി.പി. അബ്ദുല്‍ ഗഫൂര്‍ തുടങ്ങിയവര്‍ പങ്കെടുക്കും.

തദ്ദേശ സ്വയംഭരണ സ്ഥാപനങ്ങളുടെ പദ്ധതി ഭേദഗതികള്‍ക്ക് അംഗീകാരം നല്‍കുന്നതിന് ജില്ലാ ആസൂത്രണ സമിതിയോഗം നവംബര്‍ 16ന് വൈകുന്നേരം മൂന്നിന് ജില്ലാ പഞ്ചായത്ത് സമ്മേളന ഹാളില്‍ ചേരും.

    മലപ്പുറം ഡിവിഷനിലെ നിലവില്‍ വിറ്റുപോയിട്ടില്ലാത്തതും ലൈസന്‍സ് ദീര്‍ഘിപ്പിച്ചിട്ടില്ലാത്തതുമായ കള്ളുഷാപ്പുകളുടെ വില്‍പ്പന നവംബര്‍ 16ന് രാവിലെ 11 ന് കലക്‌ട്രേറ്റ് സമ്മേളന ഹാളില്‍ നടത്തും.  പങ്കെടുക്കുന്നവര്‍ മതിയായ രേഖകളുമായി എത്തണം.  കൂടുതല്‍ വിവരങ്ങള്‍ക്ക് ബന്ധപ്പെട്ട എക്‌സൈസ് സര്‍ക്കിള്‍ ഓഫീസുമായോ മലപ്പുറം എക്‌സൈസ് ഡിവിഷന്‍ ഓഫീസുമായോ ബന്ധപ്പെടണം.

കോഡൂര്‍ ഗ്രാമപ്പഞ്ചായത്തിന്റെ വാര്‍ഷിക പദ്ധതി പ്രകാരം പത്താംതരം  വിജയിച്ച 40 വയസ്സിന് താഴെയുള്ളവര്‍ക്ക് സൗജന്യ കംപ്യൂട്ടര്‍ പരിശീലനം നല്‍കും. സര്‍ക്കാര്‍ സ്ഥാപനമായ സി-ഡിറ്റ് നടത്തുന്ന പി.എസ്.സി. അംഗീകൃതമായ ആറ് മാസത്തെ ഡിപ്ലോമ ഇന്‍ കംപ്യൂട്ടര്‍ ആപ്ലിക്കേഷന്‍ കോഴ്സിലാണ് പരിശീലനം നല്‍കുന്നത്. വിവരങ്ങള്‍ക്ക്, മാനേജിംഗ് ഡയറക്റ്റര്‍, കോഡൂര്‍ ഗ്രാമപഞ്ചായത്ത് കംപ്യൂട്ടര്‍ ട്രൈനിംഗ് സെന്റര്‍, താണിക്കല്‍, കോഡൂര്‍ പി.ഒ. വിലാസത്തില്‍ ബന്ധപ്പെടാം.  ഫോണ്‍ 0483 2868518.

കേന്ദ്ര-സംസ്ഥാന സര്‍ക്കാറുകള്‍ നടപ്പിലാക്കുന്ന സമഗ്ര ആരോഗ്യ ഇന്‍ഷുറന്‍സ് പദ്ധതിയില്‍ ഇതുവരെ ചേരാത്തവര്‍ക്കും മുന്‍വര്‍ഷങ്ങളില്‍ പുതുക്കാന്‍ വിട്ടു പോയവര്‍ക്കും പദ്ധതിയില്‍ ചേരുന്നതിന്ന് നവംബര്‍ 15 വരെ അക്ഷയ കേന്ദ്രങ്ങള്‍ വഴിയും കുടുംബശ്രീയുടെ കീഴിലുള്ള ഉന്നതി കേന്ദ്രങ്ങള്‍ വഴിയും അപേക്ഷിക്കാം. 2018 മാര്‍ച്ച് വരെ കാലാവധിയുള്ള സ്മാര്‍ട്ട് കാര്‍ഡ് കൈവശമുള്ളവര്‍ വീണ്ടും അപേക്ഷ നല്‍കേണ്ടതില്ല.