കുടുംബശ്രീ മിഷന്റെ നേതൃത്വത്തില്‍ പൂതാടി സി.ഡി.എസില്‍ കോഫി പ്രൊഡ്യൂസര്‍ സംരംഭം ആരംഭിച്ചു. ഗ്രാമ പഞ്ചായത്ത് പ്രസിഡന്റ് ബിന്ദു ബാബു ഉദ്ഘാടനം ചെയ്തു. കര്‍ഷക ഉത്പാദക കമ്പനികള്‍ രൂപീകരിക്കുന്നതിനുള്ള ആദ്യപടിയായി പ്രവര്‍ത്തിക്കുന്ന ഈ ഗ്രൂപ്പുകള്‍ വനിതാ കര്‍ഷകരുടെ ഉപജീവനമാര്‍ഗങ്ങള്‍ ശക്തിപ്പെടുത്തുകയും സാമ്പത്തിക ശാക്തീകരണത്തിന് വഴിയൊരുക്കുകയും ചെയ്യുന്നു. വാര്‍ഡ് അംഗം പി വിനീത അധ്യക്ഷയായി.

വനം വന്യജീവി വകുപ്പ് ജില്ലാ സോഷ്യല്‍ ഫോറസ്ട്രി ഡിവിഷന്റെ ആഭിമുഖ്യത്തില്‍ ലോക പരിസ്ഥിതി ദിനാചരണത്തിന്റെ ജില്ലാതല ഉദ്ഘാടനവും തൈ നടീലും സംഘടിപ്പിച്ചു. കല്‍പറ്റ പി.എം ശ്രീ കേന്ദ്രിയ വിദ്യാലയത്തില്‍ നടന്ന പരിപാടി കല്‍പറ്റ മുന്‍സിപ്പാലിറ്റി ചെയര്‍മാന്‍ പി വിശ്വനാഥന്‍ ഉദ്ഘാടനം ചെയ്തു. സോഷ്യല്‍ ഫോറസ്ട്രി അസിസ്റ്റന്റ് കണ്‍സര്‍വേറ്റര്‍ എം നജ്മല്‍ അമീന്‍ അധ്യക്ഷനായി. വയനാട് വന്യജീവി സങ്കേതം കണ്‍സര്‍വേഷന്‍ ബയോളജിസ്റ്റ് ഡോ. ഒ വിഷ്ണു പരിസ്ഥിതി ബോധവത്കരണ ക്ലാസ് നയിച്ചു. തുടര്‍ന്ന് വിദ്യാര്‍ത്ഥികള്‍ പരിസ്ഥിതി ബോധവല്‍ക്കരണ കലാ പരിപാടികള്‍ അവതരിപ്പിച്ചു.

ജില്ലയിൽ ശനി,  ഞായർ ദിവസങ്ങളിൽ റെഡ് അലെർട്ട് പ്രഖ്യാപിച്ച സാഹചര്യത്തിൽ പാക്കം കുറുവ ദ്വീപ്, ബാണാസുര മീൻമുട്ടി വെള്ളച്ചാട്ടം, കാറ്റുകുന്ന് ആനച്ചോല ട്രക്കിങ്, ചെമ്പ്രപീക്ക് ട്രക്കിങ്, സൂചിപ്പാറ വെള്ളച്ചാട്ടം എന്നിവിടങ്ങളിലേക്ക് പ്രവേശനം അനുവദിക്കില്ലെന്ന് സൗത്ത് വയനാട് ഡിവിഷണൽ ഫോറസ്റ്റ് ഓഫീസർ അറിയിച്ചു.

