മനുഷ്യാവകാശ ദിനാചരണത്തിന്റെ ഭാഗമായി സാമൂഹ്യനീതി വകുപ്പ് സര്‍ക്കാര്‍ അംഗീകൃത ഹൈസ്‌കൂള്‍, കോളേജ് വിദ്യാര്‍ഥികള്‍ക്ക് പ്രസംഗം, പ്രബന്ധ മത്സരങ്ങള്‍ നടത്തുന്നു.  ഡിസംബര്‍ എട്ടിന് രാവിലെ 9.30ന് മലപ്പുറം സിവില്‍ സ്റ്റേഷനിലെ കുടുംബശ്രീ ഹാളിലാണ് മത്സരം.  വിഷയം തത്സമയം നല്‍കും.  ഒരു സ്‌കൂളില്‍ നിന്നും ഒരു ഇനത്തില്‍ ഒരു വിദ്യാര്‍ഥിക്ക് പങ്കെടുക്കാം.  താല്‍പര്യമുള്ളവര്‍ സ്ഥാപന മേധാവിയുടെ സാക്ഷ്യപത്രം സഹിതം എത്തണം.  ഫോണ്‍ 0483 2735324.

    മത്സ്യത്തൊഴിലാളി കടാശ്വാസ കമ്മീഷന്‍ അദാലത്ത് ഡിസംബര്‍ 12ന് രാവിലെ 10 ന് തിരൂര്‍ ഇ.എം.എസ്. സാംസ്‌കാരിക നിലയത്തില്‍ നടത്തും.  അദാലത്തില്‍ പങ്കെടുക്കുവാന്‍ നോട്ടീസ് കൈപ്പറ്റിയ അപേക്ഷകരും ബന്ധപ്പെട്ട ബാങ്കിന്റെ പ്രതിനിധികളും  ഹാജരാകണം.

ജില്ലയിലെ വ്യാപാരികള്‍, ടാക്‌സ് പ്രാക്ടീഷണര്‍മാര്‍, പാര്‍സല്‍ ഏജന്‍സികള്‍ ചരക്ക് സേവന നികുതി ജീവനക്കാര്‍ എന്നിവര്‍ക്ക് ചരക്ക് സേവന നികുതി പിരിക്കുന്നതില്‍ ഇ-വേ ബില്‍ പരിശീലനം നല്‍കി.
    കമ്മീഷണര്‍ ഓഫിസില്‍ നടന്ന പരിപാടി ജില്ലാ ചരക്ക് സേവന നികുതി ഡെപ്യൂട്ടി കമ്മീഷണര്‍  കെ. സുനില്‍കുമാര്‍ ഉദ്ഘാടനം ചെയ്തു. അസിസ്റ്റന്റ് കമ്മീഷണര്‍മാരായ കെ. അബ്ലുള്‍ ലത്തീഫ്,   എ. എം. ഷംസുദ്ദീന്‍ എന്നിവര്‍ പരിശീലനം നല്‍കി. അസിസ്റ്റന്റ് കമ്മീഷണര്‍  കെ. മാലതി, ഓഫീസര്‍മാരായ. മുഹമ്മദാലി പോത്തുകാടന്‍, ഹരിദാസന്‍. എന്‍,  എന്നിവര്‍  പ്രസംഗിച്ചു.

സംസ്ഥാനസാക്ഷരതാ മിഷന്‍ സംഘടിപ്പിക്കുന്ന 8ാമത്  സംസ്ഥാന തുടര്‍വിദ്യാഭ്യാസ കലോത്സവത്തിന്റെ ഭാഗമായി സ്മൃതിയാത്രകള്‍ സംഘടിപ്പിക്കുന്നതിന് സംഘാടകസമിതി തീരുമാനിച്ചു. കോഴിക്കോടിന്റെ സാഹിത്യ, കലാരംഗങ്ങളിലെ പ്രമുഖരായ എസ്.കെ. പൊറ്റക്കാട്, വൈക്കം മുഹമ്മദ് ബഷീര്‍, കെ.ടി. മുഹമ്മദ്, എം.എസ്.ബാബുരാജ്, തിക്കോടിയന്‍ എന്നിവരുടെ സ്മൃതികുടീരങ്ങളില്‍ നിന്നും സ്മൃതിയാത്രകള്‍  ആരംഭിക്കും.  അതിനൊപ്പം സാഹിത്യ സാക്ഷരതാ കലാ രംഗത്തെ പ്രമുഖരുടെ ഛായാചിത്രങ്ങള്‍ വഹിച്ചുകൊണ്ട് എല്ലാ ബ്ലോക്കുകളില്‍ നിന്നും സ്മൃതിയാത്രകള്‍ ആരംഭിക്കും.

സംസ്ഥാന പട്ടികജാതി പട്ടികവര്‍ഗ്ഗ വികസന കോര്‍പ്പറേഷന്‍  നടപ്പിലാക്കുന്ന, പരമാവധി 3.70 ലക്ഷം രൂപ പദ്ധതി തുകയുള്ള 'ഓട്ടോ ടാക്‌സി' പദ്ധതിക്കു കീഴില്‍ വായ്പ അനുവദിക്കുന്നതിനായി കോഴിക്കോട് ജില്ലയിലെ പട്ടികജാതിയില്‍പ്പെട്ട തൊഴില്‍രഹിതരായ  18 നും 50 നും മദ്ധ്യേ പ്രായമുള്ള യുവതി യുവാക്കളില്‍ നിന്നും അപേക്ഷ ക്ഷണിച്ചു.
കുടുംബ വാര്‍ഷിക വരുമാനം ഗ്രാമപ്രദേശങ്ങളില്‍ താമസിക്കുന്നവര്‍ക്ക് 98,000/ രൂപയിലും നഗര പ്രദേശങ്ങളില്‍ താമസിക്കുന്നവര്‍ക്ക്  1,20,000/ രൂപയിലും കവിയാന്‍ പാടില്ല. അപേക്ഷിക്കുന്നവര്‍ക്ക് ഓട്ടോ ടാക്‌സി ഓടിക്കുവാനുള്ള ലൈസന്‍സും ബാഡ്ജും ഉണ്ടായിരിക്കണം.