കേരള സാമൂഹ്യ സുരക്ഷാ മിഷൻ നടപ്പിലാക്കുന്ന വിദ്യാർത്ഥികൾക്കുള്ള പ്രതിമാസ ധനസഹായ പദ്ധതിയായ സ്നേഹപൂർവ്വം പദ്ധതി 2024-25 അദ്ധ്യയന വർഷത്തെ അപേക്ഷ വിദ്യാർത്ഥി പഠിക്കുന്ന സ്ഥാപന മേധാവി മുഖേന ഓൺലൈൻ ആയി അപ്‌ലോഡ്‌ ചെയ്യുന്നതിനുള്ള തീയതി ഏപ്രിൽ 30 വരെ നീട്ടി.

സംസ്ഥാന ന്യൂനപക്ഷ കമ്മീഷൻ്റെ സിറ്റിംഗ് ഏപ്രില്‍ 16ന് രാവിലെ 11 മണിക്ക് ശാസ്തമംഗലത്തെ കമ്മീഷന്റെ ഓഫീസിലെ കോര്‍ട്ട് ഹാളില്‍ നടക്കും. കമ്മീഷന്‍ ചെയര്‍മാന്‍ എ.എ.റഷീദ് ഹര്‍ജികള്‍ പരിഗണിക്കും.

സിറ്റിംഗില്‍ നിലവിലുള്ള പരാതികള്‍ പരിഗണിക്കുന്നതിനോടൊപ്പം പുതിയ പരാതികളും സ്വീകരിക്കും. കമ്മീഷന്റെ 9746515133 എന്ന വാട്ട്‌സ്ആപ്പിലേക്കും പരാതികള്‍ അയക്കാവുന്നതാണ്.

സര്‍ക്കാര്‍/സ്വാശ്രയ കോളേജുകളിലേക്ക് 2025-26 അധ്യയന വര്‍ഷത്തെ ബി.ടെക് ലാറ്ററല്‍ എന്‍ട്രി/ വര്‍ക്കിംഗ് പ്രൊഫഷണല്‍ കോഴ്‌സിലേക്കുള്ള പ്രവേശനത്തിന് അപേക്ഷ ക്ഷണിച്ചു. അപേക്ഷകര്‍ മൂന്നോ രണ്ടോ വര്‍ഷം (ലാറ്ററല്‍ എന്‍ട്രി) ദൈര്‍ഘ്യമുള്ള എന്‍ജിനിയറിംഗ് ടെക്‌നോളജി ഡിപ്ലോമ അല്ലെങ്കില്‍  സംസ്ഥാന സാങ്കേതിക വിദ്യാഭ്യാസ ബോര്‍ഡ് / ഇന്ത്യാ ഗവണ്‍മെന്റിന് കീഴിലുള്ള സ്ഥാപനങ്ങള്‍/ എ.ഐ.സി.ടി.ഇ അംഗീകൃത സ്ഥാപനങ്ങളില്‍ നിന്ന് നേടിയ മൂന്നു വര്‍ഷ ഡി.വോക്ക്, അല്ലെങ്കില്‍ 10, +2 തലത്തില്‍ മാത്തമാറ്റിക്‌സ് ഒരു വിഷയമായി പഠിച്ച്, യു.ജി.സി അംഗീകൃത സര്‍വ്വകലാശാലയില്‍ നിന്നും നേടിയ ബി.എസ്.സി ബിരുദം നേടിയവരായിരിക്കണം.   

ഏപ്രില്‍ മാസത്തില്‍ തുടര്‍ച്ചയായി അവധി ദിവസങ്ങള്‍ വരുന്നതിനാല്‍ ഈ ദിവസങ്ങളില്‍ അനധികൃത ധാതുക്കള്‍ ഖനനം ചെയ്ത് കടത്തുന്നതിനും , തണ്ണീര്‍ത്തടം/ നിലം എന്നിവ അനധികൃതമായി നികത്തുന്നതിനും സര്‍ക്കാര്‍ ഭൂമി കൈയ്യേറുന്നതിനും എതിരേ നടപടി സ്വീകരിക്കുന്നതിനായി ചിറയിന്‍കീഴ് താലൂക്ക് ഓഫീസില്‍ കണ്‍ട്രോള്‍ റൂം പ്രവര്‍ത്തിക്കും.

ഈ ദിവസങ്ങളില്‍ ഇത്തരം അനധികൃത പ്രവര്‍ത്തികള്‍ ശ്രദ്ധയില്‍പ്പെട്ടാല്‍ പൊതുജനങ്ങള്‍ വിവരം ചിറയിന്‍കീഴ് താലൂക്ക് ഓഫീസിലെ കണ്‍ട്രോള്‍ റൂമില്‍ അറിയിക്കണമെന്ന് തഹസീല്‍ദാര്‍ അറിയിച്ചു.

മാലിന്യമുക്തം നവകേരളം ജനകീയ ക്യാമ്പയിന്‍ പ്രവര്‍ത്തനങ്ങളില്‍ സംസ്ഥാനത്തെ ഏറ്റവും മികച്ച രണ്ടാമത്തെ ജില്ലയായി കോഴിക്കോട്. തിരുവനന്തപുരം കനകക്കുന്ന് നടന്നുവരുന്ന 'വൃത്തി' കോണ്‍ക്ലേവില്‍ തദ്ദേശ സ്വയംഭരണ വകുപ്പ് മന്ത്രി എം ബി രാജേഷ് കോഴിക്കോട് ജില്ലാ കളക്ടര്‍ സ്നേഹില്‍ കുമാര്‍ സിംഗിന് അംഗീകാരപത്രവും ഉപഹാരവും കൈമാറി.

