ശ്രീ മുണ്ടിയന്‍കാവ് ദേശ വിഷുവേലയോടനുബന്ധിച്ച് ഏപ്രില്‍ 15 ന് രാത്രി ഒമ്പതിനും പത്തിനും ഇടയിലുള്ള സമയത്ത് വെടിക്കെട്ട് പ്രദര്‍ശനം നടത്തുന്നതിന് മുണ്ടിയന്‍കാവ് ദേശ വിഷുവേലകമ്മിറ്റി സെക്രട്ടറി നല്‍കിയ അപേക്ഷ നിരസിച്ച് എ ഡി എം കെ. മണികണ്ഠന്‍ ഉത്തരവിട്ടു.

കഞ്ചിക്കോട് മേഖലയില്‍ വ്യവസായ സ്ഥാപനങ്ങള്‍ മുഖേന ഉണ്ടായേക്കാവുന്ന മലിനീകരണവും അതു മൂലമുണ്ടാവുന്ന പരിസ്ഥിതി പ്രശ്നങ്ങളും ചര്‍ച്ച ചെയ്യുന്നതിന് രൂപീകരിച്ച പരിസ്ഥിതി കാവല്‍ സംഘത്തിന്റെ യോഗം ഏപ്രില്‍ എട്ടിന് രാവിലെ  11 മണിക്ക് കളക്ടറേറ്റ് കോണ്‍ഫ്രന്‍സ് നടക്കുമെന്ന് കണ്‍വീനര്‍ അറിയിച്ചു. ഫോണ്‍: 0491 2505385, 2505408.

ഷോളയൂര്‍ എഫ് എച്ച് സി യിലെ ആംബുലന്‍സ് ഓടിക്കുന്നതിന് ഡ്രൈവറെ ബത്ത വ്യവസ്ഥയില്‍ നിയമിക്കുന്നു. ഫോര്‍ വീലര്‍ ലൈസന്‍സും, ബാഡ്ജും ഉള്ള ഹെവി ഡ്യൂട്ടി വാഹനം ഓടിക്കുന്നതില്‍  പരിചയമുള്ള ഉദ്യോഗാര്‍ഥികള്‍ക്ക് അപേക്ഷിക്കാം.  അപേക്ഷ ഏപ്രില്‍ ഒമ്പതിന് വൈകീട്ട് അഞ്ചു മണിക്കകം fhcsholayoor@gmail.com എന്ന വിലാസത്തില്‍ അയക്കണം. ആശുപത്രി മാനേജ്‌മെന്റ് കമ്മിറ്റി തീരുമാനിക്കുന്ന ബത്ത നിരക്കില്‍ മാത്രമേ വേതനം ലഭിക്കൂ. ആശുപത്രിയുടെ സമീപവാസികള്‍ക്ക് മുന്‍ഗണന ലഭിക്കും.

കോഴിക്കോടിനെ മാലിന്യ മുക്ത ജില്ലയായി ഇന്ന് (05) പ്രഖ്യാപിക്കും. കണ്ടംകുളം മുഹമ്മദ് അബ്ദുറഹിമാന്‍ സാഹിബ് മെമ്മോറിയല്‍ ജൂബിലി ഹാളില്‍  വൈകീട്ട് നാലിന് നടക്കുന്ന ചടങ്ങില്‍ വനം വന്യജീവി വകുപ്പ് മന്ത്രി എ കെ ശശീന്ദ്രന്‍ പ്രഖ്യാപനം നിർവഹിക്കും. ചടങ്ങിൽ അഹമ്മദ് ദേവര്‍കോവില്‍ എംഎല്‍എ അധ്യക്ഷത വഹിക്കും.  ജില്ലാ പഞ്ചായത്ത് പ്രസിഡന്റ് ഷീജ ശശി, ജില്ലാ കലക്ടര്‍ സ്‌നേഹില്‍ കുമാര്‍ സിംങ് തുടങ്ങിയവര്‍ പങ്കെടുക്കും.

