അന്താരാഷ്ട്ര ലഹരിവിരുദ്ധ ദിനാചരണത്തിന്റെ ജില്ലാതല ഉദ്ഘാടനം പത്തനംതിട്ട കതോലിക്കേറ്റ് ഹയര്‍സെക്കന്‍ഡറി സ്‌കൂളില്‍ ജില്ലാ മെഡിക്കല്‍ ഓഫീസര്‍ ( ആരോഗ്യം) ഡോ എല്‍. അനിതകുമാരി നിര്‍വഹിച്ചു. കൗമാര സൗഹൃദ ആരോഗ്യ പരിപാടിയുടെ ഭാഗമായി പിയര്‍ എഡ്യൂക്കേറ്റര്‍മാര്‍ നേതൃത്വം നല്‍കുന്ന 'കര്‍മ' ലഹരി വിരുദ്ധ കാമ്പയിന്റെ പോസ്റ്റര്‍ പ്രകാശനവും ജില്ലാ മെഡിക്കല്‍ ഓഫീസര്‍ നിര്‍വഹിച്ചു.
ജില്ലയില്‍ പരിശീലനം ലഭിച്ച 1193 പിയര്‍ എഡ്യൂക്കേറ്റര്‍മാരുടെ നേതൃത്വത്തില്‍ സ്‌കൂള്‍ വിദ്യാര്‍ഥികളില്‍ ലഹരിക്കെതിരെ അവബോധം സൃഷ്ടിക്കുന്നതോടൊപ്പം ഡിജിറ്റല്‍ പ്ലാറ്റ്ഫോമുകളുടെ ദുരുപയോഗം തടയുകയാണ് കാമ്പയിന്റെ ലക്ഷ്യം.

സമൂഹത്തില്‍ ലഹരി വ്യാപനം വര്‍ധിക്കുകയാണെന്നും എക്‌സൈസും പോലീസും പൊതുസമൂഹവും ജാഗ്രതയോടെ ഒന്നിക്കണമെന്നും ജില്ലാ പഞ്ചായത്ത് പ്രസിഡന്റ് ജോര്‍ജ് എബ്രഹാം.
എക്‌സൈസ് വിമുക്തി മിഷനും കാതോലിക്കേറ്റ് കോളജില്‍ സംഘടിപ്പിച്ച ലഹരി വിരുദ്ധ ജില്ലാതല ഉദ്ഘാടനം നിര്‍വഹിക്കുകയായിരുന്നു അദ്ദേഹം. കോളജ് പ്രിന്‍സിപ്പല്‍ ഡോ. സിന്ധു ജോണ്‍സ് അധ്യക്ഷയായി. അഡീഷണല്‍ സൂപ്രണ്ട് ഓഫ് പോലീസ് പി വി ബേബി ലഹരി വിരുദ്ധ പ്രതിജ്ഞ ചൊല്ലി.

ഏപ്രിലില്‍ നടന്ന ഡിപ്ലോമ പരീക്ഷാ ഫലം പ്രസിദ്ധീകരിച്ചപ്പോള്‍ പൈനാവ് ഐ.എച്ച്.ആര്‍.ഡി മോഡല്‍ പോളിടെക്‌നിക് കോളേജ് 83.64 ശതമാനത്തോടെ മികച്ച വിജയം കരസ്ഥമാക്കി. ഇടുക്കി ജില്ലയിലെ പോളിടെക്‌നിക് കോളേജുകളില്‍ ഒന്നാം സ്ഥാനവും, ഐ.എച്ച്.ആര്‍.ഡിയുടെ കീഴിലുള്ള പോളിടെക്‌നിക്കുകളില്‍ രണ്ടാം സ്ഥാനവും നേടാന്‍ പൈനാവ് മോഡല്‍ പോളിടെക്‌നിക് കോളേജിന് സാധിച്ചു. സംസ്ഥാനതലത്തില്‍ ഇരുപത്തിയൊന്നാം സ്ഥാനവും കോളേജ് കരസ്ഥമാക്കി. വിദ്യാര്‍ഥികളുടെയും അധ്യാപകരുടെയും ഭാഗത്തുനിന്നുണ്ടായ ആത്മാര്‍ത്ഥമായ ശ്രമവും, അതോടൊപ്പം രക്ഷിതാക്കളുടെ പിന്തുണയുമാണ്  മികച്ച വിജയത്തിലേയ്ക്ക് കോളേജിനെ നയിച്ചതെന്ന് പ്രിന്‍സിപ്പല്‍ അറിയിച്ചു.

നഷാ മുക്ത് ഭാരത് അഭിയാന്റെ ഭാഗമായി ജില്ലാ സാമൂഹ്യ നീതി വകുപ്പ് അന്തര്‍ദേശീയ ലഹരി വിരുദ്ധദിനാചാരണവും ലഹരി വിരുദ്ധ റാലിയുംസംഘടിപ്പിച്ചു.  ഉദ്ഘാടനം പത്തനംതിട്ട സെന്റ് പീറ്റേഴ്സ് ചര്‍ച്ച് ഹാളില്‍ അസിസ്റ്റന്റ് എക്സൈസ് കമ്മീഷണര്‍ എസ്. സനില്‍ നിര്‍വഹിച്ചു. യുവതലമുറ ലഹരിക്ക്  അടിമപ്പെടാതിരിക്കാന്‍ വിമുക്തി മിഷന്‍ വിവിധ വകുപ്പുകളുമായി ചേര്‍ന്ന് നിരവധി പ്രവര്‍ത്തനങ്ങളാണ് നടത്തുന്നതെന്ന് അദ്ദേഹം പറഞ്ഞു.

