സര്‍ക്കാര്‍-എയ്ഡഡ് സ്‌കൂളുകളില്‍ ഒന്ന് മുതല്‍ 10 വരെ ക്ലാസ്സുകളിലെ ഒ.ഇ.സി. സ്‌കോളര്‍ഷിപ്പിന് അര്‍ഹരായ വിദ്യാര്‍ഥികളുടെ  വിവരങ്ങള്‍ ഓണ്‍ലൈനായി അപേക്ഷിച്ചതിന് ശേഷം ബെനിഫിഷറി ലിസ്റ്റ് കിട്ടിയിട്ടും ബാങ്ക് അക്കൗണ്ടുകളില്‍ ആനുകൂല്യം ക്രെഡിറ്റാവാത്ത സ്‌കൂളുകള്‍ വിവരം അറിയിക്കണം.

പിന്നാക്ക വിഭാഗ വികസന വകുപ്പിന്റെ കോഴിക്കോട് മേഖലാ ഓഫീസില്‍ സ്‌കൂള്‍ കോഡ്, ബാങ്ക് അക്കൗണ്ട് വിവരങ്ങള്‍ രേഖാമൂലം നല്‍കണമെന്ന് ഡെപ്യൂട്ടി ഡയറക്ടര്‍ അറിയിച്ചു.

ഫോണ്‍ : 0495 2377786.
 

പാലക്കാട് മെഡിക്കല്‍ കോളെജില്‍ പ്രൊഫസര്‍, അസോസിയെറ്റ് പ്രൊഫസര്‍ , സീനിയര്‍ റസിഡന്റ് അധ്യാപക തസ്തികകളിലേയ്ക്ക് കരാറടിസ്ഥാനത്തില്‍ നിയമനം നടത്തും. ഒപ്‌ടോമെട്രിസ്റ്റ് , എസ്.റ്റി.ഐ. കൗണ്‍സലര്‍, (ഡെര്‍മറ്റോളജി) തസ്തികകളിലേയ്ക്കും നിയമനം നടത്തും.

ഉദ്യോഗാര്‍ഥികള്‍ നവംബര്‍ 14 വൈകീട്ട് അഞ്ചിനകം അപേക്ഷിക്കണം. ഫോണ്‍ : 0491 2000644.
 

കല്‍പ്പാത്തി രഥോത്സവത്തോടനുബന്ധിച്ച് ജില്ലാ ടൂറിസം പ്രമോഷന്‍ കൗണ്‍സിലിന്റെ ആഭിമുഖ്യത്തില്‍  സംസ്ഥാന ടൂറിസം വകുപ്പിന്റെ  സഹകരണത്തോടെ നവംബര്‍ 13 വരെ കല്‍പ്പാത്തി ദേശീയ സംഗീതോത്സവം നടക്കും. 

കല്‍പാത്തി ചാത്തപ്പുരം മണി അയ്യര്‍ റോഡില്‍ പ്രത്യേകം സജ്ജീകരിച്ച  ലാല്‍ഗുഡി.ജി.ജയരാമന്‍ നഗറില്‍  ഇന്ന് (നവംബര്‍ ഒമ്പത്) മുത്തുസ്വാമി ദീക്ഷിതര്‍ ദിനത്തില്‍ വൈകീട്ട് അഞ്ചിന് വിവേക് മൂഴിക്കുളത്തിന്റെ സംഗീത കച്ചേരിക്ക് എന്‍.എം.ബ്രഹ്മദത്തന്‍ (വയലിന്‍), എന്‍.നാഗരാജ് (മൃദംഗം) പക്കമേളമൊരുക്കും. 

എല്‍.ബി.എസ് സെന്റര്‍ ഫോര്‍ സയന്‍സ് ആന്‍ഡ് ടെക്നോളജിയുടെ പാലക്കാട് ഉപകേന്ദ്രത്തില്‍ നോര്‍ക്ക റൂട്സിന്റെ ആഭിമുഖ്യത്തില്‍ നടക്കുന്ന'മൊബൈല്‍ ഫോണ്‍ റിപ്പയറിങ്  ആന്‍ഡ് സര്‍വീസിങ്', 'ഫിനാന്‍ഷല്‍ അക്കൗണ്ടിങ് പാക്കേജ്', 'കംപൂട്ടര്‍ ഹാര്‍ഡ്‌വേര്‍  മെയ്ന്റനന്‍സ് ആന്‍ഡ് ബേസിക് നെറ്റ്വര്‍ക്കിങ്' കോഴ്സുകളിലേക്ക് എസ്.എസ്.എല്‍.സി യോഗ്യതയുളളവര്‍ക്ക് അപേക്ഷിക്കാം.

കുമരപുരം ഗവ.ഹയര്‍ സെക്കന്‍ഡറി സ്‌കൂളിലെ സ്‌കൗട്ട്‌സ് ആന്‍ഡ് ഗൈഡ്‌സ് യൂനിറ്റിന്റെ ആഭിമുഖ്യത്തില്‍ നടത്തിയ ലഹരി വിരുദ്ധ പ്രവര്‍ത്തനങ്ങളുടെ ഉദ്ഘാടനം എ.എസ്.പി.ജി.പൂങ്കുഴലി നിര്‍വഹിച്ചു. സ്‌കൂളില്‍ നടന്ന യോഗത്തില്‍ പാലക്കാട് നഗരസഭാ കൗണ്‍സിലര്‍ റ്റി.എസ്.മീനാക്ഷി അധ്യക്ഷയായി.

