സി-വിജില്‍ ആപ്പ് മുഖേന ജില്ലയില്‍ ചൊവ്വാഴ്ച്ച 131 പരാതികള്‍ ലഭിച്ചു. എല്ലാ പരാതികളും പരിഹരിച്ചു. ജില്ലയില്‍ ഇതുവരെ 4855 പരാതികളാണ് സി-വിജില്‍ ആപ്പ് വഴി ലഭിച്ചത്. നിയമസഭാ തെരഞ്ഞെടുപ്പിന്റെ മാതൃകാ പെരുമാറ്റ ചട്ടലംഘനവുമായി ബന്ധപ്പെട്ട് സി - വിജില്‍ ആപ് മുഖേന പൊതുജനങ്ങള്‍ക്ക് നേരിട്ട് പരാതി നല്‍കാം.

മുണ്ടക്കൈ-ചൂരല്‍മല ദുരന്തബാധിതരായ ജില്ലയുടെ വിവിധ സ്ഥലങ്ങളില്‍ താമസിക്കുന്ന വോട്ടര്‍മാര്‍ക്ക് നിയമസഭ തെരഞ്ഞെടുപ്പ് ദിവസം വോട്ട് ചെയ്യാന്‍ വാഹന സൗകര്യം ഏര്‍പ്പെടുത്തുമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥയായ ജില്ലാ കളക്ടര്‍ ഡി.ആര്‍ മേഘശ്രീ അറിയിച്ചു. ദുരന്തബാധിത പ്രദേശത്തെ 700ഓളം പേരാണ്  വാഹന സൗകര്യം ഉപയോഗപ്പെടുത്തുക. ഏപ്രില്‍ ഒന്‍പതിന് എട്ട്  ബസുകളിലായി രാവിലെ 11നും ഉച്ചയ്ക്ക് 2.30 നും സര്‍വീസുകള്‍ നടത്തും.

നിയമസഭാ തെരഞ്ഞെടുപ്പില്‍ ചൂരല്‍മല വോട്ടര്‍മാര്‍ക്കായ് പ്രത്യേക പോളിംഗ് സൗകര്യം ഒരുക്കി. വെള്ളരിമല വില്ലേജിലെ ക്രസന്റ് ഇംഗ്ലീഷ് മീഡിയം സ്‌കൂളില്‍ മുമ്പ് പ്രവര്‍ത്തിച്ചിരുന്ന പോളിംഗ് സ്റ്റേഷന്‍ വോട്ടര്‍മാരുടെ സൗകര്യം കണക്കിലെടുത്ത് മേപ്പാടി ഗവ ഹയര്‍ സെക്കന്‍ഡറി സ്‌കൂളിലേക്ക് മാറ്റിയതായി വൈത്തിരി അസിസ്റ്റന്റ് ഇലക്ടറല്‍ രജിസ്‌ട്രേഷന്‍ ഓഫീസര്‍ അറിയിച്ചു. മേപ്പാടി ഗവ ഹയര്‍ സെക്കന്‍ഡറി സ്‌കൂളിലെ പുതിയ ബില്‍ഡിങ്ങിന്റെ കിഴക്കുഭാഗമാണ് പോളിങ് സ്‌റ്റേഷന്‍ നമ്പര്‍ 203 ആയി പ്രവര്‍ത്തിക്കുക. കണ്‍ട്രോള്‍ റൂം നമ്പര്‍ 04936 204220.

നിയമസഭ തിരഞ്ഞെടുപ്പുമായി ബന്ധപ്പെട്ട് നിരോധനാജ്ഞ പ്രഖ്യാപിച്ച സാഹചര്യത്തില്‍ മുന്‍കരുതല്‍ കണക്കിലെടുത്ത് നിരോധനാജ്ഞ കാലയളവില്‍ ( ഏപ്രില്‍ ഏഴ് വൈകിട്ട് ആറ് മണിമുതല്‍ ഏപ്രില്‍ ഒമ്പത് രാത്രി 12 വരെ) ജില്ലയിലെ പടക്കകടകള്‍ അടച്ചിടണമെന്ന് ജില്ലാ തിരഞ്ഞെടുപ്പ് ഓഫീസറായ ജില്ലാ കളക്ടര്‍ ഡി.ആര്‍ മേഘശ്രീ അറിയിച്ചു. പരസ്യ പ്രചരണം അവസാനിക്കുന്ന ഏപ്രില്‍ ഏഴ് ചൊവ്വ വൈകുന്നേരം ആറ് മണി മുതല്‍ പ്രഖ്യാപിത രീതിയിലുള്ള നിരോധനാജ്ഞതയും മദ്യനിരോധനവും ജില്ലയില്‍ നിലവില്‍ വരുന്നതാണ്.