വ്യാവസായിക പരിശീലന വകുപ്പിന് കീഴിലുള്ള കരുണാപുരം സര്‍ക്കാര്‍ ഐ.ടി. ഐയില്‍ ഡ്രാഫ്റ്റ്‌സ്മാന്‍ സിവില്‍, കമ്പ്യൂട്ടര്‍ ഓപ്പറേറ്റര്‍ ആന്റ് പ്രോഗ്രാമിംഗ് അസിസ്റ്റന്റ് എന്നീ ട്രേഡുകളില്‍ (എസ്.സി.വി.ടി) പ്രവേശനത്തിന്  അപേക്ഷ ക്ഷണിച്ചു. മേല്‍പ്പറഞ്ഞ രണ്ടു ട്രേഡുകളിലും  30 ശതമാനം സീറ്റുകള്‍ പെണ്‍കുട്ടികള്‍ക്കായി സംവരണം ചെയ്തിട്ടുണ്ട്.

ഉന്നത വിദ്യാഭ്യാസ വകുപ്പിന് കീഴില്‍ പത്തനംതിട്ട ജില്ലയിലെ തിരുവല്ല കുന്നന്താനത്ത് പ്രവര്‍ത്തിക്കുന്ന അസാപ്പ് കമ്യൂണിറ്റി സ്‌കില്‍ പാര്‍ക്കില്‍ ഇലക്ട്രിക്ക് വെഹിക്കിള്‍ സര്‍വീസ് ടെക്നീഷ്യന്‍ കോഴ്‌സിലെ ഒഴിവുള്ള സീറ്റുകളില്‍  സ്‌പോട്ട് അഡ്മിഷന് അപേക്ഷ ക്ഷണിച്ചു. ക്ലാസുകള്‍ ജൂണ്‍ 26ന് ആരംഭിക്കും. പ്ലസടു, ഐ.ടി.ഐ അല്ലെങ്കില്‍ ഡിപ്ലോമ ആണ് യോഗ്യത. ആറ് മാസം ദൈര്‍ഘ്യമുള്ള കോഴ്‌സ് വിജയകരമായി പൂര്‍ത്തിയാക്കുന്നവര്‍ക്ക് 100 ശതമാനം പ്ലേസ്‌മെന്റ് അസിസ്റ്റന്‍സ് ലഭിക്കും. കൂടുതല്‍ വിവരങ്ങള്‍ക്ക്  ഫോണ്‍: 9495999688, 9496085912, 9497289688.

ജില്ലയിലെ മുനിസിപ്പല്‍ ഏരിയയില്‍ ആരോഗ്യവകുപ്പിന് കീഴിലുള്ള വെക്ടര്‍ കണ്‍ട്രോള്‍ യൂണിറ്റിന്റെ നേത്യത്വത്തില്‍ കൊതുകുജന്യ രോഗ നിയന്ത്രണ പ്രവര്‍ത്തനങ്ങള്‍ക്കായി കണ്ടിജന്റ് ജീവനക്കാരെ നിയമിക്കുന്നതിനായി ഇന്റര്‍വ്യൂ നടത്തും. 675 രൂപ ദിവസവേതന അടിസ്ഥാനത്തില്‍ 30 ദിവസത്തേക്കാണ് നിയമനം. യോഗ്യത എസ്.എസ്.എല്‍.സി. പ്രായപരിധി 18-45.  കുയിലിമലയിലുള്ള ഇടുക്കി കളക്ടറേറ്റില്‍ പ്രവര്‍ത്തിക്കുന്ന ജില്ലാ മെഡിക്കല്‍ ആഫീസില്‍ (ആരോഗ്യം) ജൂലൈ 3 ന് രാവിലെ 10 മണിക്കാണ്  ഇന്റര്‍വ്യൂ. ഉദ്യോഗാര്‍ഥികള്‍ക്ക് ഈ തൊഴില്‍ ചെയ്യുന്നതിനുള്ള കായികക്ഷമത ഉണ്ടായിരിക്കണം.  മുന്‍പരിചയമുളളവര്‍ക്ക് മുന്‍ഗണന ഉണ്ടായിരിക്കും.

ഉന്നതവിദ്യാഭ്യാസ വകുപ്പിന് കീഴില്‍ പ്രവര്‍ത്തിക്കുന്ന പത്തനംതിട്ട അസാപ്പ് കമ്യൂണിറ്റി സ്‌കില്‍ പാര്‍ക്കില്‍ ജൂണ്‍ 28ന് തൊഴില്‍മേള നടത്തും. വിവിധ സ്ഥാപനങ്ങളില്‍ നിന്ന്  നൂറിലധികം തൊഴിലവസരങ്ങള്‍ റിപ്പോര്‍ട്ട് ചെയ്തിട്ടുണ്ട്. രജിസ്ട്രേഷനും കൂടുതല്‍ വിവരങ്ങള്‍ക്കും ഫോണ്‍: 9495999688, 9496085912, വാട്‌സാപ്പ് നമ്പര്‍: 9497289688.