സംസ്ഥാന ദുരന്ത നിവാരണ  അതോറിറ്റി കണിച്ചാർ പഞ്ചായത്തിൽ ആരംഭിച്ച ലിവിംങ്  ലാബ് പദ്ധതിയുടെ ഭാഗമായി കുട്ടികൾക്കായി ദ്വിദിനദുരന്തനിവാരണ പരിശീല ക്യാമ്പ് സന്നാഹം സംഘടിപ്പിച്ചു. 
ഡോ. പൽപു യു പി സ്കൂൾ കണിച്ചാർ, സെന്റ്  സെബാസ്റ്റ്യൻ യു പി സ്കൂൾ കാപ്പാട്, സാൻതോം ഹയർസെക്കണ്ടറി സ്കൂൾ കൊളക്കാട് എന്നീ സ്കൂളുകളിലെ എൻ എസ് എസ്, എസ് പി സി വിദ്യാർഥികളാണ് പരിശീലന പരിപാടിയിൽ പങ്കെടുത്തത്.

ഭൂമി നാഷണൽ കോൺക്ലേവ്  ഡിജിറ്റൽ സർവെ ഫോർ സ്മാർട്ട് ലാൻഡ് ഗവർണൻ സിന്റെ ഭാഗമായി സബ് കളക്ടർ ഒ വി ആൽഫ്രഡ്, അസിസ്റ്റന്റ് കളക്ടർ ശിവ ശക്തിവേൽ എന്നിവരുടെ നേതൃത്വത്തിൽ  26  സംസ്ഥാനങ്ങളിൽ നിന്നെത്തിയ ഡെലിഗേറ്റ്സുകൾ  നെയ്യാറ്റിൻകര താലൂക്കിലെ കോട്ടുകാൽ വില്ലേജിലെ ഡിജിറ്റൽ സർവ്വെ ക്യാമ്പ്  ഓഫീസ് സന്ദർശിച്ചു. ജില്ലാ കലക്ടർ അനു കുമാരി വിവിധ സംസ്ഥാനങ്ങളിൽ നിന്നെത്തിയ ഡെലിഗേറ്റ്സുകളുമായി കോവളം ഉദയ സമുദ്ര ഹോട്ടലിൽ നടത്തിയ കൂടിക്കാഴ്ചയ്ക്ക് ശേഷമാണ് ഉദ്യോഗസ്ഥ പ്രതിനിധികൾ കോട്ടുകാൽ വില്ലേജ് സന്ദർശിച്ചത്.

പൂജപ്പുര എല്‍.ബി.എസ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി ഫോര്‍ വുമണ്‍ എന്‍ജിനീയറിംഗ് കോളേജില്‍ അസിസ്റ്റന്റ് പ്രൊഫസര്‍മാരെ കരാര്‍ വ്യവസ്ഥയില്‍ നിയമിക്കുന്നതിന് ജൂണ്‍ 30ന് രാവിലെ 10 മണിക്ക് കോളേജില്‍ വാക്-ഇന്‍-ഇന്‍ര്‍വ്യൂ നടത്തുന്നു.

കമ്പ്യൂട്ടര്‍ സയന്‍സ് ആന്‍ഡ് എന്‍ജിനീയറിംഗ് വകുപ്പിലാണ് നിയമനം. യോഗ്യരായ ഉദ്യോഗാര്‍ഥികള്‍ വിദ്യാഭ്യാസ യോഗ്യതയും സംവരണ ആനുകൂല്യങ്ങളും തെളിയിക്കുന്ന സര്‍ട്ടിഫിക്കറ്റുകൾ സഹിതം കോളേജില്‍ നേരിട്ട് ഹാജരാകണം. ഫോണ്‍ : 9495230874

