കോട്ടയം ജില്ലയിലെ ഒരു സർക്കാർ ആശുപത്രിയിൽ ലക്ചറർ ഇൻ റേഡിയേഷൻ ഫിസിക്‌സ് തസ്തികയിൽ ഒരു താത്കാലിക ഒഴിവുണ്ട്. ഫിസിക്‌സിൽ രണ്ടാം ക്ലാസ് ബിരുദാനന്തര ബിരുദവും കേന്ദ്ര ആണവോർജ വകുപ്പിന്റെ ഡയറക്ടറേറ്റ് നടത്തുന്ന ഒരു വർഷത്തെ റേഡിയോളജിക്കൽ ഫിസിക്‌സ് പരിശീലനം പൂർത്തിയാക്കിയവർക്കാണ് അപേക്ഷിക്കാനാവുക.

പന്ന്യന്നൂര്‍ ഗവ.ഐ ടി ഐയില്‍ മെക്കാനിക്ക് മോട്ടോര്‍ വെഹിക്കിള്‍ ട്രേഡില്‍ പട്ടിക ജാതി വിഭാഗത്തില്‍ നിന്ന് ഗസ്റ്റ് ഇന്‍സ്ട്രക്ടറെ നിയമിക്കുന്നു. ബന്ധപ്പെട്ട ട്രേഡില്‍ എന്‍ടിസിയും മൂന്ന് വര്‍ഷ പ്രവൃത്തി പരിചയമോ എന്‍എസിയും ഒരു വര്‍ഷ പ്രവൃത്തി പരിചയമോ മെക്കാനിക്കല്‍/ ഓട്ടോമൊബൈല്‍ എഞ്ചിനീയറിങ്ങില്‍ ഡിപ്ലോമയും രണ്ട് വര്‍ഷത്തെ പ്രവൃത്തിപരിചയവും അല്ലെങ്കില്‍ മെക്കാനിക്കല്‍/ ഓട്ടോമൊബൈല്‍ എഞ്ചിനീയറിങ്ങില്‍ ഡിഗ്രിയും ഒരു വര്‍ഷത്തെ പ്രവൃത്തി പരിചയവുമുള്ളവര്‍ക്ക് അപേക്ഷിക്കാം. യോഗ്യതയുള്ളവര്‍ ഒറിജിനല്‍ സര്‍ട്ടിഫിക്കറ്റുകളുമായി ഏപ്രില്‍ എട്ട് രാവിലെ 11 ന് പന്ന്യന്നൂര്‍ ഐടിഐയില്‍ എത്തണം.

പുത്തൂർ ഗ്രാമപഞ്ചായത്തിൽ പ്രൈമറി സ്‌കൂൾ കുട്ടികൾക്ക് കായിക പരിശീലനം നൽകുന്ന പദ്ധതി നടപ്പിലാക്കുന്നതിന് താത്കാലിക അടിസ്ഥാനത്തിൽ ഫിസിക്കൽ ട്രെയിനർമാരെ നിയമിക്കുന്നു. താൽപര്യമുള്ളവർ യോഗ്യത തെളിയിക്കുന്ന രേഖകൾ സഹിതം ഏപ്രിൽ 11നകം പഞ്ചായത്ത് ഓഫീസിൽ അപേക്ഷ സമർപ്പിക്കണം .

ചാലക്കുടി - ചിറങ്ങര അടിപ്പാത നിര്‍മ്മാണത്തെതുടര്‍ന്ന് ദേശീയപാതയില്‍ അനുഭവിക്കുന്ന രൂക്ഷമായ ഗതാഗത കുരുക്ക് ഒഴിവാക്കാന്‍ ഏപ്രില്‍ അഞ്ചിന് വൈകീട്ട് നാല് മുതല്‍ പരീക്ഷണാടിസ്ഥാനത്തില്‍ ഗതാഗതപരിഷ്‌കാരം നടപ്പിലാക്കും. ദേശീയപാത 544-ല്‍ ബ്ലാക്ക് സ്പോട്ട് പരിഹരിക്കുന്നതിന്റെ ഭാഗമായ അടിപ്പാത/ മേല്‍പ്പാലങ്ങളുടെ നിര്‍മാണ പ്രവൃത്തികളുമായി ബന്ധപ്പെട്ട് ജില്ലാ കളക്ടര്‍ അര്‍ജുന്‍ പാണ്ഡ്യന്റെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം. പൊലീസ്, ആര്‍.ടി.ഒ, ദേശീയപാതാ അതോറിറ്റി, മോട്ടോര്‍ വെഹിക്കിള്‍ ഡിപ്പാര്‍ട്ട്മെന്റ് എന്നിവര്‍ ചേര്‍ന്ന് ഇതിന് ആവശ്യമായ ക്രമീകരണങ്ങള്‍ ഏര്‍പ്പെടുത്താനും നിര്‍ദ്ദേശമുണ്ട്.

തൃശ്ശൂര്‍ കോര്‍പ്പറേഷന്‍ സ്റ്റേഡിയത്തിലെ സിന്തറ്റിക് ട്രാക്ക് നിര്‍മ്മിക്കുന്നതിന്റെ പുരോഗതി വിലയിരുത്തുന്നതിനായി ജില്ലാ കളക്ടര്‍ അര്‍ജുന്‍ പാണ്ഡ്യന്റെ അധ്യക്ഷതയില്‍ തൃശ്ശൂര്‍ കോര്‍പ്പറേഷന്‍ മേയര്‍ എം.കെ വര്‍ഗ്ഗീസിന്റെയും കായിക യുവജനകാര്യവകുപ്പ് ഡയറക്ടര്‍ പി. വിഷ്ണുരാജിന്റെയും സാന്നിദ്ധ്യത്തില്‍ യോഗം ചേര്‍ന്നു. തൃശ്ശൂര്‍ കോര്‍പ്പറേഷന്‍ സ്റ്റേഡിയത്തില്‍ 14.2 കോടിയുടെ വികസന പദ്ധതിയാണ് നടപ്പിലാക്കുന്നത്.