കൃഷിവകുപ്പ് ജില്ലാതല പരിസ്ഥിതി ദിനാഘോഷ പരിപാടി എസ്.കെ.എം.ജെ ഹൈസ്കൂൾ ജൂബിലി ഹാളിൽ ജില്ലാപഞ്ചായത്ത് പ്രസിഡന്റ് ചന്ദ്രിക കൃഷ്ണൻ ഉദ്ഘാടനം ചെയ്തു. സ്കൂൾ പരിസരത്ത്റംബൂട്ടാൻ, മാങ്കോസ്റ്റീൻ, സപ്പോട്ട, പേര എന്നിവയുടെ ഗ്രാഫ്റ്റ് തൈകൾ നട്ടുപിടിപ്പിച്ചു.   കൃഷി വകുപ്പ് സംഘടിപ്പിച്ച പരിസ്ഥിതി ദിന ക്വിസ് മത്സരത്തിലെ വിജയികളെ പരിപാടിയിൽ അനുമോദിച്ചു. എസ്.കെ.എം.ജെ യു.പി, ഹൈസ്കൂൾ, ഹയർ സെക്കണ്ടറി സ്കൂൾ വിദ്യാർത്ഥികളുടെ പരിസ്ഥിതി സന്ദേശമുയർത്തുന്ന വിവിധ കലാപരിപാടികളും അരങ്ങേറി. സംസ്ഥാന കൃഷിവകുപ്പ് മന്ത്രിയുടെ പരിസ്ഥിതി ദിന സന്ദേശം വായിച്ചു.

ജില്ലയിലെ കാലവര്‍ഷ മുന്നൊരുക്കം വിലയിരുത്തുന്നതിന് പൊതുവിദ്യാഭ്യാസ, ന്യൂനപക്ഷ ക്ഷേമ വകുപ്പ് മന്ത്രി എന്‍ ഷംസുദ്ദീന്റെ അധ്യക്ഷതയില്‍ ഇന്ന് (ജൂണ്‍ ഒമ്പതിന് ) ഉച്ചയ്ക്ക് 12ന് കലക്ടറേറ്റ് കോണ്‍ഫറന്‍സ് ഹാളില്‍ യോഗം ചേരും. ബന്ധപ്പെട്ട ഉദ്യോഗസ്ഥര്‍ യോഗത്തില്‍ പങ്കെടുക്കണമെന്ന് ജില്ലാ കലക്ടര്‍ അറിയിച്ചു.

പരിസ്ഥിതി സംരക്ഷണത്തിനും പരിസര മലിനീകരണമെന്ന വലിയ ഭീഷണി ഇല്ലാതാക്കാനും പുതിയ തലമുറ രംഗത്തിറങ്ങണമെന്ന് ജില്ലാ പഞ്ചായത്ത് പ്രസിഡന്റ് ചന്ദ്രിക കൃഷ്ണൻ. ജില്ലാ സാക്ഷരതാ മിഷൻ ജില്ലാ പഞ്ചായത്ത് കോൺഫറൻസ് ഹാളിൽ സംഘടിപ്പിച്ച ലോക പരിസ്ഥിതി ദിനാചരണവും യാത്രയയപ്പ് സമ്മേളനവും ഉദ്ഘാടനം ചെയ്യുകയായിരുന്നു അവർ. അവശ്യ സേവനങ്ങൾ വീട്ടുമുറ്റത്ത് ലഭ്യമാവുന്ന പുതിയ കാലത്ത് നാം നേടിയ എല്ലാ മുന്നേറ്റങ്ങളുടെയും ആഘാതം അനുഭവിക്കുന്നത് പ്രകൃതിയാണെന്നും കൂട്ടായ പ്രവർത്തനത്തിലൂടെ ഈ വെല്ലുവിളി അതിജീവിക്കേണ്ടതുണ്ടെന്നം അവർ പറഞ്ഞു.

പത്തിരിപ്പാല ഗവ. ആര്‍ട്‌സ് ആന്‍ഡ് സയന്‍സ് കോളജില്‍ ബി.ബി.എ വിഭാഗത്തില്‍ അതിഥി അധ്യാപകരുടെ താത്കാലിക നിയമനത്തിനായി ജൂണ്‍ 12ന് രാവിലെ 10 ന് അഭിമുഖം നടക്കും. വിദ്യാഭ്യാസ യോഗ്യത, പ്രായം, പ്രവൃത്തിപരിചയം തെളിയിക്കുന്ന അസല്‍ സര്‍ട്ടിഫിക്കറ്റുകളും അനുബന്ധ രേഖകളും സഹിതം ഹാജരാകണം. ഫോണ്‍: 0491-2873999.