സ്‌കൂള്‍ പ്രിന്‍സിപ്പല്‍ സി.എസ്.മണി, പി.റ്റി.എ. പ്രസിഡന്റ് സുനില്‍കുമാര്‍, എന്‍.എസ്.എസ്. പ്രോഗ്രാം ഓഫീസര്‍ ബി.പ്രദീപ്കുമാര്‍ , ഭാസ്‌കരന്‍മാഷ്, സ്‌കൂള്‍ ചെയര്‍മാന്‍ എസ്.ശരത് , സ്‌കൗട്ട്‌സ് ആന്‍ഡ് ഗൈഡ്‌സ് കാപ്റ്റന്‍ ആന്‍സി ദീപ എന്നിര്‍ പങ്കെടുത്തു.

ജില്ലാ കുടുംബശ്രീ മിഷനില്‍ ഒഴിവുള്ള ബ്ലോക്ക് കോഡിനേറ്റര്‍-ഒന്ന്, ബ്ലോക്ക് കോഡിനേറ്റര്‍-രണ്ട് ഒഴിവുകളിലേയ്ക്ക് കരാറടിസ്ഥാനത്തില്‍ നിയമനം നടത്തും. ഉപപട്ടികയില്‍ ഉള്‍പ്പെട്ടവരുടെ അഭിമുഖം നവംബര്‍ ഒമ്പത്, 10 തീയതികളില്‍ ജില്ലാ പഞ്ചായത്ത് ആരോഗ്യ വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സന്റെ ചേംബറില്‍ നടക്കും.

ബ്ലോക്ക് കോഡിനേറ്റര്‍-രണ്ട് നവംബര്‍ ഒമ്പതിന് ഉച്ചയ്ക്ക് രണ്ടിനും ബ്ലോക്ക് കോഡിനേറ്റര്‍- ഒന്ന് നവംബര്‍ 10 രാവിലെ 9.30നുമാണ് കൂടിക്കാഴ്ച നടക്കും.

ലീഗല്‍ സര്‍വീസസ് ദിനാചരണത്തിന്റെ ഭാഗമായി ജില്ലാ ലീഗല്‍ സര്‍വീസസ് അതോറിറ്റി ഇന്ന് (നവംബര്‍ ഒമ്പത്) മുതല്‍ 18 വരെ നിയമ സേവന പ്രചാരണം നടത്തും. രാവിലെ 9.30ന് ജില്ലാ കോടതി കോംപ്ലക്‌സില്‍ ജില്ലാ ജഡ്ജി കെ.പി. ഇന്ദിര പ്രചാരണം ഉദ്ഘാടനം ചെയ്യും. 

ഭിന്നലിംഗക്കാര്‍ക്ക് തുടര്‍ വിദ്യാഭ്യാസം ഉറപ്പുവരുത്തുന്നതിന് ആരംഭിച്ചിട്ടുള്ള 'സമന്വയ' ജില്ലാതല രജിസ്ട്രേഷന് തുടക്കമായി. ജില്ലാ പഞ്ചായത്ത് മിനി സമ്മേളന ഹാളില്‍ ചേര്‍ന്ന പരിപാടി ജില്ലാ പഞ്ചായത്ത് പ്രസിഡന്റ് കെ.ശാന്തകുമാരി ഉദ്ഘാടനം ചെയ്തു.

സംസ്ഥാന സര്‍ക്കാറും തൊഴില്‍ വകുപ്പും സംയുക്തമായി നടപ്പാക്കുന്ന 'ആവാസ് ' ആരോഗ്യ ഇന്‍ഷൂറന്‍സ് പദ്ധതിയില്‍ ഇതര സംസ്ഥാന തൊഴിലാളികള്‍ അംഗമാക്കുന്നുണ്ടെന്ന് 
തൊഴിലുടമകള്‍ ഉറപ്പാക്കണമെന്ന് ജില്ലാ ലേബര്‍ ഓഫീസര്‍ (എന്‍ഫോഴ്‌സ്‌മെന്റ്) അറിയിച്ചു. 

മുന്‍കൂട്ടി നിശ്ചയിക്കുന്ന എന്റോള്‍മെന്റ് സെന്ററുകളില്‍ തൊഴിലാളികളെ ആധാര്‍ കാര്‍ഡ് അല്ലെങ്കില്‍ വോട്ടേഴ്‌സ് ഐ ഡി കാര്‍കളുമായി എന്റോള്‍മെന്റിന് എത്തിക്കണം. 
 

കണ്‍സ്യൂമര്‍ ഫെഡിന്റെ സഹായത്തോടെ പ്രാഥമിക സഹകരണ സംഘങ്ങള്‍ നടത്തുന്ന നീതി മെഡിക്കല്‍ സ്റ്റോറുകളുടെ പ്രവര്‍ത്തന-അവലോകന യോഗം ജില്ലാ സഹകരണ ബാങ്കിന്റെ ഹെഡ് ഓഫീസ് സമ്മേളന ഹാളില്‍ ചേര്‍ന്നു.

കണ്‍സ്യൂമര്‍ ഫെഡ് ചെയര്‍മാന്‍ എം.മെഹബൂബ് യോഗം ഉദ്ഘാടനം ചെയ്തു. ജില്ലാ സഹകരണ സംഘം ജോയിന്റ് രജ്‌സ്ട്രാര്‍ (ജനറല്‍) എം.കെ.ബാബു അധ്യക്ഷനായി. കണ്‍സ്യൂമര്‍ ഫെഡ് സ്‌പെഷല്‍ ഓഫീസര്‍ അബ്ദുള്‍ റഷീദ്, ജില്ലാ ബാങ്ക് ജനറല്‍ മാനെജര്‍ എ.സുനില്‍കുമാര്‍, പ്ലാനിങ് അസി.രജിസ്ട്രാര്‍ ഇ ഹരിദാസ്, റീജനല്‍ മാനെജര്‍ ശുഭ തുടങ്ങിയവര്‍ സംസാരിച്ചു.