സമഗ്ര ഗുണമേന്മ വിദ്യാഭ്യാസ പരിപാടിയുമായി ബന്ധപ്പെട്ട് ബ്ലോക്ക്തല സെമിനാര്‍ സംഘടിപ്പിച്ചു. പന്തലായനി ബ്ലോക്ക് പഞ്ചായത്ത് പ്രസിഡന്റ്  പി ബാബുരാജ് സെമിനാര്‍ ഉദ്ഘാടനം ചെയ്തു. പൊതുവിദ്യാഭ്യാസ വകുപ്പും സമഗ്ര ശിക്ഷാ കേരളയും സംയുക്തമായി പന്തലായി ബിആര്‍സിയുടെ നേതൃത്വത്തിലാണ് പരിപാടി സംഘടിപ്പിച്ചത്. 

കൃഷി, സർവേ, ഫോട്ടോഗ്രാഫി തുടങ്ങിയ നിരവധി മേഖലകളിൽ ഡ്രോണുകൾ ഉപയോഗിക്കുന്ന സാഹചര്യത്തിൽ സംസ്ഥാന സർക്കാർ സ്ഥാപനമായ അസാപ് കമ്മ്യൂണിറ്റി സ്‌കിൽ പാർക്കുകൾ മുഖേന ഡ്രോൺ പൈലറ്റ് പരിശീലനം സംഘടിപ്പിക്കുന്നു. ഡ്രോൺ പറത്താൻ ആവശ്യമായ  പ്രായോഗിക പരിശീലനം ലഭിക്കുന്നതോടൊപ്പം കോഴ്‌സ് പൂർത്തിയാക്കുന്നവർക്ക് ഡയറക്ടർ ജനറൽ ഓഫ് സിവിൽ ഏവിയേഷൻ (DGCA) നൽകുന്ന 10 വർഷം കാലാവധിയുള്ള റിമോട്ട് പൈലറ്റ് ലൈസൻസ് ലഭിക്കും. 18നും 65 നും മധ്യേ പ്രായമുള്ള പത്താം ക്ലാസ് യോഗ്യതയും ഇംഗ്ലീഷ് പരിജ്ഞാനവും പാസ്‌പോർട്ടും ഉള്ളവർക്ക് അപേക്ഷിക്കാം.

ജനകീയ പ്രവർത്തനങ്ങളിലൂടെയും സുതാര്യമായ ഭരണ നിർവഹണത്തിലൂടെയും ജീവനക്കാർക്കും പൊതുജനങ്ങൾക്കും നൽകിയ വിവിധ സേവനങ്ങളുടെ ഗുണമേന്മയ്ക്ക് ഐഎസ്ഒ സർട്ടിഫിക്കറ്റ് ലഭിച്ചതിന്റെ ആഘോഷവും 2024-25 വർഷത്തിലെ താലൂക്ക് തലത്തിലെ മികച്ച റവന്യൂ ഉദ്യോഗസ്ഥർക്കുള്ള അവാർഡ് ദാനവും നാളെ (ഏപ്രിൽ അഞ്ച്) ഏറനാട് താലൂക്ക് ഓഫീസിൽ നടക്കും. ജില്ലാ കളക്ടർ വി.ആർ വിനോദ് ഉദ്ഘാടനം ചെയ്യുന്ന പരിപാടിയിൽ പെരിന്തൽമണ്ണ സബ് കളക്ടർ അപൂർവ തൃപാദി അധ്യക്ഷത വഹിക്കും. തഹസിൽദാർ, മുനിസിപ്പൽ ചെയർപേഴ്‌സൺ, വിവിധ രാഷ്ട്രീയ പാർട്ടി പ്രതിനിധികൾ തുടങ്ങിയവർ പങ്കെടുക്കും.

കുറ്റിപ്പുറം പഞ്ചായത്ത് പരിധിയിലുള്ള പി.എച്ച്. സെന്റർ-മുക്കിലപ്പീടിക (പേരശന്നൂർ-മുക്കിലപ്പീടിക) റോഡിന്റെ നവീകരണ പ്രവൃത്തി നടക്കുന്നതിനാൽ ഈ റോഡിലൂടെയുള്ള വാഹന ഗതാഗതം ഏപ്രിൽ ഏഴ് മുതൽ പ്രവൃത്തി തീരുന്നത് വരെ നിരോധിച്ചു.
 

സംസ്ഥാന ന്യൂനപക്ഷ കമ്മീഷൻ മലപ്പുറം ജില്ലാ സിറ്റിംഗ് നാളെ (ഏപ്രിൽ അഞ്ച്) രാവിലെ പത്ത് മുതൽ തിരൂർ പി.ഡബ്ല്യു.ഡി റസ്റ്റ് ഹൗസ് കോൺഫ്രൻസ് ഹാളിൽ നടക്കും. കമ്മീഷൻ ചെയർമാൻ അഡ്വ. എ.എ. റഷീദ് ഹരജികൾ പരിഗണിക്കും. സിറ്റിംങിൽ നിലവിലുള്ള പരാതികൾ പരിഗണിക്കുന്നതോടൊപ്പം പുതിയ പരാതികൾ സ്വീകരിക്കും. പരാതികൾ  9746515133 എന്ന കമ്മീഷന്റെ വാട്ട്സ്ആപ്പ് നമ്പറിലേക്കും അയക്കാം.