നിയമസഭാ തെരഞ്ഞെടുപ്പില്‍ ജില്ലയില്‍ പോളിംഗ് ഡ്യൂട്ടിക്ക് നിയോഗിച്ചിട്ടുള്ള ഉദ്യോഗസ്ഥരുടെ അവസാനഘട്ട റാന്‍ഡമൈസേഷന്‍ പൂര്‍ത്തിയായി. ജില്ലയിലെ മൂന്നു മണ്ഡലങ്ങളിലുമായുള്ള 715 പോളിംഗ് സ്റ്റേഷനുകളിലേക്കും 20 ശതമാനം റിസര്‍വ് ഉള്‍പ്പെടെ 3440 ഉദ്യോസ്ഥരെ നിശ്ചയിച്ചു. മാനന്തവാടി മണ്ഡലത്തില്‍ 285, സുല്‍ത്താന്‍ ബത്തേരി മണ്ഡലത്തില്‍ 302, കല്‍പറ്റ മണ്ഡലത്തില്‍ 273 ഉള്‍പ്പെടെ 860 വീതം പ്രിസൈഡിംഗ് ഓഫീസര്‍മാരേയും ഫസ്റ്റ് പോളിംഗ് ഓഫീസര്‍മാരെയും വിന്യസിച്ചു. മാനന്തവാടിയില്‍ 570, സുല്‍ത്താന്‍ ബത്തേരിയില്‍ 604, കല്‍പറ്റയില്‍ 546 പോളിംഗ് ഓഫീസര്‍മാരും പ്രവര്‍ത്തിക്കും.

തെരഞ്ഞെടുപ്പ് ദിവസം ബൂത്തുകളില്‍ നിന്ന് കുറഞ്ഞത് 100 മീറ്റര്‍ അകലെയായിരിക്കണം രാഷ്ട്രീയ പാര്‍ട്ടികളുടെ കൗണ്ടറുകള്‍ സ്ഥാപിക്കേണ്ടത്. ഓരോ കൗണ്ടറിലും രണ്ട് പേരില്‍ കൂടുതല്‍ ഇരിക്കരുത്. വോട്ടര്‍ സ്ലിപ്പ് വിതരണം ചെയ്യുന്നതൊഴികെ യാതൊരു വിധത്തിലുള്ള പ്രചാരണ പ്രവര്‍ത്തനങ്ങളും അനുവദനീയമല്ല.

നിയമസഭാ പൊതുതെരഞ്ഞെടുപ്പില്‍ വോട്ട് രേഖപ്പെടുത്തുന്നതിനുള്ള നടപടിക്രമങ്ങള്‍ വോട്ടര്‍മാര്‍ കൃത്യമായി പാലിക്കണമെന്ന് അധികൃതര്‍ അറിയിച്ചു. പോളിങ് ബൂത്തില്‍ എത്തിയാല്‍ ഒന്നാം പോളിങ് ഉദ്യോഗസ്ഥന്‍ വോട്ടറുടെ തിരിച്ചറിയല്‍ രേഖയും വോട്ടര്‍ പട്ടികയിലെ വിവരങ്ങളും പരിശോധിച്ച് ഉറപ്പാക്കും. തുടര്‍ന്ന് രണ്ടാം പോളിങ് ഉദ്യോഗസ്ഥന്‍ കൈവിരലില്‍ മഷി പുരട്ടി, വോട്ട് രജിസ്റ്ററില്‍ സമ്മതിദായകന്റെ ഒപ്പ് രേഖപ്പെടുത്തി വോട്ട് ചെയ്യാന്‍ സ്ലിപ് കൈമാറും. വോട്ടിങ് യന്ത്രത്തിന്റെ ചുമതലയുള്ള പോളിങ് ഉദ്യോഗസ്ഥന്‍ സ്ലിപ് കൈമാറി വിരളിലെ മഷിയടയാളം പരിശോധിക്കും.