ചെറുകുന്ന് ഗ്രാമ പഞ്ചായത്ത് കുടുംബശ്രീ സി ഡി എസിന്റെ നേതൃത്വത്തിൽ സംഘടിപ്പിച്ച മഴപൊലിമ പുതുമയായി. യുവതലമുറക്ക് കാർഷിക സംസ്കാരം, കൃഷി രീതികൾ എന്നിവയിൽ അവബോധം സൃഷ്ടിക്കുന്നതിനായി കുന്നനങ്ങാട് റെയിൽചാൽ വയലിൽ നടന്ന പരിപാടി കല്യാശ്ശേരി ബ്ലോക്ക് പഞ്ചായത്ത് പ്രസിഡന്റ് പി പി ഷാജിർ ഉദ്ഘാടനം ചെയ്തു. സ്ഥിരം സമിതി അധ്യക്ഷൻ സി എച്ച് പ്രദീപ്കുമാർ അധ്യക്ഷനായി. കുടുംബശ്രീ ജില്ലാ മിഷൻ കോ ഓർഡിനേറ്റർ എം വി ജയൻ മുഖ്യാതിഥിയായി. കൊവ്വപുറം വായനശാലയ്ക്ക് സമീപത്തുനിന്നും  വിളംബര ഘോഷയാത്രയോടെ ആരംഭിച്ച മഴപൊലിമ കുന്നനങ്ങാട് റെയിൽ ചാൽ വയലിൽ സമാപിച്ചു. തുടർന്ന്  വിവിധ മത്സര പരിപാടികൾ നടന്നു.

പട്ടികജാതിവികസന വകുപ്പിന് കീഴിൽ തിരുവനന്തപുരം ശ്രീകാര്യം മണ്‍വിളയില്‍ പ്രവര്‍ത്തിക്കുന്ന ആറ്റിപ്ര ഗവ. ഐ.ടി.ഐയില്‍ എന്‍.സി.വി.റ്റി അംഗീകാരമുള്ള സര്‍വേയര്‍ ട്രേഡിലേക്ക് അഡ്മിഷന് അപേക്ഷ ക്ഷണിച്ചു.

പട്ടികജാതി പട്ടികവര്‍ഗക്കാര്‍ക്കു പുറമേ മറ്റു വിഭാഗക്കാര്‍ക്കും അപേക്ഷിക്കാം. താത്പര്യമുള്ളവര്‍ https://scdditiadmission.kerala.gov.in എന്ന ലിങ്ക് വഴി അപേക്ഷിക്കേണ്ടതാണ്. എസ്എസ്എല്‍സിയാണ് അടിസ്ഥാന യോഗ്യത. പ്ലസ് ടു പാസായവര്‍ക്ക് ഗ്രേസ് മാര്‍ക്ക് ലഭിക്കുന്നതിനായി മാര്‍ക്ക് ലിസ്റ്റ് അപ് ലോഡ് ചെയ്യണം.

കേരള മദ്രസ അധ്യാപക ക്ഷേമനിധി ബോര്‍ഡില്‍ നിന്നും 2024 ഡിസംബര്‍ 31 വരെ പെന്‍ഷന്‍ അനുവദിച്ച ഗുണഭോക്താക്കള്‍ ആഗസ്റ്റ് 24 വരെ അക്ഷയ കേന്ദ്രങ്ങള്‍ വഴി ബയോമെട്രിക് മസ്റ്ററിംഗ് നടത്തണം. ലൈഫ് സര്‍ട്ടിഫിക്കറ്റ് ഹാജരാക്കിയവരും മസ്റ്ററിംഗ് നടത്തണം. ഫോണ്‍: 0495 2966577, 9188230577.

കേരള വെറ്ററിനറി സര്‍വകലാശാല നടത്തിവരുന്ന എം.എസ്.സി, ബിഎസ്.സി (പി.പി.ബി.എം), ഡിപ്ലോമ, പി.ജി ഡിപ്ലോമ കോഴ്സുകളിലേക്ക് 2025-26 അധ്യയന വര്‍ഷത്തിലേക്കുള്ള പ്രവേശനത്തിന് അപേക്ഷിക്കാനുള്ള തിയതി ജൂലൈ നാല് വരെ നീട്ടി. അന്താരാഷ്ട്ര നിലവാരത്തിലുള്ള ലാബുകള്‍,  പഠനസൗകര്യങ്ങള്‍, പരിചയസമ്പന്നരായ അധ്യാപകര്‍ എന്നിവ സര്‍വകലാശാലയുടെ പ്രത്യേകതയാണ്. ഉന്നത വിദ്യാഭ്യാസത്തിനും ഗവേഷണത്തിനും ഇന്ത്യയിലും വിദേശരാജ്യങ്ങളിലും അനന്തസാധ്യതകളുള്ള  ഈ കോഴ്സുകള്‍ക്ക് നിരവധി തൊഴില്‍ മേഖലകളില്‍ അവസരങ്ങളുണ്ട്. കോഴ്‌സുകളുടെ വിശദാംശങ്ങള്‍ക്ക് www.kvasu.ac.in എന്ന വെബ്‌സൈറ്റ് സന്ദര്‍ശിക്കുക.