നാഷണല്‍ ആയുഷ് മിഷനും ഗവ ഹോമിയോപ്പതിക് മെഡിക്കല്‍ കോളേജും സംയുക്തമായി ലോക ഹോമിയോപ്പതി ദിനാഘോഷ പരിപാടികള്‍ സംഘടിപ്പിച്ചു. മാനാഞ്ചിറ കിഡ്സണ്‍ കോര്‍ണറില്‍ നടന്ന പരിപാടികള്‍ ജില്ലാ ഇന്‍ഫര്‍മേഷന്‍ ഓഫീസര്‍ സി പി അബ്ദുള്‍ കരീം ഉദ്ഘാടനം ചെയ്തു. ഹോമിയോപ്പതി ചികിത്സയെ കൂടുതല്‍ ജനങ്ങളിലെത്തിക്കാന്‍ ശ്രമങ്ങളുണ്ടാവണം. വന്ധ്യതാ ചികിത്സാ രംഗത്ത് ഉള്‍പ്പെടെ വലിയ മാറ്റങ്ങളുണ്ടാക്കാന്‍ ഹോമിയോപ്പതിയിലൂടെ സാധിക്കുമെന്നത് കേരളത്തില്‍ നടപ്പിലാക്കി വരുന്ന ജനനി പദ്ധതിയിലൂടെ തെളിയിക്കപ്പെട്ടതാണെന്നും അദ്ദേഹം പറഞ്ഞു.  

വയോജന സംരക്ഷണത്തിൽ പുതിയ പദ്ധതിയുമായി കൊടുവള്ളി നഗരസഭ. 2024-25 വാർഷിക പദ്ധതിയിൽ ഉൾപ്പെടുത്തി ഇരുപത് ലക്ഷം രൂപ ചെലവഴിച്ചാണ് കിറ്റുകൾ വിതരണം ചെയ്യുന്നത്. 
അപേക്ഷ സമർപ്പിച്ച രണ്ടായിരം പേർക്ക് കിറ്റുകൾ നൽകും. നഗരസഭ പോഷകാഹാര പദ്ധതിയുടെ വിതരണോദ്ഘാടനം നഗരസഭാ ചെയർമാൻ വെള്ളറ അബ്ദു നിർവ്വഹിച്ചു. വികസന സ്റ്റാന്റിംഗ് കമ്മിറ്റി ചെയർമാൻ വി സിയാലിഹാജി അധ്യക്ഷത വഹിച്ചു.

കോഴിക്കോട് ഗവ: മെഡിക്കല്‍ കോളേജ് ആശുപത്രി വികസന സൊസൈറ്റിക്ക് കീഴില്‍ 755  രൂപ ദിവസവേതന അടിസ്ഥാനത്തില്‍ ഒരു വര്‍ഷത്തേക്ക് വിമുക്ത ഭടന്‍മാരെ താല്‍കാലിക സെക്യൂരിറ്റി ജീവനക്കാരായി നിയമിക്കുന്നു (നിലവില്‍ എച്ച്ഡിഎസ്സിനു കീഴില്‍ ജോലി ചെയ്യുന്ന ജീവനക്കാരെ പരിഗണിക്കുന്നതല്ല). ഉയർന്ന പ്രായ പരിധി: 56 വയസ്സ്.  ഉദ്യോഗാര്‍ത്ഥികള്‍ ഏപ്രില്‍ 19  ന് രാവിലെ ഒന്‍പതികം അസ്സല്‍ രേഖകള്‍ സഹിതം കോഴിക്കോട് ഗവ: മെഡിക്കല്‍ കോളേജ് ആശുപത്രി എച്ച്ഡിഎസ് ഓഫീസില്‍ എത്തണം.

പുത്തഞ്ചേരി ഉള്ളൂര്‍ റോഡില്‍  നിലവിലുള്ള ഓവുപാലം പുതുക്കിപ്പണിയുന്നതിന്റെ ഭാഗമായി  കൂമുള്ളി മുതല്‍ ഉള്ളൂര്‍ വരെയുള്ള വാഹനഗതാഗതം പ്രവൃത്തി തീരുന്നതുവരെ നിരോധിച്ചതായി  പിഒയു എക്‌സിക്യൂട്ടീവ് എഞ്ചിനീയര്‍ അറിയിച്ചു.

മാവൂര്‍ - കൂളിമാട് - ചുളളിക്കാപ്പറമ്പ് - പന്നിക്കോട് എരഞ്ഞിമാവ് റോഡില്‍ ചുളളിക്കാപ്പറമ്പ് അങ്ങാടിയില്‍ ഓവുപാലം പുതുക്കി പണിയുന്ന പ്രവൃത്തി ആരംഭിച്ചിരിക്കുന്നതിനാല്‍, ഈ  റോഡിലൂടെയുള്ള വാഹനഗതാഗതം പ്രവൃത്തി പൂര്‍ത്തീകരിക്കുന്നത് വരെ പൂര്‍ണ്ണമായും നിരോധിച്ചതായി പൊതുമരാമത്ത് വകുപ്പ് നിരത്ത് വിഭാഗം എക്‌സിക്യൂട്ടീവ് എഞ്ചിനീയര്‍ അറിയിച്ചു.