കുഴല്‍മന്ദം കാളി ഭഗവതി ക്ഷേത്രത്തിലെ വിഷു വേലയോടനുബന്ധിച്ച് ഏപ്രില്‍ 17 ന്  രാവിലെ ആറു മുതല്‍ രാത്രി 10 നു ഇടയില്‍ വെടിക്കെട്ട് പ്രദര്‍ശനം നടത്തുന്നതിന് കുഴല്‍മന്ദം തെക്കേ ദേശം  വേലക്കമ്മറ്റി നല്‍കിയ അപേക്ഷ നിരസിച്ച് എ ഡി എം കെ. മണികണ്ഠന്‍ ഉത്തരവിട്ടു.

കേരള മോട്ടോര്‍ തൊഴിലാളി ക്ഷേമനിധി അംഗങ്ങള്‍ക്ക് കുടിശ്ശിക അടക്കാനുള്ള തീയതി ഏപ്രില്‍ 30 വരെ നീട്ടി. ഓണ്‍ലൈന്‍, ഫ്രണ്ട്സ് ജനസേവന കേന്ദ്രം, സൗത്ത് ഇന്ത്യന്‍ ബാങ്ക് എന്നിവ വഴിയും പി ഒ എസ് മെഷീന്‍ ഉപയോഗിച്ച് ജില്ലാ ഓഫീസുകളിലും ക്ഷേമനിധി അടക്കാം. ഫോണ്‍:0497 -2705197

കണ്ണൂര്‍ റൂറല്‍ ജില്ലാ പോലീസ് ഡി എച്ച് ക്യൂ ക്യാമ്പില്‍ ക്യാമ്പ് ഫോളോവര്‍മാരെ നിയമിക്കും. ധോബി (ഒന്ന്), കുക്ക് (രണ്ട്) തസ്തികകളിലേക്ക് 59 ദിവസത്തേക്കാണ് നിയമനം. പ്രസ്തുത മേഖലകളില്‍ മുന്‍പരിചയമുള്ളവര്‍ അസ്സല്‍ തിരിച്ചറിയല്‍ രേഖ, മുന്‍പരിചയം തെളിയിക്കുന്ന സര്‍ട്ടിഫിക്കറ്റ് എന്നിവ സഹിതം ഏപ്രില്‍ എട്ടിന് രാവിലെ 10.30 ന് മാങ്ങാട്ടുപറമ്പിലെ റൂറല്‍ ജില്ലാ പോലീസ് ആസ്ഥാനത്ത് അഭിമുഖത്തിന് എത്തണം.

ശുചിത്വ കേരളം സുസ്ഥിര കേരളം എന്ന ലക്ഷ്യത്തോടെ സംസ്ഥാനമൊട്ടാകെ സംഘടിപ്പിച്ച മാലിന്യ മുക്തം നവകേരളം ക്യാമ്പയിൻ രണ്ടാം ഘട്ടത്തിന് സമാപനം കുറിച്ചുകൊണ്ട് അഴിയൂർ ഗ്രാമപഞ്ചായത്ത്‌ സമ്പൂർണ മാലിന്യ മുക്ത പ്രഖ്യാപനം നടത്തി.  പ്രഖ്യാപന  ചടങ്ങ്  അഴിയൂർ ഗ്രാമപഞ്ചായത്ത് പ്രസിഡന്റ് ആയിഷ ഉമ്മർ ഉദ്ഘാടനം ചെയ്തു. പ്രഖ്യാപനത്തിന് മുന്നോടിയായി സമ്പൂർണ ഹരിത അയൽകൂട്ടം, ഓഫീസ്,  വിദ്യാലയം/കലാലയം, അംഗൻവാടി, സമ്പൂർണ ശുചിത്വ ടൗൺ,  വാർഡ് തുടങ്ങി വിവിധ പ്രഖ്യാപനങ്ങളും നടത്തി.