നിയമസഭാ തെരഞ്ഞെടുപ്പിന്റെ ഭാഗമായി ജില്ലയില്‍ സുരക്ഷാ ക്രമീകരണങ്ങള്‍ ഉറപ്പാക്കുന്നതിനായി ജില്ലാ പോലീസ് മേധാവി അരുണ്‍ കെ പവിത്രന്റെ  നേതൃത്വത്തില്‍ യോഗം ചേര്‍ന്നു. തെരഞ്ഞെടുപ്പ് സുരക്ഷയുടെ ഭാഗമായി ലോക്കല്‍ പോലീസ്, കേന്ദ്ര സായുധ സേന (ബി.എസ്.എഫ്), മഹാരാഷ്ട്ര സ്‌പെഷ്യല്‍ ആംഡ് പോലീസ്, ഐ.ആര്‍ ബറ്റാലിയന്‍, കേരള ആംഡ് പോലീസ്, എം.എസ്.പി, ആര്‍.ആര്‍.ആര്‍.എഫ്, എസ്.എ.പി, സ്‌പെഷ്യല്‍ പോലീസ് ഓഫീസര്‍മാര്‍ ഉള്‍പ്പെടെ 3000 ലധികം പേരെ വിവിധ കേന്ദ്രങ്ങളിലേക്ക് നിയോഗിച്ചിട്ടുണ്ട്. ജില്ലാ -സംസ്ഥാന അതിര്‍ത്തികളിലെ പിക്കറ്റ് പോസ്റ്റുകള്‍, പട്രോളിങ്, വാഹന പരിശോധന എന്നിവ ശക്തമായി തുടരും.

നിയമസഭ തെരഞ്ഞെടുപ്പിന്റെ ഭാഗമായി ജില്ലയിലെ 715 പോളിങ് ബൂത്തുകളും ഫോര്‍ജി ക്യാമറ നിരീക്ഷണത്തിലായിരിക്കും. ജില്ലാ കണ്‍ട്രോള്‍ റൂമിന്റെ നിരീക്ഷണത്തില്‍ തെരഞ്ഞെടുപ്പ് പ്രക്രിയ സുതാര്യവും കാര്യക്ഷമവുമായി നടപ്പാക്കാന്‍ വേണ്ടി ഇലക്ഷന്‍ കമ്മീഷന്‍ മുഴുവന്‍ ബൂത്തുകളിലും ക്യാമറ സ്ഥാപിച്ച് കൊണ്ടാണ് കണ്‍ട്രോള്‍ റൂമില്‍ നിരീക്ഷണം ഉറപ്പുവരുത്തുന്നത്. കലക്ടറേറ്റില്‍ പ്രത്യേകം സജ്ജീകരിച്ച കണ്‍ട്രോള്‍ റൂമില്‍ 30 ഉദ്യോഗസ്ഥര്‍ തെരഞ്ഞെടുപ്പ് പ്രക്രിയ ആരംഭിക്കുന്നത് മുതല്‍ അവസാനിക്കുന്ന വരെ ഓരോ ബൂത്തിലെയും ദൃശ്യങ്ങള്‍ കൃത്യമായി പരിശോധിക്കും.

ജില്ലയിലെ മൂന്ന് നിയോജക മണ്ഡലങ്ങളിലുമായി 166  പ്രത്യേക സുരക്ഷാ  ബൂത്തുകളുമാണുള്ളത്. ഈ ബൂത്തുകളില്‍ സുഗമമായ പോളിങിനുള്ള സുരക്ഷാ ക്രമീകരണങ്ങള്‍ ഏര്‍പ്പെടുത്തിയിട്ടുണ്ട്. മാനന്തവാടി നിയോജക മണ്ഡലത്തില്‍ 87, കല്‍പ്പറ്റ നിയോജക മണ്ഡലത്തില്‍ 42, സുല്‍ത്താന്‍ ബത്തേരി നിയോജക മണ്ഡലത്തില്‍ 37 വീതമാണ് പ്രത്യേക സുരക്ഷാ ബൂത്തുകള്‍. മൈക്രോ ഒബ്‌സെര്‍വറും സായുധ സേനയും ഉള്‍പ്പെടെയുള്ള സുരക്ഷ ഉറപ്പാക്കും.