കൊയിലാണ്ടി നഗരസഭ കുടുംബശ്രീ സൗത്ത് സിഡിഎസ് ചലനം മെന്റർഷിപ്പിന്റെ ഭാഗമായി യുവമിത്ര കെ കൊയിലാണ്ടി ഓക്സിലറി ഗ്രൂപ്പ്‌ ലീഡർമാർക്ക് പരിശീലനം സംഘടിപ്പിച്ചു. നഗരസഭ ചെയർപേഴ്സൺ സുധ കിഴക്കേപാട്ട് ഉദ്ഘാടനം നിർവഹിച്ചു. സ്റ്റാൻഡിങ് കമ്മിറ്റി ചെയർമാൻ കെ ഷിജു അധ്യക്ഷത വഹിച്ചു. കുടുംബശ്രീ ജില്ല മിഷൻ പ്രോഗ്രാം മാനേജർ ടി ടി ബിജേഷ്, മെന്റർ ഷീല വേണുഗോപാൽ എന്നിവർ വിഷയാവതരണം നടത്തി. സിഡിഎസ് ചെയർപേഴ്സൺ കെ കെ വിബിന, ഓക്സിലറി ആർ പി ആയില്യ കൃഷ്ണ, സിഡിഎസ് ഉപസമിതി കൺവീനർമാരായ ഷീജ, നസ്നി, ശാലിനി, ഷൈനി, അക്കൗണ്ടന്റ് അനുശ്രീ എന്നിവർ സംസാരിച്ചു.

കണ്ണൂര്‍ ഗവ. പോളിടെക്‌നിക്ക് കോളേജില്‍ മെക്കാനിക്കല്‍ എഞ്ചിനീയറിങ് ലക്ചറര്‍ തസ്തികയിലേക്ക് അപേക്ഷ ക്ഷണിച്ചു. ഫസ്റ്റ് ക്ലാസ്സോടുകൂടി ബി.ടെക് /എം.ടെക് പാസ്സായ ഉദ്യോഗാര്‍ഥികള്‍ രേഖകള്‍ സഹിതം ജൂലൈ ഒന്നിന് രാവിലെ 10 ന് പ്രിന്‍സിപ്പല്‍ മുമ്പാകെ നടത്തുന്ന കൂടിക്കാഴ്ചയ്ക്കും എഴുത്തു പരീക്ഷക്കും എത്തണം. ഫോണ്‍: 0497 2835106

ലഹരി വിമുക്ത ചികിത്സക്കായി ജില്ലാ ആയുര്‍വേദ ആശുപത്രിയില്‍ പ്രവര്‍ത്തിക്കുന്ന പ്രത്യേക ഒ.പി വഴി മദ്യപാനം, മറ്റു ലഹരിവസ്തുക്കള്‍ എന്നിവയുടെ ഉപയോഗം മൂലം ശാരീരിക, മാനസിക ആരോഗ്യ പ്രശ്‌നങ്ങള്‍ അനുഭവിക്കുന്നവര്‍ക്കും, ഡീ-അഡിക്ഷന്‍ ചികിത്സയ്ക്ക് ശേഷം തുടര്‍ ചികിത്സ ആവശ്യമുളളവര്‍ക്കും കണ്‍സല്‍ട്ടേഷന്‍, കൗണ്‍സിലിങ്ങ്, മരുന്നുകള്‍ എന്നിവ സൗജന്യമായി നല്‍കുന്നു. തിങ്കള്‍ മുതല്‍ ശനി വരെ രാവിലെ ഒന്‍പത് മുതല്‍ ഉച്ചയ്ക്ക് രണ്ട് മണി വരെയാണ് ഒ.പി സമയം. മറ്റു ദിവസങ്ങളില്‍ ഇതര മാനസിക രോഗങ്ങള്‍ക്കായുളള ഒ.പിയും പ്രവര്‍ത്തിക്കുന്നുണ്ട്. മുന്‍കൂട്ടി ബുക്ക് ചെയ്യാന്‍ 0497 2706666 എന്ന നമ്പറില്‍ ബന്ധപ്പെടാം.

ചേളന്നൂർ ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തി നവീകരിച്ച പാവട്ടിക്കുന്ന് കോളനി -അരിക്കൽ മീത്തൽ ഗാന്ധി റോഡ് ബ്ലോക്ക് പ്രസിഡന്റ് കെ പി സുനിൽകുമാർ ഉദ്ഘാടനം ചെയ്തു.
സ്റ്റാൻഡിങ് കമ്മിറ്റി ചെയർമാൻ സർജാസ് കുനിയിൽ അധ്യക്ഷത വഹിച്ചു. നരിക്കുനി ഗ്രാമപഞ്ചായത്ത് പ്രസിഡന്റ് ടി കെ സുനിൽകുമാർ മുഖ്യാതിഥിയായി. ബ്ലോക്ക് വൈസ് പ്രസിഡന്റ് ഷിഹാന രാരപ്പൻകണ്ടി, വാർഡ് മെമ്പർ സി കെ സലിം, ഗ്രാമപഞ്ചായത്ത് മുൻ അംഗങ്ങളായ കുനിയിൽ അഹമ്മദ് മാസ്റ്റർ, പി എം വസന്ത, രാഷ്ട്രീയ പാർട്ടി പ്രതിനിധികൾ എന്നിവർ സംസാരിച്ചു.

മന്ത്രിസഭാ വാര്‍ഷികാഘോഷങ്ങളുടെ ഭാഗമായി മുഖ്യമന്ത്രി പിണറായി വിജയന്റെ അധ്യക്ഷതയില്‍ നാല് ജില്ലകളുടെ മേഖലാതല അവലോകന യോഗം ജൂലൈ ഒന്ന് ചൊവ്വാഴ്ച രാവിലെ പത്ത് മണി മുതല്‍ കണ്ണൂര്‍ കൃഷ്ണമേനോന്‍ മെമ്മോറിയല്‍ ഗവ വനിതാ കോളേജ് ഓഡിറ്റോറിയത്തില്‍ നടക്കും. കോഴിക്കോട്, കണ്ണൂര്‍, വയനാട്, കാസര്‍കോട് ജില്ലകളിലെ വിവിധ വികസന പദ്ധതികള്‍ യോഗത്തില്‍ അവലോകനം ചെയ്യും. മന്ത്രിമാര്‍, ചീഫ് സെക്രട്ടറി, ഡിജിപി, നാലു ജില്ലകളിലെ ജില്ലാ കലക്ടര്‍മാര്‍, മറ്റ് ഉന്നത ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുക്കും.

വടകര നഗരസഭക്ക് പുതുതായി നിർമിച്ച ഓഫീസ് കം ഷോപ്പിങ് കോംപ്ലക്സിന്റെ ‌ ഉദ്ഘാടനം ഇന്ന് (തിങ്കൾ) വൈകിട്ട് നാലിന് മുഖ്യമന്ത്രി പിണറായി 
വിജയൻ നിർവഹിക്കും. മന്ത്രിമാരായ പി എ മുഹമ്മദ് റിയാസ്, എ കെ ശശീന്ദ്രൻ, എംഎൽഎമാരായ കെ കെ രമ,
 ഇ കെ വിജയൻ, കെ പി കുഞ്ഞമ്മദ് കുട്ടി മാസ്റ്റർ,  ഷാഫി പറമ്പിൽ എം പി, ചെയർപേഴ്സൺ കെ പി ബിന്ദു എന്നിവർ പങ്കെടുക്കും.