മുല്ലശ്ശേരി ഗ്രാമപഞ്ചായത്തും മുല്ലശ്ശേരി, അന്നകര സര്‍വീസ് സഹകരണ സംഘങ്ങളും കൃഷിഭവനും സംയുക്തമായി സംഘടിപ്പിക്കുന്ന ഞാറ്റുവേല ചന്തയ്ക്ക് തുടക്കമായി. മുരളി പെരുനെല്ലി എം.എല്‍.എ ഞാറ്റുവേല ചന്തയുടെ ഉദ്ഘാടനം നിര്‍വഹിച്ചു. ഗ്രാമപഞ്ചായത്ത് പ്രസിഡന്റ് ദില്‍ന ധനേഷ് അധ്യക്ഷത വഹിച്ചു. ജൂണ്‍ 30 വരെ നാല് ദിവസങ്ങളിലായാണ് ചന്ത സംഘടിപ്പിക്കുന്നത്.  

നടാല്‍, കിഴുന്ന പ്രദേശങ്ങളെ ബന്ധിപ്പിച്ച് നിര്‍മ്മിക്കുന്ന നാറാണത്ത് പാലം ജൂലൈ ഒന്നിന് വൈകിട്ട് 5.30 ന്  പൊതുമരാമത്ത്,വിനോദസഞ്ചാര വകുപ്പ് മന്ത്രി പി.എ മുഹമ്മദ് റിയാസ്  നാടിന് സമര്‍പ്പിക്കും. നാറാണത്ത് പാലം പരിസരത്ത് നടക്കുന്ന ചടങ്ങിൽ  രജിസ്‌ട്രേഷന്‍,മ്യൂസിയം,പുരാരേഖാ വകുപ്പ് മന്ത്രി രാമചന്ദ്രന്‍ കടന്നപ്പള്ളി അധ്യക്ഷനാകും. എം.പിമാരായ ഡോ. വി ശിവദാസന്‍, കെ സുധാകരന്‍, പി സന്തോഷ് കുമാര്‍, കണ്ണൂർ മേയര്‍ മുസ്ലിഹ് മഠത്തില്‍ എന്നിവര്‍ വിശിഷ്ടാതിഥികളാകും.

കാര്‍ഷിക സമൃദ്ധിയിലേക്ക് നാടിനൊപ്പം എന്ന സന്ദേശവുമായി ഇരിങ്ങാലക്കുട മുന്‍സിപ്പല്‍ മൈതാനിയില്‍ സംഘടിപ്പിക്കുന്ന ഞാറ്റുവേല മഹോത്സവം -2025 ന്റെ കാര്‍ഷിക സംഗമത്തിന്റെ ഉദ്ഘാടനം പത്മശ്രീ പെരുവനം കുട്ടന്‍മാരാര്‍ നിര്‍വഹിച്ചു. ഇരിങ്ങാലക്കുട നഗരസഭാ ചെയര്‍പേഴ്‌സണ്‍ മേരികുട്ടി ജോയ് അധ്യക്ഷത വഹിച്ചു. ചടങ്ങില്‍ കര്‍ഷകരെ ആദരിച്ചു. ഉദ്ഘാടന സമ്മേളനത്തിന് മുന്നോടിയായി ഞാറ്റുവേല മഹോത്സവത്തിന്റെ തീം സോങ്ങിന്റെ ദൃശ്യാവിഷ്‌ക്കാരം ഡോ. ചാന്ദ്‌നി സലീഷിന്റെ നേതൃത്വത്തില്‍ ഇരിങ്ങാലക്കുട ശ്രീ മൂകാംബിക നാട്യകലാക്ഷേത്രത്തിലെ കലാകാരികള്‍ അവതരിപ്പിച്ചു.